Clár Iomlán.

I gcomhráiteas a tháinig théis an chruinnithe aréir idir an tAire Michael Gove & Leas Uachtarán Choimisiúin na hEorpaigh, Maros Sefcovic, faoi Phrotócal Thuaisceart Éireann, dúradh go raibh plé oscailte thairbheach acu agus nach spárálfaí aon iarracht réiteach a fháil ar na deacrachtaí atá ann.

Tá sé curtha i leith an Tánaiste Leo Varadkar ag urlabhraí airgeadais Shinn Féin go bhfuil sé ag diúltaigh plé dháiríre a bheith aige faoina deacrachtaí atá ag lucht graithe lena gcuid comhlachtaí árachais agus iad ag coimhlint leis an ngéarchéim sláinte.

Cé go bhfuil neamhchinnteacht ag baint le tionscail na turasóireachta sa tír ar fad i mbliana, táthar dóchasach go mbeidh séasúr na bliana seo níos fearr ná mar a bhí séasúr na bliana anuraidh.

Deir Bainisteoir Réigiúin Údarás na Gaeltachta i dTír Chonaill Mícheál Mac Giolla Easpaig go bhfuil siad sásta smaointe agus pleananna forbartha atá ag Grúpaí faoi thograí ina gceantar a phlé agus molann sé do dhaoine teagmháil a dhéanamh leo.

Bhí céibh Inis Oírr a plé ag ionadaí ón bpobal áitiúil leis an nAire Heather Humphries a bhfuil cúramaí na nOileán uirthi, le ionadaithe poiblí Ghaillimh Thiar agus le Feidhmeannaigh na Roinne tráthnóna inné.

Tá na fíneálacha a ghearrfar ar dhaoine a bhíonn ag taisteal thar lear gan aon údar maith, le n-ardú ó 500 euro go dti 2,000 euro.

Tá faoiseamh i ndán do thart ar 4,000 teaghlaigh inniu agus cuid de na scoileanna atá ag freastal ar pháistí le riachtanais speisialta ag ath-oscailt arís.

Dúirt Urlabhraí Chaiteachas Poiblí & Athchóirithe Shinn Féin go gcaithfidh an rialtas soiléiriú a thabhairt céard iad na téarmaí tagartha a bheidh ag an gComhchoiste Gnóthaí Eorpacha scrúdú a dhéanamh ar an gComhaontú Trádála idir an tAontas Eorpach agus Ceanada.

Sláine Ní Chathalláin