你是愛笑的？抑是愛吼的？你今仔日有笑無？啥物原因？笑佇面？抑是笑佇心？ 你的笑是文文仔笑抑是大聲笑？毋管拄著啥物代誌，有啥物苦楚，毋通袂記得笑。有法度就大笑，上無文文仔笑，無法度對人笑，上無佇家己的心內笑。笑久就慣勢矣。有笑有保庇，無笑會出代誌。有笑變少年，無笑會變可憐。有笑就會好運喔！

你的名啥人號的？是序大人？抑是包紅包央相命先的­號的？你敢有佮意你的名？伊代表啥物意思？古早重男輕女，生著查某囝也共號罔腰罔市足仔滿仔春仔尾仔。你若無佮意家己的名抑是欲求好運，會使改名。你敢會為著一頓特餐優惠，共家己改名『鮭魚』？現代的家長用浪漫的古字共囡仔號名，所以愛會曉查甘字典捌音、看有諧音無。閣有人開店抑是藝名是文青風，家己造字抑是用有字特別的意思。毋管啥物名，用積極佮樂觀，建立好名聲，勇敢做家己。

你感覺人生啥物較重要？外才較重要抑是內才較重要？自細漢爸母共你講讀冊較重要抑是人品較重要？學校家長日的時，我一定交待家長。「讀冊足重要」，除非你的囡仔已經知影家己人生的方向。千萬毋通共囡仔講「讀冊無重要，乖就好，會曉做人就好」，若無，伊佇學校規工八點鐘就可能失去拍拚的目標。咱看著人，拄開始是看外才，毋過後來一定會看內才。啥物星座的個性人人佮意？欲按怎共遮的優點融合做伙，予家己內才外才攏可愛？

你敢是一个超人？你敢是攏咧為別人無閒？攏先想著別人？人若叫你是超級祕書，你敢會足歡喜？甚至你犧牲家己所愛就是為著責任感？毋過心內敢是有怨嘆？你敢是高敏感度，多才多藝，仝時間無閒足濟代誌？你當時會為家己？你當時才會停止做超級英雄？你的願望敢會因為你一直犧牲，顛倒無法度完成的閣愈離愈遠，若天頂的仙桃，想欲挽煞挽袂著？

你幾歲？當時欲老？你敢會感覺老矣？厝裡敢有老人？食老敢欲家己蹛？你的退休金當時開始儉？準備欲按怎運用才有法度過一个平安快樂的退休生活？計畫當時欲執行？你敢會驚失智？你敢有用心去理解無囡仔佇身軀邊仔的老人有偌孤單？欲按怎過一个安全佮放下的老人生活？你敢有老人友情？

你感覺人是自然生成抑是環境造成？一切天註定抑是會當靠拍拚？出世佇啥物家庭無法度揀，哪會有人歹竹出好筍，有人好竹出痀崙？那會有人生活鞏金閣包銀，有人橐袋仔空空無半仙銀？毋管背景是人啥貨，一定愛有栽培，好額的捌禮數，散赤的求進步。愛拚才會贏。所有的拍拚攏袂無彩。有愛的所在，就無失敗！

你自細漢的夢想是啥？你這馬的工課敢是你細漢想的？大學是佗位畢業的敢有影響？足濟頭家攏講做工課的態度比學歷較重要。人看輕你、無信任你、阻擋你，你敢會起懷疑、放棄？欲治人無信任的方法就是認真、堅持佮招一陣有熱情的人做伙拚，久來定著會有成果、會感動人。做辛勞佮做頭家的立場、承擔佮貢獻無仝，用熱情盡本份認真做，一定會圓夢。

你最近當時出國？你佮意家己一个人出國，抑是會招伴較鬧熱？是佮厝裡的人出國？抑是孤一人？出國的目的是啥物？是純𨑨迌？是做生理？抑是綴時行？有時出國足好耍，嘛有小可仔緊張，毋管按怎，一切攏是安全第一。出國心情傷過放輕鬆，抑是真正需要人鬥相共，敢會無細膩一時失覺察傷過信任人，就予人騙去。歹人的面頂懸袂寫家己是歹人，旅遊的人真正愛目睭褫予金，家己栽一欉，較贏靠別人，隨時留退路。

你敢捌食酒醉？是因為少年毋捌代誌？抑是因為工課場的應酬無法度？抑是家己愛啉？抑是家族的習慣？抑是做月內啉雞酒？啉酒的理由百百款，佇古早激酒無簡單，勝利、豐收、大日子的時才有酒通啉，閣不醉不歸。佇現代，有錢就有通買酒，敢需要逐改都啉甲醉茫茫？其實快樂佮痛苦是仝時間出現，我絕對尊重個人的選擇，毋過若問我個人佮意佗一款，我感覺隨時保持頭殼清醒較安全。若因為按呢減少人生的一寡趣味，嘛無要緊。命較重要。

你有佮意食羊羹無？你知影伊的來源佮引起的誤會無？你敢會予外表騙去？你敢看會清世間人的真面目？人人扶挺若甜心的主角，伊正港的生活敢是你看的、你想的按呢？你想欲做主角抑是配角？路遙知馬力，足濟主角嘛是對配角開始的。你較愛永遠做配角抑是恬恬仔拍拚栽培家己的才情等待時機，抑是無撙無節護龍懸過正身？