تیمۆساوسی یه‌كه‌م ٣: ١ - ٨

• 1ئەم قسەیە ڕاستە: ئەگەر یەکێک چاوی لە چاودێری بێت، حەزی لە چاکەکارییە.
• 2چاودێر دەبێت گلەیی لەسەر نەبێت، مێردی یەک ژن بێت، وریا و ژیر و بەڕێز و میوان دۆست بێت، بتوانێت خەڵک فێربکات،
• 3سەرخۆش و توندوتیژ نەبێت، بەڵکو دڵنەرم بێت، شەڕفرۆش نەبێت، حەزی لە پارە نەبێت.
• 4خێزانەکەی باش بەڕێوە ببات، منداڵەکانی بەوپەڕی ڕێزەوە ملکەچ بن.
• 5ئەگەر کەسێک نەزانێت خێزانەکەی بەڕێوە ببات، چۆن چاودێری کڵێسای خودا دەکات؟
• 6تازە نەبێت لە باوەڕ، نەوەک لووتبەرز بێت و هەمان سزای شەیتانی بەسەردا بدرێت.
• 7دەبێت ناوبانگی باش بێت لەلای ئەوانەی لە دەرەوەن، نەوەک قسەی بێتە سەر و بکەوێتە بەر داوی شەیتان.
• 8خزمەتکارانیش دەبێت بەڕێز بن، دوو زمان نەبن، شەراب زۆر نەخۆنەوە، چاویان لە دەستکەوتی ناڕەوا نەبێت،

تیمۆساوسی یه‌كه‌م ٢: ٦ - ١٥

• 6ئەوەی خوێنی خۆی کردە بەهای ئازادی بۆ هەمووان، شایەتیدانیش لە کاتی گونجاو بوو.
• 7بۆ ئەمە من بە مزگێنیدەر و نێردراو دەستنیشان کراوم، ڕاست دەڵێم و درۆ ناکەم، فێرکاری باوەڕ و ڕاستیم بۆ نەتەوەکان.
• 8جا دەمەوێ پیاوان لە هەموو شوێنێکدا نوێژ بکەن و بێ تووڕەیی و مشتومڕ دەستی پاکیان بەرز بکەنەوە.
• 9ژنانیش پۆشاکیان بە شەرمەوە بێت، بەڕێز و شیاوی خۆیان بڕازێننەوە، نەک بە ئەگریجە و بە زێڕ و مرواری و جلی گرانبەها،
• 10بەڵکو بە کرداری چاک شیاوی ژنێک بێت کە بانگەشەی لەخواترسی بکات.
• 11ژن با لە هێمنیدا و ئەوپەڕی ملکەچی فێر بێت.
• 12ڕێگا نادەم ژن فێرکردن بدات و دەسەڵاتی بەسەر پیاودا هەبێت، بەڵکو دەبێت لە هێمنیدا بێت،
• 13چونکە یەکەم جار ئادەم شێوەی کێشرا، ئینجا حەوا.
• 14هەروەها ئادەم هەڵنەخەڵەتا، بەڵکو ژن هەڵخەڵەتا و کەوتە گوناهەوە.
• 15بەڵام بە منداڵبوون ڕزگاری دەبێت، ئەگەر لە باوەڕ و خۆشەویستی و پیرۆزی و شیاویدا بمێننەوە.

تیمۆساوسی یه‌كه‌م ١: ١٩ - ٢: ٥

• 19دەست بە باوەڕ و ویژدانێکی چاکەوە بگرە، کە هەندێک کەس ڕەتیان کردەوە، جا کەشتی باوەڕیان تێکشکا،
• 20لەوانە هیمینایۆس و ئەسکەندەر، ئەوانم دایە دەستی شەیتان، بۆ ئەوەی فێربن کە کفر نەکەن.

تیمۆساوسی یه‌كه‌م ٢

• 1بۆیە پێش هەموو شتێک تکا دەکەم، نوێژ و نزا و پاڕانەوە و سوپاسگوزاریتان بۆ هەموو خەڵک بێت،
• 2بۆ پاشا و دەسەڵاتداران، تاکو بە ئاشتی و هێمنی و بەوپەڕی لەخواترسی و ڕێزەوە بژین.
• 3ئەمەش چاک و پەسەندکراوە لەلای خودای ڕزگارکەرمان،
• 4ئەوەی دەیەوێت هەموو خەڵکی ڕزگاریان بێت و بەرەو ناسینی ڕاستی بێن،
• 5چونکە خودا یەکە و یەک ئاشتکەرەوە لەنێوان خودا و مرۆڤدایە، ئەویش عیسای مەسیحی مرۆڤە،

