18. august 1941 rendi eitt týskt Junkers 88 bumbuflogfar á Lokkan omanfyri Norðdepil. Manningin, 4 ungir týskarar, lótu lív og sjálvt flogfarið fór í sor. Øll hesi mongu árini fram til 8. mai 1996, hevur ein hálvt tons bumba ligið ósprongd í ovasta dalinum undir Lokkanum. Serfrøðingar frá donsku verjuni staðfestu, at bumban var frá týska flogfarinum og sera vandamikil har hon lá. Avgjørt var at fáa bumbuna burtur og spreingja hana í sjónum í Viðvík á Viðoynni. Alt gekk ikki sum ætlað, men bumban var tó eftir tógvi stríð fyribeind.