Af hverju þurfum við að sofa? Af hverju dreymir okkur? Hvers vegna hrjótum við? Sérfræðingur þáttarins, Erla Björnsdóttir, sálfræðingur, segir okkur allt um svefn og líka hvers vegna snjallsímar og spjaldtölvur hafa slæm áhrif á svefninn.

Umsjón: Sævar Helgi Bragason.

Í þættinum í dag fjöllum við um brúðuleikhús, sem er þrjú þúsund ára gamalt leikhúsform! Við rifjum upp kynni við brúðurnar úr Stundinni okkar og heyrum svo frá nýjum og gömlum íslenskum brúðuleikhússýningum.

Hvernig býr maður til brúður? Getum við búið til brúðuleikhússýningu á 7 mínútum?

KrakkaRÚV kíkti á brúðuleikhússýninguna „Á eigin fótum“ í Tjarnarbíó. Sagan fjallar um Ninnu, 6 ára stelpu, sem er send í sveit hjá fólki sem hún þekkir ekki neitt. Þar kynnist hún ýmsum karakterum og lærir að standa á eigin fótum.

Viðmælendur:

Agnes Wild, leikstjóri og handritshöfundur

Sigrún Harðardóttir, tónlistarkona og tónskáld

Eva Björg Harðardóttir, leikmynda-, búninga- og brúðuhönnuður.

Umsjón: Ingibjörg Fríða Helgadóttir

Hvernig opnar Hafnfirðingur dós af baunum? Hvers vegna brenndi drekinn sig á höndunum? Hvað er á milli fjalls og fjöru?

Þátturinn í dag fjallar um brandara, gátur og hlátur. Við fáum til okkar brandarasérfræðing frá Selfossi sem á stóran banka af bröndurum og gátum, heyrum fróðleik um hlátur og hlátursköst og heyrum skemmtilega tónlist. Í þættinum verða lagðar fyrir fjórar gátur, en engin svör. Veist þú svörin?

Brandarasérfræðingur þáttarins: Grímur Chunkuo Ólafsson.

Umsjón: Ingibjörg Fríða Helgadóttir

Í þættinum í dag fjöllum við um mat og matargerð. Við þurfum öll á mat að halda til þess að eiga næga orku yfir daginn.

Sigríður Dúa, 9 ára, kemur í heimsókn í þáttinn og svarar spurningum um mat, en hún er mikil áhugamanneskja um mat og matargerð. Sigríður Dúa hefur gert allskonar tilraunir í eldhúsinu, ógeðisdrykki og því um líkt. Hún deilir líka með okkur uppskrift af mjög forvitnilegum rétti!

Vissir þú að ef þú átt erfitt með að muna uppskriftir getur hjálpað að semja lag og texta með uppskriftinni í. Við heyrum dæmi um svoleiðis lög.

Við heyrum líka söguna af Gýpu, sem var alltaf svöng og ljóð um mann sem borðar......bækur!?

Hvað er uppáhaldsmaturinn þinn?

Viðmælandi: Sigríður Dúa Brynjarsdóttir

Umsjón: Ingibjörg Fríða Helgadóttir

Af hverju koma jarðskjálftar? Gera jarðskjálftar boð á undan sér? Hverjir eru stærstu jarðskjálftar sem orðið hafa á jörðinni? Sérfræðingur þáttarins, Sigríður Kristjánsdóttir, jarðskjálftafræðingur, svarar þessum spurningum og mörgum öðrum og leyfir okkur að heyra hvernig jarðskjálftar hljóma.

Umsjónarmaður: Sævar Helgi Bragason

Í þættinum í dag spyrjum við okkur mjög stórra spurninga. Hvað er menning? Hvað eru listir? Eru menning og listir ekki það sama? Menning er mjög stórt orð sem nær yfir næstum því allt sem manneskjan gerir. Listir tilheyra því menningunni og eru eitthvað alveg sérstakt, eitthvað sem við búum til með því að virkja ímyndunaraflið þegar við viljum tjá tilfinningar eða segja sögur. Menningararfur er annað stórt orð, hvað er það? Hvernig var menningin í gamla daga á Íslandi?

Sérfræðingur þáttarins er Guðrún Línberg Guðjónsdóttir, málfarsráðgjafi hjá RÚV.

Umsjón: Ingibjörg Fríða Helgadóttir

Í þættinum er fjallað um klappið og hvernig hægt er að nota það við ýmsar aðstæður. Hvers vegna klöppum við? Við getum notað klappið til að senda margvísleg skilaboð, eins og aðdáun eða þakklæti, til að hvetja aðra til dáða, til að byggja upp takt til að dansa við eða bara til að leika okkur.

Sérfræðingur þáttarins er Árni Heimir Ingólfsson, tónlistarfræðingur og listrænn ráðgjafi hjá Sinfóníuhljómsveit Íslands. Afhverju má ekki alltaf klappa á klassískum tónleikum?

Annað efni: Brot úr þættinum „Allir í leik“ (2004. Þáttur 8). sem Una Margrét Jónsdóttir gerði.

Umsjón: Ingibjörg Fríða Helgadóttir.