Borgarmyndir

Fjallað er um Denver í Colorado ríki í Bandaríkjunum, sem síðustu 9 ár hefur mótast af hröðum íbúavexti en einna helst nýju gullæði við rætur Klettafjalla. Ólíkt upphafsárum borgarinnar á 19. öld eru verðmætin að þessu sinni græn á litin og voru fyrir fáeinum árum ólögleg vara. Við skoðum hinn unga og ört vaxandi kannabis iðnað borgarinnar auk þess að ræða við heimafólk um lífið og tilveruna í 1600 metra hæð yfir sjávarmáli.

Umsjón: Svavar Jónatansson.

Haldið er til borgarinnar El Paso í Texas ríki í Bandaríkjunum. Borgin er staðsett á landamærum Bandaríkjanna og Mexíkó og hefur tilvera hennar að mörgu leyti verið samofin systurborg sinni, Juarez í Mexíkó, en saman mynda þær einn stærsta landamærakjarna heims með um 2.5 miljón íbúa. Rætt er við heimafólk, bæði íbúa El Paso og Juarez og fjallað um veruleikann út frá landamærunum, efnahag og margþættri forsögu sem og samtíð borganna. Þátturinn var tekinn upp í marsmánuði árið 2017.

Umsjón: Svavar Jónatansson.

Í suðurhluta Arizona í Bandaríkjunum er borgin Tucson, með um 500.000 íbúa sem margir hverjir yfirgefa borgina þegar hiti sumarsins verður mikill. Fjallað verður um vísindatilraun norðan við borgina, sögu háskóla borgarinnar, bókahátíð, bændamarkað og veðreiðar auk þess sem rætt er við íbúa um ýmsa anga borgarinnar.

Þátturinn var tekinn upp í mars 2017.

Umsjón: Svavar Jónatansson.

Borg samkvæmt skilgreiningu, bær samkvæmt andrúmslofti. San Clemente hefur frá stofnun sinni á fyrri hluta 20. aldar verið samofin ljúfu lífi við hafið, auk þess að hafa verið athvarf 37. forseta Bandaríkjanna, Richards Nixon. Fjallað er um sögu borgarinnar, rætt við heimafólk ásamt því að upplifa kraft hafsins í ölduformi, en borgin er heimsfræg þegar kemur að brimbrettareið. Þátturinn var gerður í ársbyrjun 2017.

Los Angeles hefur mótað samtíma heimsins meira en flestar aðrar borgir í gegnum kvikmyndaiðnaðinn en á sér vissulega fleiri hliðar. Í þættinum er fjallað um sögu háskólans UCLA, þróun borgarinnar, frjálslynt strandsvæði, skapandi heim hinna sjónlausu, ástand heimilisleysis og umfjöllun unglinga um eigin nærumhverfi. Fylgst er með störfum blaðamanns hjá LA Times við vinnslu stórrar fréttar um heimilisleysi, eitt stærsta málefni borgarinnar. Þátturinn var unnin við upphaf árs 2017.

Umsjón: Svavar Jónatansson.

Í miðju eins gjöfulasta landbúnaðarsvæðis heims er borgin Fresno. Umhverfi hennar mótast af milljarðatekjum landbúnaðar og streymi ferðafólks á leið til Yosemite Þjóðgarðsins, en innan borgarmarkanna eru innflytjendamál fyrirferðamikil. Í stuttri heimsókn við upphaf ársins 2017 er ráfað um götur og sögu borgarinnar með aðstoð heimamanna og þess sem fyrir augu ber.

Borgin Stockton liggur við norðurenda hins mikla landbúnaðarsvæðis kennt við Central Valley í Kaliforníu. Saga Stockton er litrík og er samofin upphafi gullæðisins árið 1848. Hinsvegar hefur orðspor borgarinnar síðustu ár mótast af hárri glæpatíðni og skapað krefjandi verkefni fyrir yfirvöld. Rætt er við tvo heimamenn sem hafa upplifað borgina á ólíkan hátt, annar með áherslu á tækifærin, hinn skort á tækifærum. Þátturinn var unninn við upphaf árs 2017.

Umsjón: Svavar Jónatansson.

Svavar Jónatansson bregður upp mynd af sögu Sakramento á vesturströnd Bandaríkjanna og tekur fólk tali sem verður á vegi hans.

Svavar Jónatansson bregður upp mynd af sögu Oakland á vesturströnd Bandaríkjanna og ræðir við fólk sem hann hittir á förnum vegi.

Fjallað er um sérstöðu Barcelona borgar sem hefur reynst íbúum bæði blessun og bölvun. Andrúmsloft, arkitektur, viðmót heimafólks og loftslag Katalóníuhéraðs er meðal þess sem gert hefur borgina að einni vinsælustu ferðamannaborg Evrópu. Því hefur fylgt mikill vöxtur sem leitt hefur til ýmissa vandamála, sem hafa áhrif og móta viðbrögð almennings sem og stjórnvalda við ástandi þessarar einstöku borgar.

Þátturinn er unninn í samstarfi við Leanne Hayman.

Umsjón: Svavar Jónatansson.