Diario Cultural Zeta 3x07: Neste programa montamos un fiandón xusto no Padornelo. Alí é por onde se move O Fiand´´ón Berciano, unha asociación de xente moza que axita a cultura e o ocio da comarca. Están deste lado dos marcos?, eles nos dirán! Nos Clázicoz con Z, alucinamos con 'Auambabuluba Balambambú', o libro que escribiu Nick Cohn con 22 anos e no que non deixa títere musical con cabeza. Marta Coira trae as novidades do videoxogo zeta por excelencia: os Sims 5. Nas colaboracións, Tamara Andrés preséntanos o cómic 'Nós, seis', de Julia Lago, e Ana Abad achéganos a nova peza teatral de Mevadeus.

Diario Cultural Zeta 3X06: Cibrán Tenreiro volve triunfante ao Zeta como convidado. É o coordinador do curso de Podcasting que organiza a USC e axúdanos a descifrar un pouco mellor o medio. Debe de ser o Zeta dos reencontros, porque en 'Máis alá do Padornelo' atopamos unha muller que sobreviviu un furacán e unha invasión de caimáns: Celia Riande, en conexión desde un centro para xubilados de Florida. Marta fálanos do Pokemon español (ou peninsular, vale), que ten uns ximnasios para poñer os teus pokemons todos petados (Silvia dixit). Os colaboradores tamén veñen finos: Sara Donoso lévanos a Lugo para coñecer Leira Haus e non trae sacho nin nada; e Jesús Silva fala por fin de como sacar cartos con iso de estudar Comunicación Audiovisual. A resposta está na publicidade. Seguídenos para máis consellos.

Diario Cultural Zeta 3x05: Cambiamos o Estudio 5 pola rúa neste programa especial dende o Festival Internacional de Cine Curtocircuíto. O primeiro en poñerse diante dos micros colocados ás portas do Teatro Principal (Santiago de Compostela) foi Pela del Álamo, director artístico do festival. Recibimos tamén a cineasta Sol Mussa (sen camiseta de Shin Chan pero coa súa peza 'Proxecto X') e a Helena Salgueiro, que formou parte do xurado da sección Planeta GZ. Miramos para o talento emerxente da sección Supernova e convidamos a Rubén Suárez para falar da súa curta, 'Abismo'. Ademais, as nosas colaboradoras Tamara Andrés e Alejandro Gándara buscáronlle a parte literaria e musical a un evento que é moito máis ca cinema.

Diario Cultural Zeta 3x04: Que pasaría se xuntamos os títulos de Arancha Nogueira, Antía Yáñez, Carlos Lixó, Sleepy Spice e moitas outras? A Silvia López aparecéuselle un relato. Pero, para as cousas importantes, acudimos aos 'Clázicoz con Z'. Lucía Junquera recorre ás 'Entrevistas con historia' de Oriana Fallaci e manda un saco de ánimo ás estudantes de Xornalismo. No 'Máis alá do Padornelo', viaxamos ata La Paz, no estado mexicano de Baja California Sur. Alí vive Lorena Núñez (Baleira, 1997). Marta Coira trae recomendacións de videoxogos para desfrutar en grupo neste outono. Colaboran neste programa Ana Abad, que nos presenta a compañía Cacharela Teatro, e Sara Donoso, que nos fala de fanzines e autoedición

Diario Cultural Zeta 3x03: Unicornios lingüísticos son Inaciu Galán e Iruñe Arkakuso, dous youtubeiros e creadores de contido na rede en linguas non hexemónicas. El en asturiano e ela en euskera. E para lingua non hexemónica, o inglés. Chamamos a Sol Mussa, artista viguesa en Londres, que nos di que fala máis galego que inglés. Marta ponse en modo detective na súa sección de videoxogos para tratar de atopar, coa axuda de Carlos Pereiro, ao hacker do GTA VI. E os colaboradores Alejandro Gándara e Jesús Silva tráennos música e cine para pechar o programa.

Diario Cultural Zeta 3x02: Comezamos falando da chegada de setembro, do novo curso e da rutina. Estamos todos moi tristes, pero Silvia contactou cos mellores picadiscos para poñerlle banda sonora, desde os primeiros cafés no Maycar ata acordarse dos caseiros. Lucía trae un novo Clázico con Z, o cómic 'O fotógrafo' de Didier Lefevre e di que como ten 20 anos pode ser considerado un clásico (como as presentadoras do programa). Marta pon o contrapunto Zeta con todas as novidades da industria do videoxogo, como The Legend of Zelda ou God of War. Colaboran neste programa Ana Abad con Diego Chamizo e Tamara Andrés con Nico Carreira. O Zeta en marcha!

Nova temporada do Diario Cultural Zeta! Comezamos o curso presentando aos novos colaboradores (en realidade son todos vellos): Ana Abad nas artes escénicas, Tamara Andrés na literatura, Jesús Silva no audiovisual, Sara Donoso na arte e Alejandro Gándara (o verdadeiro novo) na música. Lucía Junquera e Silvia López continúan presentando este espazo, pero non teñen claro que van facer (todo a última hora). E incorpórase ao equipo Marta Coira para manter o nivel de modernidade. Vide a nós, que temos moitas novidades!

Diario Cultural Zeta número 31 (xa hai que ser desgraciadas para rematar unha temporada no número 31). Neste especial fin de curso, Lucía non tiña ganas de traballar e decide facer un repaso do que significou esta tempada para o equipo. Silvia trae un dos seus 'Meu dito' sobre as despedidas, pero conseguimos conter as bágoas. Celia anima un pouco a cousa falando de 'Crush', unha película "high school" con moi boas referencias, e Anxo Fariñas ven como convidado porque non hai quen o bote dos nosos estudios. Como convidadas, temos a Tamara Andrés e Jesús silva, aínda que estamos un pouco enfadadas con Jesús porque non se dignou a aparecer no estudio multimedia. (si, liches ben, tamén podes vernos en youtube).

Diario Cultural Zeta número 30, unha década estraña, se me preguntas. Tan estraña como as cousas que pasan en Hawkins, que entre demogorgons e as opinións de Celia, non levantan cabeza. Pero antes de comentar Stranger Things, Lucía déixanos unha reflexión sobre as etiquetas e facerse visible como disidente. No Cuestionario Zeta temos por fin a Bruno Arias, e algo debeu facer Silvia, que co seu refrán provocou que tiveramos a un xuíz na porta do estudio. Unha vez aclaradas as nosas ilegalidades, viñeron os colaboradores habituais, Ana Abad e Cibrán Tenreiro. Escoitade o programa, que nos dá moito traballiño facelo.

Diario Cultural Zeta número 29 (non acabará nunca esta tortura?). Lucía foi ao teatro e, ademais de ter unha experiencia relixiosa, di que seica a vida é farsa, teatro, comedia... e ponse intensa. Celia mantén o nivel de intensidade alto e comenta 'Cinco lobitos' no seu cineclube particular. Ser nai e filla, unha movida. No cuestionario Zeta poñemos a proba a nosa "zeteza" facendo un tiktok coa marabillosa Hydn. E Silvia López ponse a ouvear sen xeito, que seica anda con lobos (as demais somos máis de vampiros). Coas colaboracións de Jesús Silva e Sara Donoso. Dádelle ao play, ho!