گۆرانی گۆرانیه‌كان ١: ١ - ٤

• 1گۆرانی گۆرانییەکانی سلێمان.
• 2با بە ماچەکانی دەمی ماچم بکات،
• چونکە ئەوینی تۆ لە شەراب خۆشترە.
• 3بۆنی عەترەکەت خۆشە؛
• ناوت عەتری پرژاوە،
• مایەی سەرسوڕمانی نییە کە پاکیزەکان تۆیان خۆشدەوێ.
• 4پەلم بگرە و با پێکەوە بڕۆین!
• با پاشا بمهێنێتە ناو ژوورەکەی خۆی.
• شاد و دڵخۆش دەبین پێت،
• لە شەراب زیاتر یادی ئەوینی تۆ دەکەینەوە.
• بەڕاستی تۆیان خۆشدەوێ.

گۆرانی گۆرانیه‌كان پێشەكى ٢

گۆرانی گۆرانیه‌كان پێشەكى ١

كۆمكار ١٢: ١ - ١٤

• 1بەدیهێنەری خۆت لەبیر بێت
• لە سەردەمی گەنجیێتیت،
• پێش ئەوەی ڕۆژگاری خراپە بێت
• یان ئەو ساڵانە نزیک بێتەوە کە بڵێی:
• «خۆشییان تێدا نابینم،»
• 2پێش ئەوەی درەوشانەوەی خۆر و
• ڕووناکی و مانگ و ئەستێرە تەواو بێت،
• پێش ئەوەی گەڕانەوەی هەوری باران ئاسمان تاریک بکات؛
• 3ئەو ڕۆژەی پارێزەرانی ماڵ دەلەرزن،
• پیاوانی بەهێز دەچەمێنەوە،
• ئەو ئافرەتانەی کە ئیشی دەستاڕیان دەکرد لەبەر کەمی لە کار دەکەون،
• تاریک دادێن ئەو ژنانەش کە لە پەنجەرەکانەوە تەماشا دەکەن؛
• 4کاتێک دەرگاکانی بازاڕ دادەخرێن و
• دەنگی هاڕین نزم دەبێتەوە؛
• ئەو ڕۆژەی کە پیرەمێرد لە دەنگی چۆلەکە هەڵدەستێت،
• هەرچەندە بەلایەوە گۆرانی کچەکان کز دەبن؛
• 5ئەو ڕۆژەش کە خەڵک لە بەرزایی دەترسن و
• لە ڕێگا تۆقیون،
• کە بادەم چرۆ دەکات و
• کوللەحاجی خۆی ڕادەکێشێت و
• هیچ ئارەزوو نامێنێت.
• ئیتر مرۆڤ بەرەو ماڵی هەتاهەتایی خۆی دەچێت و
• شینگێڕەکان بە شەقامەکاندا دەسووڕێنەوە.
• 6لەبیرت بێت، پێش ئەوەی زنجیری زیو بپچڕێت و
• قاپی زێڕین بشکێت؛
• پێش ئەوەی گۆزە لەسەر کانی وردوخاش بکرێت،
• یان چەرخە لەسەر بیر بشکێنرێت و
• 7خۆڵ دەگەڕێتەوە سەر زەوی وەک پێشوو،
• ڕۆحیش دەگەڕێتەوە لای ئەو خودایەی کە بەخشیویەتی.
• 8وتاربێژی ژیرمەند دەڵێت: «بێ واتایە! بێ واتایان!
• هەموو شتێک بێ واتایە!»
• 9سەرباری ئەوەی کە وتاربێژی ژیرمەند دانا بوو، گەلیشی فێری زانین کرد، شارەزای هەڵسەنگاندن و پشکنین و ڕێکخستنی پەندی زۆر بوو.
• 10وتاربێژی ژیرمەند هەوڵی دا وشە شادی بەخشەکان بدۆزێتەوە کە بە سەرڕاستی نووسراون و وشەکانی ڕاستین.
• 11وشەکانی پیاوی دانا وەک نەقیزە وایە، وەک بزمارە چەقیوەکانن لە پیاوانی کۆمەڵ، لەلایەن یەک شوانەوە دراون.
• 12ئەی ڕۆڵە، سەرەڕای ئەمانە، ئاگاداری شتەکانی دیکەش بە.
• دانانی پەڕتووکی زۆر کۆتایی بۆ نییە، لێکۆڵینەوەی زۆریش لەش ماندوو دەکات.
• 13هەموو شت ئێستا بیستراوە و
• دەرئەنجامەکەی ئەوەیە:
• لە خودا بترسە و ڕاسپاردەکانی بەجێبگەیەنە،
• چونکە ئەمە ئەرکی سەر شانی هەموو مرۆڤە.
• 14خودا حوکم بەسەر هەموو کارێکدا دەدات،
• بە هەموو کارێکی نهێنیشەوە،
• جا چاک بێت یان خراپ.

