86. 【潮文】从小就立Flag，一直被打脸

立Flag，係近年来喺网络上十分常用嘅一 个词语。关于佢嘅出处有多种解释，就费事啰嗦。我承认当我第一次听到哩个词嘅时候，我完全唔知道佢咩意思。因为立Flag嘅字面意思同实际含义实在大相径庭。立Flag嘅立......就是树立？Flag的中文就是旗帜，咁立Flag就是树立旗帜。

咁咪啫係扯旗？

OK...原来立Flag係扯旗嘅意思。

果阵时係朋友圈见到某啲人都话自己要立Flag，要立一个大大嘅flag，

我真係哇一声叫出嚟，咁都讲得出嚟嘅咩。而且我仲亲眼睇到佢，话自己从年头立flag到年尾。当时我心中只有一个感觉：佩服。持久，相当持久。

不过佢发晒朋友圈咁係想点呢？得个讲字冇用啊，又冇图。

羞耻，相当羞耻，不知廉耻。

正当我准备攞个手机出嚟影幅相，顺便发朋友圈话自己都要立大flag嘅时候，阿实制止咗我。

阿实：“尴尬，立Flag唔係咁解噶”

尴尬：“喂，你入嚟唔敲门嘅！？变态噶你！？”

阿实：“你先变态，着翻条裤啦”

尴尬：“你就变态，唔见我立紧flag嘅咩”

于是，喺我地用咗3分钟嚟搞清楚，原来我地两个都冇资格话人地係变态之后。阿实就开始用自己嘅亲身经历，为我清楚解释“立Flag”嘅真正意思。

原来，立Flag嘅意思係完全同扯旗毫无关系。而佢嘅真正意思亦颇为广泛，但简单嚟讲，立Flag嘅其中一个常用含义係“订立目标”。譬如话，阿实喺5年前曾经立Flag，话25岁之前一定要揾到女朋友。而“揾到女朋友”，就係佢立嘅Flag啦。

到咗今年，终于啊，阿实话自己，筹备紧皈依佛门。祝福佢啊。

除咗“订立目标”，立Flag嘅另一个常用含义，可以解释为“释放某啲预期信号”。哩种解释喺影视作品中就十分常用。譬如话，某个角色话自己“做埋一铺就金盘洗手”；又譬如话，某个角色係上战场之前同队友讲，自己答应家乡的未婚妻要係“战斗胜利之后翻去食佢只鲍鱼...捞面哩味拿手住家菜”。诸如此类展望未来甚至立誓嘅说话，都係“释放某啲预期信号”亦可以称之为立Flag。

所以，以上就係“立Flag”喺当今网络世界最广泛嘅用意：“订立目标”或者“释放某种预期信号”。

咦？咁听上去，立Flag解释为扯旗都唔係冇道理喔，扯旗哩个行为都係“释放紧某种预期嘅信号啊”？佢咪就係预期紧要咩咩咯！

实：“尴尬，你个变态”

尴尬：“扑你个乖，入嚟要敲门啊！扯！你同我扯！”

阿实：“扯？扯旗个扯？”

尴尬：“扯啊，啫係lan啊，啫係滚你嘅JB蛋啊！”

阿实：“着翻条裤先讲嘢啦......”

呼~好啦，我地唔好理会果啲变态。

回归翻今期嘅话题：立Flag。

其实讲起立Flag，就不得不提一个响当当嘅名字。

佢係一个搞咗5年网络电台嚟到今时今日已经理智失控而且发际线都失控嘅人；

佢係一个拥有大嗱嗱20万订阅但参加比赛网上投票得2000零票嘅网络人气主播（抛弃个弃）；

佢係一个超级靓仔。

以上3条，只有其中1条係真嘅。係边条好明显啦。

Anyway，讲紧嘅当然就係院长尴尬，亦即係本人。

每到年尾，本人都钟意回顾下自己一年以来做咗啲乜嘢，顺便向明年立Flag。

今年直播收听人数要到达50万人，係本人立过嘅flag；

今年要开一场个人Talk Show，係本人立过嘅flag；

今年多啲更新，亦係本人立过嘅flag；

今年唔好再立旧年立过嘅flag，亦係本人立过嘅flag;

不停咁立flag立flag立flag立flag，flagflagflagflag U！What the hell?

我深感懊恼，点解我立嘅哩啲flag，都仲未实现。

如果要得到哩个问题嘅答案，我认为就要从根源揾起。

所谓三岁定八十。立Flag哩件事，可能係我从细就养成嘅坏习惯。

于是，前一段时间我做咗件事。

就係回到过去。

你冇听错啊，就係“想回到过去”果个回到过去，就係“谁求谁，春秋都只听天地号令”果种回到过去。是咁的，我问肥猫A梦借咗部时光机，“shu”一声就穿越翻到去自己仲读紧小学嘅时候。哇，一听就知係真噶啦，讲得几咁详细。

唔通你仲唔信咩。

要查清楚点解我宜家成日立Flag，就必须从根源查起。

我一落机，咁啱见到当时正处于小学鸡嘅我，同同学仔一齐喺课堂上接受紧老师嘅盘问。

老师：“各位同学，今日我地要讨论嘅题目呢，就係‘我的理想’。”

（点解老师把声咁怪嘅）

老师：“大家都分别讲下，自己大个之后想做咩工作啦”

（哇，真係怀念啊，我细个嘅时候啲老师係用广东话教书噶）

老师：“咦，小尴同学，你好似蠢蠢欲动咁喔”

