Ag filleadh go dtí an Eoraip anocht, labhraíonn tuairisceoir spóirt Raidió na Life Cillian Ó Conchúir linn faoi Wimbledon 2013, na cluichí ceannais ach go háirithe agus labhraíonn T-rex Ó Saurus linn ón Spáinn faoin saoire atá á chaitheamh aige ansin agus é ina 'Spailpín Spáinneach' ar feadh tamaillín!

Sa dara chlár den tsraith, labhraíonn an fear ilteangach(omniglot)Simon Ager linn ón mBreatain Bheag faoina shaol leis an nGaeilge is faoi na teangacha uile atá foghlamtha aige faoi seo. Labhraíonn Helena King, láithreoir de chuid Raidió na Life linn ó San Diego faoin samhradh atá á chaitheamh aici i gCalifornia ar víosa oibre J1 agus ar deireadh labhraíonn Evin Downey linn ó Albain, fear Baile Átha Cliathach atá ag obair le 'Conradh na Gaeilge Glaschú' le blianta anuas, faoin nGaeilge i nGlaschú agus faoin nasc idir an Ghaeilge agus an Gháidhlig in Albain.

Sa chéad chlár den tsraith breathnaíonn Lisa ar scéal agus ar phobal na Gaeilge i Meiriceá Thuaidh. Labhraíonn sí le hAralt Mac Giolla Chainnigh atá lonnaithe in Ontario faoin nGaeilge i gCeanada agus faoi Oireachtas Cheanada, agus le hEibhlín Zurell i Nua-Eabhrac faoi phobal na Gaeilge sna Stáit Aontaithe inniu agus faoin eagraíocht 'Daltaí na Gaeilge'.