Mentres os partidos continuan coa precampaña cara as galegas, en Carretando comezamos a debuxar os perfís dos candidatos e candidatas á Xunta con Xosé Ramón Gómez Besteiro (PSdeG) como primeiro protagonista.

Tras arquivarse as causas que o obrigaran a dimitir e logo de sete anos apartado da vida pública, Besteiro volve ao lugar de partida, candidato á porta duns comicios autonómicos moi abertos. Da man dos xornalistas Cristina P. Marcote e Manuel Varela, repasamos a traxectoria dun político cunha biografía que se resume no ascenso, a caída e a resurrección; con paralelismos ao Manual de resistencia do seu amigo Pedro Sánchez.

Sube connosco nesta nova viaxe para coñeceres polo miúdo a quen os seus chamaron "o Messi da política galega".

Para a investidura de Pedro Sánchez como presidente do Goberno precisáronse acordos con oito partidos. O BNG foi unha desas forzas coas que o PSOE estableceu un pacto de investidura coa mirada centrada no país e cun claro sabor a precampaña.

O xornalista Luís Pardo sube na nosa autocaravana para analizar o contido do acordo, a reacción que obtivo por parte do Partido Popular e as implicacións que ten de cara as eleccións galegas nesta recta final.

Ponte cómodx e desfruta desta nova viaxe!

O xeito no que nos movemos polo territorio é un dos grandes temas do noso tempo e por iso en Carretando quixemos poñer a mirada en como o facemos os galegos e galegas. A mobilidade no noso país tivo sempre condicionantes como a dispersión territorial ou o desequilibrio demográfico, mais que transformacións se deben acometer para contar no futuro cun modelo que vertebre de modo xusto e sostible o territorio?

Para exploralo pasarán pola nosa autocaravana Mateo V. Cornado, doutor en Xeografía e investigador en mobilidade e transporte sustentábel; e Miguel Pazos, profesor de Xeografía Humana na USC.

Pon os auriculares e desfruta desta nova viaxe sobre como viaxamos.

A pasada semana celebrouse no Parlamento de Galicia o debate do estado da autonomía no que se trataron os temas, os problemas e as propostas transversais para toda a sociedade galega. O seu interese radica en que foi o primeiro DEA de Alfonso Rueda como presidente da Xunta, pero tamén o último antes de que as galegas vaiamos ás urnas, un escaparate no que os partidos se posicionan cara a cita electoral.

Para analizar e contextualizar todo o que deron de si estas xornadas, temos na autocaravana a dúas persoas que o seguiron moi de preto: David Reinero, de Praza.gal, e Beatriz Muñoz, de elDiario.es. Asemade, o noso politólogo Yannick Juncal encargarase do apartado divulgativo para explicar polo miúdo este acontecemento parlamentario.

Ven percorrer o Hórreo na nosa autocaravana!

O turismo é a primeira cuestión que imos abordar nesta tempada na que percorreremos os grandes temas para o noso país. Existe o turismo sustentable? Temos que reformular o modelo turístico actual da Xunta? Que hai máis alá do Camiño e do Xacobeo?

Para dárlle resposta a estas preguntas contaremos coa participación de Iria Caamaño, doutora en Dirección e Planificación do Turismo e profesora do Departamento de Socioloxía na UDC; e con Begoña Muiño, doutoranda cunha tese centrada no boom da intelixencia e observatorios turísticos. Tamén intervirá no programa Salvador Cobo, tradutor da obra de Rodolphe Christin, 'Contra el turismo', que complementará o tema desde un prisma diferente.

Sube connosco na autocaravana noutra volta pola Galicia turística!

A furgoneta de Carretando volve a percorrer os camiños do país na súa cuarta tempada. Desta volta, temos no horizonte o comezo do curso político en Galicia e as vindeiras eleccións autónomicas.

Todos os membros de Carretando participamos no faladoiro deste primeiro episodio para debullar como se atopan de forma os partidos en Galicia, tanto a nivel interno como de liderado.

Póñedevos cómodas e cómodos que arranca esta cuarta tempada!

O equipo de Carretando conclúe a súa terceira tempada no formato podcast! Facémolo con moitos quilómetros nas costas, no contador da autocaravana, mais tamén co orgullo do traballo destes últimos meses. E facémolo na nosa viaxe pola Boa Vila, percorrendo un lugar marcado pola verticalidade de Ence e horizontalidade do Lérez. É o momento de falar do seu modelo de cidade, pero tamén de como se atopan as organizacións políticas antes do 28 de maio.

E, desta volta, contamos con Álex Espiño, de PontevedraViva, e Cris Prieto, da delegación pontevedresa de Faro de Vigo, para contextualizar o panorama de Pontevedra. De novo, profesionais da información que achegan coñecemento e interpretación da política local!

Chegamos a unha sorte de fogar: foi en Compostela onde naceu Carretando, xusto nas entrañas da Facultade de Ciencias da Comunicación da USC. Mais desta volta estamos na cidade para ir máis aló do espírito estudiantil e do Xacobeo; desexamos entender que aconteceu e acontece en termos políticos en Santiago antes das eleccións municipais do 28M.

Da man de Belén Teiga, xornalista en EuropaPress, e do consultor Roi Pérez, debullamos o goberno de Bugallo e falamos do modelo de urbe de Santiago (máis ben, da súa inexistencia).

Nesta penúltima parada contamos co #MinutoCarretando dos catro principais candidatos á alcaldía compostelá: Xosé Sánchez Bugallo (PSdeG), Borja Verea (PPdeG), Goretti Sanmartín (BNG) e María Rozas (Compostela Aberta).

Despois das vacacións de Semana Santa, o equipo de Carretando fai a súa seguinte parada ós pés da Muralla de Lugo. Debullamos o contexto electoral da cidade romana cara o 28M coa participación das xornalistas luguesas Jessica Fernández, de LugoXa, e David Lombao, de Praza.gal.

Na sección final, o candidato do BNG, Rubén Arroxo, expón que nestes catro anos conseguiron darlle “ese cambio a Lugo que tanto necesitaba”, convertendo a urbe nun lugar “activo e con moito dinamismo”. O resto de partidos achacaron problemas de axenda para poder atender a chamada de Carretando para o noso #MinutoCarretando.

O noso último podcast fala de Vigo, de Abel Caballero e do que hai máis aló da súa figura! O que había antes del, o que pode haber no futuro e tamén as propostas que achegan os candidatxs do resto de formacións políticas.

Un programa para traspasar as luces de Nadal e mirar a cidade máis grande de Galicia dende outra perspectiva da man de Uxía Miranda e Víctor Currás, xornalistas de Treintayseis e Faro de Vigo.