Maryda geçen hepdäniň ahyrynda birnäçe günläp ýagan ýagşyň we garyň yz ýany, köçelerde giň gerimli arassaçylyk işleri geçirildi. Jemagat hojalygy müdirliginiň işgärleriniň ençemesi özleriniň dynç günlerinde hem işlemäge mejbur edilýändigini, emma munuň üçin goşmaça hak tölenmeýändigini aýdýar.

Lebap welaýatynda, aýratyn-da, Türkmenabat şäherinde ilatyň Internet üpjünçiligi ýaramazlaşyp, onuň tizligi ep-esli peseldi. Häkimiýetler bu barada aç-açan resmi düşündiriş bermeýärler. Bu ýagdaýlar barada Azatlyk Radiosynyň habarçysy 19-njy ýanwarda sebitden maglumat berdi.

Aşgabadyň aeroportunda harby gullugyny ýakynda tamamlan ýaşlaryň daşary ýurtlara uçýan uçarlara goýberilmezligi bilen bagly wakalaryň birnäçesi boldy. Uçara goýberilmedik ýaşlaryň we ýagdaýlardan habarly çeşmelerimiziň ençemesi bu wakalarda 20-ä golaý raýatyň ýurtdan çykarylmandygyny aýtdy.