trufm Current Affairs

I-Democratic Alliance ikwiphulo layo lokugqibela lokuqinisekisa ukuba itsala umdla wabavoti bomasipala ombhaxa iNelson Mandela Bay, ze iqhube nesininzi sayo kumasipala iKouga, nanjengoko uMzantsi Afrika usiya kunyulo loorhulumente basekhaya ngomhla wesine kwinyanga ezayo. E-Nelson Mandela Bay, ukhuphiswano lumandla nangakumbi. Kunyulo loorhulumente basekhaya ngo-2021, imibutho yezopolitiko iDA ne-ANC, yaba ntanganye ngezihlalo ezingamashumi amane anesibhozo umbutho ngamnye kwibhunga lalo masipala umbhaxa, nto leyo eyakhokelela kurhulumente wenkazathi, notshintsho oluthe gqolo lobunkokheli kwezopolitiko. Ukanti eKouga, i-DA ikhusela ubukhulu benkxaso yayo eyabufumana ngo-2021. U-Anda Nqonji usiqulunqele le ngxelo ilandelayo

Inkonzo yesipolisa kweli nesixeko saseKapa bachazele oonondaba ngamanyathelo okuhlangabezana nodushe oluthe gqolo lusehla kushishino lwee-taxi, kwiphondo iNtshona Koloni. Oku kulandela uthotho lweziganeko zodubulo phakathi kwemihlambi eyalanayo yemibutho yoo-notaxi sukela ngomhla weshumi elinesithandathu kule nyanga, nto leyo ekhokelele ekubulaweni kwabantu nakwizenzo zokuzama ukubulala. Amapolisa athi omeleza indlela asebenza ngayo kwimimandla echaphazelekayo, ngeli xesha iingxoxo zokuza nesisombululo kule mbhambhano zisaqhuba. UYonda Magubudela usiqulunqele le ngxelo...

Le nyanga yinyanga ekuqatshelwa ngayo ukhuseleko kwi-intanethi, iCyber Security Month ngolwasemzini. Namhlanje siza kuqwalasela indlela esinokuthintela ngayo ukunwenwa kweendaba ezingeyonyaniso kwi-intanethi. Ukuxoxa banzi ngalo mba, u-Amanda Xhala uncokole nomanejala ophezulu ojongene nezobuchwepheshe kwi-Information Regulator, uLangithemba Mazibu...

Kuthunyelwe amajoni angaphezulu kwamakhulu amahlanu kwiphondo iKwaZulu-Natal kwiinzame zokugcina ucwangco. Umongameli uCyril Ramaphosa uxelele usomlomo wasePalamente uThoko Didiza kwakunye nosihlalo webhunga lamaphondo uRefilwe Mtsweni-Tsipane, ngesigqibo sakhe sokuthumela lamajoni ayokuncedisana namapolisa elaphondo. Lamajoni azakuhlala kude kube sekupheleni kwenyanga yeNkanga. Kuqikelelwa ukuba kuzakuchithwa imali engaphezulu kwezigidi ezingamashumi amathathu anesine zeerandi, ukugcina lamajoni kweliphondo. U-Amanda Xhala uncokole nengcali kwimiba yorhulumento nolawulo kwinkonzo yesipolisa, uGqirha Mfuneko Sihlobo... 

TOPIC: Discussing governance issues in the EC municipalities highlighted during the election debates

GUEST: Precious Lugayeni ( Governance expert)

Njengoko kushiyeke iintsuku ezingaphantsi kweshumi ngaphambi konyulo loomasipala basekhaya, ikomishoni yonyulo i-IEC ithi ikwinqanaba lokugqibela kumalungiselelo okuqinisekisa ukuba abavoti bakulungelele ukuvota , nokuba inkqubo yokuvota iza kuhamba ngendlela. Emnxebeni sinaye usekela-manejala wale kwiphondo iMpuma Koloni, uMasindi Mosehana...

Umphathiswa wezothutho, uBarbara Creecy, uvule ngokusesikweni izikhululo zoololiwe ezisixhenxe ezilungiswe ngokutsha kwisixeko saKuGompo. Izikhululo zikaloliwe, esaseMtsotso, eFort Jackson, ePenmure, eMdantsane, eArnoldton, eMount Ruth naseWilsonia bezonakalisiwe, kwaye i-arhente yothutho ngoololiwe kweli, iPRASA, iye yazilungisa ezi zikhuluko. Umphathiswa uthi bamisele iintshukumo ezizizo zokuthintela ukuba zingaze ziphinde zonakaliswe ezi zikhululo. UNtombozuko Balintulo ebelapho, waza wasiqulunqela le ngxelo... 

Analysing the revised White Paper on Local Government 2026 

Izolo sincokole nomphathiswa wesebe lorhulumento ngobambiswano malunga noxwebhu oluphononongiweyo olubizwa iWhite Paper, oluzakubona kusenziwa utshintsho olukhulu koomasipala beli. Umphathiswa uVelenkosini Hlabisa uthe oku kukucwangcisa kwakhona (reset) oomasipala beli kuba kubonakala ukusilela kwe White Paper eyaqulunqwa ngo1998. Uthi baphelisa into abayibiza ngokuba yi "one-size fit all approach", ukuze oomasipala baxhaswe ngokwezidingo zabo endaweni yendlela enye yokubaxhasa ngemali neyolawulo. Ukuhlalutya banzi olu xwebhu, ingakumbi kumba wenkwinkxaso-mali kamasipala nohanjiso lweenkonzo, u-Amanda Xhala uncokole nengcali kwimiba yorhulumento, uSandile Swana...

Icandelo elijongene namalungelo abantu ababandazeleke ngokwamalungu omzimba eMpuma Koloni, libambisene norhulumente wephondo liza kusungula inyanga yamalungelo abantu ababandazeleke ngokwamalungu omzimba ngomso, kwikhaya labantu abadala iEthembeni eMdanstane. Oyingqonyela ye Disability Economic Empowerment Trust, uThabiso Phetuka usichazela banzi ngoku

Ikomiti yesigqeba solawulo ye NUMSA iwohluthile amagunya kunobhala jikelele walombutho u Irvin Jim, umongameli u Andrew Chirwa, kunye anamanye amalungu olawulo kulemanyano yesinyithi. Lekomiti ityhola ezinkokheli ngokutyeshela imisebenzi yazo nokungazichopheli nokurhoxisa iintlanganiso zalemanyano. Sithe ke kwinkqubo yethu masimeme oyingcali yezemicimbi yabasebenzi ukusihlalutyela banzi ngoku u Mojalefa Musi....