تیمۆساوسی یه‌كه‌م ١: ٩ - ١٨

• 9هەروەها دەزانین تەورات بۆ کەسی ڕاستودروست دانەنراوە، بەڵکو بۆ سەرپێچیکار و یاخیبووان، خوانەناس و گوناهباران، پیس و گڵاوەکان، دایک و باوک کوژان، بکوژان،
• 10داوێنپیسان و نێربازان، بازرگانانی کۆیلە، درۆزن و سوێندخۆرانی بە درۆ، هەر شتێکیش لە دژی فێرکردنی دروست بێت،
• 11بەگوێرەی پەیامی ئینجیلی شکۆی خودای بەرەکەتدار، ئەوەی بە من سپێردراوە.
• 12سوپاسی عیسای مەسیحی خاوەن شکۆمان دەکەم، ئەوەی بەهێزی کردم و بە دڵسۆزی داناوم و بۆ خزمەتکردن دەستنیشانی کردم.
• 13هەرچەندە جاران کفرکەر و چەوسێنەر و توندڕەو بووم، بەڵام عیسا بەزەیی پێمدا هاتەوە، چونکە بە نەزانی و بێباوەڕی دەمکرد.
• 14سەرڕێژ بووم لە نیعمەتی مەسیحی خاوەن شکۆمان، لەگەڵ ئەو باوەڕ و خۆشەویستییەی کە بەهۆی یەکبوون لەگەڵ عیسای مەسیحدا بەدەستدێت.
• 15ئەم قسەیە ڕاستە و تەواو شایانی قبوڵکردنە: عیسای مەسیح بۆ ڕزگارکردنی گوناهباران هاتە جیهان، هیچ کەسێک بە ئەندازەی من گوناهبار نییە.
• 16بەڵام بەزەیی پێمدا هاتەوە، تاکو یەکەم جار لە مندا عیسای مەسیح بەوپەڕی پشوودرێژی دەربکەوێت، وەک نموونەیەک بۆ ئەوانەی باوەڕی پێ دەهێنن بۆ ژیانی هەتاهەتایی.
• 17با بۆ هەتاهەتایە ڕێز و شکۆمەندی بۆ پاشای هەتاهەتایی بێت کە نەمر و نەبینراو و تاقە خودایە! ئامین.
• 18کوڕم تیمۆساوس، ئەم ڕاسپاردەیەت پێ دەسپێرم، بەگوێرەی ئەو پێشبینییانەی پێشتر دەربارەی تۆ گوتراون، تاکو بەهۆیانەوە بە باشی بجەنگیت،

تیمۆساوسی یه‌كه‌م ١: ٣ - ٨

• 3کاتێک بۆ ناوچەی مەکدۆنیا چووم، لێت پاڕامەوە لەوێ لە شاری ‏ئەفەسۆس بمێنیتەوە، تاکو خەڵکێک ڕاسپێری فێرکردنێکی جیاواز نەدەن و
• 4گوێ نەدەنە ئەفسانە و ڕەچەڵەکی بێ کۆتایی، چونکە دەمەقاڵەی لێ دەکەوێتەوە، لەبری پلانی خودایی کە لە باوەڕەوەیە.
• 5ئامانجی ئەم ڕاسپاردەیە بریتییە لە خۆشەویستی لە دڵێکی پاک و ویژدانێکی چاک و باوەڕێکی بێ دووڕوویی.
• 6هەندێک لەمانە لایانداوە، بەلای قسەی پووچدا ڕۆیشتوون،
• 7دەیانەوێ ببنە مامۆستای تەورات، هەرچەندە تێناگەن لەوەی کە دەیڵێن و دەیچەسپێنن.
• 8بەڵام دەزانین تەورات چاکە، ئەگەر یەکێک بە دروستی بەکاریبهێنێت،

تیمۆساوسی یه‌كه‌م ١: ١ - ٢

• 1لە پۆڵسەوە کە نێردراوی عیسای مەسیحە بە فەرمانی خودای ڕزگارکەرمان و عیسای مەسیحی هیوامان،
• 2بۆ تیمۆساوس، کوڕی ڕاستەقینەم لە باوەڕدا:
• با نیعمەت و بەزەیی و ئاشتی لە خودای باوک و عیسای مەسیحی خاوەن شکۆمانەوە لەگەڵت بێت.

