Gazteen osasun mentalaren inguruan arituko gara, COVID-19aren pandemiak gazteengan izan dituen ondorioen inguruan batez ere.
Koronabirusaren izurriak kolokan jarri ditu haur, gazte eta nerabe askoren oreka emozionala eta buru osasuna, lehendik zeuden gaitz batzuk gehitu baititu, baita patologia berriak azaleratu ere.
Fedeafes (Federación de Euskadi de Asociaciones de Personas con Enfermedad Mental y Familiares) elkarteak abenduan kaleratutako Buruko osasun arazoak Haurtzaroan, Nerabezaroan eta Gazterian txostenak, izurriak Arabako, Bizkaiko eta Gipuzkoako gazteriaren osasun mentalean izan dituen ondorioak azaltzen ditu. Bertan jasota dagoenez, COVID-19aren pandemiaren eraginez ia %50 handitu da arreta psikiatrikoa jaso duten nerabeen kopurua 2019arekin alderatuta.
Datuek erakusten diguten errealitatea bere horretan oso larria eta arduratzekoa da. Horregatik, gazteen artean identifikatutako sintoma horiek guztiengatik (segurtasun eza, loaren nahasmendua, neke emozionala, kontzentrazioa galtzea, auto-estimu jaitsiera, suminkortasuna, umore-aldaketa bortitzak…) erdigunean jarri behar dira oreka emozionala eta buru osasuna.
Gipuzkoan, Agifes-ek, Buru Osasun Arazoa duten Pertsonen eta Senideen Gipuzkoako Elkarteak, Zeuk Aukeratu programa koordinatzen du. Zeuk Aukeratu, buru osasun arazoak prebenitzeko eta gaiaren inguruan sentsibilizatzeko programa da, 10 eta 18 urte arteko haur eta nerabeei zuzendua. Programa honen inguruan zehaztasun gehiago emateko, gaurkoan gurekin dugu Nekane Azuabarrena psikologoa.