كۆمكار ١٠: ١١ - ١١: ١٠

• 11ئەگەر پێش نوشتەکردن مار پێتەوە بدات،
• ئیتر نوشتەکەر کرێیەکەی وەرناگرێت.
• 12قسەی زاری دانا شیرینە،
• بەڵام گێل لێوەکانی خۆی هەڵیدەلووشن.
• 13سەرەتای وشەکانی دەمی گێلییە،
• لە کۆتاییدا دەبنە شێتێکی خراپ.
• 14گێل زۆر قسە دەکات.
• مرۆڤ نازانێت چی دەبێت و
• کێ دەتوانێت بە کەسێکی دیکە ڕابگەیەنێت
• کە چی لەدوای خۆی ڕوودەدات؟
• 15ماندووبوونی گێل خۆی شەکەت دەکات،
• بە جۆرێک نازانێت چۆن بۆ شار بچێت.
• 16قوڕبەسەر ئەو خاکەی کە پاشاکەی پێشتر خزمەتکار بوو و
• میرەکانیشی بەیانییان لەسەر خوان دادەنیشن.
• 17خۆزگە بەو خاکەی کە پاشاکەی لە نەوەی شازادە بێت و
• میرەکانیشی نان لە کاتی خۆیدا بخۆن،
• بۆ هێز نەک بۆ سەرخۆشی.
• 18بە تەمبەڵی بنمێچ دێتە خوارێ و
• بە دەست شلکردنیش خانوو دڵۆپە دەکات.
• 19بۆ ئەوەی پێبکەنن خوان ئامادە دەکەن و
• شەرابیش ژیان خۆش دەکات،
• بەڵام پارە هەموو شتێکی پێ دەکرێت.
• 20تەنانەت لەبیری خۆشت نەفرەت لە پاشا مەکە،
• لە ژووری نوستنیشت نەفرەت لە دەوڵەمەند مەکە،
• چونکە چۆلەکەی ئاسمان دەنگەکەت دەگەیەنێت و
• باڵداریش قسەکەت ڕادەگەیەنێت.

كۆمكار ١١

• 1نان بدە بە دەم ئاوەوە،
• چونکە لە پاشەڕۆژدا دێتەوە ڕێگای خۆت.
• 2بەش بدە بە حەوت کەس، بەڵێ، بە هەشتیش،
• چونکە نازانیت چ کارەساتێک لەسەر زەوی ڕوودەدات.
• 3ئەگەر هەور پڕبێت،
• باران بەسەر زەویدا دەبارێنێت.
• ئەگەر دارێک بەرەو باشوور بکەوێت یان بەرەو باکوور،
• ئەو شوێنەی دارەکەی لێ دەکەوێت، لەوێ دەبێت.
• 4ئەوەی چاوی لە با بێت ناچێنێت،
• ئەوەی سەیری هەور بکات دروێنە ناکات.
• 5هەروەک نازانیت کامە ڕێگای بایە،
• یان چۆن کۆرپەلە لەناو سکی دایکیدا شێوەی دەکێشرێت،
• بە هەمان شێوە ناتوانیت لە کارەکانی خودا تێبگەیت،
• کە هەمووان دروستدەکات.
• 6سەر لە بەیانی تۆوی خۆت بچێنە،
• سەر لە ئێوارەش دەستت شل مەکە،
• چونکە نازانیت کامیان سەوز دەبێت،
• ئەم یان ئەو،
• یان بەرهەمی هەردووکیان وەک یەک باش دەبێت.
• 7ڕووناکی شیرینە و
• باشە بۆ چاوان کە خۆر ببینێت.
• 8ئەگەر مرۆڤ تەمەنێکی درێژ ژیا،
• با بە هەمووی دڵخۆش بێت.
• بەڵام با ڕۆژانی تاریکی لەبیربێت،
• چونکە زۆر دەبێت.
• هەموو ئەوەی دێت بێ واتایە.
• 9ئەی لاو، لە سەردەمی گەنجیێتیت شادمان بە،
• با لە ڕۆژانی لاویێتیت دڵت خۆش بێت.
• بە ڕێگای دڵی خۆت و
• بە بینینی چاوەکانتدا بڕۆ،
• بەڵام بزانە کە لەسەر هەموو ئەمانە
• خودا دەتهێنێت بۆ حوکم بەسەردادان.
• 10پەستی لە دڵت داماڵە و
• خراپە لە لەشت دووربخەوە،
• چونکە نەوجەوانی و گەنجیێتی بێ واتان.

