Euse Podcast als perfekti Matchvorbereitig für hüt Abig:

Mir lueged zrugg ufs Zürcher Derby vom Weekend, wo vor beeidruckender Kulisse im Letzigrund stattgfunde hät. FCZ-Sieg, GC-Frust, Derby-Wahnsinn und es Stadion, wo wieder emal komplett uf Betriebstemperatur gsi isch.
Und mir stimmed eu ih uf die heissi Schlussphase vo dere Saison: No zwei Spiel — de FCZ schiebt jetzt ä ruhigi Chuglä und GC befindet sich im nackte Kampf ums Überläbe. Hüt chunnt Winti in Letzi. Meh Brisanz gaht fascht nöd.
Inelose!

D'Grasshoppers überrasched nöd und verlüred mit 0:2 geg Servette. De FCZ chunt nöd über es 2:2 geg Winti und de Zürcher Fuessball macht momentan eifach kei Freud.

Bi GC gits unglaublich viel Baustelle, nöd nur ufem Platz sondern im gsamte Konstrukt vo de GFAG. Eh Challenge League tauglichi Leistig - und das sit Mönet!

De FCZ schaffts nöd sich ih de Tabelle abzsetze und mir bespreched, welli Spieler im Summer chönted verpflichtet werde und ob de Marcel Koller de neu Mohammed Salah us Ägypte mitbringt.

Danke fürs Zuelose und sind lieb mitenand.

Bim FCZ startet d'Amtsziit vom Carlos Bernegger mit eme Totalabsturz. Vor em Spiel seit de Interimstrainer, de FCZ stöchi im Vordergrund – und stellt denn so drastisch um, als müesst er sich selber es Denkmal setze. Brecher zrugg im Goal, Tsawa als Rechtsverteidiger, Kény irgendwo zwüsche Zehner und Offensivexperiment, Hack komplett dusse und Vujevic ine. Nach 21 Minute isch s'Spiel praktisch gloffe, nach 40 Minute stahts 3:0 für Lausanne. Zur Pause macht de Bernegger en Drüfachwechsel - au das bringt nüt. De FCZ isch uf em Platz purs Chaos.
De Grasshopper Club zeigt gege Luzern zerscht e Reaktion ufs Out im Cup und gaht mitem 1:0 id Pause. Aber halt, es isch ja immerno GC: statt de Vorsprung hei z'bringe, kassiered d'Hoppers no zwei Goal vom Spadanuda und verlüred 1:2. Wieder kein Befreiigsschlag, wieder kei Rueh. En Match, wo me nachher seit: eigentlich hätt mer uf de FCZ chöne ufschlüsse. Wär mer nöd selber so schlecht.

De Grasshopper Club verspielt vor respektable 4'000 eigene Fans uf de Lausanner Pontaise d'Chance uf de Cupfinal. Ufem extra defür produzierte Cup-Pulli chan mer jetzt e 2:0-Niederlag gege de Unterklassig iiträge lah. Puri Frustration bi GC und sine Ahänger nach ere indiskutable Leistig. Beunruhigendi Vorzeiche au für die wahrschinlich bevorstehend Barrage.
Bim FC Züri zieht mer d'Rissleine mitem Schönredner und Ad-Hoc-Analyst Hediger. Gliichziitig wird kommuniziert, dass mitem Marcel Koller die nägscht GC-Legände zum FCZ chunnt. Cheftrainer ab Juni 2026. Interimistisch übernimmt de bisherig Co-Trainer Carlos Bernegger d'Mannschaft. Au er mit Hopper-Stallgruch. Gwüssne Fans vom FCZ stinkts - anderi freuet sich uf en nachwiislich erfolgriche Mäse Koller.

De letscht Spieltag vo de Regular Season 2025/2026 gaht id Gschicht ih - zumindest für de Gernot Messner wo sin erste Sieg als Cheftrainer chan fiire und sich nach Schlusspfiff vo de Fotografe au dementsprechend ablichte laht.

Bim FCZ hingege isch nur am Dennis Hediger sis Hemd gspannt, de ganz Rest ufm Platz isch müed und schlaff.

Mir reded wie immer über eusi beide Teams und wunderet eus über die fehlendi Krtik bim SRF gegenüber de SFL-Schiedsrichter.Isch de Michi Frey doch noch eine für d'Nati und wenn nominiered mir endlich d'Spieler vo eusne erfolgriiche U-Mannschafte is Fanionteam -> Lieblingswort vom Jan.

Das und meh ih de 12. Epdisode vom Züri Podcast Derby!

Ostermäntig, 22 Grad und Sunneschii. Es git nöd viel, wo eim jetzt no d'Stimmig cha vermiese - usser du bisch GC oder FCZ Fan. Zum Glück gits au scho vorem Stadion Bier.

GC spielt en desolate Fuessball und de Alain Sutter machts mitm Esel-Verglich nur no schlimmer. De FCZ grundsätzlich stabil und mit guete Ahsätz, findet aber sin Meister ide starche Ostschwiizer.

Mi reded über de nächsti Kaderumbruch bi de beide Mannschafte und was GC jetzt no vorem direkte Abstiig chan rette.

Viel Spass und danke fürs Zuelose!

D'Jubiläumsfolg vom Züri Podcast Derby

Kei Niederlage für d'Zürcher Fuessballvereine. Dank Natipause.

GC zelebriert sich scho als Cupfinalist und de FCZ gewährt 200 Freispiel, leider aber nöd im Stadion. Mir lueged no chli ufd Nati wiiteri Internationali Begegnige und au de Jan hät jetzt langsam aber sicher au chli Vorfreud ufd WM.

Wo GC vor einere Wuche no 5:1 gege Thun verlürt, machts de FCZ besser und schlaht de unagfochteni Leader mit 2:1. Ob das ah de Kriisesitzig liet wo unter de Wuche stattgfunde het?

Und bi GCZ vermisst mer so ziemlich all Attribut womer im Abstiigskampf brucht. Kei Kampf, kei Iisatz, kei Wille und Quittig isch eh 0:5 Niederlag gege Servette Genf.

Therapiestund für de Jan und Glücksgfühl für de Michel. Das und meh wird ih de 9. Episode behandlet.

Au am 30. Spieltag schaffeds die beide Mannschafte nöd. Niederlag Nummer 17 für den FCZ und 16 für d'Hoppers. De FCZ kassiert wieder ih de Schlussminute s'entscheidende Gegegoal und GC gaht im Schneegestöber vom Berner Oberland sang- und klanglos mit 5:1 unter.

Thun grüesst mit 71 Pünkt vom Ligathron. 74 Pünkt hend die 3 Zürcher Verein zäme - das seit eigetlich scho alles...

Da hilft nur no Galgehumor...

Spieltag 28 & 29 ih de Super League und es isch eh englischi Wuche zum vergesse! Vier Spiel, null Pünkt und die drü Zürcher Verein bildet 'Schlussliecht vo de Liga. Isches Ziet für en Trainerwechsel oder bringt das Ahleihe-Gschäft vom FCZ neue Schwung is Heereschüürli?

Das und wiiteri Theme werded ih de 7. Episode besproche - wie immer mit Humor und analytische Geniestreich