Máis de 3.000 persoas participan cada ano nos desfiles de Entroido que acolle Salceda de Caselas. O enfrontamento centenario entre os barrios da Feira e Castro Barreiro é un dos elementos diferenciadores desta festa, así como o rancho e os cabaleiros.

Hoxe coñecemos toda a programación deste 2025 coa alcaldesa, Loli Castiñeira; co concelleiro de Cultura, Alex Rodríguez; coa representante da Feira, Sofía Carracedo; e de Castro Barreiro, Daniel Rodríguez.

"Os nosos dereitos, hoxe, mañá e sempre" é o lema co que o Concello de Tui conmemora este ano o 8M, o Día Internacional da Muller. Así o deu a coñecer esta mañá na nosa sintonía a concelleira de Igualdade Ana Núñez. Avanzou que o cartel é obra de Luz Beloso e detallou os obxectivos e as citas previstas ao longo de todo o mes de marzo. Tamén interveu Paula Cabaleiro, xestora cultural e colaboradora nesta programación.

O remeiro tudense Jesús González, do Club Remo do Miño, proclamouse esta fin de semana Campión do Mundo de Remo Indoor na categoría de peso lixeiro de 50 a 54 anos. na que bateo o récord do mundo. Amais foi sétimo na categoría absoluta de peso lixeiro. Hoxe no programa Día a Día contounou coma foi esta esixente competición mundial.

Do 1 ao 20 de marzo poderase solicitar praza para o próximo curso escolar nos centros educativos para o alumnado que entra por vez primeira no sistema educativo; e para o alumnado de infantil, primaria, ESO e Bacharelato que desexe cambiar de centro.

Por este motivo nos próximos días imos achegarnos a cada un dos centros educativos de Tui para coñecelos máis de preto.

Hoxe abrimos esta quenda de entrevista co Colexio Rural Agrupado Mestra Clara Torres, coa directora, Puri Bugarín; a titora Sara Cancela; a orientadora Andrea Martínez; e a representante da ANPA Tyde, Irene Rodríguez.

O Entroido de Goián cumpre 70 anos de historia este 2025. Da man de Iago Moure, presidente da comisión organizadora, coñecemos todos os detalles dos sete días de programación, con propostas tradicionais e tamén novidosas.

O equipo senior masculino do Club Balonmán Tui continúa na pelexa polo ascenso. A falta de sete partidos para a final, os resultados son favorables. Hoxe o presidente do club, Pablo Rodríguez, e o adestrador, Jacobo Gregores, deron conta da situación do club e dos éxitos colleitados polos seus equipos.

“Saúde e terra” é o título do manifesto da Asociación de Escritoras e Escritores en Lingua Galega polo Día de Rosalía, que se celebra mañá domingo día 23.

Marga do Val, escritora, crítica literaria e profesora, forma parte desta Asociación. Con ela puidemos coñecer por que é importante conmemorar a figura de Rosalía e por que neste manifesto aparecen asuntos como a sanidade, a educación, a protección ambiental ou a revitalización que precisa a lingua galega.

Coida o corpo é a nova aposta do Concello de Tui para previr o deterioro físico da veciñanza maior de 55 anos. Un programa que se levará a cabo en todas as parroquias tudenses a partir do 10 de marzo, e que se unirá a Cultiva a Mente co obxectivo de promover un envellecemento activo. O concelleiro de Servizos Sociais, Ismael Diz, e a traballadora social Carmen González, déronnos os detalles. O prazo de inscrición abrirase o luns día 24.

A pianista e xestora musical tudense Andrea González volve estar na lista das Top 100 Mulleres Líderes en España 2025. Directora do festival IKFEM dende hai 12 anos, é a primeira muller presidenta de Xuventudes Musicais de España. Con ela coñecemos amais "Caixason", unha das novidades de IKFEM, que este ano se vai celebrar do 16 ao 20 de xullo.

Unha viaxe pola tradición e a modernidade é a que propón Daniel Rodríguez en "Transeúnte". O espectáculo estrearase mañá venres, ás 21 h no Teatro Municipal de Tui. Prevese cheo total xa que quedan poucas entradas á venda en tui.gal.

Con Daniel Rodríguez, bailarín e coreógrafo, falamos deste espectáculo coproducido polo Centro Dramático Galego.