Sign up to save your podcastsEmail addressPasswordRegisterOrContinue with GoogleAlready have an account? Log in here.
香海文化簡介 開卷,捻一頁菩提香; 悅讀,覺諸佛智慧海。 書不讀,不為我有;理不明,不為我知。 香海文化創辦人星雲大師說:「讀知一些事,讀明一點理,讀做一個人,讀懂一世情,讀通一顆心,讀悟一分緣。」做人要從讀書開始,多讀好書使人知事明理而豐足善美。 創辦人星雲大師為「香海」,定義為「香雲海會,即書香雲集,智慧如海... more
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.
September 06, 2024《風吹》─ 食茶食茶 ① 初曉 Tshoo-hiáu 褪掉雺霧 拍殕仔光ê日頭 精神 伸勻 ② 晨曦 Sîn-hi 淺淺金黃 薄縭絲ê色緻 拆箬 頭一喙甘甜 ③ 朝日 Tiau-jı̍t 金光閃閃有元氣 袂苦袂澀好滋味 茶湯止喙焦 芳氣袂礙胃 ④ 暮霞 Bōo-hâ 奢颺鑿目ê光芒卸妝 溫柔閉思ê眼神 多情夜幕頕垂進前 額頭漆一逝 紅霞(âng-hê)茶色 ⑤ 夜闌 Iā-lân 人聲恬靜ê喉韻 沉穩內斂ê暗暝 拉圇仔燒ê月色 陪你落眠 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─穀雨 Kok-ú 穀雨茶穀雨 Kok-ú 穀雨茶 夢中的坪仔田妝娗春尾的眼神 穀雨茶當著時 茶葉飽滇,茶湯金黃 山茶花嬌滴滴 季節堅持,清芳謙虛 山茶花閣號做「袖隱」 媠甲予人想欲藏咧手䘼紮轉去厝裡 穀雨茶嘛號做二春茶 春來,春去 攏是美麗的 甘甜 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 草仔粿草仔粿 捻一塊記持的粿粞,生湠 用這久的清閒 勻勻仔共撋 撋開以早的鬱卒 袂輸 沓沓仔共 年久月深的烏青 推予開 莫凝血 包一寡芡芳炒料的餡 遐濟年落䈄的空虛 才會實櫼 鼠麴草的甘甜 摻入去 拄仔精神的較早 包予平大塊 才袂大細心 纓纏無細膩的往過 用心共炊 予所有的厭氣衝煙 飛上十三天外消敨 干焦賰草仔粿的 安神佮清芳 一喙一喙 慢慢仔哺 鹹酸苦汫 攏吞落 腹肚 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 風吹風吹 我是風吹,你是線 愛阮飛偌遠,你就放偌長 飛對海邊,加放一尺 飛上山頂,加放一丈 無論盤山過嶺,我知影 阮攏佇咧你的手中心 數念我的時陣 擢一下 阮就轉來你的心肝頂 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more1minPlay
September 06, 2024《風吹》─春分 Tshun-hun 春分春分 Tshun-hun 春分 春風吹開春日 暗暝佮日時平分春色 推捒太極 起手風生,放下恬靜 燕仔風吹鬥陣飛,成雙成對 男女老幼peh山𨑨迌,秉燭夜遊 斑芝點著街路,紅霞鬧熱天頂 青苔彩畫溪水邊,鳥隻山谷唸歌詩 雷公爍爁趕烏雲,雲開天清好光景 春分春分 春天的時分 上蓋美麗的時陣 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 06, 2024《風吹》─ 太平洋的風太平洋的風 太平洋的風 吹對島嶼東爿的海岸線 掀起藍寶石色的海湧佮波浪 紲落走去Yayung Paru溪邊露營 源頭佇奇萊北峰佮合歡山中央的立霧溪 晟養規个太魯閣峽谷的生湠 太平洋的風 跤手真扭掠 我佇燕子口嘛有佮伊相拄 伊𤆬阮飛過滿山遍野的青翠 太平洋的風 佇島嶼內輕聲細說 親像阿母的叮嚀佮吩咐 攑頭的暗暝 毋管是寒天的獵戶 抑是熱人的七星 阮攏會當聽著故鄉溫暖的等候 太平洋的風 佮阮佇錐麓相搪 鹹鹹的風是太平洋的氣味 袂輸番薯糜攪鹽的清芳 太平洋的風 佇九曲洞佮阮相逢 閒閒的風是太平洋的懶屍 敢若秋凊的老榕仔跤的下晡時 太平洋的風 不時佮阮相遇 相借問了後 伊飛上峽谷的懸頂 我好親像聽著滿山坪的回音 佇遐咧喝 Formosa 咱的幸福 攏佇遮 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more3minPlay
