O grupo PinkPorris celebrará a próxima fin de semana o primeiro aniversario do seu primeiro concerto. Hoxe con Marco Oya, Jessica Ramilo, Brais Ramilo, Xosé Ledo Pazo e Nacho Lafuente, coñecemos como naceu o grupo, de onde ven o nome e nos contaron que fan "Granito rock" como puidemos comprobar nos dous temas que interpretaron en directo en Día a Día. Tamén forman parte do grupo Roberto e Fonso que hoxe non puideron estar na RMT.

A próxima semana, do martes 4 ao venres 7, a Escola de Música Municipal de Tui celebra unhas Xornadas de Portas Abertas.Van dirixida a nenos e nenas de 5 a 7 anos. Por outra parte mañá venres ás 20 h terá lugar no Teatro Municipal de Tui o concerto de fin de curso do Conservatorio de Música de Tui e da Escola de Música.

Falamos destas dúas actividades co director do Conservatorio e da Escola de Música, Rubén López.

Este domingo, 2 de xuño, ás 19 h comezará na praza da Inmaculada Recunchos de Música, unha guía musicalizada polo conxunto histórico de Tui que este ano se centra na emigración galega. Participarán o Coro Infantil de Pazos de Reis, a Escola da Coral Ponte das Febres, o Mariachi Noche de Ronda de Redondela, e a Coral Ponte das Febres que organiza o evento.

Coñecemos o percorrido que van realizar e como serán o evento con Rafael Pérez Dopeso, Mila González, José Manuel Solleiro, Noa Vaz e Sara Montes.

"Os sinais de alarma no neurodesenvolvemento infantil" é o tema que abordarán hoxe, ás 19 h no salón de actos do Seminario Menor, Paula Piñeiro e Sonia García, logopedas do Servizo de Ateción Temperá do Baixo Miño, nas III Xornadas Educativas organizadas polas ANPA's de Tui.

No barrio do Cruceiro, en Randufe, está a Cruz da Defunta. Deste elemento patrimonial falounos hoxe Cristian Lago, no tempo de "Descubrindo o noso patrimonio". Explicou coma as cruces son elementos moi habituais na nosa paisaxe cultural por diferentes motivos.

Este sábado a Alameda de San Domingos acolle o evento Orgullo e Punto, unha xornada coa que se conmemora o Día Internacional de Tecer en Público e o Mes do Orgullo, A actividade de tecer será o eixo central da xornada, pero tamén haberá contacontos, maxia, gastronomía, música… Así nolo contaron Ana Núñez, concelleira de Igualdade, e Aline Romero e Marita Alonso de TejeTui.

Suso Montero, xubílase hoxe xoves, ao cumprir 70 anos, tras máis de tres décadas na Oficina de Emprego de Tui previamente estivo tamén en Vigo, sumando 51 anos na administración pública. Con el falamos da evolución do seu traballo ao longo destes 51 anos, dos cambios, das anécdotas e tamén da nova etapa que agora abre. Canda el estivo José Ángel Fernández, director da Oficina de Emprego.

Este sábado, ás 21.30 h ES celébrase en Verdoejo, Valença, o festival Música no Quintal ao Por o Sol. Contarán coa actuación de Mr. Gallini e Geodudes. A entrada terá un prezod e 5€. Deunos todos os detalles dende a organización Jose Carlos Esteves.

Hoxe falamos coa alcaldesa de Tomiño, Sandra González, de distintos temas da actualidade municipal, pero tamén, como presidenta do GDR 14 Eu Rural, da viaxe a Italia realizada a semana pasada.

Abordamos o premio Día da Cooperación outorgado á Eurocidade Tomiño-Cerveira, as obras nos soportais de Goián, na Costa en Estás, e o cambio de luminarias.. Tamén se referiu a Feira de Cultivos que se celebra a próxima semana, e deu conta do estado das obras da Biblioteca que agardan poida abrir en outono.

ACITUI, a Asociación de Comerciantes e Industriais de Tui, celebra mañá xoves, ás 20.30 h en primeira convocatoria, e ás 21 h en segunda, na Sala Félix Rodríguez, asemblea ordinaria.

Tania Otero, de ACITUI, explicou o obxectivo desta asemblea.