ཁ་སང་ཕྱི་དྲོ་འདི་ག་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་དགོན་པའི་མདུན་ཐང་དུ་མདོ་ཁམས་ཆུ་བཞི་སྒང་དྲུག་དབུས་ས་གཉིས་ཀྱི་གོ་སྒྲིག་འོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་བསྟན་སྲིད་མི་རིགས་ཀྱི་ཆེད་རང་སྲོག་མཆོད་འབུལ་གནང་མཁན་དཔའ་བོ་བློ་དགའ་རང་བཙན་ལགས་ཀྱི་བདུན་ཚིགས་ལྔ་པ་དང་བསྟུན།  མཆོད་འབུལ་སྨོན་ལམ་དང་མར་མེའི་ཁྲོམ་སྐོར་བཅས་ཀྱི་ལས་འགུལ་ཞིག་སྤེལ་ཡོད་པ་དང་།   ལས་འགུལ་དེའི་སྐབས་མདོ་སྨད་ཆུ་བཞི་སྒང་དྲུག་གི་དབུས་རྒྱུན་སྤྱི་ཟུར་དགེ་བཤེས་སྨོན་ལམ་མཐར་ཕྱིན་ལགས་ནས།  དཔའ་བོ་བློ་དགའ་རང་བཙན་ལགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་གཞན་ལ་འཚེ་བ་སྤུ་ཙམ་མེད་པར་འཆར་གཞི་དང་ནུས་པ་སྙིང་སྟོབས་བཅས་ལྡན་པའི་ཐོག་ནས་བོད་བསྟན་སྲིད་མི་རིགས་ཀྱི་ཆེད་དུ་རང་སྲོག་བློས་གཏོང་བྱས་པ་དེར་ངེས་པར་རྗེས་དྲན་ཞུ་དགོས་པ་དང་། ལྷག་པར་ལྡི་ལི་བོད་སྒར་བསམ་ཡས་གླིང་གི་མི་མང་ཚོས་ཨ་རི་དང་ཡོ་རོབ་སོགས་ཀྱི་ས་གནས་གཞན་ཁག་གི་བོད་མིའི་ལས་འགུལ་ཁག་ལ་དཔེ་བླངས་ཏེ་ཚོར་བ་ཡོད་ཙམ་བྱས་ཏེ་ལས་འགུལ་སྤེལ་དགོས་པ་སོགས་ཀྱི་གསུང་བཤད་གནང་སོང་།   མདོ་ཁམས་ཆུ་གཞི་སྒང་དྲུག་དབུས་ས་གཉིས་ཀྱི་སྤེལ་བའི་ཁ་སང་ཕྱི་དྲོའི་ལས་འགུལ་དེའི་སྐབས།  བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་ཟུར་པ་རྒྱ་རི་སྒྲོལ་མ་མཆོག་གི་དབུས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་དང་།  བོད་སྒར་བསམ་ཡས་གླིང་གི་ས་གནས་ འགོ་འཛིན་གྱི་གཙོས་པའི་རྒྱ་འཐུས་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་མི་མང་བརྒྱ་སྐོར་ཞིག་ནས་མཉམ་ཞུགས་གནང་ཡོད་པ་དང་།    སྐབས་དེར་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་དགེ་བཤེས་བློ་བཟང་སྙན་གྲགས་ལགས་ཀྱིས་ཀྱང་བློ་དགའ་རང་བཙན་ལགས་ཀྱི་ཞལ་ཆེམས་ལྟར་བོད་མི་ཚང་མས་རྡོག་རྩ་ཆིག་སྒྲིལ་ཐོག་ནས་ནུས་པ་མཉམ་སྤུངས་དགོས་པ་སོགས་གསུངས་ཡོད།   རྒྱལ་གཅེས་དམ་པ་དཔའ་བོ་བློ་དགའ་ལགས་ཀྱི་མདུན་ཚིགས་ལྔ་པའི་མཆོད་འབུལ་སྨོན་ལམ་དེའི་སྐབས་ད་དུང་རྒྱ་གར་བོད་དོན་རྒྱབ་སྐྱོར་ཚོགས་པ་ BTSM གྱི་རྒྱལ་ཡོངས་འབྲེལ་མཐུད་པ་སྐུ་ཞབས་ Pankaj Goyal ལགས་ཀྱིས་བོད་མིའི་བདེན་དོན་འཐབ་རྩོད་ལ་རྒྱབ་སྐྱོར་ཡོད་པའི་གསུང་བཤད་གནང་བ་མ་ཟད།  མཆོད་འབུལ་སྨོན་ལམ་གྲུབ་མཚམས་ལས་འགུལ་བ་ཚོས་མར་མེའི་ཁྲོམ་སྐོར་ཡང་གནང་ཡོད། 

The post རྒྱལ་ས་ལྡི་ལིར་དཔའ་བོ་བློ་དགའ་རང་བཙན་གྱི་བདུན་ཚིགས་ལྔ་པར་མཆོད་འབུལ་སྨོན་ལམ་དང་མར་མེའི་ཁྲོམ་སྐོར་གནང་བ། appeared first on vot.

ཁ་སང་ཕྱི་ཚེས་ ༥ ཉིན་ཨ་རིའི་མི་ནི་སོ་ཊའི་ནང་རང་ལོ་ ༨༢ ཅན་གྱི་སྤོ་བོ་རྡོ་རྗེ་རྒྱལ་པོ་ལགས་ཚུད་པའི་བོད་མི་ལྔ་ཡིས་མངའ་སྡེའི་རྒྱལ་ས་ Saint Paul ནས་ Chicago གྲོང་ཁྱེར་གྱི་རྒྱ་ནག་གཞུང་ཚབ་ལས་ཁུངས་བར་མི་ལེ་ ༤༠༠ ལྷག་གི་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་འདུག དེ་ཡང་མི་ནི་སོ་ཊའི་ས་གནས་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་ལྷ་ཐོག་རྨ་གཡང་ཉི་མ་ལགས་ཀྱིས་སྣེ་འཁྲིད་པ་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་རྒྱབ་སྐྱོར་འོག ཁ་སང་ཚེས་ ༥ ནས་འགོ་འཛུགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་བོད་དོན་ཆེད་རང་སྲོག་བློས་བཏང་གནང་ནས་ཞག་ ༤༩ སྟེ་འདི་ཚེས་ ༡༩ བར་ཞི་བའི་གོམ་བགྲོད་གནང་བཞིན་པ་དང་། ལས་འགུལ་ནང་རང་ལོ་ ༨༢ ཅན་གྱི་སྤོ་བོ་རྡོ་རྗེ་རྒྱལ་པོ་ལགས་དང་རང་ལོ་ ༢༦ ཅན་གྱི་གཞོན་སྐྱེས་བསྟན་འཛིན་ནོར་བུ་ལགས་བཅས་ཁྱོན་མི་གྲངས་ལྔ་ནས་མཉམ་ཞུགས་གནང་ཡོད་པ་མ་ཟད། ཁ་སང་ཉིན་དང་པོའི་ལས་འགུལ་ནང་ས་གནས་མང་ཚོགས་གཞན་ཁག་གཅིག་ཀྱང་མཉམ་ཞུགས་གནང་འདུག ལྷ་ཐོག་རྨ་གཡང་ཉི་མ་ལགས་ཀྱིས་འདི་ག་རླུང་འཕྲིན་ཁང་ལ་གོམ་བགྲོད་དབུ་འཛུགས་སྐབས། ཐེངས་འདིའི་ཞི་བའི་ལས་འགུལ་དེ་ནི་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཞེས་པའི་སྲིད་བྱུས་དང་། བོད་ཀྱི་ཆོས་དང་རིག་གཞུང་། སྐད་ཡིག་བཅས་ལ་དམ་དྲག བོད་ཕྲུག་མང་པོ་ཞིག་རྒྱ་ནག་གཞུང་འབྲེལ་གྱི་བཅའ་སྡོད་སློབ་གྲྭ་ཁག་ཏུ་བཙན་གྱིས་བཅུག་པ་སོགས་ཀྱི་གནད་དོན་རྣམས་ཨ་རིས་གཙོས་རྒྱལ་སྤྱིའི་སྤྱི་ཚོགས་ཁྲོད་གོ་རྟོགས་སྤེལ་ཆེད་དང་། བོད་མི་རྣམས་གཉིད་ལས་སད་ཆེད་དྲན་གསོ་ཡིན་པར་འགྲེལ་བརྗོད་གནང་སོང་བ་མ་ཟད། ལྷག་དོན་དུ་རྒྱ་ནག་དམར་པོའི་གཞུང་ལ་བོད་ཀྱི་བདེན་མཐའ་མ་གསལ་བར་དུ་བོད་མིའི་སེམས་ཤུགས་ནམ་ཡང་ཆགས་ཀྱི་མ་རེད་ཅེས་བརྡ་ལན་གནང་སོང་། གཞན་ཡང་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་གཙོ་འཇིགས་མེད་ཨོ་རྒྱན་ལགས་ཀྱིས། བོད་པ་ཡིན་པ་ཙམ་གྱིས་ལས་འགུལ་འདྲ་མིན་སྤེལ་དགོས་རྒྱུ་གལ་ཆེན་ཡིན་པ་ནན་བཤད་དང་སྦྲགས། རྒྱུ་ཡོད་མཁན་ཚོས་དངུལ་འགྲོ་སོང་དང་། དཔའ་བློ་ཡོད་མཁན་ཚོས་ཕྱིར་དོན་ནས་ལས་འགུལ་སྤེལ་དགོས་པ། ཤེས་ཡོན་ཅན་ཚོས་དཔྱད་རྩོམ་འབྲི་དགོས་པ་སོགས་ཀྱི་ཞུ་སྐུལ་གནང་སོང་། ཐེངས་འདིའི་ལས་འགུལ་ནང་མཉམ་ཞུགས་གནང་མཁན་ཁོངས་སུ་ཡོད་མཁན་སྤོ་བོ་རྡོ་རྗེ་རྒྱལ་པོ་ལགས་ལྟ་བུ་མཚོན་ན། དེ་སྔོན་ཕྱི་ལོ་ ༢༠༡༢ ལོར་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་ཉིན་གྲངས་ ༢༧ རིང་ཟས་བཅད་ངོ་རྒོལ་གྱི་ལས་འགུལ་ནང་མཉམ་ཞུགས་གནང་མྱོང་མཁན་ཞིག་ཡིན་པ་དང་། ཁོང་གིས་ཐེངས་འདིའི་ལས་འགུལ་ནང་མཉམ་ཞུགས་གནང་དགོས་དོན་གཙོ་བོ་ནི་རྒྱལ་གཅེས་པ་བློ་དགའ་རང་བཙན་ལགས་ཀྱིས་རྒྱལ་ཚོགས་མདུན་དུ་སྐུ་ལུས་མེར་བསྲེགས་བཏང་བའི་གནས་ཚུལ་ཐོན་པར་སེམས་ནང་ཚོར་སྣང་དྲག་པོ་ཞིག་བྱུང་སྟབས་ཡིན་པ་གསུངས་འདུག གཞི་རྩའི་ཉེ་ལམ་ཨ་རི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཆེད་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གིས་རང་ལུས་མེར་བསྲེགས་དང་། ལྷག་པར་འདི་ལོར་རྒྱ་དམར་སྲིད་གཞུང་གིས་ཟླ་བ་འདིའི་ཚེས་ ༡ ཉིན་ནས་འགོ་འཛུགས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བའི་དོན་ཚན་ ༦༥ ཅན་གྱི་ཁྲིམས་ཡིག་ལག་བསྟར་བྱེད་འགོ་བཙུགས་པ་ནས་བཟུང་། རྒྱ་གར་ཕྱི་ནང་གཉིས་ནང་བོད་མི་གནས་སྡོད་ས་ཚིགས་གང་སར་རྐང་འཁོར་དང་སྦག་སྦག་སྐོར་སྐྱོད། སྒེར་ཚོགས་གཉིས་ཀའི་གོ་སྒྲིག་འོག་ཞི་བའི་གོམ་བགྲོད་དང་། […]

