Sign up to save your podcastsEmail addressPasswordRegisterOrContinue with GoogleAlready have an account? Log in here.
香海文化簡介 開卷,捻一頁菩提香; 悅讀,覺諸佛智慧海。 書不讀,不為我有;理不明,不為我知。 香海文化創辦人星雲大師說:「讀知一些事,讀明一點理,讀做一個人,讀懂一世情,讀通一顆心,讀悟一分緣。」做人要從讀書開始,多讀好書使人知事明理而豐足善美。 創辦人星雲大師為「香海」,定義為「香雲海會,即書香雲集,智慧如海... more
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.
September 06, 2024《風吹》─大暑 Tāi-sú 大暑大暑 Tāi-sú 大暑 節氣用伊熱甲衝煙的熱情 佮咱相借問 和磅針走標的熱度 衝甲掠袂牢 花蕊踮天頂開做雲尪 彩虹佇山裡流做水沖 仝款的氣流,無仝的懸低 干焦家己知影的冷暖 心的帆船,佇海湧海風當中 行出來上媠的航路 心的海鳥,佇天地大海之間 展開翼股自在飛行 飛出來 熱人上蓋美麗的 架勢 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 止枵三寶止枵三寶 ①水餃 尖尖翹翹 好吉兆 中央攝襇 才有好心情 腹肚內擔蔥賣菜 鍋(ue)裡藏水沬 沐沐泅 等待予恁試鹹汫 出頭天 ②泡麵 用上熱情的水沖(tshiâng) 排解年久月深的焦燥 傷爛,厚纓纏 無熟,喙哺心慒 時間著掠 熟度撙節 好食透流 ③炒飯 按怎吵不常在 感情若猶有溫度 自然就有芳氣 炒飯愛粒粒分明 鬥陣未必然事事項項 四常的代誌 才是正港的清甜 用心豉 勻勻仔來 毋免趕tshuh-tshuh 毋通迎新棄舊 冷飯熱炒 才會好食 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─小暑 Siáu-sú 小暑小暑 Siáu-sú 小暑 老步定的Kawabata橋邊 小可仔暑日雺霧的記持 懶屍的駁岸起風燒烙 轉彎踅斡廈門街小巷 教會聖樂趕走暑意 新店溪無攬無拈 同安街斑芝輕聲細說 汀州路河堤國校茉莉花 盤牆芳甲滿四界 蟋蟀仔覕佇土地公廟塗壁裡 鴟鴞咧蟾蜍山頂展翼練工夫 西北雨𤆬頭,風颱攢跤手 風慢行,雲徙跤 日頭月娘嘛拖沙 揣無覕相揣的日子 天真無知的年紀 跟綴記持拋荒的鐵枝路 漉漉搟的輕便車 軁入歲月磅空 消逝佇古亭庄舊街亭仔跤 時間的巷路 阮囡仔時的笑聲 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 大肚山組曲大肚山組曲 ① Luce 教堂 敢若飛簷走壁 閣淡薄仔成古厝紅瓦 外牆袂輸一个一个囥貯青春的篋仔 嘛像森永牛奶糖的鬥片仔 有人講 伊親像雙掌合十的祈求 嘛有人講 伊袂輸尾蝶仔的翼股 成啥無要緊,重要的是精神 我顛倒感覺 伊是一隻大肚山的方舟 欲佮咱行船佇真善美的宇宙 ② 鳳凰木 熱人上蓋奢颺的尾蝶仔 覕踮樹尾頂颺颺飛 媠閣大範的體格 佇畢業典禮彼跤兜 共規个校園染甲紅記記 紲落飛去天頂,成做一隻熱情的火鳥 順紲食掉規工的色水 毋是天光,嘛猶未黃昏 就成做一大片的紅霞 ③ 相思仔 思念的飛行機,輕蠓蠓 佇相思林巡航,綴風走揣思念的方向 輕輕仔搖,共阮的相思 搖去你的身軀邊 罩雺的時 風𤆬霧佇林內散步,沓沓仔湠 一欉一欉的相思仔,若像覕佇蠓罩後爿 佮阮相對相,文文仔笑 相思林裡陣陣的清芳,是迷魂的情網 成做火炭,氣口㒰款 烏金,燒甲火紅 思念,相siāng 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more4minPlay
