Rakel og Margrét eru frumkvöðlar á sviði umhverfisverndar og skrifuðu saman bókina Vakandi Veröld sem kom út hjá Forlaginu fyrir 7 árum en bókin á ríkt erindi til okkar allra í dag. Þær segja okkur frá því hvernig þær sjá heiminn út frá umhverfissjónarmiðum. Rakel talar um skekkjuna í því að búa á einni grænustu eyju í heimi en þurfa stundum að standa frammi fyrir því að börn megi ekki fara út að leika á leikskólanum þegar mengun mælist of mikil í Reykjavík. Fólk ætti jafnvel frekar að vera beðið um að hvíla bílinn endrum eins. Margrét vill að þjóðarleiðtogar heims geri friðarsamning við jörðina og talar um græna kærleikshagkerfið. Þær tala báðar fyrir því að við drögum úr matarsóun og nefna kostnaðinn við það að henda mat. Matarsóun er ein helsta orsök koltvísýrungslosunar í heiminum.

Freyr sem er nýráðinn til Sorpu og er þar þróunarstjóri Hringrásarhagkerfisins, segir að það sé hreinsandi fyrir sálina að skola mjólkurfernur og hann vill ekki hafa eldhúsið sitt með hvítri kókaíneldhúsinnréttingu þar sem sál manns deyr. Hann vill blanda notuðu með nýju til að skapa heimili og hann lagar hluti - "youtubar" eins og brjálaður maður en finnur í því innri ró. Ruth, sem hefur stýrt Góða hirðinum frá árinu 2018 segir að nú sé endursöluhlutfallið á notuðum munum þar 65% en var 26% þegar hún hóf þar störf. Landsmenn eru því að standa sig æ betur í því að kaupa notað. Daglega koma frá okkur hvorki meira né minna en 7-10 tonn inn af notuðum hlutum til Góða hirðisins. Freyr og Ruth segjast bæði spara verulegar fjárhæðir á því að endurvinna og geti jafnvel náð einni hressri utanlandsferð með fjölskylduna fyrir afganginn.