The post ཨ་རིའི་ Minnesota ནས་ Chicago གྲོང་ཁྱེར་བར་ཞི་བའི་གོམ་བགྲོད་དབུ་འཛུགས། appeared first on vot.

ཉེ་ལམ་ཕྱི་ཟླ་ ༧ ཚེས་ ༢ ཉིན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ། སྐུ་ལུས་མེར་མཆོད་ཕུལ་ནས་བདུན་ཕྲག་ལྔ་ཧྲིལ་པོ་འཁོར་གྱི་ཡོད་པ་དང་བསྟུན། འཛམ་གླིང་ཡུལ་གྲུ་གང་སར་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྐང་འཁོར་དང་སྦག་སྦག་སྐོར་སྐྱོད། ཟས་བཅད་ངོ་རྒོལ་སོགས་རྣམ་པ་འདྲ་མིན་གྱི་ཐོག་ནས་གཞི་རྒྱ་ཆེ་བའི་ལས་འགུལ་སྤེལ་བཞིན་པའི་ཁྲོད། ཉེ་ལམ་ཕྱི་ཟླ་ ༧ ཚེས་ ༢༤ ཉིན་མེའོ་ཆོས་འཕེལ་གླིང་གཞིས་ཆགས་སུ་གནས་སྡོད་བོད་མི་བཟའ་ཚང་བསྟན་འཛིན་དབང་འདུས་ལགས་དང་ཟླ་བ་ལགས་གཉིས་ཀྱིས་ཁུལ་དེ་ནས་འགོ་འཛུགས་ཀྱིས་རྡ་ས་བར་དུསྦག་སྦག་སྐོར་སྐྱོད་ཀྱི་ལས་འགུལ་སྤེལ་བཞིན་ཡོད་པ་ལྟར། དེ་རིང་ཕྱི་དྲོ་ཆུ་ཚོད་ ༣ ཡོལ་ཙམ་ཁོང་གཉིས་༸རྒྱལ་བའི་བཞུགས་གནས་བཞུགས་སྒར་དྷ་རམ་ས་ལར་མང་ཚོགས་ཀྱི་ཕེབས་བསུ་དང་སྦྲགས་ལས་འགུལ་མཇུག་སྒྲིལ་གནང་སོང་། གསར་འགོད་པས་བསྟན་འཛིན་དབང་འདུས་ལགས་སུ་ཐེངས་འདིའི་ལས་འགུལ་དང་འབྲེལ་ནས་བཀའ་འདྲི་ཞུ་སྐབས་ཁོང་གིས། དེ་རིང་བཞུགས་སྒར་རྡ་རམ་ས་ལར་བདེ་ཐང་ངང་འབྱོར་ནས་ལས་འགུལ་དེ་ལེགས་གྲུབ་བྱུང་བར་དགའ་སྤོབས་ཆེན་པོ་བྱུང་ཞེས་དང་།  ཉིན་གྲངས་ ༡༥ རིང་གི་སྦག་སྦག་སྐོར་སྐྱོད་ཀྱི་ལས་འགུལ་ཁྲོད་རྒྱ་གར་གྱི་མངའ་སྡེ་ ༨ བརྒྱུད་ནས་ཕེབས་ཡོད་པ་དང་བསྟུན། གནས་ཡུལ་རྒྱ་གར་ཡུལ་མིའི་ཁྲོད་དུ་བོད་ནང་གི་ཛ་དྲག་གནས་སྟངས་སྐོར་དྲིལ་བསྒྲགས་གང་ལེགས་གནང་ཐུབ་ཡོད་པ་དང་ལྷན་དུ། རྒྱ་ནག་གིས་ཉེ་ཆར་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེས་བོད་མིའི་ངོ་བོ་རྩ་མེད་གཏོང་ཉེན་ཡོད་པ། དེ་བཞིན་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་མཆོད་ཕུལ་བའི་གནད་དོན་ཐོག་སྦྱར་ཡིག་འགྲེམས་སྤེལ་ཐུབ་ཡོད་པ་གསུངས་སོང་། ཕྱོགས་མཚུངས་དབུས་དང་རྡ་ས་ས་གནས་བོད་ཀྱི་བུད་མེད་ལྷན་ཚོགས་གཉིས་ཀྱིས་ཉིན་གུང་ཆུ་ཚོད་ ༡ པོའི་ཐོག་མེག་གྷན་ཁྲོམ་གཞུང་གི་ཉེ་འདབས་སུ་རྟེན་གཞི་བྱས་པའི་རླངས་འཁོར་འབབ་ཚུགས་སུ། འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས་བོད་མིའི་བདེན་པའི་འཐབ་རྩོད་དང་། ལྷག་པར་རྒྱལ་གཅེས་དཔའ་བོ་བློ་དགའ་རང་གཙན་ལགས་ཀྱི་བློས་གཏོང་དེར་དྲང་བདེན་གྱི་བརྡ་ལན་དང་ཡ་ལན་མེད་པར་མཐའ་གཅིག་ཏུ་ངོ་རྒོལ་ཡོད་ཅེས་དང་། དེ་འབྲེལ་རྒྱལ་སྤྱིའི་ངོས་ནས་ཡ་ལན་དོན་དང་ལྡན་པ་ཞིག་གནང་སྐྱོང་ཡོང་བའི་ངག་བཅད་ལས་འགུལ་ཞིག་སྤེལ་གནང་སོང་། བོད་ཀྱི་བུད་མེད་ལྷན་ཚོགས་ནས་ལས་འགུལ་དང་འབྲེལ་བསྒྲགས་གཏམ་སྤེལ་བའི་ནང་། ཟླ་བ་སྔོན་མའི་ཚེས་ ༣ ཉིན་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ། རྒྱལ་གཅེས་དཔའ་བོ་བློ་དགའ་རང་བཙན་ལགས་ནས་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་བསྲེགས་ཀྱིས་རང་གི་གཅེས་པའི་སྐུ་སྲོག་བློས་གཏོང་གནང་ནས་བདུན་ཕྲག་ལྔ་འགྲོ་བཞིན་ཡོང་ནའང་། བློ་ཕམ་པ་ཞིག་ལ་ད་བར་འཛམ་གླིང་མཉམ་འབྲེལ་རྒྱལ་ཚོགས་ནས་གནས་ཚུལ་དེ་ལ་རྡོག་རོལ་དང་སྣང་མེད་བཏང་ཐོག  ཡ་ལན་སྤྲད་མེད་པ་ཐེར་འདོན་དང་འབྲེལ། དེར་བོད་ཀྱི་བུད་མེད་ལྷན་ཚོགས་ནས་མཐའ་ཅིག་ཏུ་དགག་པ་ཞུ་རྒྱུ་དང་སྦྲགས། རྒྱ་ནག་དམར་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་དེར་ང་ཚོས་ངོས་ལེན་རྩ་བ་ནས་མེད་ལ། བོད་ནང་ལག་བསྟར་བྱེད་མཚམས་འཇོག་དགོས་པའི་རྒྱ་ནག་དམར་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་འདུག དེ་དང་ཆབས་ཅིག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་བོད་དོན་ལས་འགུལ་བ་རྒྱལ་གཅེས་དཔའ་བོ་བློ་དགའ་རང་བཙན་ལགས་ནས་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་བསྲེགས་ཀྱིས་རང་གི་གཅེས་པའི་སྐུ་སྲོག་བློས་གཏོང་གནང་བའི་ཚེ་སྲོག་ལ་རྒྱ་ནག་དམར་གཞུང་ནས་འགན་འཁུར་དགོས་པའི་གནོན་ཤུགས་སྤྲོད་དགོས་པ་མ་ཟད།  རྒྱལ་སྤྱིའི་མཉམ་འབྲེལ་རྒྱལ་ཚོགས་དང་བོད་དོན་རྒྱབ་སྐྱོར་བ། དེ་བཞིན་མང་གཙོ་དོན་གཉེར་བ་རྣམས་ནས་རྒྱལ་གཅེས་པ་ཁོང་གིས་རང་ལུས་མེར་བསྲེགས་བཏང་ནས་དེ་རིང་བདུན་ཕྲག་ལྔའི་བར་འཛམ་གླིང་ས་ཕྱོགས་གང་སར་བཞུགས་པའི་བོད་རིགས་སྤུན་ཟླ་རྣམས་ཀྱིས་ཞུ་གཏུག་དང་སྐད་འབོད་ལ་སོགས་པའི་ལས་འགུལ་སྣ་མང་ཞིག་སྤེལ་དང་སྤེལ་མུས་དེར་རྒྱལ་སྤྱིའི་ངོས་ནས་སྣང་མེད་མ་གཏང་བར་ཡ་ལན་དོན་དང་ལྡན་པ་ཞིག་གནང་དགོས་པའི་འབོད་སྐུལ་ཞུས་འདུག བཞུགས་སྒར་དུ་ད་དུང་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་ཆེ་བསྟོད་དང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བར་ངོ་རྒོལ་དང་འབྲེལ། ཉེ་ལམ་ཕྱི་ཚེས་ ༡༩ ནས་དབུ་འཛུགས་ཀྱིས་རྒྱུན་མཐུད་ཟས་བཅད་ངོ་རྒོལ་གྱི་ལས་འགུལ་སྤེལ་བཞིན་པ་ལྟར། དེ་རིང་ཉིན་ ༡༩ པའི་ཐོག་བོད་མི་མང་སྤྱི་འཐུས་ཁག་གཅིག་དང་ལྡི་ལི་མཐོ་སློབ་ཀྱི་སློབ་ཟུར་ཁག་གཅིག་ནས་ཟས་བཅད་ངོ་རྒོལ་གནང་བཞིན་པ་མ་ཟད། དེ་རིང་སྔ་དྲོ་ཕྱག་ཚོད་ ༧ པའི་ཐོག་བོད་མི་མང་སྤྱི་འཐུས་དབང་འདུས་རྡོ་རྗེ་ལགས་དབུས་པའི་བོད་མི་ཁག་གཅིག་གིས་མགོ་རིལ་བཟོས་པས་བརྒྱུད་རྒྱ་ནག་གཞུང་ལ་ངོ་རྒོལ་དང་རྒྱལ་གཅེས་དཔའ་བོ་བློ་དགའ་རང་བཙན་ལགས་སུ་རྗེས་དྲན་ཡང་ཞུས་གནང་འདུག […]

