學識開咪

諾蘭將近三千年前嘅《奧德賽》搬上大銀幕，但電影入面嘅故事，同荷馬原著究竟有幾大分別？今集由原著嘅敘事結構、神祇同英雄觀講起，再比較電影點樣重新塑造奧德修斯，探討女性主義、反戰、同對殖民反思嘅訊息。

最近有人因巴士飛站，想喺 APP 投訴，點知反映意見限 100 字，於是索性用較文言嘅方式壓縮內容。網上有人覺得有趣，亦有人話：「呢啲其實只係書面語，根本未算文言文。」

近年由女權、LGBT、DEI，到言論自由、移民政策，幾乎所有社會議題都會被貼上「左膠」「右派」標籤。但究竟左翼同右翼最初係乜？今日仲可唔可以用呢套分類去理解政治？今集邀請好青年荼毒室洪恩，由近期文化戰爭開始，一路追溯到政治哲學最核心嘅概念，重新理解「左」同「右」究竟代表乜嘢。 

一講鄉愁，好多人會諗起離鄉別井、移民、旅行、成長地方，或者某些已經返唔到去嘅舊日時光。但鄉愁係咪只屬於離開故鄉嘅人？如果一個人從來冇真正離開過，熟悉嘅街道、店舖、生活方式卻慢慢消失，呢種失落又算唔算鄉愁？

好多人返工返到攰，都會幻想古代生活冇 KPI、冇升職競爭，但古人真係自由啲，定係佢哋只係面對另一套壓力？今集由「古人點樣返工」講起，重新理解士農工商，古代工作制度，睇吓現代打工仔同古代有咩分別。

科技係咪只係工具？我哋成日話科技本身冇好壞，關鍵在於人點用；但去到 AI、社交平台、智能電話同工業社會，問題可能冇咁簡單。

返工遇到困難，好多時唔只係工作本身嘅問題，亦牽涉人事溝通問題。有時同事之間未必配合得好，上司嘅方向可能會改變，團隊入面亦可能出現責任不清、溝通失準、事情愈做愈亂嘅情況。今集我哋會用《易經》，講講點樣幫人判斷處境，思考職場上遇到人事困難時，可以點樣睇清局面，作出更穩妥嘅選擇。

小朋友成長於 AI 時代，日常已經接觸到 TikTok 推薦演算法、Snapchat 濾鏡、生成式效果同各種 AI bot。佢哋可能好熟手咁玩 AI，但「識玩」係咪等於真正識用？今集《學識開咪》會由小朋友熟悉 AI 嘅生活情況講起，討論佢哋真正需要嘅輔助，點樣用 AI 培養創意，而唔係只係交功課、搵答案。最後亦會講到老師同家長嘅角色：AI 素養唔可以只靠小朋友自己摸索，需要學識點樣判斷、提問同創作。

一講李白，好多人會想到詩仙、飲酒、浪遊、任俠同自由。但如果細看佢嘅感情生活同家庭關係，李白又未必完全係一個容易被道德化讚美嘅人物。佢同孟浩然、杜甫之間嘅深厚情誼，常被後人浪漫化 BL 化；佢嘅婚姻、子女同家庭責任，反而較少被討論。今集我哋想評價李白，再問一個更大嘅問題：一個人寫得出偉大作品，係咪就可以令後人淡化佢生活入面嘅缺失？

今日講怪獸，好多人會諗起 Pokémon 或鹹蛋超人。其實人類對怪獸嘅興趣，唔係現代先有。《山海經》入面早就充滿異獸、神人、奇國同遠方世界。佢唔單止似古代怪獸圖鑑，亦反映古人點樣想像地理邊界、自然災異、神獸象徵同未知世界。今集我哋會由現代怪獸文化講到古代神怪想像，睇吓怪獸點樣連繫地理邊界、自然災異、神獸象徵，以及人類面對未知世界時嘅想像力。