كيف طلعت عيلة بسمة وصباح ولوين راحوا؟ شو اللي مرق معهم عالطريق؟ مين اللي رافقهم بهالرحلة وشو صار خلالها ولوين وصلوا ووين تفرقوا؟ وين صار سهيل وشو كان ناوي يعمل خلال الرحلة؟، ووين صارت مايا؟ وشو رح يصير مع صباح وبسمة؟ شو العرض اللي رح يجيه لصباح؟ وكيف رح يرد؟ أسئلة كتيرة ومفتوحة على أجوبة مريرة.. كيف رح تنتهي الحلقة الأخيرة من مسلسل بسمة صباح؟ هل هي النهاية؟ ولا لسى الدرب طويل؟ وشو الحدث الكبير اللي رح تنتهي فيه الحلقة ورح يرجع يفتت القلب عن جديد؟

ليلى وبسمة عم يخططوا يخبوا الوثائق لحتى يترجموها، وين رح تخبيهن بسمة؟ وليش صباح رفض يترجم الوراق؟ وكيف بسمة عم تتعامل مع سهيل بعد ما تغير؟ وسهيل رح يوافق يسافر بالأخير متل ماعم تحاول مايا تقنعه؟ ولا رح يضل مصصم على انه يضل ولو حياته وحياة أهله بخطر؟

سهيل لسه غرقان بحزنه الكبير على نانا، وأمه وأبوه غرقانين معه بالهم.. شو كترت الهموم على هالعيلة وشو بدن يتحملوا ليتحملوا، مين اللي بيجي الصبح وبدق عليهن الباب؟ هل هي مفاجأة حلوة أو مو حلوة؟ وشو سر زيارة هالضيف المهم وشو رح يصير؟ وعيد الأم اليوم والكل حزين على الأمهات اللي راحوا ولادهن، شو رح يحضر سهيل لأمه وشو رح يصير بالمشوار اللي رح يروحوه هو وليلى؟ وشو هالحدث الكبير اللي رح يصير؟ وشو ردة فعل سهيل وبسمة وصباح ومايا وأبو يزن على هالحدث الكبير اللي رح يهز الشارع الدمشقي بقوة ؟ وكيف رح تنتهي الحلقة مع الضيف اللي إجا زارهم على غفلة؟

سهيل تطوع بالدفاع الوطني وامه وابوه متضايقين كتير وانفجار كبير رح يحدث بيناتن، بسبب هالقصة وسهيل تغير كتير.. ليش؟ وكيف رح يطلع من هالقصة ومين رح يساعده؟ انفجار تاني رح يكركب الدنيا، وين رح يصير وشو نتائجه؟ يزن بين الموت والحياة، ومايا و ابوه جنبه، ياترى كيف رح ينتهي الموضوع؟

مرقت أيام على استشهاد نانا المسكينة بقذيفة الهاون ولهلق الجرح كبير، والحزن كبير كتير. يا خسارتك يا نانا ويا خسارة أحلامك يا عروس أنت وسهيل، كل شي راح عند سهيل ووقف الزمن وانكسر قلبه للأبد. ومايا صارت بأميركا عند جوزها وحبيب عمرها يزن وعم يحضروه لعملية ومين بيعرف يمكن يطيب ويمكن يضل مشلول كل عمره. بسمة وصباح اللي قلبهون مكسور على نانا وعلى مليون قصة وقصة، تعبو كتير واللي مرقوا فيه هالتلات سنين بهد الجبال، رغم هيك بسمة ما بتوقف عن إيمانها بدورها بالثورة. ياترى مع مين عم تتواصل وشو عم تساوي بالسر، وقذائف الهاون بلشت تنزل عالناس متل المطر بقلب الشام وصارت الهم الكبير، يا ترى سهيل كيف رح يطلع من عزلته وشو المفاجاة اللي محضرها وكيف رح يكون رد فعل بسمة وصباح على مفاجاة سهيل من العيار التقيل؟

شو المشوار اللي راحته بسمة وماقالت لحدا؟ ومتل العادة صباح بيغضب من تصرفاتها، ورد فعله هالمرة غير شكل! نانا وسهيل شو عم يخططوا؟ وين طلع الرجال يلي عم يتصل بمايا ومين وراه، وكيف رح تنحل القصة ومين رح يساعدها وكيف؟ شو عاملين بالجامعة منشان تفجير جامعة حلب وشو رد الطلاب وصباح ع هالقصة؟ بالأخير شو اتفقوا نانا وسهيل وشو المشوار اللي بروحو عليه وشو رح يصير بهالمشوار؟

الدنيا برد، وبلشت مشاكل المازوت والكهربا عم تقطع، وعجقة والعالم بلش يضيق خلقها من هالقصص، شوفي بحلب كمان؟ شو صاير وليش زعلو كل هالزعل ومين اللي انقتل بحلب؟.. ومايا شو قصة هالتلفونات الغامضة اللي عم تجيها؟، ومين رح يتدخل؟، كمان شو قصة ماجدة وشو رح يصير معها هالمسكينة وكيف صباح وبسمة وسهيل وتانا بيتلقو الأخبار؟، وبالأخير الكل زعلان إلا مايا.

ليش تم اغتيال العميد صفوان بعبوة ناسفة؟ وشو تأثير هالقصة على عيلة بسمة وصباح؟ وشو ممكن يكون ارتداداتها لاحقا عليهم؟ مين اللي اتصل بصباح وليش بسمة غضبت كل هالغضب؟ ووين رح تروح بسمة وشو رح تعمل ؟ وكيف حتكون ردة فعل صباح والعيلة على تصرف بسمة؟ أما مايا يلي صارت ببيروت، مين رح يزورها بالبيت ومين يلي رح يتصل فيها؟

حزن وموت وتهجير ونزوح وأوجاع كتيرة بس بسمة بتضل بتعقد الأمل، واتفاءل بركي بكرا أحلى. عم تزين شجرة الميلاد لتجمع الحبايب وهي اللي بتضل بتجمعن، نانا وسهيل عم يحضروا يسافروا، بس نانا مترددة شوي، والنازحين من حرستا عم يعانوا من مشاكل، شو هي المشاكل ومين رح يحلها وكيف؟ وشو قصة العميد صفوان ومين اللي بيتواصل مع صباح، وكيف رح تكون ردة فعله. سهرة الميلاد مين رح يجتمع بهالبيت الطيب وشو رح يصير؟

جميل اللي ماشافوا منو غير العنتريات الفارغة ومشكوك بأمره أنه شبيح.. فجأة طلع معدنه الأصلي كأبن بلد ودافع عن مايا وتلقى رصاصة بدل منها.. يا ترى شو رح يصير فيه؟، رح يموت أو يعيش؟ وعيلة بسمة وصباح شو رح يعملو؟، وماجدة اللي ولادها رح يروحوا ع حلب شو رح تساوي؟ ومايا.. رح ترجع ع بيروت لأنو الخطر لسه كبير عليها ولا رح تضل مع أهلها؟ وشو رح يقرروا صباح وبسمة بخصوص مايا ومين هي عروستنا الحلوة؟