Moxoolu be meŋ fo xaŋ malayikoolu la kuwo la a niŋ jinoolu, a niŋ ntelu haadamdiŋolu la kuwo. Woo be bendiŋ ntelu la sumanililaŋo ma ba? Na a te bendiŋ Kitaaboo ma, a mu toŋñaa ti ba? 

I be laaliŋ meŋ na Ala la kuwo to, woo mu toŋñaa ti ba? 

Niŋ meŋ xa Tawureta soosoo, a xa Ala lee soosoo. Woo to, fo nn xa xumoolu bee lalaa nn na laanadaa badaŋo lee ma, fo nn se toŋñaa niŋ faniyaa tobo ii ñoxoŋ to.

Karaŋo niŋ nee be Tawureta karaŋo baŋ na lee. Woo maŋ ke, xo nte xa Tawureta bee karaŋ, xa a tofo karaŋo niŋ nee to. Ayi. Woo te. Baawoo, kuw siyamaŋ siyamaŋ nee be safeeliŋ Tawureta xono la, nn tambita meŋnu kuŋ. Niŋ nte tuŋ xa a bee tofo, a se mee karaŋo maŋ baŋ. Nte xa jaŋ doolu tomboŋ doroŋ. Bari, haali nte ma a bee tofo, ni ite faŋo xa Tawureta ñiniŋ, i sa a karaŋ i faŋ yeŋ. 

Awa.  I sa a tara naa, Anabi Musaa saagita doroŋ, Tawureta baŋta safee la woo tumoo lee. Ilaŋ nn xa a mee, Anabi Musaa la kuwo labaŋta ñaa meŋna la. 

        N baadiŋolu, ilu niŋ sege. Karaŋo niŋ be ñaa meŋ, a be lee ixo keebaalu sa a fo. Xo, "buŋ mee xoto a juw bula ti". Woo mu lee, ni i be karaŋo niŋ nee famuyaa la, fo xa taa a daamutoo ma, xa joki a la taxaliŋ. Woo to, fo i xa dati leelu lasaxa, fo i sa a loŋ, karaŋo be joki la ñaa meŋna la.  Ni i xa a daamuta dantege xumoo woo leelu la, ou bien, komi i sa a fo ñaa meŋ faranse xaŋo to, introduction. Ni i xa a daamuta jee lee, meŋ be woo xaŋ, i xa woo mee, meŋ be woo xaŋ i xa woo fanaŋ mee. Ni i xa a ke woo ñaa taxaliŋ, i se famuyaa soto a to, i mee xonotofili.

Ilaŋ nn xa Anabi Musa la xuma labaŋolu mee, a xa meŋnu fo Isirayilangoolu yeŋ, jaŋ niŋ a faxata.

Subu saraxoo xoto mu feŋ naani lee ti. Maluyaa--xa maluyaa Ala ñaa, xa a loŋ, xa a fo, xo i mu junubikelaa ti; Kiitoo--baawoo i xa Ala soosoo, fo xa waa Jahanama, kadawuŋ; Fiinoo--Ala la fiinoo lee xaŋ ma, ate xa feeroo labo meŋ se ite labo kiitoo woo xoto; Danxeneyaa--niŋ meŋ be laaliŋ woo bee la, fo xa suboo senuŋo taa, xa a yeloo boŋ, xa a jaani, xa a ke saraxoo ti Ala lee yeŋ.  

Awa. Nn xa woo je xotoma, xa a tofo. Xa tara naa, Ala xa a fo fanaŋ, woo saraxoo woolu be ke la meŋnu ti, ii be bo la jaŋ meŋ, ii be bo la waxatoo meŋ, a niŋ meŋ bi ii bo la. A xa woo bee fo, xa fasari.

Ala xa sariyaŋ taŋo sigi, bari a maŋ woolu doroŋnu sigi.  A xa sariayaŋ keme woroo ñoxoŋ sigi.  Karaŋo niŋ nee to, nn be doolu tomboŋ na ii to, xi ii tofo.