تیمۆساوسی یه‌كه‌م پێشەكى

شینه‌كانی ئیرمیا ٣: ٥ - ٥: ٢٢

• 5دەوری گرتم و گەمارۆی دام
• بە ژەهر و ناخۆشی.
• 6ناچاری کردم لەناو تاریکیدا نیشتەجێ بم
• وەک ئەوانەی لەمێژە مردوون.
• 7لەناو پەرژینێک بەندی کرد بۆ ئەوەی نەتوانم هەڵبێم،
• زنجیرەکانی منی قورس کرد.
• 8هەروەها کاتێک هاوار دەکەم و داوای فریاکەوتن دەکەم،
• بەڵام نزاکانم ڕادەگرێت.
• 9بەردی تاشراوی کەڵەکە کرد و ڕێگای منی پێ گرت،
• ڕێڕەوەکانی منی خواروخێچ کرد.
• 10وەک ورچێک بۆم لە بۆسەدایە،
• وەک شێرێک خۆی مات دەکات،
• 11منی لەڕێ لادا و پارچەپارچەی کردم،
• منی وێران کرد.
• 12کەوانەکەی ڕاکێشا
• منی کردە نیشانەی تیرەکانی.
• 13تیرەکانی تیردانەکەی
• لە دڵم چەقاند.
• 14هەموو گەلەکەم سووکایەتیم پێ دەکەن،
• بە درێژایی ڕۆژ بە گۆرانی گاڵتەم پێ دەکەن.
• 15تێری کردم لە تاڵی،
• زەقنەبووتی دەرخوارد دام.
• 16بە چەو ددانەکانی منی وردوخاش کرد،
• منی لەناو خۆڵەمێش پەستایەوە.
• 17من لە ئاشتی بێبەش کراوم،
• سەرکەوتنم لەبیرچووەوە.
• 18ئینجا گوتم، «شکۆمەندیم نەما،
• هەروەها هیوام بە یەزدان بڕا.»
• 19دێتەوە بیرم، ڕۆژانی زەلیلی و سەرگەردانیم،
• وەک ژەهر و زەقنەبووت بوون.
• 20بە باشی بەبیرم دێتەوە،
• لە ناخەوە ڕۆحم خەمبارە.
• 21بەڵام ئەوە دەهێنمەوە یادم و
• لەبەر ئەوە هیوام هەیە:
• 22بەهۆی خۆشەویستی نەگۆڕی یەزدانە کە لەناونەچووین،
• چونکە بەزەییەکەی تەواو نابێت.
• 23ئەوانەت هەموو بەیانییەک نوێن؛
• دڵسۆزییەکەت چەند گەورەیە.
• 24بە خۆم دەڵێم: «یەزدان بەشی منە،
• لەبەر ئەوە هیوام بەوە.»
• 25یەزدان چاکە بۆ ئەوانەی هیوایان بەو هەیە،
• بۆ ئەو کەسەی داوای ئەو دەکات.
• 26باشە بۆ کەسێک بە بێدەنگی چاوەڕێ بکات
• بۆ هاتنی ڕزگاریی یەزدان.
• 27باشە پیاو نیر هەڵبگرێت
• هەر لە تەمەنی منداڵییەوە.
• 28با بە تەنها دانیشێت و بێدەنگ بێت،
• چونکە یەزدان ئەمەی بەسەرهێناوە.
• 29با سەری بخاتە ناو خاکوخۆڵ،
• لەوانەیە هێشتا هیوای مابێت.
• 30با ڕوومەتی بۆ ئەوە ڕابگرێت کە لێی دەدات،
• با تێربێت لە ڕیسوایی.
• 31چونکە کەس بۆ هەتاهەتایە
• لەلایەن پەروەردگارەوە ڕەت ناکرێتەوە.
• 32لەگەڵ ئەوەی دڵتەنگی دەهێنێت، میهرەبانیش نیشان دەدات،
• بەپێی گەورەیی خۆشەویستییە نەگۆڕەکەی.
• 33ئەو کەس لە دڵەوە زەلیل ناکات و
• دڵتەنگی ناکات.
• 34تێکشکاندنی دیلەکانی هەموو زەوی
• لەژێر پێ،
• 35یان بێبەشکردنی کەسێک لە مافی خۆی
• لەبەردەم خودای هەرەبەرز،
• 36یان بەدوورگرتنی مرۆڤ لە دادپەروەری،
• ئایا پەروەردگار هەموو ئەمانە نابینێت؟
• 37کێ دەتوانێت قسە بکات قسەکەی بێتەجێ،
• ئەگەر پەروەردگار فەرمانی نەدابێت؟
• 38ئایا ڕوودانی چاکە و خراپە
• بە فەرمایشتی خودای هەرەبەرز نییە؟
• 39بۆچی مرۆڤی زیندوو گلەیی بکات
• کاتێک لەسەر گوناهەکانی سزا دەدرێت؟
• 40با هەڵسوکەوتمان بپشکنین و تاقی بکەینەوە و
• بگەڕێینەوە بۆ لای یەزدان.
• 41با دڵ و دەستمان بەرزبکەینەوە
• بۆ خودا لە ئاسمان، بڵێین:
• 42«ئێمە گوناهمان کرد و یاخی بووین،
• تۆش لێمان خۆش نەبوویت.
• 43«خۆت بە تووڕەیی داپۆشی و ڕاوتناین،
• بەبێ بەزەیی ئێمەت کوشت.
• 44بە هەور خۆت داپۆشی
• بۆ ئەوەی نوێژەکانمان نەگاتە لات.
• 45ئێمەت کرد بە پاشەڕۆ و نەویستراو
• لەنێو گەلان.
• 46«هەموو دوژمنانمان
• دەمیان لێمان کردەوە.
• 47ترس و تەڵە باڵی بەسەرماندا کێشا،
• لەناوچوون و وێرانی.»
• 48چاوەکانم کانی فرمێسک هەڵدەڕێژن
• لەبەر ئەوەی گەلەکەم لەناوچوون.
• 49چاوەکانم فرمێسک هەڵدەڕێژن و ناوەستن
• بەبێ پسانەوە،
• 50تاوەکو یەزدان لە ئاسمانەوە
• تەماشای خوارەوە بکات و ببینێت.
• 51ئەوەی دەیبینم گیانم ئازار دەدات
• لەبەر ئازاری کچانی شارەکەم.
• 52ئەوانەی دوژمنی من بوون بەبێ هۆ
• وەک چۆلەکە ڕاویان کردم.
• 53بە زیندووێتی منیان فڕێدا ناو چاڵ،
• بەردیان تێمگرت.
• 54نوقومی ئاو بووم،
• گوتم: «خەریکە بمرم.»
• 55ئەی یەزدان، لە قووڵایی چاڵەوە
• بە ناوی تۆوە نزا دەکەم.
• 56گوێت لە دەنگم بوو:
• «گوێت دامەخە کاتێک هاوار و هانات بۆ دەهێنم.»
• 57ئەو ڕۆژەی نزام بۆ کردیت نزیک بوویتەوە،
• فەرمووت: «مەترسە!»
• 58ئەی پەروەردگار، بەرگریت لە کێشەی من کرد،
• ژیانی منت کڕییەوە.
• 59ئەی یەزدان، ستەمدیدەیی منت بینی.
• دادوەری کێشەکەم بکە!
• 60هەموو تۆڵەسەندنەوەکەی ئەوانت بینی،
• هەموو پیلانەکانیان لە دژی من.
• 61ئەی یەزدان، گوێت لە ڕیسواکردنەکەیان بوو،
• هەموو پیلانەکانیان لە دژی من؛
• 62ئەوەی دوژمنەکانم بە درێژایی ڕۆژ لە دژی من
• باسی دەکەن و دەیچرپێنن.
• 63تەماشایان بکە! هەستان و دانیشتنیان،
• بە گۆرانییەکانیان گاڵتەم پێ دەکەن.
• 64ئەی یەزدان، سزایان بدە،
• بەپێی کردەوەکانی دەستیان.
• 65پێچە لەسەر دڵیان دابنێ،
• با نەفرەتت لەسەریان بێت!
• 66بە تووڕەییەوە ڕاویان بنێ و لەناویان ببە
• لەژێر ئاسمانی یەزداندا.