September 06, 2024《風吹》─夏至 Hē-tsì 夏至夏至 Hē-tsì 夏至 綠色樹蔭 茂茂密密 金色的太陽 並昨昏的日頭閣較奢颺 送走春天的妖嬌 迎接清涼的西北雨佮鬧熱的火金蛄 簾簷跤覕雨的燕仔 歇踮節氣變換的航道 準備後過的飛行 毋免閣獨夜無伴等待 嘛免留戀日時的精彩 青春的干樂佮時間走標 送走日時上長的一工 身騎白馬追趕流逝的歲月 日子敢若亂鐘仔走精去的發條 一工並一工較冗 透中下晝發出光芒 共夏季的燦爛 捘做周至的日頭光 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─芒種 Bông-tsíng 芒種芒種 Bông-tsíng 芒種 雨水的光影 tòo甲滿稻埕 若像彩虹㒰款 色水迷人圓滿 向望掖種的塗 無論懸低 雨水獻予萬物 天地嘛還咱 季節的豐收 稻仔飽米成做生湠的種子 結實的稻仔粒頂懸 發出來幼芒 共土地染甲金光閃閃 光芒四射的種子 就是天地無限的生機 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 繭繭 佮草木萬物仝款 咱攏當咧恬恬蔫焦 一分一秒無聲無說 慢慢仔 毋過絕對袂重耽 親像行船人 故鄉的海岸 沓沓仔消失佇 勻勻仔浮懸的海面 目睭金金 看著咱的往事 跟綴海湧 一幕一幕洘流 進前的性命 原在佇心肝底燒烙 毋過,那來那成做 記持的烌燼 徛踮佇 借蹛的娘仔繭 年久月深 煞掠做是 家己永遠的厝 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─小滿 Sió-buán 小滿小滿 Sió-buán 小滿 人生加減有寡無奈 就算講你用盡氣力咧生活 嘛未必然會達成想欲愛的目標 春天來矣 有當仔嘛是予雨水寒流打擾 人生也充滿希望 共無奈當做無常 共無常當做正常 才是日頭光的正能量 人生總是愈來愈寂寞 袂合的袂愛鬥陣 會合的佮阮仝款 年歲愈來愈濟 所以嘛愈來愈少 人生袂當圓滿 小滿就好 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 阿爸的跤踏車阿爸的跤踏車 阿爸的跤踏車 頭前有一个喨仔 喨一聲 伊就載阮去四界奅 無論海邊抑是駁岸 阿爸載阮到佗位 佗位就是阮的𨑨迌埕 阿爸的跤踏車 頭前有一个喨仔 喨一聲 隨在阮溪邊抑是山坪 只要跤踏仔踏落去 啥物所在隨講隨到遐 阿爸的跤踏車 頭前有一个喨仔 喨一聲 阮的世界就開始變化 無論以早抑是這馬 阿爸永遠佮阮做陣行 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─立夏 Lı̍p-hē 立夏立夏 Lı̍p-hē 立夏 徙入熱人頭一工 春日佮百花相辭 早稻仔當欲吐穗 蟬聲快樂唸歌詩 田嬰點水躡跤尾 掀起趣味的熱天 蜜蜂蝴蝶颺颺飛 歡喜𨑨迌覕相揣 水雞相褒答喙鼓 舞弄鬧熱的暗暝 雷公爍爁真響亮 踮佇天頂拍鑼鼓 黃昏打扮抹朱紅 紅霞妝娗點胭脂 天公落水淹田岸 萬物心涼透心肝 烏鯧飛魚草仔粿 攢好立夏補老爸 菜瓜大蔥烏白豆 凊彩上桌攏腥臊 四月佛陀仙祖生 搭棚搬戲敬仙佛 立夏雨水若拄好 五穀豐收好透流 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.