O equipo senior masculino do Club Balonmán Tui continúa na pelexa polo ascenso. A falta de sete partidos para a final, os resultados son favorables. Hoxe o presidente do club, Pablo Rodríguez, e o adestrador, Jacobo Gregores, deron conta da situación do club e dos éxitos colleitados polos seus equipos.

“Saúde e terra” é o título do manifesto da Asociación de Escritoras e Escritores en Lingua Galega polo Día de Rosalía, que se celebra mañá domingo día 23.

Marga do Val, escritora, crítica literaria e profesora, forma parte desta Asociación. Con ela puidemos coñecer por que é importante conmemorar a figura de Rosalía e por que neste manifesto aparecen asuntos como a sanidade, a educación, a protección ambiental ou a revitalización que precisa a lingua galega.

Coida o corpo é a nova aposta do Concello de Tui para previr o deterioro físico da veciñanza maior de 55 anos. Un programa que se levará a cabo en todas as parroquias tudenses a partir do 10 de marzo, e que se unirá a Cultiva a Mente co obxectivo de promover un envellecemento activo. O concelleiro de Servizos Sociais, Ismael Diz, e a traballadora social Carmen González, déronnos os detalles. O prazo de inscrición abrirase o luns día 24.

A pianista e xestora musical tudense Andrea González volve estar na lista das Top 100 Mulleres Líderes en España 2025. Directora do festival IKFEM dende hai 12 anos, é a primeira muller presidenta de Xuventudes Musicais de España. Con ela coñecemos amais "Caixason", unha das novidades de IKFEM, que este ano se vai celebrar do 16 ao 20 de xullo.

Unha viaxe pola tradición e a modernidade é a que propón Daniel Rodríguez en "Transeúnte". O espectáculo estrearase mañá venres, ás 21 h no Teatro Municipal de Tui. Prevese cheo total xa que quedan poucas entradas á venda en tui.gal.

Con Daniel Rodríguez, bailarín e coreógrafo, falamos deste espectáculo coproducido polo Centro Dramático Galego.

Tui contará cunha Jam Session o próximo venres, 28 de febreiro ás 21 h, no novo espazo sociocultural da rúa Camilo José Cela. Músicos locais e da contorna reuniranse para tocar e brindar unha tarde chea de música e improvisación.

Unha iniciativa froito da colaboración entre o Concello de Tui, a través da concellería de Cultura, e a promotora local FB ProduXion. Así nolo contou hoxe Frans Banfield.

Até o 6 de marzo está aberto o prazo de presentación de propostas para a execución das obras de rehabilitación do inmoble situado no número 20 da rúa Bispo Castañón adquirido pola Xunta dentro do Plan Rexurbe. Desta cuestión falamos coa conselleira de Vivenda e Planificación de Infraestruturas, así coma da rehabilitación das outras tres vivendas adquiridas pola Xunta no conxunto histórico de Tui, e en materia de infraestruturas da conexión entre Tui e A Guarda.

Bugina Turismo presenta unha oferta de visitas guiadas co título "Experiencias con Esencia" que esta fin de semana brinda dúas propostas. O domingo será un paseo pola Eurocidade Tui-Valença, e previamente o sábado pola Guarda Mariñeira.

En total en "Experiencias con esencia" realizaranse un total de 10 visitas. Coma novidade haberá bonos para 5 percorridos ou para os 10. As persoas interesadas poden contactar a través do Whastapp 684 193 927 ou en buguinaturismo.com.

Observar a pesca da lamprea no río Miño nunha embarcación. Esa é a nova proposta de Río Miño en Barco, segundo explicou Verónica Gómez. Trátase dunha actividade que se realizará os venres ás 20 h e sábados ás 12 h e ás 16.30 h, sempre con reserva de praza anticipada no teléfono 662 31 25 20. Conta cunha duración de 90 minutos e un prezo de 30 euros, incluíndo unha degustación final de lamprea e albariño.

Biper Bocatería é un dos establecementos que participan este venres 21 e o sábado 22 na campaña "San Solterín", impulsada por ACITUI. Hoxe coñecemos a oferta desta bocatería coa súa xerente, Marina López, no Espazo Comercio.