無仝形式的棒球實踐：陳尚季書寫的《斷棒》人生

臺語老師、業餘棒球選手，a.k.a文壇新作家、一个人會當有偌濟橫棍仔（斜槓/slash），這是咧形容《野球風雲》SP特輯的來賓陳尚季。

陳尚季是正港臺中人出身，只是大學、研究所，濟濟冬攏浸佇咧花蓮的東華大學，予伊的文字，通看會著山佮海的空闊，嘛有對過去棒球時代的數念，嘛主動走揣伊棒球人生中，有欠缺的，或者是其他重要的記持。

國小開始拍球，國中因為受傷，嘛因為厝內底爸爸的建議，應該回歸讀冊這條路，所以無繼續行向另外一坎的棒球訓練。不而過陳尚季，開展對寫作、文學的興趣，用書寫的方式，將棒球寫入去伊的人生內底。

出版《斷棒》這本棒球小說，主要用華語書寫，內底的對話，差不多攏是用臺語文呈現，欲打造往過拍棒球和教練、和同學練球的語境，得著真好的回應。

透過經驗、透過開講，甚至家己走揣有興趣的題材。親像陳尚季這本小說上尾一篇《上尾的日頭》（《最後的太陽》），就是咧寫咱臺灣予市場淘汰掉，消失去的在地本土手套品牌，伊透過考證，加上少年學師仔的角度，觀察並且書寫這个行業的變化。

陳尚季這陣嘛有臺語老師的身份，按怎將「臺語、文學、棒球」，做伙來聽《野球風雲》SP：「無仝形式的棒球實踐：陳尚季書寫的《斷棒》人生」。

野球風雲轉播車開來到桃園，欲來看桃園野球新強權！

北科附工棒球隊高一新生尤丞翊，展現伊認真的態度，予教練重用。自國小三年仔開始摃球，經歷濟濟改的失敗佮挑戰，攏無放棄對棒球的追求。佇咧國中階段，一改精彩的撲球，得著教練的肯定，自彼時開始信心大大增加，決心佇咧棒球路頂繼續向前。尤丞翊講，自國中二年仔開始，下定志願欲入美國職棒大聯盟（MLB）。所以，伊毋但練球，閣積極學英語，為旅外做準備。

球隊朱倉平教練強調，尤丞翊身體素質和品性，攏真有潛質，並且鼓勵伊繼續保持對棒球的熱情，和突破自我的決心。尤丞翊的爸爸過去佇咧伊欲放棄的時陣，共伊講：若無欲摃球，就佮我轉來做水電！聽著按呢，伊想講閣堅持一下，加上女朋友透過遠距離的電話，予伊信心，真緊就徛穩球隊重要的外野守備位置。

大溪高中棒球隊注重球員心理輔導佮棒球科學化，教練鄭錦繁強調，心理健康對球員表現真重要，所以學校特別請輔導老師定期和球員交流，幫助in克服心理障礙。

球員楊勝允自國小三年仔開始接觸棒球，經歷過病疼和低潮，佇咧厝內人的支持下，堅持落來。楊勝允表示，伊的目標是在今年職業棒球選秀中，第二輪被揀著，並強調心態調整的重要性。

《野球風雲》轉播車開來到中部，欲來看兩間中部棒球名校：臺中西苑高中VS雲林麥寮高中，其中西苑高中隊長邱乙正、閣有兩位投手鍾亦恩、江彥漢，展現少年球員對棒球的熱愛。麥寮高中球員王浩然自臺東來到雲林拍球，向望臺東小朋友嘛通珍惜每一種棒球資源。

臺中市立西苑高級中學棒球隊成立22年，2004年捌提過木棒聯賽冠軍，過去嘛是國內、外職業棒球球隊走揣球員的好所在。不而過臺中優秀選手開始去予其他縣市咧挖人才，致使球隊面臨嚴重的人才流失問題，不而過球隊，猶原用上有限的戰力，拚好成績，維持中部棒球名校的看板。

雲林麥寮通講是風頭水尾，過去因為東北季風的緣故，無適合棒球運動戶外的訓練。這陣麥寮高中已經佇濟濟人士的幫忙之下，開始起訓練基地簡單的室內棒球場，選手就會當閣較穩定練球，創造好成績。

