A Eurocidade Tui-Valença cumpriu este luns 13 anos dende a súa constitución oficial. Un tempo no que se ten avanzado na cooperación transfronteiriza en moi diversos ámbitos. Cultura, deporte, mobilidade, medio ambiente, economía ou turismo son algúns dos ámbitos que están sobre a mesa.

Abordamos estas cuestións co alcalde de Tui, Enrique Cabaleiro, e co presidente da Câmara de Valença, José Carpinteira.

"Maldito Cupido" é o novo sinxelo de G Face. Unha bachata que o artista tomiñés lanza coincidindo co Día dos Namorados. Novos éxitos na carreira musical de G Face, que hoxe venres compartirá escenario con Andy y Lucas no Auditorio Mar de Vigo. Coñecemos con el todas estas boas novas.

“Os Lobariñas Feixoo. Luz e memoria nos Séculos escuros” é o libro que hoxe se vai presentar na Sala de Exposicións Municipal de Tui, no edificio Francisco Sánchez, ás 19.30 h. Participará o seu autor, Perfecto Ramos, e conducirá o acto Helena Pousa. Coñecemos toda a historia desta obra da man do seu escritor.

Cun concerto celebrará a Eurocidade Tui-Valença o seu 13º aniversario. Será este sábado 15 de febreiro ás 21 h no Teatro Municipal de Tui, onde actuará un centenar de músicos da Associação Musical de São Pedro da Torre, Old Brigde Band, o Conservatorio Profesional de Música de Tui e a Banda de Música Popular de Tui. A concelleira de Cultura, Sonsoles Vicente; e o director da Banda de Música tudense, Eloy Carrera, deron máis detalles.

Máis de 600 persoas van participar o vindeiro 23 de febreiro na oitava edición do Trail Muíños do Folón (para o que aínda hai prazas dispoñibles). Unha cita que conecta deporte, natureza e patrimonio. Hoxe coñecemos máis detalles con Ánxela Fernández, alcaldesa do Rosal, e Serafín Martínez, de Nokao.

Xampatito Pato presenta este venres, 14 de febreiro, ás 19 h no Teatro Municipal de Tui "Compaña", un espectáculo para público familiar que fusiona o circo co mundo das marionetas, contando a historia do protagonista con moita maxia e surrealismo. Así nolo contaba o seu protagonista, Jesús Velasco

Gastronomía, música e unha atmosfera máxica encherán esta fin de semana a praza da Inmaculada coa campaña “Tui, meu amor”, promovida polo Concello de Tui, que convida a celebrar o amor en todas as súas formas. Será este venres 14 de 17 h a 20 h; e o sábado de 12 h a 14 h e de 16 h a 20 h. A concelleira de Comercio e Turismo, Ana Núñez, deu todos os detalles.

Javier Martínez creceu entre coches. A súa afección polo automobilismo levouno a participar en rallies no 2016. Na actualidade, con máis de 150 carreiras desputadas, o copiloto ten no seu palmarés títulos como o campionato de Copa de España de Rallies. Con el repasamos os seus inicios e éxitos deportivos.

“Cando os tempos cambian, os pais e nais aprenden” é o relatorio que clausurará mañá no auditorio de Goián ás 19.00 horas, a X Semana da Educación de Tomiño. A charla estará impartida pola psicóloga Diana Jiménez, quen nos contou no programa Día a Día cales son os retos actuais da educación.

Hoxe é o Día Internacional da Nena e a Muller na Ciencia. Un día que se conmemora dende o ano 2016 para visibilizar a gran fenda de xénero que existe neste campo, cunha falta moi acusada de participación de mulleres.

Hoxe profundamos nesta realidade con Leticia Costas, divulgadora científica.