كۆمكار ٩: ١٠ - ١٠: ١٠

• 10ئەوەی لە دەستت دێت، بەوپەڕی هێز و تواناوە بیکە، چونکە نە کار و نە پلاندانان و نە زانین و نە دانایی نییە لە جیهانی مردووان، ئەوەی تۆ دەچیت بۆ ئەوێ.
• 11دیاردەیەکی نوێم لەسەر زەوی بینی:
• ڕاکردن بۆ سووکەڵەکان نییە و
• جەنگ بۆ پاڵەوانان نییە و
• نان بۆ دانایان نییە و
• دەوڵەمەندی بۆ تێگەیشتووان نییە و
• پەسەندی بۆ زانایان نییە،
• چونکە کات و بەخت تووشی هەمووان دێت.
• 12هەروەها مرۆڤ کاتی خۆی نازانێت:
• وەک ئەو ماسییانەی بە تۆڕێکی لەناوبەر دەبردرێن،
• یان وەک ئەو چۆلەکانەی بە تەڵەوە دەبن،
• ئادەمیزادیش بە هەمان شێوەی ئەوان
• لەناکاو و لە کاتێکی خراپدا دەکەونە تەڵەوە.
• 13ئەم داناییەشم لەسەر زەویدا بینی، لەلای من مەزنە:
• 14شارێکی بچووک و خەڵکێکی کەمی تێدابوو، پاشایەکی مەزن پەلاماری دا و ئابڵوقەی دا و قوللەی مەزنی بەدەوریدا بنیاد نا.
• 15ئەو شارە پیاوێکی هەژاری دانای تێدابوو، بە دانایی خۆی شارەکەی دەرباز کرد. بەڵام کەس ئەو پیاوە هەژارەی لەبیر نەما.
• 16منیش گوتم: «دانایی لە هێز باشترە،» بەڵام دانایی هەژاریش بە سووکی تەماشا دەکرێت و گوێ لە قسەکانی ناگیرێت.
• 17قسەی بە هێمنی لەلایەن دانایان شایانی سەرنجدانە
• زیاتر لە هاواری دەسەڵاتدار لەناو گێلان.
• 18دانایی لە چەکی جەنگ چاکترە،
• بەڵام یەک گوناهبار چاکەیەکی زۆر تێک دەدات.

كۆمكار ١٠

• 1وەک چۆن مێشی مردوو بۆنی خۆش بۆگەن دەکات،
• کەمێک کاری گێلانە دەتوانێت دانایی و ڕێزی کەسێک لەناوبەرێت.
• 2دڵی دانا مەیلی ڕێی ڕاست دەکات،
• دڵی گێلیش مەیلی ڕێی چەوت دەکات.
• 3کە گێل بە ڕێگادا دەڕوات
• گێلی لێ دەبارێت،
• ئیتر گێلایەتییەکەی بۆ هەموو لایەک دیارە.
• 4ئەگەر تووڕەیی فەرمانڕەوا بەسەرتدا جۆشا،
• شوێنی کاری خۆت بەجێمەهێڵە،
• چونکە هێمنی هەڵەی گەورە ئارام دەکاتەوە.
• 5خراپەیەک هەیە لەسەر زەویدا بینیم،
• وەک هەڵەیەکی مەزنە لەلایەن فەرمانڕەوا:
• 6گێل زۆر جار لە پلەوپایەی بەرز دادەنرێت و
• دەوڵەمەندەکانیش لە شوێنە نزمەکان دادەنیشن.
• 7بینیم خزمەتکاران ئەسپ سوار بوون و
• میران پیادە بوون وەک خزمەتکار.
• 8ئەوەی چاڵ هەڵکەنێت خۆی تێی دەکەوێت،
• ئەوەی دیوار بڕووخێنێت مار پێیەوە دەدات.
• 9ئەوەی بەرد هەڵبکەنێت ئازاری پێوە دەبینێت،
• ئەوەی دار ببڕێت لە مەترسییەکەیدا دەبێت.
• 10ئەگەر تەور کول بێت و
• دەمی تیژ نەکرێت،
• هێزی زیاتری دەوێت،
• بەڵام دانایی بەسوودە بۆ سەرکەوتن.