訪談者：台灣棒球名人堂秘書長 鍾裕能

台灣棒球球壇上蓋奢颺徐生明，有人講伊是棒球魔術師，三級棒球的菁英，做過台灣國家代表隊的總教練，但嘛經歷過台灣，職業棒球上烏暗的簽賭事件，來聽客家子弟台灣棒球名人堂秘書鍾裕能，來講客家傳奇徐生明的故事的故事。

訪談者：台灣棒球名人堂秘書長 鍾裕能

《野球風雲》今仔日訪問台灣棒球名人堂秘書長鍾裕能，伊講名人堂成立的目的是，保存棒球歷史，表彰棒球先輩、傳承棒球世代，提名棒球名人。伊講：這項代誌是「和時間咧相逐」，因為對棒球有奉獻的人真濟，不而過隨時間咧行，年歲嘛愈來愈大，真正愛好好仔透過訪談，來做紀錄，若準無做，就無法度開始做落去。

鍾裕能秘書長嘛講分享第二屆入選的棒球名人王貞治的故事，做伙來聽。

《野球風雲》過去關心男性高中棒球員的表現，今仔日非常無仝款，咱觀察今年高中木棒聯賽45間參加學校的球隊內底，獨獨有一間是女力大爆發，這是來自苗栗縣的中興商工，雖罔成軍干焦2年，不而過佇咧女性「嬌」點，聯賽唯一女總教練梁逸姍的𤆬領之下，愈來愈受著關注。

梁逸姍本身是壘球隊出身，因為爸爸足愛棒球，兩位阿兄嘛是基層棒球教練，所以梁逸姍自細漢就佇咧棒球箍仔咧走跳。雖然中興商工欲招生有難度，但是拄著女選手想欲加入，欲來摃球的女學生，有影是歡迎再歡迎，球隊有兩名真優秀的女性的球員。

這兩位就是翁麗雅和駱姵如，這陣是中興商工球場頂的「女性生力軍」，面對強隊穀保家商，雖然實力有差，但是總是有幾球，投了袂䆀，摃球實實在在，一點仔都無傲嬌。

花蓮好山好水，這改因為4月初三的大地動，傷亡真嚴重，予逐家真正真毋甘。《野球風雲》轉播車，特別關懷、看顧花蓮這塊土地。

講著花蓮的體育環境，無親像大都市資源濟，斷層嘛真深，有一寡有潛力的選手一个一个離開花蓮，閣加上本底少子化的影響，致使愛組成棒球隊，根本上就是真食力，這回來到花蓮體育中學，欲來看這支球隊的棒球養成。

18冬前，花蓮體中棒球隊曾經是木棒聯賽的大強隊，上強的戰績是季軍，更加栽培出陳俊秀、鄭鎧文，這寡職業棒球好手，不而過按呢算算咧，已經是欲20冬進前的代誌囉。

花蓮體中按怎對抗這寡挑戰，予學生囡仔會當留佇故鄉拍球，守護基層棒球。行，這陣咱的轉播車就來到花蓮。

這陣高三投手楊佑安，少棒時期是佇太巴塱國小，這間國小栽培出真濟棒球明星，親像王光輝、黃忠義等老輩選手。2017年楊佑安彼時，伊和其他隊友做伙六連勝，提著第8屆紅葉小巨人杯軟式少棒錦標賽冠軍。國中煞因為走偏去空白3冬，高中時代才閣開始拍球。

上蓋感謝的猶是阿媽，過去因為爸爸媽媽佇咧臺北上班，阿媽是照顧伊和姊姊、妹妹上重要的人。阿媽看伊國中三年按呢迷失家己，實在看袂落去，講重話：「若會無欲好好仔拍球？」這句話，予伊想真久，明明過去的就是遮爾愛棒球，若會放棄這條路咧？

楊佑安靠太巴塱國小教練陳明仁的幫助，順利進入花蓮體中棒球隊，閣共伊自偏離的路，閣搝轉來，算是影響伊真深的人。

「 Scout，球探」你知影偌濟咧？棒球球探按怎做揀選新秀？今仔日《野球風雲》毋但欲紹介這項職業，嘛欲來聽看覓，美國職業棒球堪薩斯皇家隊（Kansas City Royals）亞洲區球探Nathan Miller，佇臺灣釘根，和臺灣人結連理、結婚，嘛為臺灣生下新臺灣之子：雷皓博，嘛是真有Power的高中棒球選手。

