《野球風雲》轉播車開來到臺東大學附屬體育中學，欲來關心這寡東部囡仔，雖罔資源無大都市濟，但是一步一步改善人才流失的問題，將臺東優秀的囡仔留予牢。舊年木棒聯賽創造創隊以來上好第三，今年雖然干焦只有第六，不而過in猶是佇咧每一場比賽，攏展現東部囡仔的奮戰精神。

今仔日《Hito大人物》是咱臺東體育中學的投手「陽崧儒」，看著崧儒的姓，無毋著，就是「臺東陽家班」！爸爸是綠島公館國小教練陽一平，叔仔是前職棒投手陽建福，家族優秀的棒球基因，閣有大崧儒一歲的堂的堂兄陽柏翔，前往日本挑戰甲子園。原本陽崧儒嘛欲去日本，最後選擇留著咧臺東發展。毋過也落戰帖、「唱聲」堂兄，講「三粒球解決陽柏翔」。

另外一位是東體棒球隊隊長的林泊廷，是團結規隊重要的指標。雖然伊講「球技無遐好」，但是教練看泊廷較好鬥陣，予伊隊長這个身份。舊年因為東體去美國拍Baby Ruth盃賽，泊廷未來已經有去美國讀冊的目標，欲和兩位隊友做伙去美國阿肯色州讀社區大學，那讀冊、那摃球。泊廷的爸爸、媽媽雖然毋甘，猶是透過節目，予伊滿滿的祝福。

《野球風雲》關心高中學生球員，臺灣棒球三級棒球系統化養成，自高中到大學，南台灣的高雄嘛真有發展，尤其佛光山普門高中，延續到南華大學，有真完整的人才培訓。這集咱野球風雲轉播車落南開來到高雄佛光山的普門中學。

今年木棒聯賽普門中學，展現「屬武」之人的韌命精神，佇咧季軍賽倒贏鶯歌工商。球隊自2013年7月初1創立到今11冬，已經是新的南霸天。雖罔是佛教學校，不而過球員來自無仝宗教，閣較學會曉包容。球隊要求球員「品德上重要」，閣來才是球技。球員的心態比較閣較「定著」，也就是華語所講的「比較穩重」。

木棒聯賽賽季，隊裡的柯皓鈞扮演「關鍵打擊」，帶動球隊開展「反攻」的氣勢。血統來自原住民族的魯凱族和泰雅族，展現天生的好球感，今年毋但打擊受著肯定，守備更加得著最佳外野手的榮譽。未來向望球衫改用族語名班德勒，正名身份挑戰職業棒球路。閣有優秀的投手陳勇志，嘛欲來《野球風雲》節目，講出伊的棒球故事，敬請收聽。

《野球風雲》轉播車開入來桃園市平鎮高中，2003年成立的棒球隊，這陣拄好21冬。桃園過去被笑講是野球沙漠，是平鎮高中跳出來，延續桃園三級棒球路。

故事通自2002年桃園縣時代，桃園新明國中青少棒球隊講起，無正規的棒球場，練習攏是佇咧學校的紅毛塗地，三不無時練習趨壘、接球，身軀全傷，不而過in創做「紅毛塗地傳奇」。

彼時提著桃園30外年來，頭改全國青少棒錦標賽冠軍，雖罔提著冠軍，這寡學生囡仔拄欲升高中，縣內無高中棒球隊好延續的大難關，經過濟濟人的拍拚之下，總算揣著平鎮高中有意願，設立棒球體育班，真無簡單才完成桃園市內三級棒球接接，共好的棒球人才留佇咧桃園。

今仔日咱欲來看這支球隊的黃金左投林維恩和強棒一番許庭綸，in未來結束學生棒球、畢業後，按怎開創野球人生。

《野球風雲》轉播車開到木棒聯賽冠軍現場，看著這寡少年學生球員，完成高中木棒聯賽冠軍戰二連霸，毋但打擊表現出脫，打擊獎頭3名攏是穀保的球員，其中張乙安（5成91）、古定玄和陳睦衡（5成31），規个聯賽的MVP，嘛是穀保的投手張峻瑋。