（嗯？老师屈我答问题）

老师：“嗱老师问你，你长大之后要做咩工作啊”

小尴尬：“老师，我长大之后要做科学家！”

（科...科学家？唔係咁搞笑啊嘛）

我：“你讲大话！”

哩个时候全班小学鸡连同老师都一齐望住我哩个来自21世纪嘅胡须型男，一面不知所措。

我知道佢地唔单只俾我哩个突然出现嘅男人吓亲，仲被我英气嘅脸庞震慑住。

哩个时候老师忍唔住开声：“哩位先生，麻烦你着翻条裤啊”

我：“下，咩话？”

“shu”一声，我就咁又从过去翻到嚟现在啦。

噢，我冇逃跑，我赶时间啫。

不过，我终于明白啦。

细个立Flag话长大要做科学家，其实根本就係乱嚟。

如果俾我答多次，我一定会咁样讲...

小尴尬：“老师，我长大之后要做一个晨咁早逼地铁翻工午饭时间得半粒钟然后直踩加班到9点一个礼拜做足7日冇时间又冇钱嘅亡命上班族啊！”

老师：“答得好啊，小尴同学，哩个学期你就企喺课室外面听课啦”

小尴尬：“多谢老师！......吓？”

如果当时咁讲，至少宜家实现咗细个立嘅第一个Flag。

不过，我依稀记得，当时自己回答要做“科学家”的时候，係有一种奇怪嘅感觉嘅。

係一种轻微嘅成就感。

当喺全班同学面前，讲出高大上嘅“科学家”三个字嘅时候，仿佛我已经成为咗半个科学家了。至少我会被大家认为，係一个“以当上科学家为目标的细路”，听上去几招积，只脚都en得劲啲。

哩个时候，我察觉到答案嘅一丝踪迹。

点解我咁中意立Flag，而又无办法实现自己立过嘅flag呢？

原来因为立Flag本身，已经可以带比人成就感。

而重点係在于：公开立Flag。

一个人匿埋喺房间里面立Flag（我讲紧嘅係“订立目标”，唔係扯旗，唔好误会），或者喺心里面暗暗立Flag，得到嘅只会係自我激励嘅效果。但公开立Flag，喺所有人面前讲出你的目标志向，得到的效果就係其他人认同你的果份成就感。

我将佢称之为：“成就感预支”

即係预先提取成就感。

可以想象一下，当你要完成一个成就。喺做之前就宣布哩个伟大目标，定係喺达成之后才公告天下，得到嘅感觉可以係截然不同。达成之后先话俾大家知，当然会得到大家惊喜嘅赞赏，哇，原来你咁劲。但係，喺未达成之前，甚至喺未开始做之前就宣布你哩个目标，得到嘅都有可能係大家嘅赞赏，哇，劲喔你，好有志向啊。

譬如，喺朋友圈发一条，我决心今年一定要考到注册会计师证；

大家可能会留言：好劲啊，加油！听讲好难个喔！你咁犀利一定得啦~

又譬如发一条：我今年嘅目标係跑10K，减10斤，练腹肌同马甲线！

大家可能就会留言：支持你！马甲线好吸引咯！对腹肌完全冇抵抗力啊！

再譬如话我自己嘅例子，当我讲话要喺今年开一场个人Talk show，大家嘅反应係：好期待啊，正啊！我一定买票！（多谢，你地话噶，我逐个marked低名噶啦）

喺公开宣布你嘅目标之后，无论你开始走上实现目标嘅道路与否，大家都会认为你已经係一个向目标奋发紧嘅人，而且哩个目标听起身仲唔係咁简单。跟住，喺大家向你表达支持，认可甚至赞赏之后，就不禁令人想象到成功果一刻嘅场景，令你提前享受到，实现目标果一刻嘅成就感。

我认为可怕嘅地方就係哩度了，预先提取咗成就感，而成就与否都仲係未知之数。

成就感唔一定就等于成就。

我霖通咗啦，原来立Flag之所以失败，係有时我觉得立咗Flag就当搞掂，好似已经做咗嘢。而更加严重嘅时候係本住避难就易嘅偷懒态度，我沉迷係预先提取嘅成就感当中而疏于真正嘅目标。

哇......好深刻啊，点解个结论会咁鬼认真嘅。

都啱嘅，係应该认真对待自己立过嘅flag，如果真係想达成嘅话。

嗯，立flag真係好重要，尤其係对于男人嚟讲，真係要睇下自己系咪每朝早都有立flag。

（开门）

阿实：“喂，尴尬，你又开始变态啦？”

尴尬：“何超实！入嚟要敲门啊讲几多次啊！”

阿实：“咩啊，又匿埋立flag啊？”

尴尬：“讲紧你啊，立flag沟女，日日吹水。”

阿实：“呜呜呜...戳中痛点（普通话）（fade out）”

（关门）

立flag冇错嘅，人地对你立嘅flag表达支持就更加冇错。只係实现目标唔係一条线性嘅道路，喺哩个愈发复杂嘅社会，每一个订立的目标，每一次实现立Flag的道路，都係纵横交错，险象环生的。所以喺咁艰辛嘅时候，可以预先品尝成就感，就可能容易令人变得松懈。最后我觉得，flag都係要立！但做唔做得到，唔关人地事，最紧要记得自己最初想点。

如果宜家老师再问我一次：大个之后想做咩啊？

我会答：我大个之后...想做翻个细路啊，老师。

做一个日日立flag唔算数嘅曳细路。

完