Anabi Musaa be Sinayi konkoo xaŋ tumoo meŋ, Ala xa a fo a yeŋ, xo a xa Tawureta safee. Ni i xa a je, xo Musa xa duniyaa daa ñaa safee, xa nn bembaa Haadamalu la kuwo safee, a niŋ Anabi Nunfuŋ, niŋ Iburayima, Nsyaxa niŋ Yanxuuba. Ala xo a yeŋ, Ate, Ala xa meŋ ke woolu tiloolu la; niŋ wooŋ te, Musaa tuŋ miya ke noo, baawoo ate wuluuta sanjiy siyamaŋ siyamaŋ woo tiloolu xoo la.  

Ala xa buŋ ñaa meŋ, a se ate la kiiti xumoo daafaa, xo soosoo saraa mu saayaa lee ti, Jahanama taxoo; xa a la fiina xumoo fanaŋ daafaa.  A se woo ke ñaa meŋ, woo lee keŋ mu a la gullo baa ti.  Bari, ate la feeroo lee mu.  Ate la fangoo. 

Niŋ meŋ soobee xa Ala la sariyaŋ taŋo lasaxa, a sa a soŋo loo a la, xo a xi ii bee kiliŋ kiliŋ tiñaa lee. I la miira to, Ala fanaŋ tuŋ ma a loŋ, xo haadamadiŋo ba a bee tiñaa la? A tuŋ xa a loŋ nee de! Woo to, niŋ Ala tuŋ xa a loŋ, xo haadamadiŋo mee sariyaŋo muta a ñaa ma, muŋ xa a ti la, a xa sariyaŋo dii? Muŋ nafaa lee be sariyaŋo la, niŋ a mee moxoo kisi noo?

Ala xoo, xo jalaŋo mee ke. Bari, i sa a tara naa, jalaŋo mu feŋ meŋ ti, yiri doroŋ te, kuru doroŋ te.  Jalaŋo mu feŋ meŋ ti, i je feŋfeŋ bula Ala ñaa, xa a lasiyaa Ala ti, woo lee keŋ mu jalaŋo ti Ala ñaa xoto. Ilaŋ nn be woo lee tofo la karaŋo niŋ nee to. 

Ala la sariyaŋ taŋo be ñaa meŋ, ni i xa haali kiliŋ tiñaa, fo i xa faxa.  Woo mu lee, i niŋ i Daali Mansoo xa xaŋ xa talaa lee, kadawuŋ.  Ilaŋ nn xa sariyaŋ doolu lamee, xa a je, fo i xa doolu tiñaa ii to.

Ala xa laafidoo meŋ taa Musaa yeŋ, a xa woo daafaa lee. A naata Musaa niŋ Isirayilangoolu ti Sinayi konkoo xaŋ tuguŋ, a tuŋ xumata a yeŋ jaŋ meŋ, a xa a kii luŋ meŋ.  Silaŋ, Ala xumata ii jamaa yeŋ, xa a la sariyaŋ taŋolu fo.  

I xa a loŋ, keñee wuloo be ñaa meŋ, jiy te jee, domoliŋ te je. Fuwi te jee.  Bari, haabii, Ala xa moxoo million fula ñoxoŋ topoto keñee wuloo lee xono la, a xi ii labo joŋñaa to Misira waxatoo meŋ. Ilaŋ nn xa a mee, a xa woo ke ñaa meŋ.

Musaa niŋ a la moxoolu be Misira arame niŋ geyjiy wuleŋo fulaŋ tee. Bori dulaaŋ ti ii yeŋ. Ii mee Misira kele fanaŋ. Woo to, ii se muŋ ke? Ii mee fuwi noo, fo xa sigi, xa Ala la kisoo maxonoŋ. Ala xi ii kisi ñaa meŋna la, nn be woo lee je la karaŋo niŋ nee to, xa a je fanaŋ, Ala mutoo niŋ diina mutoo be talaaliŋ ñaa meŋnu la.

N baadiŋolu, ni ilu be diina feŋfeŋ to; ni i xa woo muta ñaa woo ñaa; I la diina mutoo woo mini i niŋ Ala labeŋ noo. Baawoo muŋ na? Baawoo, ite xa junubi juloo meŋ taa, woo saraa mu jahanama taxoo doroŋ nee ti.  Jahanama fanaŋ mu kadawuŋ kuwo ti. A teŋma, ni i xi i faŋ ñaagaa ñaa woo ñaa, ni i xa kuw ñimmaa siyamaŋ siyamaŋ nee ke, haabii, i be kiitoo xoto. Bari haabii, Ala xoo, xo ate se ite la kiiti ñaa bo i yeŋ nee, ni i sa a lamee, xa soŋ ate la feeroo woo lee ma. Ala la feeroo, Ala la fangoo. Ite la feere te; ite la fangaŋ te. Ala lee taa doroŋ. 

Kiiti ñaa labaŋo, Ala naata meŋ ti, woo be xuuyaa la toolu ti, bari Ala xa kisi siloo labo, ii bee kiliŋ kiliŋ se kisi woo kitoo ma ñaa meŋna la fanaŋ. Woo keliŋma, a xa a la gullo baa fanaŋ mawura tuguŋ, xa a tanxumaŋ nn yeŋ. Ni i fakili ta a kuu, Ala la gullo ba mu feŋ meŋ ti, woo mu siloo ti, Ala faŋo xa meŋ natege, ate faŋo be meŋ ñaa bo la, fo Haadamadiŋo se kisi jahanama taxoo ma ñaa meŋ na.