Şu hepdäniň başynda Aşgabatda howanyň sowap, garyň ýagmagy bilen, köçeleri gar basdy. Birnäçe gün bäri arassalanmaýan gar-ýagyn üýşmekleri köçeleriň sürçek bolmagyna, ulag hadysalarynyň bolmagyna getirdi. Bu barada Azatlyk Radiosynyň habarçysy 23-nji ýanwarda paýtagtdan maglumat berdi.

Aşgabadyň käbir söwda merkezlerinde türkmenistanlylara elýeterli bahadan WiFi Internet hyzmatlary birdenkä hödürlenip başlandy. Köpleri geň galdyrýan bu waka, goňşy Eýrandaky protestleriň fonunda, ýurduň käbir sebitlerinde Internet üpjünçiliginiň çäklendirilen mahalyna gabat geldi.

Ahal welaýatynda şu günler gonamçylyklara gözegçilik güýçlendirilip, olaryň her birinde azyndan iki polisiýa işgäri nobatçylyk çekýär. Bu aralykda, ilat arasynda tanalýan molladyr işanlar, palçylar we tebipler Milli howpsuzlyk ministrliginiň ýerli edaralary tarapyndan soraga çekilýär.