شینه‌كانی ئیرمیا ٤

• 1چۆن زێڕ ڕەونەقی خۆی لەدەستدات،
• زێڕی بێگەرد گۆڕا!
• بەردەکانی پیرۆزگا پەرشوبڵاو بوونەوە
• لەسەر سووچی هەموو شەقامێک.
• 2چۆن کوڕە بەهادارەکانی سییۆن،
• ئەوانەی بە زێڕی بێگەرد دەکێشران،
• ئێستا بە گۆزەی گڵ دانران،
• دەستکردی دەستی گۆزەکەر!
• 3تەنانەت چەقەڵەکانیش گوانیان دەدەنە توولەکانیان
• بۆ ئەوەی شیریان پێبدەن،
• بەڵام گەلەکەی من دڵڕەقە
• وەک وشترمرغ لە چۆڵەوانی.
• 4لەبەر تینووێتی
• شیرەخۆرە زمانی بە مەڵاشوویەوە نووسا.
• منداڵەکان داوای نان دەکەن،
• بەڵام کەس نییە بۆیان بشکێنێت.
• 5ئەوانەی خواردنی خۆشیان دەخوارد
• لە شەقامەکاندا وێران بوون،
• ئەوانەی لەناو جلوبەرگی ئەرخەوانی بەخێو دەکران
• لەسەر زبڵدانەکان پاڵ دەدەنەوە.
• 6سزای تاوانی گەلەکەم گەورەتر بوو
• لە سزای گوناهەکەی سەدۆم،
• ئەوەی لە چرکەیەکدا سەرەوژێر بوو
• بێ ئەوەی دەستی یارمەتی بۆ درێژ بکرێت.
• 7میرەکانیان لە بەفر بێگەردتر بوون،
• لە شیر سپیتر بوون،
• جەستەیان لە یاقووت سوورتر بوو،
• وەک یاقووتی شین بوون.
• 8بەڵام ئێستا ڕەنگیان لە ڕەژوو ڕەشترە،
• لە شەقامەکاندا ناناسرێنەوە.
• پێستیان بە ئێسکیانەوە نووساوە
• وەک تەختەدار وشک هەڵگەڕاوە.
• 9ئەوانەی بە شمشێر کوژران باشتر بوون
• لەوانەی بە قاتوقڕی مردن.
• ئەوانە بە برسیێتی ئازاریان چێشت،
• چونکە خواردن لە کێڵگە نەبوو.
• 10دایکە میهرەبانەکان
• بە دەستی خۆیان منداڵەکانیان لێنا،
• کردیان بە خۆراک
• کاتێک گەلەکەم لەناوچوو.
• 11یەزدان تووڕەیی خۆی دەردەبڕێت،
• هەڵچوونی بە جۆشی خۆی هەڵدەڕێژێت.
• ئاگرێکی لە سییۆن بەرپا کرد
• بناغەکانی سووتاند.
• 12پاشاکانی زەوی و هەموو دانیشتووانی جیهان
• باوەڕیان نەکرد
• کە دوژمن و ناحەز
• دێنە ناو دەروازەکانی ئۆرشەلیمەوە.
• 13بەڵام لەبەر گوناهی پێغەمبەرەکانی و
• تاوانی کاهینەکانی ڕوویدا،
• ئەوانەی لە ناوەڕاستیدا
• خوێنی ڕاستودروستانیان دەڕشت.
• 14بە شەقامەکاندا وێڵ بوون
• وەک کوێر.
• خۆیان بە خوێن گڵاوکرد،
• کەس ناتوانێت دەست لە جلەکانیان بدات.
• 15خەڵک هاواریان لێ دەکەن: «ئەی گڵاوەکان، دووربکەونەوە!
• دووربکەونەوە! دووربکەونەوە، دەستمان لێ مەدەن!»
• کاتێک ڕایانکرد و وێڵ بوون،
• لەناو گەلاندا گوتیان،
• «جارێکی دیکە ناتوانن لێرە نیشتەجێ بن.»
• 16یەزدان خۆی پەرتەوازەی کردن،
• ئیتر چاودێرییان ناکات.
• خەڵک ڕێزیان لە کاهینەکان نەگرت،
• لەگەڵ پیرەکان میهرەبان نەبوون.
• 17سەرباری ئەمەش، ئێمە چاومان کزبوو
• بێهوودە لە چاوەڕوانی یارمەتی،
• لە قوللەکانمان چاوەڕێ بووین
• بۆ گەلێک کە ناتوانێت ڕزگارمان بکات.
• 18تەڵەیان بۆ هەنگاوەکانمان ناوەتەوە
• بۆ ئەوەی لە گۆڕەپانەکانماندا هاتوچۆ نەکەین.
• کۆتاییمان نزیک بووەوە، چەند ڕۆژێکمان ماوە،
• چونکە کۆتاییمان هات.
• 19ئەوانەی ڕاویان دەناین سووکتر بوون
• لە هەڵۆکانی ئاسمان،
• بەسەر چیاکاندا شوێنمان کەوتن،
• لە چۆڵەوانیدا بۆسەیان بۆمان نایەوە.
• 20پاشای دەستنیشانکراوی یەزدان، ئەوەی هەناسەی ژیانمانە،
• لە بۆسەکانیان گیرا،
• ئەوەی گوتمان، لە سێبەری ئەودا
• لەنێو گەلان دەژین.
• 21ئەی کچی ئەدۆم، دڵخۆش و دڵشادبە،
• ئەی دانیشتووانی خاکی عوچ.
• بەڵام جامەکە بەسەر تۆشدا تێدەپەڕێت،
• سەرخۆش دەبیت و ڕووت دەبیتەوە.
• 22ئەی سییۆنی کچ، سزای تاوانەکەت تەواو دەبێت،
• ڕاپێچکراوییەکەت درێژ ناکاتەوە.
• بەڵام ئەی ئەدۆمی کچ، سزای تاوانەکەی تۆ دەدات،
• گوناهەکەت ئاشکرا دەکات.