The post བོད་དོན་ཆེད་མེའོ་ཆོས་འཕེལ་གླིང་ནས་རྡ་ས་བར་སྦག་སྦག་སྐོར་སྐྱོད་ཀྱི་ལས་འགུལ་སྤེལ་མཁན་བོད་མི་བཟའ་ཚང་ཞིག་བཞུགས་སྒར་དུ་འབྱོར་སོང་། appeared first on vot.

དེ་རིང་ཕྱི་ཟླ་ ༨ ཚེས་ ༥ ཉིན་ལ་དྭགས་བསོད་ནམས་གླིང་བོད་མི་དྭང་བླངས་རུ་ཁག་དང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་བོད་མི་ ༨༠ ངོས་ནས་བློ་དགའ་རང་བཙན་ལགས་དམ་པ་དེ་ཉིད་གཙོས་བོད་ཀྱི་རྒྱལ་གཅེས་དཔའ་བོ་དཔའ་མོ་ཡོངས་ལ་རྗེས་དྲན་སླད་རྒྱལ་ས་གླེ་ནས་འཛམ་གླིང་ནང་གི་མོ་ཊའི་བགྲོད་ལམ་མཐོ་ཤོས་གཉིས་པ་མཁར་གདོང་ལ་ཆེན་བར་སྦག་སྦག་སྐོར་སྐྱོད་ཀྱི་ལས་འགུལ་ཞིག་སྤེལ་འདུག དེའང་དེ་རིང་སྔ་དྲོ་ཆུ་ཚོད་ ༩ པའི་ཐོག་ཚོགས་པ་དེ་དག་གཉིས་ཀྱི་ལས་ཀྱི་སྣེ་མོ་རྣམས་དང་། སྦག་སྦག་སྐོར་སྐྱོད་པ་རྣམ་པ་ལྷན་འཛོམས་ཐོག  ཐོག་མར་འཕགས་བོད་གཉིས་ཀྱི་རྒྱལ་གླུ་བླངས་བ་མ་ཟད། རྒྱལ་གཅེས་དཔའ་བོ་བློ་དགའ་རང་བཙན་ལགས་ཆེད་དུ་ངག་བཅད་མྱ་ངན་སྐར་མ་གཅིག་གནང་སྟེ།  བསོད་ནམས་གླིང་ས་གནས་འགོ་འཛིན་བཀྲ་ཤིས་དོན་གྲུབ་ལགས་དང་ལ་དྭགས་ནང་པའི་ཚོགས་པའི་ཚོགས་གཞོན་སྐུ་ཞབས་རིག་འཛིན་རྡོ་རྗེ་ལགས་རྣམས་ཀྱིས་དམ་པ་དེ་ཉིད་ཀྱི་བློས་བཏང་ལ་རྗེས་དྲན་གྱི་གསུང་བཤད་སོགས་གནང་རྗེས།  སྐུ་ཞབས་རིག་འཛིན་རྡོ་རྗེ་ལགས་ཀྱིས་སྦག་སྦག་སྐོར་སྐྱོད་ཀྱི་ལས་འགུལ་དེ་དབུ་འབྱེད་གནང་འདུག སྐབས་དེར་ཁོང་གིས་འདི་གའི་གསར་འགོད་པའི་བཅར་འདྲིའི་ཁྲོད། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་ལ་ངོ་རྒོལ་གྱིས་རང་གི་གཅེས་པའི་ལུས་སྲོག་བློས་བཏང་གནང་བ་ལ་རྗེས་དྲན་དང་འབྲེལ།  འཛམ་གླིང་ཡུལ་གྲུ་གང་སར་རྣམ་པ་འདྲ་མིན་གྱི་སྒོ་ནས་རང་སོ་སོའི་གདུང་སེམས་མཉམ་སྐྱེད་གསལ་སྟོན་གྱི་ལས་འགུལ་སྣ་མང་སྤེལ་བཞིན་པ་ལྟར།  བོད་མི་རྣམས་ཀྱིས་ལ་དྭགས་ནང་གི་ཐེངས་འདིའི་ལས་འགུལ་བརྒྱུད་བོད་ཀྱི་བརྡ་ལན་འཛམ་གླིང་ཀུན་ལ་ཁྱབ་ཐུབ་པའི་སྨོན་འདུན་ཞུ་ཡི་ཡོད་པ་གསུངས་འདུག སྦག་སྦག་སྐོར་སྐྱོད་པ་རྣམས་ཀྱིས་ཐེངས་འདིའི་ལས་འགུལ་ཐོག་གྱོན་ཆས་ནག་པོ་གྱོན་པའི་ཐོག་རང་ཉིད་ཀྱི་ལུས་ལ་བོད་དང་རྒྱ་གར་གྱི་རྒྱལ་དར་སོགས་བཅིངས་ཏེ་ཚོར་ཤུགས་ཆེན་པོའི་ཐོག་འཛམ་གླིང་ནང་གི་མོ་ཊའི་བགྲོད་ལམ་མཐོ་ཤོས་གཉིས་པ་མཁར་གདོང་ལ་ཆེན་བར་སྦག་སྦག་སྐོར་སྐྱོད་གནང་བ་མ་ཟད། ལ་ཆེན་དེའི་ཐོག་སྐད་ཤུགས་ཆེན་པོས་འབོད་སྒྲ་སྒྲོག་སྟེ་རྒྱ་ནག་གཞུང་ལ་ངོ་རྒོལ་དང་མཉམ་འབྲེལ་རྒྱལ་ཚོགས་ཀྱིས་དེ་གའི་ལས་ཁུངས་མདུན་དུ་རང་ཉིད་ཀྱི་སྐུ་ལུས་མེར་མཆོད་ཕུལ་བའི་གནད་དོན་ལ་ད་བར་བརྡ་ལན་གང་ཡང་གནང་མེད་པར་བློ་ཕམ་གྱི་རྣམ་པ་གསལ་སྟོན་གནང་འདུག  དེའི་སྐོར་ལས་འགུལ་གོ་སྒྲིག་གནང་མཁན་ཁོངས་སུ་ཡོད་པ་ལ་དྭགས་བསོད་ནམས་གླིང་བོད་མི་དྭང་བླངས་རུ་ཁག་གི་ཚོགས་གཙོ་ཀརྨ་བསོད་ནམས་རབ་བརྟན་ལགས་སུ་བཀའ་འདྲི་ཞུས་ཡོད། གཞན་ཡང་ལས་འགུལ་ནང་མཉམ་ཞུགས་གནང་མཁན་ངོས་ནས་ལས་འགུལ་དེའི་བརྒྱུད་བོད་མི་རྣམས་ལ་རང་ཉིད་བོད་པ་ཡིན་པའི་འདུ་ཤེས་ནམ་ཡང་གློད་རྒྱུ་མེད་པའི་དྲན་སྐུལ་དང་དཔའ་བོའི་ཞལ་ཆེམས་ལྟར་རྡོག་རྩ་གཅིག་སྒྲིལ་དགོས་པའི་ཞུ་འབོད་གནང་འདུག ལས་འགུལ་བ་རྣམས་མཁར་གདོང་ལ་ཆེན་བར་བསྐྱོད་རྗེས་རྒྱལ་ས་གླེར་ཕྱིར་ལོག་གིས་ལས་འགུལ་རེ་ཞིག་མཇུག་བསྒྲིལ་གནང་འདུག

The post བློ་དགའ་རང་བཙན་ལགས་དབུས་པའི་བོད་ཀྱི་རྒྱལ་གཅེས་པ་ཡོངས་ལ་རྗེས་དྲན་སླད་མཁར་གདོང་ལ་ཆེན་བར་སྦག་སྦག་སྐོར་སྐྱོད། appeared first on vot.

