A actualidade do día en Noticias 13.30h na Radio Municipal de Tui

Este domingo en Pexegueiro teñen cita co folclore no Festival de Primavera organizado pola Asociación O Mosteiro.

Contarán coa actuación do grupo Trécolas, que forma parte da Asociación O Carballo de Sárdoma, e da Coral Ponte das Febres, que presentará un espectáculo en primicia coa colaboración de membros da rondalla de Pexegueiro.

Comeza a campaña de recadación de fondos para realizar un torso en bronce de Don Ricardo que será inaugurado o próximo ano coincidindo co segundo aniversario do seu pasamento.

Un grupo de amigos leva a cabo esta campaña de cuestación para a que os interesados poden depositar a súa contribución nunha conta aberta en ABANCA. Estivemos afalar con Tito Gómez, unha das persoas que está a traballar nesta iniciativa.

Mañá ás 18h terá lugar en Tui unha charla sobre métodos de estudo en alumnos con dislexia. Trátase dunha actividade organizada pola ANPA Diómedes do CEIP Nº1 en colaboración con outras nove ANPAs de centros educativos tudense. Terá lugar no salón de actos do CEIP Nº2 e correrá a cargo de Paula Outón, profesora na USC e especialista en dislexia.

A un día para que peche o prazo de solicitude de prazas nos centros educativos o CRA Mestra Clara Torres conta con moi poucos alumnos nalgunhas das súas aulas. A súa directora, Teresa Domínguez, deunos conta hoxe de cales son as diferenzas e as vantaxes da educación no CRA.

A Plataforma cidadá de afectados polo Plan Xeral no barrio de San Bartolomé reclama que o Concello de Tui leve a cabo a modificación do PXOM na zona dos PERI’s de San Bartolomé, aplicando o estudo que se levou a cabo de acordo coa consellería de Infraestruturas, o que suporía un investimento de 59 mil euros en varias anualidades. Manuel Fernández e José Sío Castro explicaron que demandan que se faga xustiza.

A Semana Santa en Tui, organizada pola Irmandade do Docísimo Nome de Xesús e a Irmandade da Santa Casa da Misericordia, comezará este domingo coa lectura do pregón ás 18h na capela de San Telmo na S. I. Catedral. Estivemos a falar sobre todos os actos que terán lugar a partir do Domingo de Ramos, o 25 deste mes.

Este domingo, 18 de marzo, celébrase o Día do Seminario baixo o lema “Apóstoles para os xoves”. Por este motivo hoxe visitáronnos o Formador do Seminario Alberto Montes Rajoy e os 36 seminaristas que estudan alí. Estivemos a falar con algúns deles.

A de hoxe será unha noite de experimentación musical electrónica no Betún da man de Ton-Dose e Hipercubos e os seus dispositivos sonoros artesanais. Será a partir das 22h con entrada de 4€ para os socios beta. Contóunolo Sergio Alonso, que tamén nos deu conta da sesión en vinilo de mañá co tudense Diego Estevez a.k.a. Dj Junior que achegará dende ás 23.30h.

Este domingo saen de Tui os 340 participantes en Ultreia, a marcha de sendeirismo popular, que percorrerá a distancia de 53 quilómetros, até Pontevedra, nunha única xornada. Estaba prevista para o pasado día 4 pero foi adiada polo mal tempo.

David Acevedo, os máis rápidos poderían facer o percorrido en 8 horas, pero a media estará entre as 10 e 12 horas.