شینه‌كانی ئیرمیا ٥

• 1ئەی یەزدان، بەبیرت بێتەوە چیمان بەسەرهات،
• تەماشا بکە و ڕیسواییەکەمان ببینە.
• 2میراتەکەمان بۆ نامۆکان بوو،
• ماڵمان بۆ بێگانە.
• 3هەتیو و بێ باوک بووین،
• دایکانمان وەک بێوەژنن.
• 4دەبێ ئەو ئاوە بکڕین کە دەیخۆینەوە
• دارەکانمان بە نرخ بۆمان دێت.
• 5ئەوانەی ڕاومان دەنێن زۆر نزیک بوونەوە،
• ماندوو دەبین و حەوانەوەمان نییە.
• 6دەستمان لە میسری و ئاشورییەکان پانکردەوە
• بۆ بەدەستهێنانی نانی پێویست.
• 7باوکانمان گوناهیان کرد، نەمان،
• ئێمەش سزاکەیان وەردەگرین.
• 8کۆیلەکان فەرمانڕەوایەتیمان دەکەن،
• کەس نییە لە دەستیان ڕزگارمان بکات.
• 9بەهۆی شمشێر لە چۆڵەوانی ژیانمان لە مەترسیدایە
• هەتا بژێوی پەیدا دەکەین.
• 10پێستمان وەک تەنوور سووتاوە،
• لەبەر برسیێتی برژاوین.
• 11لە سییۆن دەستدرێژییان کردە سەر ژنان،
• پاکیزەکانیش لە شارۆچکەکانی یەهودا.
• 12میران بە دەستیانەوە هەڵدەواسرێن،
• ڕێز لە پیران ناگیرێت.
• 13لاوانیان دەهاڕدرێن،
• منداڵان لەژێر بارەداردا بەلادادێن.
• 14پیران دەستیان لە دەروازە هەڵدەگرن،
• لاوانیش وازیان لە گۆرانی هێنا.
• 15خۆشی دڵمان نەما،
• شاییمان بوو بە شیوەن.
• 16تاجی سەرمان کەوت.
• قوڕبەسەرمان، چونکە گوناهمان کرد!
• 17لەبەر ئەم شتانە دڵمان داهێزرا،
• لەبەر ئەم ڕووداوانە بەرچاومان تاریک بوو،
• 18لەبەر کێوی سییۆن، وێران بوو،
• چەقەڵ هاتوچۆی تێدا دەکەن.
• 19ئەی یەزدان، تۆ بۆ هەتاهەتایە حوکم دەکەیت،
• تەختی تۆ نەوە دوای نەوە بەردەوام دەبێت.
• 20بۆچی بەردەوام لەبیرمان دەکەیت؟
• بۆچی کاتێکی درێژ بەجێمان دەهێڵیت؟
• 21ئەی یەزدان، بمانگەڕێنەوە بۆ لای خۆت، هەتا بگەڕێینەوە،
• وەک جاران ڕۆژانمان نوێ بکەرەوە،
• 22یان تۆ زۆر لێمان تووڕە بوویت و
• بە تەواوی ئێمەت ڕەتکردووەتەوە؟