講著球探Nathan Miller的後生雷皓博，這陣已經高二，是桃園北科附工棒球隊隊裡的「黃金投手」。這對棒球球探、球員爸仔囝的組合，按怎鬥陣？爸爸講，Nathan Miller講，伊希望予伊的後生閣較濟獨立的空間，去發展棒球路，節目內容有夠精彩，緊來收聽。

野球風雲前幾集邀請全臺灣特色的棒球球隊，其中包含木棒聯賽前三名的學校新北市三重埔穀保家商、桃園市平鎮高中、高雄佛光山普門中學，閣有一寡特色的偏鄉球隊臺東體育中學棒球隊，或者是中部傳統名隊興大附屬台中高農棒球隊。有影看著真濟臺灣囡仔、客家子弟，閣有天生運動底就真飽滇的原住民選手。

這禮拜野球風雲是「開外掛」，按怎講「開外掛」？因為這寡學生球員的父母組成，是臺灣和其他國家跨國婚姻。爸爸是台灣人、媽媽是日本人，閣有因為爸爸媽媽做工課，來到臺灣生活，佇咧三級棒球拍棒球的選手。

頭一位是咱新北市鶯歌工商投手、17 歲台日混血右投徐翔聖。 2023 年被養樂多選入去，成做咱臺灣頭一位，透過日本職業球隊育成選秀，第一指名的高中生，按算今年 7 月就會使加入養樂多球隊，徐翔聖家己真有信心。

徐翔聖過去就想過欲佇日本職業棒球大舞台徛起，和媽媽做伙看阪神虎比賽大漢，伊講：「日本職業棒球就是伊自細漢上欲去的所在」。雖罔美國職業棒球欲開雙倍以上條件，但是徐翔聖猶原決定先去日職，未來有機會，才閣來挑戰美國大聯盟。

今年木棒聯賽鶯歌工商一路拍入去四強賽，徐翔聖穩定的投球內容，得著投手獎，5場贏場，防禦率干焦1.45，嘛入選大會最佳十人。但上尾的季軍賽，伊上場做Closer、煞落4分，終期尾輸予高雄普門中學，猶是有淡薄仔吞袂落這口氣。

另外一位球員是崇義高中的深見一騎，爸爸媽媽攏是日本人，爸爸因為做工課的原因來到臺灣。來到新北市汐止崇義高中，才開始正式接受正規訓練，有真好的投球天份，家己嘛真拍拚，假日閣會到私人訓練教室上課。3月底拄放榜，一改考牢兩間臺灣的體育學校，一間是國立體育大學運動競技學系，一間是國立臺灣體育大學球類運動學系。

這陣伊立定目標欲先佇臺灣讀大學，共棒球底練予在、閣磨一下。未來若有機會嘛會透過日本的本土選秀，向望轉去日本拍球。野球風雲行向國際化，頭一站來日本站，邀請你來收聽。

《野球風雲》節目轉播車今仔日開來到「國立中興大學附屬臺中高級農業職業學校棒球隊」，這支球隊成軍超過20年，雖然校園內無正式的球場，干焦有簡單的內野練習場，但是佇遮栽培出真濟球星，親像國防部長張育成就是佇這間學校出身。

這集咱邀請客家鄉親、高二投手張翊笙，第二位是鎮守游擊的高一學生李楷棋，是來自臺中市和平區的泰雅好手。楷棋自國小二年仔開始拍球。過去因為學校的關係，拍盃賽攏無著等，無法度拍到全國的前幾強。不而過，來到興大附農，才高一的身份，就靠伊的實力，徛穩先發游擊和二番的角色。

投手張翊笙身材較細隻，食袂大箍，過去定定受傷，過去有淡薄仔失志。開始重量訓練以後，身體有較好，實力嘛沓沓仔粒積起來。兩人對未來的看法，攏想欲去國外拍球，想欲和學長張育成仝款，去美國拍開展職業棒球路。不而過楷棋真驚英語講：「上英語課猶原聽較無」，但是伊承諾會改變家己，好好仔進步。楷棋嘛想欲增長家己的英語力，佇遐好好仔享受摃球人生。

這兩个學長佮學弟，蹛仝間宿舍，感情好甲，到底節目上閣講啥物「棒球經」，緊來聽野球風雲你著知。