有報道指出，美軍喺中東軍事行動中使用 Anthropic 嘅 Claude 協助情報分析與戰術模擬。同時，美國國防部與 Anthropic 亦因 AI 喺軍事用途上嘅限制而出現公開爭議。究竟 AI 嘅風險係咩？當AI能力快速提升，安全邊界應該由誰劃定？

呢一集我哋由《梅艷芳》《九龍城寨》《夜王》等電影出發，思考一個更深層嘅問題：點解香港近年最受歡迎嘅電影，都集體回望舊年代？當一座城市反覆重拍過去黃金歲月，究竟係單純懷舊，定係正在重新理解「時間」本身？由儒法之爭到基督教時間觀，我哋會拆解懷舊復古背後嘅循環與線性時間思想結構。問題唔在於回望，而在於香港仲會唔會再次想像未來？

今年係馬年，但原來生肖唔止係民俗咁簡單，背後牽涉一套好完整嘅時間及文化制度。由天文觀察、到曆法計算、再到國家治理同日常生活。今集我哋想從十二生肖嘅動物講起，介紹十二生肖喺唔同地區同少數民族語境入面點樣被吸收、改寫、甚至出現唔同版本。再介紹相關嘅時間系統 - 天干地支。

今日農曆年初一，但有冇諗過原來唔係理所當然係？古代農曆原來邊個月係歲首變咗幾次。呢種情況其實我哋一啲都唔陌生? 今集將會同大家講下曆法裏面其中一個好重要嘅概念 - 正朔。農曆其實唔完全係陰曆? 陰曆陽曆有咩唔同? 嚟到今日，Lunar New Year 定 Chinese New Year 嘅用法依然引起爭論。了解曆法嘅歷史，有冇可能可以跳出呢種爭論?

我哋今日習慣用「某國之人」去理解一個人，但對春秋戰國人嚟講，身份可能同時包括家族、封邑、文化圈，甚至對「周」嘅整體秩序認同。當一個人出使他國、做客卿或流動於諸侯之間，佢嘅自我認同會唔會比我哋想像中更加流動？《尋秦記》為我哋提供咗一個思考國家意識同身份認同嘅切入點。

《尋秦記》原著小說其實相當著重人性同權謀，對神秘思想嘅運用相對克制；但去到電視劇版本反而加入咗更多「天命」「預兆」同「占卦」元素，甚至出現一段關鍵嘅占卦情節，由李斯解《易經》。呢啲內容喺小說入面係完全冇出現過。今集就由呢啲改編入手，討論呢啲元素點樣反映戰國一套重要嘅思想結構。

《尋秦記》其實大量借用了墨家思想作為結構骨架。主角項少龍修習所謂「墨子劍法」，亦出現一個具高度組織性嘅墨家網絡，能夠跨國運作、介入諸侯政治；而「魯公祕錄」所代表嘅技術知識，亦明顯呼應《墨子》當中對守城、機關、工藝嘅重視。再加上項少龍身上反覆出現嘅「救人」「減少殺戮」傾向，以及故事不斷碰觸嘅命運與歷史必然問題，其實都係墨家思想入面極為關鍵嘅議題。作者點樣將一套先秦思想轉化為現代小說可以運作嘅敘事裝置？

《尋秦記》如果拎開劇情同情懷，純粹由「穿越」返戰國去諗，其實究竟聽唔聽得明人哋講嘢？又睇唔睇得明佢哋寫嘅字？ 今集就借《尋秦記》做引子，用一個比較貼地嘅方式，傾吓真實嘅古代語言係點，同埋電視劇同電影點樣處理呢個問題。

《尋秦記》有好多生活嘅畫面：主角啱啱跌落去嗰種手足無措、要搵人幫、要搵位落腳、要避開被人當成怪人，甚至連講句說話、行一步路都要諗清楚。如果你真係穿越返戰國，衣食住行係點？衣着會唔會俾人覺得可疑？最唔慣食嘅會係味道定係食嘅方式？住又慣唔慣？出行又係咩情況? 今集繼續有專家帶你走進戰國時代!

世界各地正討論限制社交媒體，澳洲率先禁止未滿 16 歲使用，並將責任放喺平台身上，實施效果如何？禁制表面係回應沉迷、精神健康同網絡欺凌問題，實際反映社會對資訊、注意力同成長環境失控嘅焦慮。究竟大人有冇責任同權力去監管小朋友使用社交媒體？Yope, Lemon8, Kick, Twitch, Snapchat 呢啲青少年人用嘅社交媒體我哋又有幾熟悉？AI 生成內容越嚟越真假難辨，會唔會之後變成連大人都需要限制？今集我哋會討論 : 應唔應該禁？點解社會會想禁？呢種禁令背後反映咗乜？家長及教師又可以點樣回應？