شینه‌كانی ئیرمیا ١: ١٩ - ٣: ٤

• 19«هاوارم بردە لای هاوپەیمانەکانم،
• بەڵام هەڵیانخەڵەتاندم.
• کاهین و پیرەکانم
• لە شاردا لەناوچوون
• لەو کاتەی بەدوای خۆراکدا دەگەڕان
• بۆ ئەوەی لە ژیانیان بەردەوام بن.
• 20«ئەی یەزدان، ببینە، من لە تەنگانەدام!
• دڵم توندە،
• من لە ناخەوە پەستم،
• چونکە زۆر یاخی بووم.
• لە دەرەوە شمشێر دەستبەکارە،
• لە ماڵەوەش تەنها مردن هەیە.
• 21«خەڵک ناڵەی منیان بیست،
• بەڵام کەس نییە دڵنەواییم بکات.
• هەموو دوژمنەکانم بەڵای منیان بیست،
• دڵخۆش بوون بەوەی تۆ بە منت کردووە.
• خۆزگە ئەو ڕۆژەت بەسەردەهێنان کە باست کرد،
• ئینجا وەک منیان لێدێت.
• 22«با هەموو خراپەکانیان بێنە بەردەمت،
• وایان بەسەربهێنە
• وەک ئەوی بەسەر منت هێنا
• لەسەر هەموو گوناهەکانم.
• زۆر دەناڵێنم و
• دڵم لاواز بووە.»

شینه‌كانی ئیرمیا ٢

• 1چۆن پەروەردگار سییۆنی کچی داپۆشی
• بە هەوری تووڕەییەکەی!
• لە ئاسمانەوە شکۆی ئیسرائیلی فڕێدا
• بۆ سەر زەوی،
• لە ڕۆژی تووڕەییدا
• تەختەپێی خۆی بەبیر نەهێنایەوە.
• 2پەروەردگار بەزەیی نەهاتەوە،
• هەموو نشینگەکانی یاقوبی هەڵلووشی،
• بە تووڕەیی خۆی
• قەڵاکانی یەهودای کچی ڕووخاند.
• پاشایەتی و میرەکانی زەلیل کرد
• دایگرتنە سەر زەوی.
• 3بە گڕی تووڕەیی خۆی بڕییەوە
• هەموو هێزی ئیسرائیل.
• دەستی ڕاستی بەرەو دواوە کێشایەوە
• لەبەردەم دوژمن.
• ئاگرێکی بەتینی لەناو یاقوبدا داگیرساند،
• هەموو دەوروبەرەکەی دەخوات.
• 4وەک دوژمنێک کەوانەکەی خۆی ڕاکێشا،
• دەستی ڕاستی ئامادە کرد.
• وەک ناحەز لەناوی برد
• هەموو ئەوەی چاو ئارەزووی دەکرد.
• لەناو چادرەکەی سییۆنی کچ
• تووڕەیی خۆی وەک ئاگر ڕشت.
• 5پەروەردگار وەک دوژمنی لێهات،
• ئیسرائیلی هەڵلووشی.
• هەموو کۆشکەکانی ئەوی هەڵلووشی،
• قەڵاکانی ڕووخاند.
• شیوەن و ماتەمی زۆر کرد
• بۆ یەهودای کچ.
• 6کەپرەکەی تێکدا، وەک باخچەیەک نەما،
• شوێنی کۆبوونەوەکەی ڕووخاند.
• یەزدان وای کرد سییۆن لەبیری بچێتەوە
• ڕۆژی شەممە و جەژنەکان.
• بە تووڕەیی خۆی
• پاشا و کاهینی ڕەتکردەوە.
• 7پەروەردگار قوربانگاکەی خۆی ڕەتکردەوە،
• وازی لە پیرۆزگاکەی خۆشی هێنا.
• دیواری کۆشکەکانی
• ڕادەستی دوژمنەکانی کرد.
• لەناو ماڵی یەزدان دەنگیان هەڵبڕی
• وەک لە ڕۆژی جەژندا.
• 8شووراکانی سییۆنی کچ
• یەزدان مەبەستی بوو بیڕووخێنێت.
• بە گوریس پێوای و
• دەستی لە وێرانکردنی نەگێڕایەوە.
• سەنگەر و دیواری هێنایە گریان و
• پێکەوە ڕووخان.
• 9دەروازەکانی نوقومی زەوی بوون،
• شمشیرەکانی لەناوبرد و شکاندی.
• پاشا و میرەکانی بۆ نێو گەلان ڕاپێچ کراون،
• فێرکردنی موسا نەماوە،
• هەروەها پێغەمبەرەکانیشی
• هیچ بینینێکیان لەلایەن یەزدانەوە بۆ ئاشکرا نەکراوە.
• 10پیرەکانی شاری سییۆن
