A terceira viaxe de Carretando prodúcese nun espazo singular: Ferrol, sétima urbe galega, é unha cidade onde os problemas políticos do presente son, en realidade, cuestións do pasado. Problemas estruturais arredor da inestabilidade, a paralización do Concello ou a imposibilidade de establecer un convenio co Ministerio de Defensa para desbloquear unha parcela de 90.000 metros cadrados no centro de Ferrol.

Nesta ocasión, a través dos xornalistas Marta Corral, de Ferrol360, e Isidoro Valerio, de Radiovoz, entendemos que pasa na política local de cara ao 28 de maio, pero tamén que aconteceu nestes anos para que a cidade aínda non teña claro un proxecto para si mesma. Un horizonte de futuro.

Na segunda viaxe da nosa autocaravana polos concellos galegos facemos unha parada na cidade da Coruña. Analizamos a política coruñesa da man de dous coñecidos xornalistas como Marta Otero, de la Opinión de A Coruña e Pablo Díaz, de Radio Coruña Cadena Ser. Ademáis, contamos cos candidatos do PSdeG-PSOE, PPdeG, Marea Atlántica, BNG e Unidas Podemos para explicarnos os seus proxectos para a cidade de María Pita. No 3x02 tratamos de debullar quen se sentará no sillón da praza da heroína coruñesa e moito máis.

Na primeira parada destas eleccións municipais, o equipo de Carretando desprázase a Ourense para abordar cos xornalistas de La Región, Brais Iglesias e Sergio Conde, o contexto pre-electoral da cidade. Ademais, contamos cos candidatos do PSdeG, PPdeG e BNG para explicar o seu proxecto para Ourense.

Ó longo do episodio preguntámonos se repetirá Jácome como alcalde. Queremos saber se Manuel Cabezas ou Paco Rodríguez serán capaces de paralo e cal será o papel do BNG. Isto e máis, no 3x01 de Carretando.

Carretando volve ás estradas galegas coa súa terceira tempada. Os episodios que conforman esta nova viaxe falan da festa da política que vai acontecer o vindeiro 28 de maio en todos os concellos do país. Neste primeiro capítulo, a pouco máis de 100 días para as eleccións municipais, pintamos o cadro xeral de Galicia e explicamos a dinámica desta nova etapa do proxecto.

No derradeiro episodio da segunda tempada de Carretando, compartimos reflexións coas compañeiras de Castañas no Verán. O programa está dividido en dúas partes. Nesta primeira parte publicada por nós, analizamos a dimensión social dos problemas políticos, mentres que na segunda parte que publica o podcast Castañas no Verán, falamos sobre a dimensión política dos problemas sociais.

Neste episodio de Carretando analizamos a influencia galega sobre o Partido Popular a nivel nacional. Realizamos un percorrido histórico polas figuras que Galicia lle proporcionou ó PP e mantemos un faladoiro con Gema Sánchez, doutora en Ciencias Políticas, e a Rafa Cuíña, ex alcalde de Lalín. Na divulgación afondamos na estrutura e organización internas do Partido Popular con Adrián Vázquez e os nosos politólogos.

Neste novo episodio de Carretando estamos de celebración e quixemos repasar todo o que levamos vivido e o ollar o futuro. Os comezos, as dificultades, o bo, VÓS... O Carretando máis íntimo, nesta nova entrega do voso podcast galego favorito.

Neste episodio especial de Carretando falamos sobre o resultado electoral das últimas eleccións portuguesas. A maioría absoluta de Costa e o Partido Socialista, o fracaso do Bloco de Esquerda e do Partido Comunista Portugués, o ascenso do Chega, a derrota do PSD... Para analizar todo isto temos connosco a Tereixa Constenla, corresponsal de El País en Lisboa e a Anxo Luxilde, escritor e xornalista. Neste faladoiro, ademáis de examinar os efectos dos comicios lusos, tratamos os posibles paralelismos e diferenzas con respecto do panorama político español.

Podería parecer que si, pero o Nadal non rematou en Carretando. Neste cuarto episodio coñecemos ó Abel máis recente, ó Abel alcalde. O das luces, pero tamén o das sombras. Na divulgación, falamos sobre a campaña permanente, a espectacularidade da política, a americanización das formas e do politainment. Na reportaxe, abordamos o lado descoñecido e escuro de Abel e as cíticas que recibe.

Nesta terceira entrega da nosa segunda tempada, e aproveitando que estamos no Nadal, en Carretando falamos da personaxe política e mediática por excelencia en Galicia, Abel Caballero. Nesta primeira parte sobre a serie de Abel, tocamos as súas primeiras etapas vitais: o Abel universitario; o Abel do PCE; o Abel Presidente do porto olívico; o Abel socialista e ministro e o Abel novelista. Son moitas as cousas descoñecidas sobre o alcalde de Vigo que tratamos de dar á luz en Carretando. Na divulgación, falaremos sobre o liderado político co noso equipo de politólogos e cunha invitada especial, Ariana Castro, do podcast Política con Ciencia.