咱的轉播車首先邀請少年球員二刀流選手、穀保家商棒球隊隊長陳睦衡，來到轉播車頂面，分享伊的棒球人生，伊講「往過做投手，國中因為受傷，差一點仔放棄」，教練知影這个囡仔，棒球天份佮實力攏真飽滇，為著欲共留咧繼續拍球，教練特別安排「海產店之約」。受著教練和先輩學長的鼓勵，和陳睦衡拍勾仔（打勾勾），約束繼續拍球，才予伊延續棒球這條路。

另外一位來到野球風雲轉播車的投手蕭齊，198公分的身材，是出名的2米「躼跤投手」。英語有夠讚，已經做好萬全的準備，國內外的球探，攏咧看穀保家商的球員，有啥物款的好表現，準備欲佇畢業後，趕緊共優秀的球員簽入去，進一步培養。

來賓：啾啾麥陳宏宜

特約主持人：黃國洲

臺文版

體育主播啾啾麥陳宏宜，30歲才正式開始投入體育主播的工課，不而過入行的第二年，因為感覺無受重用，心裡想講欲擲離職單，差一點點仔就離開主播臺。

啾啾麥轉念，感覺只要有鏡頭，一定愛盡全力發揮家己的才調。因為伊知影：若準表現傷束縛，伊就會予「產業潛規則」，捒離開舞臺光環。節目頂會當表現就盡量表現，有影做出成績。

表現愈來愈受著重視，無奈體育頻道佇咧大環境下，煞一个一个喝停，啾啾麥體育主播的生涯，隨頻道收起來暫時喝停。

期間伊接過真濟通告，其中有一冬，中信兄弟邀請伊做主場網路轉播的主播，予伊和體育的路閣接起來。

接落中信兄弟網路主場轉播的工課，故事就是遮爾仔變化萬千，其中的「鹹甜苦澀」，啾啾麥攏總體驗過。播球有影「鋩鋩角角」，煞因為傷過「老實」，去予球迷「大大洗面」。到底發生啥物代誌，做伙來聽。

華文版

體育主播啾啾麥陳宏宜，30歲正式加入體育主播行列，但入行的第二年，因為不感到受重用，心裡萌生丟離職單的想法，差點就離開主播臺。

啾啾麥轉念，覺得只要有鏡頭，一定要盡全力發揮自己的長處。因為他深知：若表現太收斂，就會被「產業潛規則」推遠、離開舞臺光環。因此，節目上，能表現就盡量表現，果真做出成績。

表現愈來愈受重視，無奈體育頻道在大環境下，一個一個收場，啾啾麥體育主播的生涯，也隨頻道收起來，暫時下臺一鞠躬。

期間他接過很多通告與工作，其中有一年，中信兄弟邀請他擔任主場網路轉播主播，讓他和體育的路再度接上線。

接下中信兄弟網路主場轉播的工作，故事就是有這麼多的變化萬千，其中的鹹甜苦澀，啾啾麥都一一體驗。中信兄弟主場播球，不比一般來說體育頻道播球，太多播球的「鋩鋩角角」。啾啾麥因為太過「老實」，被球迷「大洗臉」。到底發生什麼事情，一起來收聽。

特約主持人：黃國洲

來賓：江仲豪 老師

江仲豪野球底真深，毋但做球員，嘛做過教練，甚至做過兄弟象的總教練。回顧伊的棒球路，自三級棒球少棒開始摃，拄好赴著咱臺灣棒球史上第一波懸峰，江仲豪就是其中一位代表性人物。

國中、高中攏佇美和中學拍球，濟濟改代表臺灣去國外比賽，提著「世界第一」。自美和青少棒、青棒，三級棒球結束以後，閣參加業餘成棒，1990年中職開始摃、加入兄弟象，赴著臺灣職棒的開展。

江仲豪尾手轉任教練，1996年至1998年升任總教練，雖罔拄著職業棒球第一波簽賭事件，臺灣棒球環境變甲真差，票房普遍無好，做教練的猶原愛鼓舞所有的選手。

離開職業棒球短暫移民美國，有機會轉來臺灣，就轉來故鄉臺中，佇咧西苑教高中棒球。2013年透過朋友介紹，江仲豪有機會西進中國教棒球，來到北京北方工業大學做教練，校長攏叫伊「江教授」。彼時嘛𤆬8名台灣學生囝仔做伙來到遮讀日文系，這批學生出業以後，有6人留佇咧中國，到基層學校或者是球隊教棒球，甚至開體育傳播行銷整合公司，雖罔無繼續拍球，不而過攏為棒球產業開枝散葉。