• بە کپی لەسەر زەوی دادەنیشن،
• خۆڵ بەسەر سەریاندا دەکەن،
• جلوبەرگی گوش لەبەر دەکەن.
• پاکیزەکانی ئۆرشەلیم
• سەریان دادەنەوێنن.
• 11چاوەکانم ماندووبوون لە فرمێسک ڕشتن،
• دڵم توندە،
• جەرگ بڕاوم
• لەبەر ئەوەی گەلەکەم وێران بوو،
• لەبەر بوورانەوەی منداڵان و شیرەخۆران
• لەناو گۆڕەپانەکانی شاردا.
• 12بە دایکیان دەڵێن:
• «کوا نان و ئاو؟»
• کاتێک وەک بریندار
• لەناو گۆڕەپانەکانی شاردا دەبوورێنەوە،
• کاتێک ڕۆحیان دەردەچێت
• لەناو باوەشی دایکیان.
• 13چیت پێ بڵێم؟
• ئەی ئۆرشەلیمی کچ،
• بە چیت بچووێنم؟
• بە چی بەراوردت بکەم،
• بۆ ئەوەی دڵت بدەمەوە،
• ئەی سییۆنی کچە پاکیزە؟
• وێران بوونت وەک دەریا قووڵە.
• کێ دەتوانێت چاکت بکاتەوە؟
• 14بینینی خودایی بۆ پێغەمبەرەکانت
• درۆ و فریودەر بوو،
• تاوانی تۆیان دەرنەخست
• بۆ ئەوەی لە ڕاپێچکردن بتپارێزن.
• بەڵکو سروشی
• درۆ و هەڵخەڵەتێنەریان بە تۆ گەیاند.
• 15هەموو ئەوەی بەوێدا تێدەپەڕێت
• بە گاڵتەپێکردنەوە چەپڵەت بۆ لێدەدات،
• فیکە لێ دەدەن و سەر بادەدەن
• لەبەر ئۆرشەلیمی کچ،
• دەڵێن: «ئەمە شارەکەیە
• کە پێی دەگوترا تەواوی جوانی و
• مایەی دڵخۆشی هەموو زەوییە؟»
• 16هەموو دوژمنەکانت
• دەمیان لێت دەکرێتەوە،
• فیشکەیان دێت و ددانیان لێت جیڕدەکەنەوە،
• دەڵێن: «هەڵمانلووشی.
• بێگومان ئەمە ئەو ڕۆژەیە کە چاوەڕوانی بووین،
• پێی گەیشتین و بینیمان.»
• 17یەزدان ئەوەی مەبەستی بوو کردی،
• قسەی خۆی بەجێگەیاند،
• ئەوەی لە ڕۆژانی کۆنەوە بەڵێنی پێیدا.
• بەبێ بەزەیی تۆی ڕووخاند،
• دوژمنی پێت خۆشکرد،
• هێزی ناحەزانی تۆی پتەو کرد.
• 18دڵی خەڵکەکە
• بۆ پەروەردگار هاوار دەکات.
• ئەی شووراکانی سییۆنی کچ،
• با فرمێسکەکانت وەک ڕووبار بڕژێت
• بە شەو و بە ڕۆژ.
• خۆت مەبووژێنەوە،
• چاوەکانت پشوو نەدات.
• 19هەستە، بە شەو هاوار بکە،
• لەگەڵ دەستپێکردنی ئێشکگرتن.
• وەک ئاو دڵت هەڵبڕێژە
• لەبەردەم پەروەردگار.
• دەستت بۆی بەرز بکەوە
• لە پێناوی ژیانی منداڵەکانت،
• ئەوانەی لە برسان بووراونەتەوە
• لەسەر سووچی هەموو شەقامەکان.
• 20«ئەی یەزدان، ببینە و تێڕابمێنە،
• ئەمەت بە کێ کردووە؟
• ئایا ژن بەری سکی خۆی دەخوات،
• منداڵی باوەشی؟
• ئایا کاهین و پێغەمبەر
• لە پیرۆزگای پەروەردگار دەکوژرێت؟
• 21«گەنج و پیر پێکەوە پاڵکەوتن
• لەسەر زەوی شەقامەکان،
• پاکیزە و لاوەکانم
• بە شمشێر کوژراون.
• لە ڕۆژی تووڕەییتدا ئەوانت کوشت،
• ئەوانت بەبێ بەزەیی سەربڕی.
• 22«هەروەک بۆ ڕۆژی جەژن بانگهێشتت کردبن،
• ئاوا لە دژی من لە هەموو لایەکەوە بانگی تۆقینت کرد.
• لە ڕۆژی تووڕەیی یەزدان
• کەس ڕاینەکرد و کەس دەرباز نەبوو،
• ئەوانەی لە باوەشم کردن و بەخێوم کردن،
• دوژمن لەناوی بردن.»

