توا سنين التالي، دخل علينا ال-Ketchup فوق البطاطا المقلية، و المايونيز فوق السلاطة التونسية، و عديناه. احنا هكاكه، و كمل جات ثقافة الجوكامول و Fromage شد الدار ، و الصوص à l'ail قريب تولي تتباع عند العطار !

انا غرت على ماكلتنا, تي و إلا قلي شقعد فيها ؟ حتى الصحن التونسي ولابالجبن.

يضهرلي ضيعنا الفتلة، إما ما نعرش وقتاش،

ايجا نلقاوها مع بعضن

نتفكر لاموضة طلعت بن 2003 و 2004, العام هذاكة انا نخدم في بيتزاريا Dolce Vita بجنب سفارة إيطاليا، خرجت فازة جديدة في السوق، يسميوها Sandwitch pate special،

عرفي، ما قصرش ! علمني نطيبها، لحكاية و ما فيها نحل pate بيتزا، نحط فيها إسكالوب طايب و فوقو شوية جبن، نرميها في الفور، نخرجها و نزيدها السلاطة و نبيعها ب-2000 فرنك،من هوني جات كلمة مقلوب.

الغريب في الحكاية اللي عرفي كان يطيبها و يبيعها أما ياكلهاش، و كان يقلي هاالكعك ما يطير جوع.

و كان كل يوم في وقت الفطور، يبعث حمزة الشلواش يلقف صحن كفتاجي، وإلا صحن تونسي، و كيف يحب يدلل روحو يبعثوا يخطف صحن مقرونة بالعلوش من بار إيطاليا الجميلة في نهج ألمانيا. عرفي كان مخماخ، ...

العولة في دار مماتي في ماطر، Festival متع كسكسي ما ناقصو كان des sponsors، في,2021 مش بالعاني نلقى روحي نحكي عل العولة و الكسكسي بالإنجليز مع photographe اسمها Becky في Podcast أمريكاني اسمو the Storied receipe

بربشت و وصفت شوية تصاور قعدت في ذاكرتي، و انا نتكلم عاودت عشت لمة متع عايلة كبيرة ما فرقها كان الموت.

يا حسرة !

Becky عجبتها فكرة العولة و الكسكسي ,عطيتها ال-recette ،جربت طيبتو خطفتلها، كملت عملتلو shooting و حطيناه على site متاعها. سكرنا الموضوع و بات الحس

عام مبعد , ينوقز تليفوني فيه نومرو من لندرة . انا قلت : ألو، ...

و هو قال Hello Elyes، و قعد ت نتلغمج يمكن ساعة بالانجليز مع راجل لا نعرفو لا شفتو قبل

مخ الهدرة، الراجل و هو يحوس, ادعذر و قام و سمع البودكاست

قال, هو زادة, عجبتو لحكاية و يحب يعرف أكثر على عادتنا و ماكلتنا في الشمال،

فسرلي اللي بش يجي لتونس هو و equipe كاملة و يصوروا مع عايلة تونسية في جوجمة العولة و ما تبعها ،

خديت الوقت و جاوبتو على أسالتو ودليتو على ثنية

! برى عاد ,أنا ما قلتلكمش ! السيد طلع مدير الإنتاج متع Jamie Oliver

،...

في صيف 2004 اول مرّه نخدم في بيزاريا، وقتها كان عمري 14 سنة، دخلت نخدم في الكوجينه، نغسل الماعون، انظف الخضره وانحضرها، نقضي من المرشي صونطرال، ومن نهج اسبانيا، و نشق شارع شارل ديڨول بالديابلو وهو مبلّع بالنصّابه و انا نقول "ساقيك يا مادام، ساقيك يا مادام, سامحنا نتعداو".

البيزاريا في قلب العاصمه، مقابل ساحة منجي بالي للي يعرفها. الحانوت في شارع جمال عبد الناصر، كان عمرها يفوت 80 عام، و بالصدفة كانت لاصقة لسفارة ايطاليا.. ما نطولش عليكم، الشهر لول في الكوجينة، الشهر الثاني وراء الكاسة، آخر الصيف قلت لعرفي نحب نجرب صنعة البيزا، ما كانش مالعاكسين و في الجمعتين الي قعدوا بلّصني وراء الفارنية و الفور. نتفكر كعبات البيزا اللي خرجتهم مثلثين، واللي لصقو في قاع الفور ب°400 سخانه ورصـاتلي مدخل يدي للكتف انظف فيه. بعدالصيف هذاكا رجعت نقرا، اما رجعت الصيف اللي مبعدو واللي مبعد بعدو خدمت وراء الفور و خبّيت الصنعه عندي حتى يجي نهار اللي نستحقها.

هذي هي بداية غرامي بالكوجينة، بعد 16 سنه من التجربة هذي دخلت نقرا كوجينة في فرنسا و خذيت دبلومي. مازلت نحلم و حكايتي مع الكوجينة مازالت كيف بدات، تنج

كيف جيت نعيش في فرنسا، سمعت اللي الكسكسي يعتبروه من أحسن 3 ماكلات عند الفرنسيس. و كملت خذيت ديبلوم الكوجينة هوني. و قريت شوية كتب على الماكلة ; أما باقي ما فهمتش علاش الكسكسي موجود في Top 3 قبل ال-Blanquette de veau و El-quiche.

بش نعرف أكثر، وليت نسأل أي فرنساوي يعرضني على حكايتو مع الكسكسي. الكلهم يقولوا اللي هما ياكلوه عل الأقل مرتين في الشهر.

كيف غطست معاهم شوية و حبيت نعرف أنواع الكسكسي، يقولولي CousCous رويال، و CousCous aux مرقاز هوما أبن حاجة ! فهمت اللي هو ما عندو حتى علاقة بكسكسي نهار الأحد اللي تتلم عليه العايلة. نزيد نقدم شوية، نلقى الفرنسيس فيبالهم اللي الكسكسي اصلو مغربي، و حتى les chefs يطيبوه و يقدموه كان على الطريقة المغربية ! شي يدوخ !

علاش هكا ؟ وينو الكسكسي بالمناني، و وينو الكسكسي بالكلامار المحشي، تي وينو القديد و المسلان و الحمص و الزبيب. من وقتها ما عجبتنش حكاية الكسكسي في فرنسا ، و كيفاش يتسمى كان على المغرب، وحتى كيف نسافر، نزيد نتأكد اللي هالفينومان وصل لبلدان اخرين . على خاطر كل واحد نسألو على الماكلة إلتونسة ما يجاوبني كان هريسة،

من وقتها نسال علاش