بسمة عم تحضر حالها تسافر..كيف ووين وليش؟ بالوقت نفسه مايا عم تمر بمشاكل بالجامعة..مين اللي اعتدى عليها وكيف انتهت القصة ؟ وهل انتهت فعلا من حالها ولا يزن عمل شي ليساعد مايا؟ "كل هالقصص والأسئلة رح تعرفو أجوبتها بس تتابعو الحلقة ١٨ من مسلسل "بسمة صباح.

هل يمكن للانسان أن تتبدل مواقفه بين ليلة وضحاها؟ كل شي ممكن! وهل من المقنع أنو نكتشف أن مايا ويزن ونانا وسهيل غيروا مواقفهم فجأة؟ شو اللي صار معهم حتى صار عندهم قناعات جديدة و انقلبت مواقفهم وكيف بسمة وصباح رح يتقبلوا هالتبدل المفاجىء؟ ومين الضيوف الحبايب اللي رح يجوا ع بيت بسمة وصباح فجأة وكيف رح يتقبلوا تبدل المواقف؟ القصة مخربطة وفايتة ببعضها، لحتى نفهم شو سبب هالخربطة تابعوا هالحلقة المميزة من مسلسل "بسمة صباح".

مين الشهيد اللي رح يحزنوا عليه كتير بسمة وصباح وولادهم؟، وشو رح يصير وقت يعرفوا بقصة استشهاده وكيف رح يتصرفوا ؟، وصباح شو القصة الغريبة اللي رح تصير معه وكيف رح يتصرف؟. قصتين مع بعض بالحلقة نفسها رح تظهر الفرق بالأخلاق والإنسانية بين الناس بوقت المحن والأزمات اللي عم تمر عالكل بدون استثناء.

بسمة عم تتعافى بعد حادث التفجير الصعب اللي عاشته ونجت منه بأعجوبة، وصباح بينحط بامتحان تقرير مصير صعب كتير، يا ترى كيف رح يقدر ينجح فيه؟، ومايا ويزن عم يساعدو العالم اللي بلشت تنزح، شو المشاكل اللي رح تواجهن؟.

بالحلقة 14 من بسمة صباح قرب عيد الأم.. وعيد الثورة الأول.. بسمة معجوقة وفايقة من الصبح بدها تروح ع بيت أهلها.. ياترى وين بيت أهل بسمة؟.. وشو بصير معها هنيك؟.. شو بتتصرف بالمحنة الصعبة اللي واجتها وكيف بتنتهي معها القصة؟.. صباح ومايا وسهيل ويزن وليلى ونانا.. كلهم رح يمرقو بوقت صعب كتير بمحنة بسمة.. ومين بيجي وبفاجىء الكل آخر الحلقة؟

الأخبار عم توصل من حمص المنكوبة بالحلقة 13 ، وبابا عمرو ممكن يقتحموها بأي لحظة وتسقط، بهالأجواء والترقب مين هالصبية راما اللي فاتت ع بيت بسمة وصباح وشو حكايتها؟.. وكيف تعاملت بسمة والعيلة معها وساعدوها؟.. وشو الاتفاق التي تم بين يزن وأبوه خلال وجودهم ببيروت؟.

الدنيا برد كتير وكأنها رح تتلج.. رح تعرفوا بالحلقة 12 لوين رايحة بسمة بهالبرد وليش طلبها مديرها السابق؟.. وشو بصير معها هي ومايا وليلى بهالبرد بالمشوار الخاص اللي كانو مقررين يروحو؟.. أما صباح مشواره باتجاه تاني وشو بيعمل بعد مايعرف وين راحت بسمة ومايا؟. أحداث مشوقة كالعادة بتنتهي مع مفاجأة من العيار التقيل لنانا.. لتعرفوا أكتر تابعوا هالحلقة الجديدة من المسلسل الإذاعي "بسمة صباح".

بالحلقة 11 من المسلسل الإذاعي "بسمة صباح"، جيران مايا وبسمة بواجهوا خطر، وصباح بروح مشوار وبيحكي شي كتير مهم. كيف مايا وبسمة بواجهوا الخطر اللي تعرضوله جيرانهم؟، ومين اللي بساعدهم بهالمحنة؟، ورح تعرفوا كمان شو هو هالمشوار اللي راح عليه صباح؟ وشو حكى هنيك؟

أحداث جديدة بالحلقة العاشرة من الدراما الإذاعية "بسمة صباح"، واليوم رح نتعرف على أبو يزن للمرة الأولى، ونعرف موقفه من كل شي عم يصير بسوريا، وكمان رح نعرف ليش عيلة بسمة وصباح كلن تحت الخطر. مين ساعد العيلة هالمرة، وشو هو الخطر اللي تعرضوله.. تابعوا أحداث هالحلقة المشوقة ويلي بلش فيها تصعيد السلاح عالأرض بشكل أكبر.

رح تسمعوا بالحلقة التاسعة من مسلسل بسمة صباح ، انتهاء سنة 2011 وعيلة بسمة وصباح عاشو أحداث وقصص أشكال ألوان، خلال الثورة السورية، كان آخرها خطف سهيل بالحلقة الماضية. يا ترى كيف قضو ليلة رأس السنة وليه بلش صباح يتبدل، وكتير قصص رح تعرفوها بالحلقة التاسعة هالأسبوع بأحداثها المشوقة كالمعتاد.