كۆمكار ٩: ١ - ١٠

• 1ئیتر لە هەموو ئەوانە ڕامام و بۆم دەرکەوت کە ڕاستودروستان و دانایان و کردەوەکانیان لەژێر دەسەڵاتی خودان، بەڵام کەس نازانێت لە ڕێگەی خۆشەویستی یان ڕق لێبوونەوەوە دێت.
• 2هەموویان یەک چارەنووسیان هەیە، ڕاستودروست و بەدکار، چاک و خراپ، پاک و گڵاو، قوربانی سەربڕ و ئەوەی قوربانی سەرنابڕێت؛
• چاکەکار و گوناهبار،
• سوێندخۆر و ئەوەی دەترسێت سوێند بخوات.
• 3ئەمە ئەو خراپەیە کە لە پشتی هەموو ڕووداوەکانی سەر زەوییە: کە یەک چارەنووس بۆ هەمووان بێت، هەروەها دڵی ئادەمیزاد پڕە لە خراپە، شێتییش لە دڵیاندایە لە کاتێکدا زیندوون و پاشان کە دەچنە پاڵ مردووان.
• 4هەرکەسێک کە لەنێو زیندووان بێت، ئومێدەوارە. تەنانەت سەگی زیندووش لە شێری تۆپیو چاکترە!
• 5زیندووان دەزانن کە دەمرن،
• بەڵام مردووان هیچ نازانن و
• لەمەودواش پاداشتیان نییە،
• تەنانەت ناویان لەبیرکراوە.
• 6خۆشەویستی و ڕق و
• بەغیلیشیان لەمێژە لەناوچوون،
• ئیتر بەشیان نییە هەتاهەتایە
• لە هەموو ئەوەی لەسەر زەویدا دەکرێت.
• 7بڕۆ بە شادی نانی خۆت بخۆ و بە دڵێکی خۆش شەرابی خۆت بنۆشە، چونکە لەمێژە خودا لە کردەوەت ڕازییە.
• 8با هەموو کاتێک جلوبەرگت سپی بێت و زەیت لە سەری خۆت بدە.
• 9خۆشی ببینە لەگەڵ ژنەکەت کە خۆشت دەوێت، هەموو ڕۆژانی ژیانی بێ واتات، کە خودا لەسەر زەوی پێیداویت، هەموو ڕۆژانی بێ واتات، چونکە ئەمە بەشی تۆیە لە ژیان و لە ماندووبوونەکەت کە لەسەر زەوی پێوەی ماندوو دەبیت.
• 10ئەوەی لە دەستت دێت، بەوپەڕی هێز و تواناوە بیکە، چونکە نە کار و نە پلاندانان و نە زانین و نە دانایی نییە لە جیهانی مردووان، ئەوەی تۆ دەچیت بۆ ئەوێ.