དེ་རིང་ཕྱི་ཟླ་ ༨ ཚེས་ ༥ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ལུགས་བསམ་མཉམ་འབྲེལ་གྱི་འགན་འཛིན་ཚོགས་པའི་ཚོགས་གཞོན་བསྟན་འཛིན་མཁས་གྲུབ་ལགས་ཁེ་ན་ཌའི་མི་སེར་ཡིན་ཡང་འདས་པའི་ལོ་ ༣ ཙམ་ནས་ཁོང་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནང་དུ་བཅའ་སྡོད་གནང་བཞིན་ཡོད་པ་དང་། དཔྱ་ཁྲལ་འབུལ་བབ་ཀྱང་རྒྱ་གར་ནས་འབུལ་བཞིན་ཡོད་པ་ལྟར། འདི་ལོའི་བཅན་བྱོལ་བོད་མིའི་འོས་བསྡུའི་ཁྲོད་ཁོང་ལ་རྒྱ་གར་ནང་བཅའ་སྡོད་བོད་མི་གཞན་དང་མཚུངས་པའི་འོས་བསྡུའི་ཐབ་ཐང་སྤྲད་མེད་པའི་གནད་དོན་དང་འབྲེལ་ནས་ཁ་མཆུ་ཨང་ ༢༣ པའི་ཐོག་གྱོད་ཡ་ཕྱོགས་གཉིས་ནས་ངེས་བརྟན་བཟོ་རྒྱུའི་ཆེད་ཐོག་མའི་ཉན་ཞིབ་ལས་རིམ་འཚོགས་སོང་། དེ་ཡང་ཁ་མཆུ་ཨང་ ༢༣ དང་འབྲེལ་ཁྲིམས་དོན་གསལ་བཟོའི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དབུས་པའི་ཁྲིམས་ཞིབ་པ་རྣམ་པ་དང་། ཆེས་མཐོའི་ཁྲིམས་ཞིབ་ཁང་གི་ལས་བྱེད་རྣམ་པ། གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་དང་ཁོང་གི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་བསྟན་འཛིན་ཡར་རྒྱས་ལགས། དེ་བཞིན་གྱོད་ཡ་རྩོད་ལེན་པ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དང་། གཞན་ཡང་ཟུར་ཉན་པ་དང་གསར་འགོད་པ་བཅས་ཕེབས་འདུག སྐབས་དེར་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་ཁྲིམས་རྩོད་པ་རིན་ཆེན་དབང་རྒྱལ་ལགས་ཀྱིས།  ལུགས་བསམ་མཉམ་འབྲེལ་གྱི་འགན་འཛིན་ཚོགས་པའི་ཚོགས་གཞོན་བསྟན་འཛིན་མཁས་གྲུབ་ལགས་རྩ་བའི་ཁེ་ན་ཌའི་མི་སེར་ཡིན་ཡང་འདས་པའི་ལོ་ ༣ ཙམ་ནས་ཁོང་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦ པ་སྟེ་ཡུལ་ཁྲིམས་ལ་བརྩི་སྲུང་ཞུས་པའི་ཐོག་ Overseas Citizenship of India ཞེས་ཕྱི་རྒྱལ་བ་རྒྱ་གར་གནས་སྡོད་ཆོག་པའི་ལག་འཁྱེར་ཐོག་ནས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནང་དུ་བཅའ་སྡོད་གནང་བཞིན་ཡོད་པ་དང་། དཔྱ་ཁྲལ་འབུལ་བབ་ཀྱང་རྒྱ་གར་ནས་འབུལ་བཞིན་ཡོད་པ་མ་ཟད། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ སྤྱི་འཐུས་ཀྱི་འོས་ཆོས་དང་འབྲེལ་བའི་དོན་ཚན་སྒྲིག་འགལ་བྱུང་གི་མེད་པས། བཅའ་ཁྲིམས་དོན་ཚན་ ༡༡ འོས་བསྡུ་དང་འོས་གཞིའི་ཐོབ་ཐང་འོག་རྒྱ་གར་ནང་བཅའ་སྡོད་བོད་མི་གཞན་དང་མཚུངས་པའི་འོས་བསྡུའི་ཐབ་ཐང་སྤྲད་མེད་པའི་གནད་དོན་དང་འབྲེལ་ནས་ཁ་མཆུ་དེ་ཉིད་གཏུགས་ཡོད་པ་གསུངས་སོང་། མ་ཟད། ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་སྤྱི་ཡོངས་གྲུབ་ཟིན་པའི་གནས་སྟངས་དབང་གིས་ཆེས་མཐོའི་ཁྲིམས་ཞིབ་ཁང་ནས་ཞུ་སྦྱོར་བ་བསྟན་འཛིན་མཁས་གྲུབ་ལགས་སུ་འདི་ལོའི་སྲིད་སྤྱི་གཉིས་ཀྱི་འོས་གཞིར་བཞེངས་རྒྱུའི་གོ་སྐབས་དམིགས་བསལ་སྤྲོད་ཐུབ་ཀྱི་མེད་ཀྱང་། དེང་སྐབས་ཕྱི་རྒྱལ་ནས་ཚུར་རྒྱ་གར་ནང་ཕྱིར་ལོག་གནང་མཁན་བོད་མི་མི་ཉུང་བ་ཞིག་འབྱུང་གི་ཡོད་པས། སླད་མར་ཁོང་རྣམས་ལ་སྲིད་སྤྱི་གཉིས་ཀྱི་འོས་བསྡུའི་ལས་རིམ་ནང་མཉམ་ཞུགས་གནང་རྒྱུའི་གོ་སྐབས་མཐུད་ཚང་ཡོང་ཕྱིར་བཙན་བྱོལ་བོད་མིའི་བཅའ་ཁྲིམས་དང་འོས་བསྡུ་སྒྲིག་གཞི་གཉིས་ཀར་བསྐྱར་བཅོས་འགྲོ་དགོས་པ་དང་། ཞུ་རྩའི་ནང་གསལ། ‘གནས་སྡོད།’ ཞེས་གཞི་གང་ལ་ངོས་འཛིན་དགོས་མིན་བཅའ་ཁྲིམས་ཀྱི་འགྲེལ་བཤད་ཁ་གསལ་གནང་སྐྱོང་ཡོང་བའི་ཞུ་སྐུལ་གནང་ཡོད་པ་གསུངས་སོང་། དེ་བཞིན་སྐབས་དེར་རྩོད་ལེན་པ་དབུས་འོས་བསྡུ་འགན་འཛིན་བློ་བཟང་ཡེ་ཤེས་མཆོག་གིས།  ཞུ་སྦྱོར་བ་བསྟན་འཛིན་མཁས་གྲུབ་ལགས་ཕྱི་རྒྱལ་བ་རྒྱ་གར་གནས་སྡོད་ཆོག་པའི་ལག་འཁྱེར་ཐོག་ནས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་གནས་སྡོད་གནང་བཞིན་ཡོད་ནའང་།  བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༢ ནང་གསལ་ས་གནས་དེར་གཏན་འཇགས་གནས་སྡོད་འོག་ས་གནས་གཞན་ནས་གནས་སྤོས་བྱས་པ་གང་ཞིག ཀ ༽ ས་གནས་སུ་ལོ་ཧྲིལ་པོ་ ༥ […]

