Cuntrasts

Igl è sta per el sco d’avair in da 6 en il lotto. Steivan Luzi è vegnì elegì sco nov guardiaparc dal Parc Naziunal Svizzer. 90 persunas eran s’annunziadas per questa plazza. Il bun egl e la passiun per la natira ha l’um da 31 onns ertà surtut da ses tat (non) che aveva la medema lavur. Ina scolaziun specifica sco guardiaparc na dat quai betg. Il bler è d’emprender cun far: dumbrar selvaschina, tschertgar ils plazs, nua ch’ils peschs han mess lur ovs, documentar fluras ed infurmar ils turists. Pervia da ses nov job da siemi na dastga el dentant betg pli ir a chatscha, e quai è tut auter che simpel.

Betg tut quai ch’è vegl è secondhand e betg tut quai che vesa ora retro è vintage. Ils «Cuntrasts» sa deditgeschan a la nostalgia per objects dal passà. «Els raquintan in’istorgia e na pon betg vegnir cumprads dapertut», di la futurologa Nina Burger. Butias da secondhand creschan sco bulieus or da la terra. «I dat in kick dad ir en la brocki», di Antonia Desax che gieva gia en la brocki, cura che quai era anc ina vargugna. In auter trend è da rimnar vehichels vegls sco er tadlar e producir plattas da vinil.

In film realisà da Maya Chollet da RTS, adattà per rumantsch da René Spescha.

En ils circuls dals speleologs svizzers è Jean-Claude Lalou ina capacitad. Dapi 60 onns explorescha el taunas e cuvels sutterrans e scriva cudeschs davart quels cuvels mistics e misterius. Gist per el sco tip iperactiv saja quest mund silenzius in ambient ideal per sa calmar e giudair las bellezzas dal grip e da la crappa, di sia dunna Myriam Mosimann Lalou. Jean-Claude Lalou ans lascha far part da questa fascinaziun, saja quai en in cuvel cun ses figl, en discussiun cun sia famiglia e cun ses ami e fotograf Rémy Wenger, u lura er durant in’expediziun cun speleologs pli giuvens en ina grotta en la Val de Travers.

In film davart in job cun autas pretensiuns, blera passiun e bain inqual sfida.

Els accumpognan nus durant nossa uffanza e mussan a mintgin a leger, scriver, dumbrar e bleras autras chaussas: las scolastas ed ils scolasts. Per quest job ston ins esser naschì – nus avain vulì savair pertge ed avain vis che dar scola è in job cun autas pretensiuns e blera passiun.

«Pedofilia? Na, quai na datti betg tar nus...». En la documentaziun «Zona grischa» discurran differents protagonists e protagonistas davart pedofilia en il Grischun e mussan cun quai che quella construcziun «quai na datti betg tar nus» è faussa. Per quest film retschaiva Sabrina Bundi il 3. premi dal Swiss Press Award 21 en la categoria video.

Tge è pedofilia insumma? Ina malsogna ubain ina disposiziun sexuala? Cura daventa ina persuna pedofila? Quants pedofils datti tar nus en il Grischun? E co pudess ins impedir meglier che uffants vegnan malduvrads? Nus giain en la «zona grischa» da la pedofilia e faschain tut quellas dumondas a psicologs, a la polizia, ad in’unfrenda da violenza sexuala ed ad in um pedofil. Dentant betg be quai, la dumonda centrala da la documentaziun è numnadamain, co che nus sco societad stuessan ir enturn cun il tema pedofilia. E per dar resposta a quella dumonda, èn pliras persunas stadas prontas d’agir sco public da test, sco spievel per la societad.

Il mir da fermada da la Grande Dixence è in monster da 15 milliuns tonnas, construì ils onns 50 entadim la Val des Dix en il Vallais. Il pli grond mir da fermada dal mund. Ma la Grande Dixence cumpiglia er in spazi sutteran che s’extenda sur plirs 100 kilometers da galarias e chanals en las muntognas dal conturn enfin vi en la Val da Zermatt, quai per collectar ils 400 milliuns meters cubics d’aua per il Lac des Dix. In omagi als lavurers ch’han construì a sias uras quella «bestga», ma er a quels che la tgiran e mantegnan oz en vita.

Dal bab e da la mamma survegnin nus noss num. Ils surnums naschan pli tard tranter collegas, en uniuns u clubs. Els èn quasi in segund batten.

Schegea pli paucs – datti anc oz ils surnums. Els fan part da nossa cultura.

Petra Rothmund è ida sin ils fastizs dal fenomen surnums che fa part da nossa cultura. Persunas da la Rumantschia raquintan ad ella dal daco e cum, da gusts e disgusts da lur surnums.

Las scolas serradas, la sortida stritgada, emnas e mais a chasa, en chombra, en il homeoffice, nagin sport en gruppa, mascrinas, s’inscuntrar be en la rait. L’onn da corona ha pretendì bler da la giuventetgna ch’è en ina fasa da la vita, nua ch’il sa barattar cun collegas, amis ed amias è uschè impurtant. Co vai cun giuvnas e giuvens? Psichicamain, en scola, en l’emprendissadi, a chasa?

Cun questas dumondas essan nus ids a Glion tar scolaras e scolars dal Center da formaziun Surselva, a Scuol tar in emprendist che stat curt avant l’examen final da cuschinier ed a Ftan en la classa da sport da l’Institut Otalpin.. Co han ellas passentà quest davos ’onn? Sin tge han els stuì renunziar, tge siemis e tge finamiras stritgar? E cun tge sentiments guardan ellas ed els en il futur?

Sper giuvnas e giuvens raquinta era Reto Mischol dals Servetschs psichiatrics dal Grischun da sias experientschas ed enconuschientschas da l’onn da corona. Il schefpsicolog en la partiziun psichiatria d’uffants e giuvenils ha constatà in augment signifitgant da problems psichics tar la giuventetgna en il Grischun.

«Jau hai il nas plain da questa pandemia», di il cusseglier guvernativ Marcus Caduff. El lavura en media var 70 uras ad emna e sa fatschenta dapi passa in onn surtut cun la pandemia. Tge vul quai dir d’avair la responsabladad per l’economia grischuna en ina tala situaziun da crisa? Tge consequenzas ha quai gì ch’el ha numnà il cussegl federal in «tamazi»? E co è quai stà da cumbatter uschè ditg per las terrassas en ils territoris da skis e la finala stuair ceder? Il film dat in sguard davos las culissas e mussa era tge che Marcus Caduff fa per supportar il squitsch che vegn da tut las varts.

Da mattetta tgirava Petra Battaglia sias poppas, Anita Pedretti era gia en scolina en il chantun da l’ospital e Fabiana Sac gidava gia adina gugent als umans. Oz lavuran las trais dunnas en la tgira – en la Chasa d’attempads a Savognin, tar la Spitex en Engiadin’Ota e sin la staziun da pandemia da l’Ospital chantunal a Cuira.

Ellas trais tutgan tar quellas persunas, senza las qualas i na va betg – las persunas che lavuran en la tgira. Corona ha accentuà lur valur. Tuttina regna anc savens l’idea che lavurar en la tgira saja metter si plasters, lavar pazients ed als dar medicaments. Il mintgadi, ch’ellas trais han laschà observar ad Isabelle Jaeger per ils «Cuntrasts», mussa bain spert ch’il mastergn da la tgirunza na pretenda betg be engaschi, ma ina passiun per la tgira.