一生攏奉獻佇棒球這項運動，江仲豪笑講，閣幾年仔就欲退休，但是愛棒球的心，是永遠袂斷。伊按怎看兩岸棒球發展，做伙收聽《野球風雲》節目。

 《野球大辭典，四聲道做伙展》

這集單元欲紹介，9个守備位置、各守備球員的講法，敬請準時收聽。

特約主持人：黃國洲

來賓：馮勝賢

馮勝賢七個月就早產出世，因為肢體上的阻礙，自細漢就愛穿鐵鞋。一直愛到五歲，才會當正常行路。

會拍野球，毋是因為佮意野球。是因為參加球隊就會當搬到臺中和母仔蹛。轉學去到臺中太平國小，因為身材比起其他選手，猶是有較差，所以定定無機會出賽，甚至全隊攏欲升起去美和中學國中部，馮勝賢猶無佇名單之內，是阿母跪落去求教練，伊的棒球路才無斷去。

馮勝賢的母仔，一直是伊親情上大的寄託。做老母的對伊講：「咱出身單親家庭，莫製作社會問題。」老邦一直共這句話，囥佇心肝底。所以伊開始苦練，嘛骨力共身體食較勇壯咧。一步一步選牢國手，加入職業棒球。

職業棒球時代，兄弟隊教練榊原良行對伊影響上深，馮勝賢嘛展開「鐵血」職業運動員的人生。自透早到半暝，逐工愛承（sîn）超過3000粒球。 榊原良行教練對老邦講：「跤腿斷去才通落場」；「連遮的球，攏接袂起來，是欲按怎做內野手」。

聽著教練按呢講，馮勝賢去予伊激著，手提一粒球，就敲（khà）對頭殼頂起去，血是流袂停。但老邦回想講，就是自彼粒球以後，承球都較有法度倚手套來接。榊原良行教練看著彼幕，欽佩馮勝賢、對伊講：「你比日本人，閣較成日本人」。老邦聽著伊按呢講，伊心內暗想」就有價值矣」。

特約來賓 : 馮勝賢老師、黃國洲 老師

「臺灣國球是棒球，原住民打擊是一流，客家精神共下守(客家)，野球風雲做盟友，U pang-ciw ku ka’ulahan nu maku.(南勢阿美語)」，聽《野球風雲》這个名，就知影咱重視臺灣每一个族群的棒球選手，嘛欲透過廣播予閣較濟人，理解非常多元的體育文化。

《你是我的Hito，野球風雲人物》

第一集咱就欲邀請人生仝款有足濟「第一」的「老邦」馮勝賢，《你是我的Hito，野球風雲人物》訪問伊的人生，是按怎有遮濟「第一」。第一位讀碩士、博士的棒球選手，嘛是中職大聯盟頭一位有「球員」身分的「秘書長」，過去伊咧拍職業仔的時代，「第一年」就提著「新人王」。

不而過欲講遮濟第一奢颺的表現進前，愛先講另外一段故事。1999年彼冬，馮勝賢被簽約入去職業棒球聯盟，仝年人猶未報到，伊入選亞錦賽國家隊選手，欲替臺灣拚奧運資格門票。

關鍵對日本的比賽，九局下半局臺灣1:0領先，馮勝賢煞因為三壘守備失誤球漏去，閣予日本隊摃一支「再見安打」，去予日本盤過，彼場比賽輸輸去，無法度提著奧運資格。馮勝賢嘛因為漏球，規世人予國家隊除名。不而過，伊永遠會記得這个教訓，「歸零」了後，東山再起精彩的故事趕緊來收聽。

《野球大辭典，四聲道做伙展》

這个單元邀請黃國洲老師來共同主持，國洲老師和阿旻就親像「battery，投捕搭檔」仝款，主持甲非常鬥搭。自這粒關鍵的「球」講法開始，美國是棒球的起源地，英語名號做「Baseball 」；傳去到日本，日本人叫伊「やきゅう」就是「野球」，日本閣掠伊外來語音譯「ベースボール」。日本時代傳來到臺灣，咱愛耍球的老輩，就用倚音，共漢字寫做「麥斯帽屢」（be̍h-su-bō-lú），真正趣味，另外閣有啥物講法，一定愛收聽、學起來。