The post ཕྱི་རྒྱལ་ནས་རྒྱ་གར་དུ་ཕྱིར་ལོག་གནང་མཁན་བོད་མི་ཞིག་གི་འོས་བསྡུ་ཐོབ་ཐང་དང་འབྲེལ་ཁ་མཆུ་ཨང་ ༢༣ པའི་ཐོག་མའི་ཉན་ཞིབ་ལས་རིམ་འཚོགས་སོང་། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་ནས་ཟླ་གཅིག་འཁོར་བ་དང་བསྟུན། ཨ་རི་གྲོང་ཁྱེར་ནིའུ་ཡོག་གཙོས་པའི་འཛམ་གླིང་ས་ཕྱོགས་གང་སར་གཞི་རྒྱ་ཆེ་བའི་ལས་འགུལ་སྤེལ་བཞིན་པ་རེད་འདུག དེ་ཡང་ཟླ་ ༧ ཚེས་ ༢ ཉིན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་སྐུ་ལུས་མེར་མཆོད་ཕུལ་ནས་ཁ་སང་སྟེ་ཟླ་གཅིག་ཧྲིལ་པོ་འཁོར་བ་དང་བསྟུན། འཛམ་གླིང་ཡུལ་གྲུ་གང་སར་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་གཞི་རྒྱ་ཆེ་བའི་ལས་འགུལ་སྤེལ་བཞིན་པའི་ཁྲོད། ཁ་སང་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་ད་བར་བོད་རྒྱལ་ཁབ་དང་བསྟན་སྲིད་མི་རིགས་ཀྱི་དོན་དུ་རང་ལུས་མེར་བསྲེགས་བཏང་མཁན་རྒྱལ་གཅེས་དཔའ་བོ་རྣམ་པར་གདུང་སེམས་མཉམ་སྐྱེད་དང་རྗེས་དྲན་གྱི་སླད་དུ། ནིའུ་ཡོག་ཇེག་སན་ཧཡིཌ་ Jackson Height ནས་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་བར་སྤུར་སྒམ་ ༡༧༠ གདན་ཞུས་ཀྱིས་གོམ་བགྲོད་ཀྱི་ལས་འགུལ་སྤེལ་འདུག་པ་དང་། བཞུགས་སྒར་རྡ་རམ་ས་ལའི་ནང་དུ་མེ་གྷན་ཁྲོམ་གཞུང་ནས་བྷག་སུ་ཐང་ཆེན་བར་གོམ་བགྲོད་དང་འབྲེལ་མར་མེ་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་སོང་། ཕྱོགས་མཚུངས་ཁེ་ཎ་ཌའི་གྲོང་ཁྱེར་ཊོ་རོན་ཊོ་དང་ཧྥ་རན་སིའི་རྒྱལ་ས་པེ་རིས་ནང་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་ནག་གཞུང་ཚབ་ཁང་གི་མདུན་དུ་སྐྲ་བཞར་ཏེ་མགོ་རིལ་བཟོས་པ་དང་ས་གནས་སུ་མར་མེ་ཁྲོམ་སྐོར་བརྒྱུད་དཔའ་བོ་བློ་དགའ་རང་བཙན་ལགས་སུ་རྗེས་དྲན་དང་འབྲེལ། རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་གཞི་རྒྱ་ཆེ་བའི་ལས་འགུལ་སྤེལ་ཡོད་འདུག དེ་བཞིན་ཐའེ་ཝན་གྱི་རྒྱལ་ས་ཐའེ་པེ་ནང་དུ་རྟེན་གཞི་བྱས་པའི་ Bank of China རྒྱ་ནག་གི་དངུལ་ཁང་ཞེས་པ་དེའི་ཡན་ལག་དངུལ་ཁང་ཞིག་གི་མདུན་དུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ལག་ཏུ་བོད་ཀྱི་རྒྱལ་དར་བསྣམས་ཏེ་རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་ལ་ངོ་རྒོལ་དང་སྦྲགས། དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་མཆོད་ཕུལ་ནས་ཟླ་གཅིག་ཧྲིལ་པོ་འཁོར་བའི་རྗེས་དྲན་གྱི་མཛད་སྒོ་ཞིག་ཀྱང་འཚོགས་འདུག གཞན་ཡང་དབྱིན་ཡུལ་གྱི་རྒྱལ་ས་ལོན་ཊོན་ནང་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་དབྱིན་ཡུལ་གྱི་སྲིད་བློན་གྱི་བཞུགས་གནས་ Downing Street ཞེས་པའི་ས་གནས་ནས་འགོ་འཛུགས་ཀྱིས་རྒྱ་ནག་གཞུང་ཚབ་ཁང་གི་བར་དུ་གོམ་བགྲོད་དང་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག་པ་མ་ཟད། ལག་ཏུ་ཀྲག་ཤོག་ནག་པོའི་བསྟུམས་པའི་ཕུང་པོ་དང་དེའི་ཐོག་བོད་མི་རང་ལུས་མེར་བསྲེགས་བཏང་མཁན་རྣམས་ཀྱིས་པར་རིས་སྦྱར་ཏེ་ངོ་རྒོལ་སྐད་འབོད་དང་སྦྲགས། དཔའ་བོ་བློ་དགའ་རང་བཙན་གཙོས་པའི་བོད་མི་རང་ལུས་མེར་བསྲེགས་བཏང་མཁན་ ༡༧༠ ལྷག་ལ་རྗེས་དྲན་དང་རྒྱ་ནག་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོས་ལེན་རྩ་བ་ནས་མེད་ཅེས་བརྗོད་འདུག་པ་དང་། ཉི་འོང་གྱི་རྒྱལ་ས་ཊོཀ་ཡོ་ནང་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་དང་གོམ་བགྲོད་ཀྱི་ལས་གུལ་སྤེལ་འདུག་པ་མ་ཟད། གོམ་བགྲོད་ཀྱི་ལས་འགུལ་གྲུབ་མཚམས་སུ་ཊོཀ་ཡོ་གཙུག་ལག་སློབ་གཉེར་ཁང་གི་ཚོགས་ཁང་དུ་བོད་མི་རང་ལུས་མེར་བསྲེགས་བཏང་མཁན་དང་འབྲེལ་རླུང་རྟ་ཞེས་པའི་དངོས་བྱུང་གི་གློག་བརྙན་ཞིག་གཟིགས་འབུལ་ཞུས་འདུག ཕྱོགས་མཚུངས་ཁ་སང་རྒྱ་གར་གྱི་གྲོང་ཁྱེར་སྦོམ་སྦེ་ནང་གི་རང་བཙན་རྒྱལ་ཐང་དུ། རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་གདུང་སེམས་མཉམ་སྐྱེད་དང་རྒྱ་ནག་གིས་བོད་མི་རིགས་རྩ་མེད་གཏོང་བའི་ཁྲིམས་འཆར་ལ་ངོ་རྒོལ་བྱེད་པའི་ཆེད་དུ་མོན་གྷོ་འདོད་རྒུ་གླིང་གི་ས་གནས་གཞོན་ནུ་དང་བུད་མེད་ཚོགས་པ།  བྷན་རྡ་ར་ནོར་རྒྱས་གླིང་གི་གཞོན་ནུ་བཅས་ཐུན་མོང་གི་གོ་སྒྲིག་འོག ཞི་བའི་ཁྲོམ་སྐོར་གྱི་ལས་འགུལ་སྤེལ་འདུག་པ་དང་། སྐབས་དེར་མོན་གྷོ་ས་གནས་ཀྱི་སེར་སྐྱ་མང་ཚོགས་བརྒྱ་དང་བདུན་བཅུ་ལྷག་དང་།  བྷན་རྡ་ར་ནོར་རྒྱས་གླིང་གི་མང་ཚོགས་ལྔ་བཅུ་ང་གཅིག་བཅས་མཉམ་ཞུགས་གནང་འདུག་པ་མ་ཟད།   སྦོམ་སྦེར་རྟེན་གཞི་བྱས་པའི་རྒྱ་ནག་གི་ཡན་ལག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་སྐབས་བོད་མི་བཞི་བཅུ་ལྷག་ས་གནས་ཉེན་རྟོག་པས་འཛིན་བཟུང་བྱས་ཏེ་རྗེས་སུ་གློད་བཀྲོལ་བཏང་ཡོད་པ་རེད་འདུག རྩ་བའི་ད་བར་བོད་མི་ ༡༧༠ ལྷག་གིས་སྐུ་ལུས་མེར་བསྲེགས་བཏང་ཡོད་པ་དང་དཔའ་བོ་བློ་དགའ་རང་བཙན་ལགས་ནི་ནུབ་ཕྱོགས་རྒྱལ་ཁབ་ནང་བོད་མི་རང་ལུས་མེར་བསྲེགས་བཏང་མཁན་ཐོག་མ་དེ་ཆགས་ཀྱི་ཡོད་པ་དང་། ཁ་སང་ཚེས་ ༢ ཉིན་དམ་པ་ཁོང་གིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་ནས་ཟླ་ ༡ ཧྲིལ་པོ་འཁོར་བའི་དུས་ཚིགས་ཁེལ་ཡོད་པ་དང་། ཨ་རི་གཙོས་པའི་འཛམ་གླིང་ས་ཕྱོགས་གང་སར་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ངོ་རྒོལ་སྐད་འབོད་གཙོས་པའི་མར་མེ་ཁྲོམ་སྐོར་དང་། ཞི་བའི་གོམ་བགྲོད། དེ་བཞིན་བགྲོ་གླེང་སོགས་རྣམ་པ་འདྲ་མིན་གྱི་ཐོག་ནས་ལས་འགུལ་སྤེལ་གནང་ཡོད་པ་རེད།

The post དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་ཕུལ་ནས་ཟླ་གཅིག་འཁོར་བ་དང་བསྟུན་འཛམ་གླིང་ས་ཕྱོགས་གང་སར་གཞི་རྒྱ་ཆེ་བའི་ལས་འགུལ་སྤེལ་བ། appeared first on vot.

