王桑一工 Awesome One Day 秀容來講

你是家己扞公司做頭家，抑是做人的辛勞趁薪水？你佇辦公室敢有定定看著頭家？若看著你敢敢和頭家講話？抑是予頭家叫去講話？看著頭家攏講袂出話？你佮同事的感情按怎？你敢有讚成辦公室的戀情？若真正雙方有感情，敢會影響恁的工課？敢有啥物問題？啥物款的頭家才是好頭家？

你人生珍惜、要意的是啥？有的人重精神，有的重金錢。少年時代要意的，佮食老是無仝的，毋過，毋管啥物年歲，攏會追求被愛的感覺。查埔的要意的佮查某要意的無仝。查埔人無啥可能為查某人犧牲理想，毋過查某人閣較巧嘛會為對方犧牲，放棄一切。

你敢有細漢佮你做伙大漢的初戀？是啥物原因離開？啥人對不起啥人？敢有共心內的話講出來、講清楚？抑是雄雄離開，無予對方解說的機會？分手的傷痕敢有影響你一世人？你是失戀檢討家己，重新出發？抑是檢討別人，對愛情失去信心？你是一改交一个，抑是一睏交幾若个？你的愛情觀是啥物？你按怎面對少年毋捌代誌的愛情？

你這世人食甲上緊張的一頓飯是當時？是佮啥人食？是佮頂司食飯？是佮心愛的人食？抑是佮見對方的家長？兩人的交往上重要的是啥？感情？抑是家庭？你感覺你是強勢族群，抑是弱勢？眾人認為的強勢敢有影強勢？弱勢敢有影弱勢？你敢捌聽過弱欺強，下司欺侮頂司，學生佮家長創治老師的代誌？

你是相親抑是自由戀愛？你是家己逐著恁某恁翁，抑是人安排的？你敢會主動佮人接接？你講話敢有人欲聽？你敢有勇氣去熟似生份人？你敢同意小動一下仔頭殼做寡安排予對方感動？你敢有信心會揣著伴？抑是準備欲一世人孤單？你敢敢大膽去奅一个眾人迷？你敢知欲按怎展現個人的魔力？

你上佮意啥物動物？你敢物去過海生館？你敢有定定去動物園？你敢有飼動物伴？你敢愛看介紹動物的節目？你敢相信萬物有靈性？動物園的動物咧想啥？你的人生敢有啥物囥佇心內無講出來的心事？你敢有佮意章魚？你敢知影伊的名有幾種講法？你感覺伊是恐怖的妖，抑是溫暖的神？

你敢會曉看好歹人？是刁工看無？抑是目睭糊著蜊仔肉？這佮價值觀、人生的計畫有關係。你的幸福源泉是啥？啥人才是正港會予你幸福的人？倚近你的人，有可能是有企圖，外表斯文，內底情緒控制無妥當的。欲按怎分辯有善心的人？欲按怎篩除無好的對象？選伴欲按怎選？愛細膩，莫予人騙去。

你幾歲離開故鄉為人生拍拚？我是18歲離開高雄去臺南讀大學，紲落愈離愈遠。你離開故鄉的心情是啥物？離開故鄉去拍拚，你敢有基本的才情佮欲成功的向望？面對社會現實，欲按怎表現家己、爭取權利、 化危機變轉機？成名了後，欲按怎珍惜名聲，知影家己人生欲愛啥？出外是欲靠啥人？出外欲拍拚有啥物臺灣俗語的智慧，會當用來提醒家己？

王桑一工一冬矣。啥物叫做浪漫？自然流露、浪漫就是勇敢，就是浪漫。千算萬算，毋值得拄搪。你一世人的想法敢會改變。細漢人定勝天，一定拚會過，食老煞愈來愈感覺，一人一款命。毋過人生有足濟選擇的點，你敢有看著天公伯仔的啟示？有的代誌是家己想欲變？有的是想足久，想欲變煞無勇氣變？有的是出大代誌矣，無變袂使。代誌來的時，你會按怎判斷才來做選擇。人講查某人有直覺，你敢欲信？上無，你會感覺較好過。選就選矣。時到才來調整。

你是𠢕讀冊的人，抑是頇顢讀冊的人？你感覺家己是天才，抑是庸才？你感覺家己是好額人，普通人，抑是散赤人？你選對象的條件是啥？敢愛佮爸母參詳？你交朋友敢會佮爸母討論？若意見無仝欲按怎？交往到啥物程度敢會老實講？若有一个條件佮你天差咧地的夢中情人，你敢會勇敢講出你的愛？講出你欲奅伊？欲用啥物步數來表達愛？啥物是人做伙較重要的咧？姼仔、菝仔按怎讀？查埔、查某俗語有啥物？