У перыяд пандэміі і рэжыму самаізаляцыі больш за ўсё пакутуюць самыя слабыя і ўразлівыя грамадзяне, якія залежаць ад іншых людзей. У нашай краіне гэта людзі з інваліднасцю, якія жывуць у дамах-інтэрнатах. З пачатку эпідэміі ва ўсіх установах аб'яўлены каранцін. Было прынята рашэнне аб пераводзе супрацоўнікаў гэтых устаноў у рэжым абсервацыі, гэта значыць з сённяшняга дня яны працуюць двухтыднёвымі вахтамі, кругласутачна і неадлучна знаходзячыся на сваіх рабочых месцах. Гэтыя людзі цяпер маюць вострую патрэбу ў спецыялізаваных сродках аховы. І ёсць тыя, хто робіць усё магчымае, каб дапамагчы супрацоўнікам дамоў-інтэрнатаў у гэтай складанай сітуацыі.

Якая сёння сітуацыя з захворваннямі і забеспячэннем неабходнымі сродкамі аховы ў дамах-інтэрнатах? Ці толькі ў медычных і ахоўных сродках ёсць там патрэба? Ці адгукаюцца людзі на заклік дапамагчы гэтым установам і людзям, што там жывуць і працуюць?

На гэтыя ды іншыя пытанні ў жывым эфіры Еўрарадыё адказваюць валанцёры гуманітарнай ініцыятывы дапамогі інтэрнатам Таццяна Герасімава, Аляксей Тарасевіч.

200521 - PETARDA - У Беларусі памерлі яшчэ 6 чалавек з COVID-19 — што кажа Лукашэнка? by Euroradio

200521 - ZOOM - Лукашэнка: некаторым не падабаецца, што ў нас не больш за 950 выпадкаў COVID-19 by Euroradio

21 траўня госць Еўрарадыё — гісторык, даследчык Зміцер Дрозд.

Гісторыя беларускага народа — гэта пераважна гісторыя пераследу і вынішчэння. За веру, за мову, за памяць продкаў, за не той колер валасоў... І таму на першым месцы для беларуса спрадвек было — выжыць. Але заўжды беларусы марылі пабудаваць на сваёй зямлі сваю дзяржаву бяспекі і справядлівасці. Гэта мара, хай сабе і больш падобная да ўтопіі, жыве ў беларусах і сёння, перакананы гісторык Зміцер Дрозд. Каб потым у гэтай краіне мары мець сваю мову, сваю веру, сваю культуру, каб шанаваць свае спрадвечныя традыцыі, гісторыю і сваіх продкаў.

Пра тое, як нам выжыць і не забыцца ў працэсе пра тое, хто ж мы такія на самай справе, мы і разважаем у чарговым выпуску "Ідэі Х" са Змітром Драздом.

Мінская ўрбаністычная платформа праводзіць даследаванне наконт таго, як пандэмія COVID-19 і самаізаляцыя ўплываюць на жыццё гараджан, і запрашае беларусаў да ўдзелу. Ці змогуць гараджане вярнуцца ў звыклае жыццё пасля перамогі над каранавірусам? Што згубіць горад за час барацьбы з COVID-19? Які ён — беларускі від з акна? На гэтыя ды іншыя пытанні ў жывым эфіры Еўрарадыё адказваюць даследчыца Анастасія Нікіціна і даследчык і рэдактар Мінскай урбаністычнай платформы Андрэй Вазьянаў.

200520 - PETARDA - Даходы "Газпрама" ад экспарту газу за I квартал абваліліся ў два разы by Euroradio

200520 - ZOOM - ЦВК паламала выбарчы план Статкевіча — што далей? by Euroradio

Усе кірункі знешняй палітыкі Беларусі ў той ці іншай ступені аказаліся закранутыя пандэміяй каранавіруса. Традыцыйныя дыпламатычныя кантакты былі зведзеныя да мінімуму. Перарваліся ці таксама былі зведзеныя да мінімуму эканамічныя сувязі беларускіх вытворцаў і пастаўшчыкоў з іншымі краінамі. А наперадзе, па прагнозах эканамістаў, нас чакае сусветны эканамічны крызіс.

У якой стадыі знаходзяцца адносіны Беларусі і Расіі? Ці сапраўды каранавірус падштурхнуў афіцыйны Мінск да больш хуткага наладжвання адносін з ЕС і ЗША? Як змяніліся адносіны з Кітаем і Украінай? Што чакае эканоміку нашай краіны?

На гэтыя ды іншыя пытанні ў жывым эфіры Еўрарадыё адказваюць дырэктар Савета па міжнародных адносінах “Мінскі дыялог” Яўген Прэйгерман, акадэмічны дырэктар Цэнтра эканамічных даследаванняў BEROC Кацярына Барнукова і каардынатар праграмы “Знешняя палітыка Беларусі” Савета па міжнародных адносінах “Мінскі дыялог” Дзяніс Мельянцоў.

Вакалістка і аўтарка песень піянераў беларускага соўла Dee Tree Валерыя Дэле аб'явіла пра стварэнне новага праекта. Гэта калабарацыя з прадзюсарам Bingo, музыкі робяць электронную музыку. Як гэта выглядае — можна паглядзець і паслухаць у музычнай рубрыцы "Такога вы не чулі": музыкі прадстаўляюць кампазіцыю "Jungle".

Рыхтуючыся да выбарчай кампаніі 2020 года, Мікола Статкевіч заявіў, што мае план, які паламае сцэнар улады. План быў, на першы погляд, нечаканы і арыгінальны: зарэгістраваць ініцыятыўныя групы “30 кандыдатаў пратэсту” і скарыстацца месяцам збору подпісаў для правядзення вулічнай агітацыі. Каранавірус і Цэнтрвыбаркам не пакінулі ад “плана Статкевіча” каменя на камені. Каранавірус фактычна адмяніў вулічную актыўнасць, а ЦВК проста не зарэгістравала “кандыдатаў пратэсту”.

Ці быў гатовы Мікола Статкевіч да таго, што ніхто з яго кандыдатаў не будзе мець магчымасці легальна ўдзельнічаць у выбарчай кампаніі? Ці ёсць у яго план на далейшы удзел у выбарчым марафоне?

На гэтыя ды іншыя пытанні ў жывым эфіры Еўрарадыё адказвае Мікола Статкевіч.