CNN གསར་ཁང་དང་བོད་གནས་ལྟ་ཞིབ་ཁང་གཉིས་ཀྱིས་བོད་ཁམས་ཕྱོགས་ནས་བཙན་བྱོལ་ལ་འབྱོར་བའི་བོད་མི་ཞིག་ལ་དམིགས་བསལ་བཅར་འདྲི་ཞུས་པའི་ཁྲོད། རྒྱ་གཞུང་གིས་ཕྱི་ལོ་ ༢༠༢༡ ལོའི་ལོ་མཇུག་ཙམ་ལ་ཁམས་བྲག་མགོ་དགའ་ལྡན་རབ་བརྟན་གླིང་དགོན་དུ་སྨིད་ ༩༩ ཅན་གྱི་སྟོན་པའི་སྐུ་བརྙན་དང་མ་ཎི་འཁོར་ལོ་གྲངས་ ༤༥ དེ་བཞིན་ཉེ་འཁྲིས་སུ་ཡོད་པའི་ཐོག་བརྩེགས་གསུམ་ཅན་གྱི་རྗེ་བཙུན་བྱམས་པ་མགོན་པོའི་སྐུ་བརྙན་དང་གཙུག་ལག་ཁང་གཏོར་བཤིག་བཏང་རྗེས། ད་ཆ་ས་ཚིགས་དེབཞིན་རྟ་རྒྱུག་ཐང་དུ་བསྒྱུར་ཡོད་པ་མ་ཟད། སྲིད་འཛིན་ཞི་ཅིན་ཕིང་གིས་སྣེ་ཁྲིད་པའི་རྒྱ་གཞུང་གིས་བོད་ནང་དུ་མི་རིགས་མཉམ་བསྲེས་ཀྱི་ཆེས་གདུག་རྩུབ་ཅན་གྱི་སྲིད་བྱུས་ལག་བསྟར་ཁྲོད།  ད་ལྟའི་ཆར་བོད་པའི་ལོ་ཆུང་བྱིས་པ་རྣམས་བོད་སྐད་ཡང་རྒྱག་ཐུབ་ཀྱི་མེད་པའི་གནས་སྟངས་འོག་ལྷུང་ཡོད་པ་འགྲེལ་བརྗོད་གནང་འདུག དེ་ཡང་ཁ་སང་ CNN གསར་ཁང་དང་བོད་གནས་ལྟ་ཞིབ་ཁང་གཉིས་ཀྱིས་དེ་གའི་དྲྭ་ཚིགས་ཐོག་བོད་ཁམས་བྲག་མགོ་ཕྱོགས་ནས་བཙན་བྱོལ་ལ་འབྱོར་བའི་བོད་མི་ཆོས་རྒྱལ་ཟླ་བ་ལགས་སུ་དམིགས་བསལ་བཅར་འདྲི་ཞུས་པའི་གནས་ཚུལ་སྤེལ་བའི་ནང་། ཕྱི་ལོ་ ༢༠༢༡ ཟླ་ ༡༢ ཚེས་ ༡༢ ཉིན་རྒྱ་ནག་གཞུང་གིས་བོད་བྲག་མགོའི་དགའ་ལྡན་རབ་བརྟན་རྣམ་རྒྱལ་གླིང་གི་ཉེ་འཁྲིས་སུ་བཞེངས་ཡོད་པའི་མཐོ་ཚད་ལ་ཁྲུ་ ༩༩ ཅན་གྱི་སྟོན་པའི་སྐུ་བརྙན་དང་། རྗེ་བཙུན་བྱམས་མགོན་གྱི་སྐུ་བརྙན། མ་ཎི་དུང་འཁོར་བཞི་བཅུ་ཞེ་ལྔ་བཅས་གཏོར་བཤིག་བཏང་བའི་གནས་ཚུལ་ཕྱི་ཕྱོགས་སུ་ཐོན་ཡོད་པ་ལྟར་།ཆོས་རྒྱལ་ལགས་ཀྱིས་སྔར་ཆོས་ལུགས་ཀྱི་གནས་རྟེན་ཡིན་པའི་ས་གནས་དེ་ད་ཆ་རྟ་རྒྱུག་བཏང་སའི་ཐང་ཆེན་དུ་བསྒྱུར་ཡོད་པ་མ་ཟད། དེའི་ཉེ་འཁོར་དུ་ཐོག་བརྩེགས་མང་པོ་ཡོད་པའི་ཁང་པ་འཛུགས་སྐྲུན་བྱེད་བཞིན་ཡོད་པ་འགྲེལ་བརྗོད་གནང་འདུག མ་ཟད། ཁོང་གིས་ཁམས་བྲག་མགོ་དེ་བཞིན་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ངོ་རྒོལ་གྱི་ལྟེ་གནས་ཤིག་ཏུ་གྱུར་རྗེས། རིམ་པས་ཁུལ་དེར་རྒྱ་གཞུང་གིས་མངོན་གསལ་དོད་པོས་དམག་མི་དང་ཉེན་རྟོག་པ་ཇེ་མང་དུ་བཏང་ནས་དམ་དྲག་ཇེ་ཆེར་བཏང་བ་དང་། སྲང་ལམ་ཁག་ནས་བོད་མི་ཚོར་གང་བྱུང་གིས་སྔོག་བཤེར་བྱས་པ་སོགས་མཐོང་མྱོང་ཡོད་པ་དང་། ལྷག་པར་དེང་སྐབས་ས་གནས་མི་མང་རྣམས་རྒྱུན་དུ་གཞུང་གི་ཚོགས་འདུར་བསྐོངས་ནས། དམར་ཤོག་ཚོགས་པར་ཉན་དགོས་པ་དང་། རང་གི་ཕྲུ་གུ་དགོན་པའི་སློབ་གྲྭར་གཏོང་མི་རུང་བའི་སྐོར་ལ་སློབ་གསོ་སྤྲོད་ཀྱི་ཡོད་པ་དང་ཆབས་ཅིག བྲག་མགོ་རྫོང་གི་སྟོན་པའི་སྐུ་བརྙན་གཏོར་བཤིག་ལ་ཞི་རྒོལ་གནང་མཁན་བོད་མིར་ཉུང་མཐར་ཉིན་གྲངས་ ༢༠ ལྷག་བཀག་ཉར་དང་གཞུང་གི་ཆབ་སྲིད་སློབ་གསོར་བཙན་གྱིས་ཞུགས་བཅུག་གི་ཡོད་པ་འགྲེལ་བརྗོད་གནང་འདུག དེ་བཞིན་ཆོས་རྒྱལ་ལགས་ཀྱིས་ཁོང་གི་མི་རབས་ནི་རྒྱ་ནག་ནང་ཤེས་ཡོན་གྱི་བརྒྱུད་རིམ་ཡོངས་རྫོགས་སུ་བོད་ཀྱི་ལོ་རྒྱུས་དང་། སྐད་ཡིག རིག་གཞུང་བཅས་ལ་དམིགས་བསལ་གྱིས་སློབ་སྦྱོང་བྱེད་པའི་གོ་སྐབས་ཡོད་པའི་མི་རབས་མཐའ་མ་དེ་ཡིན་པར་སེམས་འཚབ་དང་སྦྲགས། རྒྱ་གཞུང་གིས་བོད་ཁུལ་དུ་བཙན་གྱིས་མི་རིགས་མཉམ་བསྲེས་ཀྱི་སྲིད་བྱུས་ལག་བསྟར་ཁྲོད་ད་ལྟའི་ཆར་བོད་མི་ན་གཞོན་རྣམས་རང་གི་ཕ་སྐད་ཙམ་ཡང་རྒྱབ་ཐུབ་ཀྱི་མེད་པ་དང་། ལྷག་པར་རྒྱའི་ཆེད་འཛུགས་བྱས་པའི་བཅའ་སྡོད་སློབ་གྲྭ་ཁག་ནང་རྒྱ་སྐད་དང་རྒྱ་ཡིག་གཙོ་ཁྲིད་བྱས་ཏེ་བོད་མིའི་ངོ་བོ་བཅས་པ་རྩ་མེད་བཟོ་ཐབས་བྱེད་བཞིན་ཡོད་པའི་ཐོག ད་ཆ་སྔོན་འགྲོའི་སློབ་གྲྭ་ནང་གི་བོད་པའི་ལོ་ཆུང་བྱིས་པ་ཚོ་ལའང་རྒྱ་ནག་དམར་ཤོག་ཚོགས་པར་དགའ་ཞེན་དང་ཡིད་ཆེས་འགྱུར་བ་མེད་པ་བྱེད་དགོས་སྐོར་གྱི་སློབ་གསོ་སྤེལ་བཞིན་པ་དེས་བོད་མིའི་ངོ་བོ་དང་ཆོས་རིག་བཅས་པ་རྩ་མེད་འགྲོ་ཉེན་ཡོད་པའི་བློ་འཚབ་ཆེས་ཆེར་བཏོན་གནང་འདུག གནས་ཚུལ་ནང་ད་དུང་དེ་སྔ་ཕྱི་ལོ་ ༢༠༠༨ ལོར་ལོ་ན་བརྒྱད་སོན་པའི་ཆོས་རྒྱལ་ལགས་ཀྱིས་བོད་ནས་བྲོས་བྱོལ་དུ་ཕེབས་ཐབས་གནང་ཡོད་ཀྱང་། གཞིས་ཀ་རྩེ་ས་ཁུལ་དུ་རྒྱ་གཞུང་གིས་ཁོང་འཛིན་བཟུང་བྱས་རྗེས་ཟླ་བ་གཅིག་ཙམ་བཀག་ཉར་བྱས་ཏེ་འདྲི་རྩད་བྱས་པ་དང་། དེ་རྗེས་ས་གནས་བཙོན་ཁང་དུ་བསྐྱལ་ཏེ་ཟླ་བ་དྲུག་ཙམ་རིང་བཅོན་དུ་བཅུག་ཡོད་པ་གསལ་སྟོན་དང་ཆབས་ཅིག དེ་ལྟར་ཡང་སྔ་ལོར་ཁོང་བོད་ནས་བྲོས་བྱོལ་དུ་ཕེབས་ཏེ་༸སྤྱི་ནོར་གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཡང་ཞུས་ཡོད་པ་གསལ་སྟོན་གནང་འདུག གནད་དོན་དེ་དང་འབྲེལ་འདི་ག་རླུང་འཕྲིན་ཁང་གིས་བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས་སུ་ཞལ་པར་བརྒྱུད་བཀའ་འདྲི་ཞུས་ཡོད། གཞི་རྩའི་སྔ་ལོར་རྒྱ་གཞུང་གིས་བོད་ཁམས་དཀར་མཛེས་ས་ཁུལ་གྱི་བྲག་མགོ་རྫོང་དུ་སླར་ཡང་གུ་རུའི་སྐུ་བརྙན་ཞིག་དང་མཆོད་རྟེན་བརྒྱ་ཕྲག་མང་པོ་གཏོར་བཤིག་བཏང་བ་མ་ཟད། ཁུལ་དེའི་ས་གནས་བོད་མི་ཚོར་དམ་དྲག་ཤུགས་ཆེན་བྱེད་བཞིན་པའི་གནས་ཚུལ་ཐོན་ཡོད་པ་དང་། ལྷག་པར་དེའི་སྐོར་གྱི་གནས་ཚུལ་མཁོ་སྤྲོད་གནང་མཁན་བོད་མིར་འཛིན་བཟུང་དང་ཁྲིམས་ཐག་ལྕི་མོ་གཅོད་ཀྱི་ཡོད་པའི་གནས་ཚུལ་ཐོན་ཡོད་པ་རེད།