September 06, 2024《風吹》─驚蟄 Kenn-tı̍t 驚蟄驚蟄 Kenn-tı̍t 驚蟄 冬眠的萬物 予彼陣雷公爍爁叫醒 iő-káng甜蜜的芳氣 傳來春天的氣味 啉一喙春茶 期待春暖花開的驚喜 蟄伏的身軀 嘛愛準備伸跤出手 迎接拄睏精神的春天 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more1minPlay
September 06, 2024《風吹》─雨水 Ú-suí 落雨天雨水 Ú-suí 落雨天 天公伯仔佮咱人仝款 嘛是有歡喜甲四淋垂的時陣 阮以早袂愛落雨天 總感覺, 空氣黏黏𣻸𣻸 啥物代誌攏無法度通做 尾仔熟似作田的朋友 知影無雨做無頭路 花蕊青菜稻仔攏愛雨水 無水通啉, 人會喙焦 無水淹田, 作物嘛袂快活 雨中散步是一種生活 雨中的街路袂輸歌廳 聽美妙節奏的落雨聲 雨景親像電影 看來來往往五花十色的雨傘 落雨也有好心情 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more2minPlay
September 05, 2024《風吹》─清明Tshing-bîng 阿母的新厝阿母的新厝 北海岸玫瑰園 一港溫暖的海風 親像阿母燦爛的笑容 安慰阮毋通悲傷 阿母講 遮有山有海閣有佛寺 可比是天堂 阿母講 遮有花有草嘛有寶塔 敢若是西方 阮毋敢放聲吼 恐驚傷過澹溼的目屎 會擾亂已經焦燥的所在 阮毋敢過頭想你 煩惱傷過沉重的思念 會硩歹墓園的植栽 阮嘛想欲化做千風 定定來阿母身軀邊做伴 熱人佇你四箍輾轉踅玲瑯 予你消涼 寒天罩佇你四周圍熁燒氣 予你溫暖 透早用日頭光喊你起床 暗時用月光守護你的身影 化作千風會較扭掠 三不五時做伙 早起來去(la̋i)海邊 散步聽海看日出 黃昏來去(la̋i)山頂 開講泡茶看紅霞 母仔囝毋是干焦一世人的親情 彼是累世萬劫的緣份 白色的山桂花發穎進前 阮會閣來看你 阮會交代in 墓草毋免修剪 按呢才知影 阮對阿母的思念 有偌深 偌長 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more3minPlay
August 20, 2024《風吹》─ 情批情批 欲共你講的話,已經揣無言語 欲寫予你的詩,嘛想袂出來半字 挽一片雲抑是遏一蕊花送你 敢有才調表達阮的情意 用日頭光寫批,日鬚藏佇批裡 金黃色的光芒,炤出一字一字的相思 趁每一工你起床的時 送予你規房間的溫暖 用春風寫批,風激甲無意仔無意 共阮的數念 吹過你的窗仔門邊 講是無啥物代誌 偷偷仔想你 用雨水寫批,雨滴袂輸墨水 tòo甲批紙澹漉漉 簾簷跤ti-ti-ta-ta 字寫甲含含糊糊 思念嘛起起落落 用月光寫批 迷人的月娘,含情帶意 對樹葉仔的空隙 掖落來一沿一沿 寫佇塗跤兜 溫柔的情網 留言告訴我你對這一集的想法: https://open.firstory.me/user/clzkwp8750bwo01tk9ndc27fn/comments Powered by Firstory Hosting...more3minPlay
FAQs about 風吹─周蘇宗臺語詩:How many episodes does 風吹─周蘇宗臺語詩 have?The podcast currently has 53 episodes available.