شینه‌كانی ئیرمیا ٣

• 1من ئەو پیاوەم کە زەلیلیم بینی
• بە گۆچانی تووڕەیی ئەو.
• 2منی بە پێش خۆی دا و
• منی بە تاریکاییدا برد، بەبێ هیچ ڕووناکییەک.
• 3بێگومان، دەستی لە دژی من بەرزدەکاتەوە
• بە بەردەوامی و بە درێژایی ڕۆژ.
• 4گۆشت و پێستی منی پیرکرد،
• ئێسکەکانی شکاندم.

شینه‌كانی ئیرمیا پێشەكى، ١: ١ - ١٨

• 1چۆن ئەم شارە بەجێهێڵراوە،
• ئەوەی پڕبوو لە خەڵک!
• چۆن وەک بێوەژنی لێهات،
• ئەوەی لەناو نەتەوەکان مەزن بوو!
• ئەوەی لەنێو هەرێمەکان شاژن بوو
• ئێستا بووەتە کەنیزە!
• 2بە شەو بەکوڵ دەگریێت،
• فرمێسکی لەسەر گۆناکانییەتی.
• لەناو هەموو دۆستانی
• کەس نییە دڵنەوایی بکات.
• هەموو دڵدارانی ناپاکییان لەگەڵ کرد،
• بوون بە دوژمنی.
• 3لەدوای زەلیلی و کۆیلایەتی سەخت،
• یەهودا ڕاپێچ کرا،
• لەنێو نەتەوەکان نیشتەجێ دەبێت،
• شوێنی ئارام نابینێتەوە.
• ئەوانەی ڕاوی دەنێن
• لە ناوەڕاستی تەنگانەدا پێی دەگەن.
• 4ئەو ڕێگایانەی بەرەو سییۆنن شین دەگێڕن،
• لەبەر ئەوەی کەس بۆ جەژنەکان نایەت.
• هەموو دەروازەکانی چۆڵ دەکرێن،
• کاهینەکانی دەناڵێنن،
• پاکیزەکانی خەمبارن،
• ئەویش تاڵی دەچێژێت.
• 5ناحەزەکانی بوونە بە گەورەی ئەو،
• دوژمنەکانی سەرکەوتوون،
• چونکە یەزدان خەمباری کرد،
• لەبەر زۆری گوناهەکانی
• منداڵەکانی بەرەو خاکی غەریبی بردران،
• دوژمنەکانیان ڕاپێچیان کردن.
• 6سییۆنی کچ
• هەموو جوانییەکەی ڕۆیشت.
• میرەکانی وەک ئاسکیان لێهاتووە
• لەوەڕگایان دەست ناکەوێت،
• بە بێهێزی دەڕۆن
• لەبەردەم ئەوانەی ڕاویان دەنێن.
• 7لە ڕۆژانی زەلیلی و سەرگەردانی،
• ئۆرشەلیم هەموو خۆشییەکانی خۆی بەبیر هاتەوە،
• کە لە دێرزەمانەوە بوون.
• کاتێک گەلەکەی کەوتنە دەستی دوژمن،
• کەس نەبوو بە هانایەوە بێت.
• دوژمنان تەماشایان کرد،
• بە ڕووخانەکەی پێکەنین.
• 8ئۆرشەلیم بە تەواوی گوناهی کرد
• لەبەر ئەوە گڵاو بوو.
• هەموو ئەوانەی ڕێزیان لێی دەگرت سووکایەتی پێ دەکەن،
• چونکە ڕووتی ئەویان بینی.
• ئەویش دەناڵێنێت
• بەرەو دواوە ڕوو وەردەگێڕێت.
• 9گڵاوییەکەی بە دامێنییەوە بوو،
• بیری لە چارەنووسی خۆی نەکردەوە.
• کەوتنەکەی سامناک بوو،
• کەس نەبوو دڵنەوایی بکات.
• «ئەی یەزدان، تەماشای زەلیلیم بکە،
• چونکە دوژمن سەرکەوت.»
• 10دوژمن دەستی درێژکردووە
• بۆ سەر هەموو گەنجینەکانی،
• نەتەوەکانی بینی
• هاتنە ناو پیرۆزگاکەیەوە،
• ئەوانەی تۆ فەرمانت دا
• نەیێنە ناو کۆمەڵەکەی تۆوە.
• 11سەراپای خەڵکەکەی دەناڵێنن و
• بەدوای ناندا دەگەڕێن،
• گەنجینەکانی خۆیان بە خواردن دەدەن
• بۆ ئەوەی گیانیان بەبەردا بێتەوە.
• «ئەی یەزدان، تەماشا بکە و ببینە،
• چونکە سووک بووم.»
• 12«ئایا هیچ بۆ ئێوە نییە، ئەی هەموو ڕێبوارەکان؟
• تەماشای دەوروبەر بکەن و ببینن.
• هیچ ئازارێک هەیە وەک ئازارەکەی من،
• ئەوەی کە تووشی منی کرد،
• ئەوەی کە یەزدان بەسەری هێنام،
• لە ڕۆژی جۆشانی تووڕەییەکەی.
• 13«لە سەرەوە ئاگری نارد،
• بۆ ناو ئێسکەکانم دایبەزاند،
• تۆڕی بۆ قاچەکانم دانایەوە
• منی بەرەو پاش گەڕاندەوە.
• منی وێران کرد،
• داهێزراو بە درێژایی ڕۆژ.
• 14«گوناهەکانم وەک نیر خرانە سەرم،
• بە دەستەکانی ئەو هۆنرانەوە.
• گوناهەکانم خرانە سەر ملم و
• خودا هێزی لێ بڕیم.
• پەروەردگار منی ڕادەستی کەسانێک کرد
• کە ناتوانم بەرەنگاریان ببمەوە.
• 15«پەروەردگار هەموو پاڵەوانەکانی ڕەتکردەوە
• کە لەناو مندا بوون.
• لەشکرێکی لە دژی من بانگکرد
• بۆ تێکشکاندنی گەنجەکانم.
• پەروەردگار یەهودای کچە پاکیزەی
• لەناو گوشەر پڵیشاندەوە.
• 16«لەسەر ئەمەیە من دەگریێم،
• چاوەکانم فرمێسک دەڕێژن،
• ئەوەی دڵنەواییم دەکات لێم دوور کەوتووەتەوە،
• کەس نییە گیان ببوژێنێتەوە.
• کوڕەکانم وێران بوون،
• لەبەر ئەوەی دوژمن زاڵ بوو.»
• 17سییۆن دەستەکانی پان دەکاتەوە،
• بەڵام کەس نییە دڵنەوایی بکات.
• یەزدان فەرمانی دا لە دژی یاقوب
• کە دراوسێکانی دوژمنی ئەو بن.
• ئۆرشەلیم لەناویاندا
• گڵاو بوو.
• 18«یەزدان ڕاستودروستە،
• بەڵام من لە دژی فەرمانی ئەو یاخی بووم.
• ئەی هەموو گەلان، گوێ بگرن،
• تەماشای ئازارەکانم بکەن.
• پاکیزە و لاوەکانم
• ڕاپێچ کران.