The post བོད་བྲག་མགོ་རྫོང་གི་སྟོན་པའི་སྐུ་བརྙན་བཞུགས་སའི་ས་ཚིགས་དེ་བཞིན་རྟ་རྒྱུག་ཐང་ཆེན་དུ་བཟོས་ཡོད་པ་ཐེར་འདོན། appeared first on vot.

ནིའུ་ཡོག་ཏུ་གནས་སྡོད་བོད་མི་ཚོས་རྒྱལ་ཚོགས་ཀྱི་ལས་ཁུངས་མདུན་དུ་རང་ཉིད་ཀྱི་སྐྲ་བཞར་ཏེ་མགོ་རིལ་བཟོས་པས་བརྒྱུད་རྒྱ་ནག་གཞུང་ལ་ངོ་རྒོལ་དང་རྒྱལ་གཅེས་དཔའ་བོ་བློ་དགའ་རང་བཙན་ལགས་སུ་རྗེས་དྲན་ཞུས་གནང་འདུག དེ་ཡང་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་ནས་ཁ་སང་བདུན་ཚིགས་བཞི་པ་ཁེལ་བ་དང་བསྟུན། ཨ་རིའི་ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་གོ་སྒྲིག་འོག ཁུལ་དེའི་བོད་མི་ཁྱོན་ ༩༠ ཙམ་གྱིས་སྐྲ་བཞར་གྱི་ལས་འགུལ་དེའི་ནང་མཉམ་ཞུགས་གནང་འདུག  དེ་དག་གི་ཁོངས་ནས་བོད་མི་ ༦༨ ཀྱིས་ལུས་ལ་དཔའ་བོ་དེ་ཉིད་ཀྱི་འདྲ་པར་འཁོད་པའི་སྟོད་ཐུང་ནག་པོ་གྱོན་ཏེ་རྒྱལ་ཚོགས་ཀྱི་མདུན་དུ་དངོས་སུ་མགོ་རིལ་བཟོས་ཡོད་པ་དང་། བོད་མི་ ༢༢ ཀྱིས་རང་ཉིད་ཀྱི་ཁྱིམ་ལ་མགོ་རིལ་བཟོས་པའི་རྗེས་རྒྱལ་ཚོགས་ཀྱི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ནང་མཉམ་ཞུགས་གནང་འདུག གནད་དོན་དེ་འབྲེལ་འདི་ག་རླུང་འཕྲིན་ཁང་གིས་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དཀོན་མཆོག་པ་སངས་ལགས་སུ་བཀའ་འདྲི་ཞུས་པར་ཁོང་གིས།  རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་བཏང་ནས་བདུན་ཚིགས་བཞི་པ་ཁེལ་བ་དང་བསྟུན། ནམ་རྒྱུན་ལྟར་ངོ་རྒོལ་སྐད་འབོད་ཙམ་མ་ཡིན་པར་ད་ལན་སྐྲ་བཞར་གྱི་ལས་འགུལ་སྤེལ་རྒྱུའི་འཆར་གཞི་སྒྲིག་པ་བཞིན། ཐོག་མའི་ཆར་ད་བར་བོད་མི་རང་ལུས་མེར་བསྲེགས་བཏང་མཁན་ ༡༧༠ ལྷག་བྱུང་ཡོད་པས་ཁོང་རྣམས་ལ་རྗེས་དྲན་དང་འབྲེལ་མི་གྲངས་ ༡༧༠ ཡིས་སྐྲ་བཞར་གྱི་ལས་འགུལ་ནང་མཉམ་ཞུགས་བྱེད་ཐབས་བྱས་ཀྱང་། ལས་འགུལ་ནང་དངོས་སུ་མཉམ་ཞུགས་གནང་མཁན་མི་གྲངས་ ༩༠ ཙམ་བྱུང་ཡོད་སྐོར་གསུངས་བ་མ་ཟད། ཁོང་རང་ཉིད་ཀྱང་སྐྲ་བཞར་གྱི་ལས་འགུལ་ནང་མཉམ་ཞུགས་བྱས་ཡོད་སྐོར་གསུངས་སོང་། མ་ཟད་སྐྲ་བཞར་གྱི་ལས་འགུལ་དེའི་ནང་བུད་མེད་མཉམ་ཞུགས་གནང་མཁན་གཅིག་བྱུང་བ་ནི་པདྨ་མཁའ་འགྲོ་ལགས་ཡིན་པ་དང་། ཁོང་གིས་ལས་འགུལ་དེའི་སླད་ཐོ་འགོད་དམིགས་བསལ་གནང་མེད་ཀྱང་ས་གནས་སུ་ངོ་རྒོལ་སྐད་འབོད་གནང་སྐབས་ཚོར་བ་ཆེན་པོའི་ཐོག་བློ་དགའ་རང་བཙན་ལགས་དམ་པ་དེ་ཉིད་ཆེད་དུ་སྐྲ་བཞར་རྒྱུའི་བསམ་བློ་འཁོར་བ་ཞིག་ཆགས་ཀྱི་འདུག སྤྱིར་ཁ་སང་ཕྱི་ཚེས་ ༣༠ ཉིན་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ནང་དུ་ Youth for Human Rights International དང་ United for Human Rights ཞེས་པའི་འགྲོ་བ་མིའི་ཐོབ་ཐང་ཚོགས་པ་གཉིས་ཀྱི་གོ་སྒྲིག་འོག 20th International Human Rights Summit ཞེས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༠ པ་དེ་དབུ་འཛུགས་གནང་ཡོད་པ་ལྟར། ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དཀོན་མཆོག་པ་སངས་ལགས་གཙོས་པའི་བོད་མི་གསུམ་ནས་ཉིན་གསུམ་རིང་གི་ལྷན་ཚོགས་དེའི་དབུ་འབྱེད་མཛད་སྒོར་མཉམ་ཞུགས་གནང་བ་མ་ཟད། ལྷན་ཚོགས་ཀྱི་ཚོགས་གཙོ་དང་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་བོད་དང་འབྲེལ་བའི་ཡིག་ཆ་ཁག་དང་དཔའ་བོ་བློ་དགའ་རང་བཙན་ལགས་ཀྱི་ལོ་རྒྱུས་ངོ་སྤྲོད་སོགས་ཕུལ་ཏེ་བོད་དོན་ཞུ་གཏུགས་གནང་འདུག དེའི་ཁྲོད་ཁ་སང་གཞན་ཡང་ནིའུ་ཡོག་ས་གནས་བོད་ཀྱི་བུད་མེད་ལྷན་ཚོགས་ཀྱིས་ཨ་རིའི་ནིའུ་ཡོག་ཏུ་རྟེན་གཞི་བྱས་པའི་ New York Post གསར་ཁང་གི་མདུན་དུ་ངོ་རྒོལ་གྱི་ལས་འགུལ་སྤེལ་འདུག་པ་དང་། […]

The post རྒྱལ་ཚོགས་མདུན་མགོ་རིལ་བཟོས་ཏེ་བློ་དགའ་རང་བཙན་ལགས་སུ་རྗེས་དྲན་ཞུས་འདུག appeared first on vot.

རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་མི་རིགས་རྩ་གཏོར་གྱི་ཁྲིམས་ལག་བསྟར་བྱས་འགོ་བཙུགས་པར་ངོ་རྒོལ་དང་། དཔའ་བོ་བློ་དགའ་རང་བཙན་ལགས་ལ་མྱ་ངན་དང་གདུང་སེམས་མཉམ་སྐྱེད་ཞུ་སླད། བཞུགས་སྒར་རྡ་རམ་ས་ལ་གཙོ་བོར་འགྱུར་བའི་འཛམ་གླིང་ས་ཕྱོགས་གང་སར་གནས་པའི་བོད་མི་རྣམས་ནས་ངོ་རྒོལ་སྐད་འབོད་དང་ཟས་བཅད་ངོ་རྒོལ། དེ་བཞིན་རྐང་འཁོར་དང་སྦག་སྦག་སྐོར་སྐྱོད་སོགས་ཀྱི་ལས་འགུལ་སྣ་མང་སྤེལ་བཞིན་པའི་ཁྲོད། བོད་མི་སྐལ་བཟང་མཐར་ཕྱིན་ལགས་ཀྱིས་ཟླ་བ་འདིའི་ཕྱི་ཚེས་ ༡༥ ནས་འགོ་འཛུགས་ཀྱིས་བཞུགས་སྒར་རྡ་རམ་ས་ལ་ནས་ལ་དྭགས་བར་སྤྱི་ལེ་ ༦༠༠ ལྷག་གི་བོད་དོན་གོམ་བགྲོད་ཀྱི་ལས་འགུལ་སྤེལ་བཞིན་པ་རེད། ཕྱི་ཚེས་ ༡༥ ཉིན་རྡ་རམ་ས་ལ་ནས་འགོ་བཙུགས་ཏེ། ཁ་ཉིན་ཁོང་ཀུ་ལུ་མ་ན་ལི་ཁུལ་དུ་ས་གནས་བོད་མི་མང་ཚོགས་ཀྱིས་ཕེབས་སུ་སྣེ་ལེན་ཞུས་པའི་ཐོག་ཕེབས་འབྱོར་བྱུང་རྗེས། དེ་རིང་ཀི་ལོང་ནས་ Jispa ཕྱོགས་སུ་སྐྱོད་བཞིན་པ་རེད་འདུག འདི་ག་རླུང་འཕྲིན་ཁང་གིས་སྐལ་བཟང་མཐར་ཕྱིན་ལགས་སུ་ཁོང་གི་གོམ་བགྲོད་ལས་འགུལ་འདིའི་སྐོར་བཀའ་འདྲི་ཞུས་ཡོད། 

The post རྡ་རམ་ས་ལ་ནས་ལ་དྭགས་བར་བོད་དོན་གོམ་བགྲོད་གནང་མཁན་སྐལ་བཟང་མཐར་ཕྱིན་ལགས་དེ་རིང་ཀི་ལོང་ནས་ Jispa ཕྱོགས་སུ་སྐྱོད་བཞིན་པ། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱིས་བོད་ཀྱི་རྩ་དོན་སླད་རྒྱལ་ཚོགས་ཀྱི་ལས་འཁུངས་མདུན་དུ་སྐུ་ལུས་མེར་བསྲེགས་ཕུལ་ཏེ་ཟླ་བ་གཅིག་ཧྲིལ་པོ་འཁོར་གྱི་ཡོད་པའི་དུས་ཚིགས་དང་བསྟུན། བོད་མི་གནས་སྡོད་ས་གནས་གང་སར་གཞི་རྒྱ་ཆེ་བའི་རྔམ་སྟོན་ཁྲོིམ་སྐོར་སོགས་ཀྱི་ལས་འགུལ་ཇེ་ཤུགས་ཆེ་རུ་སྤེལ་བཞིན་འདུག དེའང་དེ་རིང་སྔ་དྲོ་ཨོ་རི་ས་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་ས་གནས་བོད་མི་བརྒྱ་ཕྲག་འདུ་འཛོམས་ཀྱིས་ཨོ་ར་ས་གྲོང་ཁྱེར་ Bubaneshwar ནང་རྔམ་སྟོན་ཁྲོམ་སྐོར་གྱི་ལས་འགུལ་བརྒྱུད་དམ་པ་དེ་ཉིད་ལ་རྗེས་དྲན་དང་རྒྱ་གཞུང་གིས་བོད་ཐོག་འཛིན་པའི་དྲག་པོའི་སྲིད་བྱུས་ལ་ངོ་རྒོལ་གྱི་ལས་འགུལ་ཞིག་སྤེལ་འདུག་པ་མ་ཟད། ལས་འགུལ་ཐོག་ཨོ་རི་ས་མངའ་སྡེའི་ BJP གཞུང་འཛིན་ཚོགས་པའི་ཚོགས་གཙོ་སྐུ་ཞབས་ Samir Mohanti གཙོས་པའི་ཕྱི་ནང་སྐུ་མགྲོན་ཁག་གཅིག་ཆེད་ཕེབས་གནང་འདུག  གནད་དོན་དེ་འབྲེལ་འདི་ག་རླུང་འཕྲིན་ཁང་གིས་ཨོ་རི་ས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་དབྱངས་འཛོམས་ལགས་སུ་བཀའ་འདྲི་ཞུས་ཡོད། ཕྱོགས་མཚུངས་དེ་རིང་རྒྱ་གར་བྱང་ཤར་ Assam མངའ་སྡེའི་ Guwahati གྲོང་ཁྱེར་ནང་དུ་ཤིས་ལོང་ས་གནས་ཀྱི་སྣེ་ཁྲིད་དང་བྱང་ཤར་བོད་མིའི་ཛ་དྲག་དྭང་བླངས་ལས་འགུལ་ཚོགས་པའི་གོ་སྒྲིག་འོག་གསར་འགོད་ལྷན་ཚོགས་ཤིག་སྐོང་འཚོགས་གནང་འདུག  སྐབས་དེར་སྤྱི་ཟུར་ཚེ་རིང་སྒྲོལ་མ་ལགས་དང་སྤྱི་ཟུར་དབྱངས་ཅན་སྒྲོལ་དཀར་ལགས་གཉིས་ཀྱི་གཙོ་འགན་བཞེས་ཏེ་གཙོ་བོ་རྒྱ་ནག་གཞུང་གིས་ཟླ་འདིའི་ཚེས་ ༡ ནས་ལག་བསྟར་ཟིན་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོ་རྒོལ་ དང་། ཨ་རི་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་བར་གདུང་སེམས་མཉམ་སྐྱེད། དེ་བཞིན་རྒྱ་ནག་གཞུང་གིས་བོད་ནང་དམ་དྲག་དང་སྡུག་རྩུབ་ཅན་གྱི་སྲིད་བྱུས་འདྲ་མིན་སྤེལ་བཞིན་པ་ལ་ངོ་རྒོལ་དང་ངོས་ལེན་རྩ་བ་ནས་མེད་པའི་བརྡ་ལན་གསལ་འདོན་གནང་བ་མ་ཟད། ད་བར་བོད་ཕྱི་ནང་གཉིས་སུ་རང་ལུས་མེར་བསྲེགས་བཏང་མཁན་རྣམས་དང་རྒྱ་ནག་གཞུང་གིས་བོད་ནང་དམ་དྲག་བྱེད་བཞིན་པའི་གནས་སྟངས་སོགས་ཀྱི་ཐོག་པར་རིས་འགྲེམས་སྟོན་གྱི་ལས་འགུལ་ཞིག་ཀྱང་སྤེལ་གནང་འདུག ཕྱོགས་མཚུངས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནང་མང་ཚོགས་འདུ་འཛོམས་ཀྱིས་བློ་རང་བཙན་ལགས་དམ་པ་དེ་ཉིད་ལ་རྗེས་དྲན་དང་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་འདུག་པ་དང་།  དྷ་རམ་ས་ལར་རྒྱུན་མཐུད་ཟས་བཅད་ལས་འགུལ་མུ་མཐུད་སྤེལ་མུས་ཐོག བཞུགས་སྒར་ཉེ་འདབས་སུ་ཆགས་པའི་ནོར་བུ་གླིང་ཁ་ལྟ་བུའི་ནང་རེས་གཟའ་ལྷག་པར་འཆར་ཅན་རྒྱལ་གཅེས་པ་དམ་པ་དེ་ཉིད་སླད་མཆོད་འབུལ་སྨོན་ལམ་གོ་སྒྲིག་གནང་མུས་ཡིན་པ་རེད། གཞན་ཡང་དེ་རིང་དགོང་མོ་འབྲས་ལྗོངས་ཀྱི་རྒྱལ་ས་སྒང་ཏོག་ནང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་དཔའ་བོ་བློ་དགའ་རང་བཙན་ལགས་འདས་གྲོངས་སུ་ཕྱི་ནས་བདུན་ཚིགས་ ༤ པ་དང་བསྟུན་གཞི་རྒྱ་ཆེ་བའི་མར་མེ་ཁྲོམ་སྐོར་གྱི་ལས་འགུལ་སྤེལ་གནང་རྒྱུ་དང་།  ཨ་རིའི་ནིའི་ཡོག་ནང་བདུན་ཚིགས་ ༤ པ་དང་བསྟུན་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག མཉམ་སྦྲེལ་རྒྱལ་ཚོགས་མདུན་དུ་བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་རྗེས་དྲན་དང་རྒྱ་ནག་གཞུང་ལ་ངོ་རྒོལ་ཆེད་སྐྲ་བཞར་གྱི་གཞི་རྒྱ་ཆེ་བའི་ལས་འགུལ་ཤིག་གྲ་སྒྲིག་གནང་བཞིན་པ་རེད་འདུག དེ་བཞིན་སྤུ་རུ་ཝ་ལ་དང་། གུ་ཝ་ཧ་ཌི། ལོན་ཌོན། ཊོ་རོན་ཊོ། བྷོ་སི་ཊོན་བཅས་སུའང་བློ་དགའ་རང་བཙན་ལགས་དམ་པ་དེ་ཉིད་ལ་རྗེས་དྲན་དང་རྒྱ་གཞུང་ལ་ངོ་རྒོལ་གྱི་ལས་འགུལ་གཅིག་མཚུངས་སུ་སྤེལ་ཡོད་པ་རེད།

The post བློ་དགའ་རང་བཙན་ལགས་དམ་པའི་བདུན་ཚིགས་བཞི་པ་དང་བསྟུན་རྒྱ་གཞུང་ལ་ངོ་རྒོལ་ལས་འགུལ་སྔར་ལྷག་སྤེལ་བཞིན་འདུག appeared first on vot.