Este ano o Festival de Verán de Patinaxe Artística organizado polo CPA Ribex tamén terá carácter solidario, así nolo explicou coma responsable do club Santi Alonso.

Terá lugar no Pavillón Municipald e Tui mañá sábado a partir das 19h e a entrada terá un prezo de 2€ íntegros paa os afectados pola explosión no barrio da Torre.

Este domingo o deporte tamén é solidario coa Festa da Piragua, que sairá dende a Ribeira de Caldelas ás 11h para facer unha baixada polo Miño ata Guillarei. Pódese participar con kaiak propio ou cun dos proporcionados pola organización e todo o racadado irá para os afectados pola explosión no barrio da Torre. As reservas pódense realizar no 619 04 73 72.

Trátse dunha iniciativa da Comunidade De Montes de Guillarei, a Asociación de Veciños de Guillarei, a ANPA Tide e o CRA Mestra Clara Torres e colaboración con VerdeAzul.

Este domingo no Monte das Penizas en Paramos terá lugar o Xantar do Codillo, que terá carácter solidario cos afectados pola explosión no barrio da Torre. Trátase dun xantar que xa estaba previsto nesta data e que decidiron transformar de festa a evento solidario despois da catástrofe. Teñen xa confirmadas arredor de 700 reservas.

Os alumnos do CEIP Nº1 realizarán o mércores 20 de 13.15h a 14h unhas xornadas científico-tecnolóxicas nas que mostrarán moitos dos proxectos que nos levan traballado e investigado durante todo o curso.

Algúns dos nenos estiveron está mañá na RMT explicando en que consistirán os stands dos seus cursos xunto coa profesora e xefa de estudos do centro, Marta Álvarez. Martín Álvarez, de 2º, Iria Moledo e Carlota Sío, de 3º, e Gabriel Gómez de 5º contáronnos o que se poderá ver nos seus stands.

Mañá sábado ás 16.30h terá lugar no Paseo Fluvial unha quedada polo Día Mundial de Tecer en Público. É un acto gratuíto aberto a todo aquel que desexe pasar un bo rato tecendo e compartido ideas, merendar, aprender estiramentos e participar nos sorteos organizados.

Esta actividade está organizada por Marita Miscapisca, ARTElier e MyR Abalorios coa colaboración de Mercería Fiadeiras e Osteopatía Tui.

Unha catástrofe das dimensións xurdida tras a explosión do pasado 23 de maio en Paramos supera a calquera goberno municipal. Así o afirmaba hoxe o voceiro de Alternativa Tudense, Miguel Capón, quen sinalaba a colaboración total da xunta de portavoces, onde dos distintos grupos xurdiron parte das acción que se están a realizar coma o Fondo de Emerxencia, a convocatoria da Xunta Local de Seguridade, ou a contratación dun asesor en seguros. Tamén indicaba que no gabinete de crise se propuxo encargar un informe xurídico de a quen corresponde a responsabilidade civil subsidiaria da explosión. Ao tempo que facía un chamamento á prudencia.

Coincidía con outros voceiros que estiveron na nosa sintonía nos últimos días que a reconstrución vai ser un proceso longo.

A música tradicional será protagonista esta fin de semana en Tui coa celebración do IV Concurso de Gaita e Tamboril o sábado, e do V Día da Muiñeira o domingo.

Ambos actividades están organizados pola Asociación Xuvenil e Cultural San Telmo, que traballa pola recuperación das tradicións, coa colaboración do Concello de Tui.

Esta fin de semana a Asociación Cultural Betún ten dúas novas propostas musicais. O prato forte será mañá venres a partir das 22h cun concerto de Su Garrido Pombo, coa que contamos hoxe na nosa sintonía para falar do seu disco "Quedo a vivir aquí", do que amais nos ofreceu algúns temas en directo.

O domingo na rúa Cuenca estarán 16mm coa súa proposta de violonchelo e theremin.

Dúas emprendedoras están a poñer en marcha no Concello do Rosal, un proxecto para a creación da primeira Escola de Hostelería do Baixo Miño, que contará con espazos para aulas, degustación, demostracións e dúas exposicións permanentes de elementos etnográficos e de viños producidos na comarca. Estivemos a falar desta iniciativa con Esther Ruzo e Sonia Castiñeira.

A 3º edición do Simposio de Escultura do Miño, unha iniciativa conxunta dos concellos de Tomiño e Vila Nova de Cerveira, está a desenvolverse dende hai uns días no Espazo Fortaleza de Goián. Alí, ata finais de mes seis recoñecidos escultores de distintos países están a traballar en vivo para o público en seis obras que pasarán a formar parte do patrimonio escultórico das dúas vilas.