Día a Día

O alcalde de Tui, Enrique Cabaleiro, explicou hoxe na nosa sintonía cales son os dous temas que máis lle preocupan coma rexedor nestes momento: o baixo nivel de ingresos do Concello de Tui e a situación de abandono do conxunto histórico . Amais deu conta doutros temas coma a apertura do novo centro de saúde, a situación do Camiño de Santiago, ou a apertura da rúa Ourense.

Música no Claustro afronta os tres últimos días de festival con novas propostas musicais. Hoxe será a quenda de Nikola Tanaskovic ás 21.30h e mañá á mesma hora actuará Noiserv. Con eles dous falamos esta mañá dos seus concertos, acompañados por Samuel Diz. O festival prosegue ata o domingo.

A Comunidade Montes de Camposancos na Guarda proxecta facer unha parcela de 100 mil metros cadrados no Monte Trega, na zona de Chans, na que inicialmente plantarían herba e despois árbores autóctonas co obxectivo de crear un arboreto e se co tempo é posible un xardín botánico. Así o explicou o presidente da comunidade de montes José Fernando Martínez. O custe para a comunidade será mínimo xa que só terían que correr cos gastos do arqueólogo que Patrimonio lles esixe mentres realicen os traballos. Da plantación encargarse a empresa CEAMSA que aportará as a algas como fertilizante para a toda a zona cun investimento de 200 mil euros.

A comunidade d eMontes traballa arestora nos permisos. Agardan poder comezar no outono.

Mañá venres, ás 23h no exterior do Café Central celébrase un desfile solidario en favor da asociación APAMP organizado por La Tortoise que presentará a nova temporada primavera-verán. A entrada ao desfile é libre, pero para recadar fondos porán á venda rifas ao prezo de 2€ para entrar no sorteo de distintos agasallos entre eles un vestido deseñado por Jorge Vázquez.

Unha búsqueda do tesouro, unha conferencia sobre a grana cochinilla, e un concerto de viola de gamba son as tres propostas para hoxe dentro de Música no Claustro. Samuel Diz director do festival deu conta do exitoso inicio de onte. Viu acompañado por Huemac Escalona Lüttig que impartirá a conferencia ás 18.30h e por Irene Gómez que presentará en concerto ás 21.30h o seu traballo "Cantos de serea".

Cinco concertos, conferencias e obradoiros de artesanía permitirán a fusión entre música, patrimonio e creación interdisciplinar dende hoxe e ata o domingo no XII Música no Claustro que se vai celebrar na Catedral de Tui.

O arranque desta edición de 2016 terá lugar ás 21.30h na capela das reliquias da Catedral coa homenaxe amor e vida pola música a Moisés Quintas Suárez. A continuación Pres de Cambrai ofrecerán un concerto titulado “O segredo do Pergamiño Vindel”. Belén Bermejo falounos do espectáculo desta noite.

Os empresarios, políticos e sociedade civil do norte de Portugal atópanse sorprendidos e desgustados pola decisión do Goberno de Portugal de excluír ao norte do país dos descontos do 15% nas peaxes aprobados noutras vías, nomeadamente na entrada ao Algarve. O presidente do Consello Empresarial dos Vales do Limo e Miño, Ceval, José Luis Ceia, asegura que non entende a decisión cando o norte de Portugal protestou en numerosas ocasións polas peaxes.

Ata este mércores, 3 de agosto, ás doce da noite, está aberto o prazo de inscrición para a II Ruta Histórica "As catro portas de Tui do século XVII" organizada polo club AndaTui dentro do Circuíto de Andainas Saudables da Eurocidade. A andaina celebrarase este sábado, 6 de agosto, ás 22h con saída dende o palco da música na Corredoira e chegada en Santo Domingo. Incluirá a actuación da Asociación X.C. do Traxe de Tui en cada porta e unha queimada ao remate. O prezo é de 5€ para adultos e a inscrición debe facerse en www.andatui.es. Así nolo contou hoxe José Martínez Tato.

Alternativa Tudense non está a promover nin vai presentar unha moción de censura en Tui. Así quixeron deixalo claro esta mañá os seus concelleiros na corporación e membros do equipo de goberno municipal, Miguel Capón Rey, e María José González. Lembraban que xa hai un ano ao inicio do mandato o PP ofreceulles a alcaldía e o rexeitaron.

Si recoñeceron que membros do partido están a participar nas reunións convocadas polo Partido Popular provincial co obxectivo de reunificar a dereita na cidade. Explicaron nese senso que tanto Miguel Capón como Mª José González que eles coma membros do equipo de goberno decidiron por ética no tomar parte nas mesmas.

Todo preparado no Concello para a conmemoración esta tarde do 125 aniversario dos Xogos Florais de Galicia. ÁS 19.30h comezará no salón de sesións o programa previsto coa intervención do presidenta da RAG e do alcalde de Tui. A actuación das irmás Sara e Raquel Areal ao violín, e a proxección de imaxes antigas de Tui completará o programa neste primeiro escenario. Logo traslado da actividade ata a praza de Fromista xunto coa Banda de Gaitas de Guillarei. A concelleira de Ensino e Cultura, María José González, así o explicou ao tempo que aproveitou para convidar ao público a asistir.