Falamos coa viguesa Ledicia Costas, que está presentando o seu último libro 'Pel de cordeiro', unha novela para a adultos na que mandan as bruxas de todo tipo, desde as que perseguiron durante a Inquisición ás que teñen consultas nos nosos días.

Con Moncho Lemos repasamos as novidades da carteleira: 'Furiosa', de George Miller; e 'Segundo premio', de Isaki Lacuesta e Pol Rodríguez.

Viaxamos ata o conxunto arqueolóxico de Santalla de Bóveda. As modernas técnicas de investigación están proporcionando novas vías para entender un monumento que, até o de agora, era un dos grandes misterios do pasado romano en Galicia.

Con Luz Castro analizamos nesta ocasión a presencia do galego no sector dos videoxogos.

Regresamos ás pinturas da viguesa Menchu Lamas, a precursora que nos anos 80 estableceu os primeiros lazos entre modernidade e tradición, entre o abstracto e o figurativo. A galería Luisa Pita de Santiago acolle unha escolma de obras de Menchu Lamas dos últimos 5 anos. Cadros de grandes formatos nos que as formas circulares e a pulsión xeométrica volven adquirir protagonismo.

Con Dolores Vilavedra falamos da obra 'O teu perfil na miña sombra', de Rexina Vega.

Imos somerxernos no fondo do mar para descubrir bosques de algas a través da mostra "Retrato dun bosque de laminarias", da artista viguesa Elena Alonso. Unha exposición na que combina pinturas coloristas, vídeo e realidade aumentada para poñer en valor estes ecosistemas mariños e concienciar sobre a súa conservación.

Con Emilio Españadero repasamos os principais premiados dos Premios Martín Códax: Os Melidaos, Caamaño & Ameixeiras, Miudiño Sessions, A Arca da Noe... e un avance do próximo 'Lume na palleira'!

Co profesor e especialista en teatro galego Henrique Rabuñal analizamos a actividade teatral de Luísa Villalta. Escribiu cinco obras e deixou algún material inédito.

Con Moncho Lemos repasamos as principais novidades da carteleira: 'Disco, Ibiza, Locomía, dirixida por Kike Maíllo; e 'Calladita', de Miguel Faus.

O compromiso de Luísa Villalta foi moi importante. Implicouse, estimulou a reflexión crítica, creou opinión e tomou partido. Á súa beira hai unha amiga que comparte ese cariño: a profesora, ex-deputada do BNG e escritora Pilar García Negro.

Con Luís Miguel Crespo repasamos os vindeiros concertos da Real Filharmonía de Galicia e da Orquesta Sinfónica de Galicia.

Ana Pillado é unha das fillas de Pancho Pillado, o que foi editor de Luísa Villalta, ademais do seu mentor e amigo. Uníronos a música, a literatura e o amor pola cultura galega. Isabel Freire mantivo unha conversa con ela.

Con Dolores Vilavedra falamos do libro 'O incendio', de Sara Vila Alonso, gañador do último Premio Blanco Amor de novela.

As autoras galegas acapararon a novena edición dos Premios Follas Novas do Libro Galego. Alzáronse con 10 dos 13 premios concedidos no Teatro Principal de Santiago. As premiadas quixeron reivindicar a importancia da comunidade do libro en Galicia, dende autores e autoras ata lectores, pasando por editoras e librarías. Falamos con tres das triunfadoras: Susana Sánchez Arins, Leticia Barbadillo e Silvia Penas.

Con Emilio Españadero conversamos sobre o premio honorífico Martín Códax da Música para Emilio Cao, o novo de Fuxan os Ventos, o “Cantar Galego ao Zeca” de Uxía e o concerto de aniversario de Milladoiro.

Visitamos a exposición "Héctor Francesch. Colecciçon de favoritas" na Fundación Abanca en Vigo. O universo deste artista abarca dende o debuxo á pintura, pasando polas instalacións. Converte en arte obxectos que todos temos a mán, apostando por unha pintura colorista que nos remite ao pop art e ao cómic.

Con Luz Castro coñecemos máis da Xornada Power Up arredor de Videoxogos Aplicados e Persuasivos, que organiza o Campus Industrial de Ferrol en colaboración coa coordinación do máster en Deseño, Desenvolvemento e Comercialización de Videoxogos e co Concello de Ferrol.

O Auditorio de Milladoiro acolle os Recoñecementos Escena Galega das Artes Escénicas que entrega a Asociación Galega de Artes Escénicas. Con eles recoñécese a profesionais, entidades, instalacións, publicacións e persoal técnico vencellado ás artes escénicas de Galicia. Entre os premiados están Títeres Cachirulo, a Revista Erregueté, Madó Santos, Ana Díaz Calvo, A Casa Vella de Amiadoso e Fátima Rodríguez.

Con Dolores Vilavedra afondamos nunha lectura de Manuel Veiga Taboada: 'A literatura galega contada aos escépticos'. Fai un percorrido que abarca dende Vicente Risco á literatura última.