كۆمكار ٧: ١ - ٨: ١٧

• 1ناوبانگی باش لە بۆنی خۆش باشترە و
• ڕۆژی مردنیش لە ڕۆژی لەدایکبوون.
• 2چوون بۆ ماڵی ماتەمدار باشترە
• لە چوون بۆ ماڵی ئاهەنگدار،
• چونکە مردن کۆتایی هەموو مرۆڤێکە،
• زیندوو دەیخاتە دڵی خۆیەوە.
• 3وەڕسبوون لە پێکەنین باشترە،
• چونکە بە خەمۆکی ڕوخسار دڵ چاک دەبێتەوە.
• 4دڵی دانایان لە ماڵی ماتەمدارە و
• دڵی گێلانیش لە ماڵی ئاهەنگدارە.
• 5گوێگرتن لە سەرزەنشتی دانا باشترە
• لە گوێگرتن لە گۆرانیی گێلەکان،
• 6چونکە پێکەنینی پیاوی گێل،
• وەک قرچەی دڕکە کە لەژێر مەنجەڵدا.
• ئەمەش هەر بێ واتایە.
• 7زۆرداری پیاوی دانا گێل دەکات و
• بەرتیل دڵ گەندەڵ دەکات.
• 8کۆتایی شت باشترە لە سەرەتاکەی،
• پشوو درێژ باشترە لە هەڵەشە.
• 9لە ناخەوە زوو پەست مەبە،
• چونکە تووڕەیی لەناو سنگی گێلەکاندا جێگیرە.
• 10مەڵێ: «بۆچی سەردەمانی کۆن لە ئەمڕۆ باشتر بوون؟»
• چونکە لە داناییەوە نییە لەمە پرسیار دەکەیت.
• 11دانایی باشە وەک میرات و
• بە سوودە بۆ ئەوانەی کە خۆر دەبینن.
• 12دانایی پەناگایە
• وەک چۆن پارەش پەناگایەکە،
• بەڵام ئەمە سوودی زانینە:
• دانایی ژیان دەبەخشێت بە خاوەنەکەی.
• 13تەماشای کاری خودا بکە:
• کێ دەتوانێت ڕاستی بکاتەوە
• ئەوەی خودا خواری کردووەتەوە؟
• 14لە ڕۆژی باشدا، لە خۆشیدا بە،
• بەڵام لە ڕۆژی خراپدا، ئەوە بزانە کە
• خودا هەردووکیانی دروستکردووە.
• ئیتر مرۆڤ ناتوانێت هیچ شتێک
• سەبارەت بە داهاتووەکەی بدۆزێتەوە.
• 15لە ڕۆژگاری بێ واتای خۆمدا ئەم دووانەم بینی:
• کەسی ڕاستودروست هەیە بە ڕاستودروستییەکەی دەفەوتێت،
• خراپەکاریش هەیە درێژە بە خراپەکەی دەدات.
• 16زۆر ڕاستودروست مەبە و
• زیاد دانا مەبە.
• بۆچی خۆت تێکدەدەیت؟
• 17زۆر بەدکار مەبە و
• مەبە بە گێل.
• بۆچی بمریت لە کاتی خۆت نەبێت؟
• 18باشترە دەست بە یەکێکیانەوە بگریت و
• دەست لەوەی دیکەش شل نەکەیت،
• چونکە لەخواترس بە هیچ شێوەیەک زیادەڕۆیی ناکات.
• 19دانایی دانا بەهێزتر دەکات
• لە دە فەرمانڕەوا کە لە شاردا بن.
• 20بێگومان هیچ مرۆڤێکی ڕاستودروست لەسەر زەویدا نییە،
• کە چاکە دەکات و هەرگیز گوناه ناکات.
• 21هەروەها هەموو قسەیەک کە دەیکەن دڵی خۆتی مەدەرێ،
• نەوەک گوێت لە خزمەتکارەکەت بێت نەفرەتت لێ بکات،
• 22چونکە دڵت دەزانێت
• کە تۆش زۆر جار نەفرەتت لەوانی دیکە کردووە.
• 23هەموو ئەمانەم بە دانایی تاقی کردەوە و گوتم:
• «دانا دەبم،»
• کەچی لێم دوور بوو.
• 24ئەو داناییە کە هەیە دوورە و زۆر قووڵە؛
• کێ دەیدۆزێتەوە؟
• 25هاتم سەرنجم دا لە دانایی و لێم کۆڵییەوە و
• گەڕام بەدوای ڕاستیەکاندا بۆ ئەوەی لێی تێبگەم،
• لە ئەنجامدا بۆم دەرکەوت کە خراپەکاری نەزانینە و
• گێلایەتیش شێتییە.
• 26من دۆزیمەوە کە لە مردن تاڵترە
• ئەو ژنەی کە تۆڕە و دڵی تەڵەیە،
• دەستەکانیشی کۆتن.
• ئەوەی لەبەردەم خودا چاک بێت، لێی دەرباز دەبێت،
• بەڵام گوناهبار بە تەڵەکەیەوە دەبێت.
• 27وتاربێژی ژیرمەند دەڵێت: «سەیر بکە، ئەمەم دۆزییەوە:
• «بۆ ئەوەی بگەمە ئەنجامی ڕاستییەکان زانیارییەکانم یەک بە یەک کۆکردەوە،
• 28لە کاتێکدا کە هێشتا دەگەڕام و
• جارێ نەگەیەشتبوومە ئەنجام،
• پەندێکم بیستووە کە دەڵێت:
• ”لەنێو هەزار پیاودا تەنها یەکێکم دۆزییەوە،
• بەڵام لەنێو هەموویان یەک ئافرەتم نەبینی.“
• 29تەنها شتێکم دۆزیوەتەوە، ئەمەش ئەوەیە:
• خودا مرۆڤی لەسەر بنچینەیەکی ڕاست دروستکردووە،
• بەڵام ئەوان دوای داهێنانی زۆر کەوتوون.»

كۆمكار ٨

• 1کێ وەک مرۆڤی دانایە؟
• کێ ڕوونکردنەوەی شت دەزانێت؟
• دانایی مرۆڤ ڕووی ڕووناک دەکاتەوە و
• تاڵی ڕوخساری دەگۆڕێت.
• 2من دەڵێم: فەرمانی پاشا بەجێبگەیەنە، لە پێناوی ئەو سوێندەی کە بۆ خودات خوارد.
• 3پەلە مەکە لە ڕۆیشتن لەبەردەمی پاشا. داکۆکی لە خراپە مەکە، چونکە پاشا هەرچی پێی خۆش بێت دەیکات.
• 4فەرمایشتی پاشا فەرموودەی دەسەڵاتدارە، کێ دەتوانێت پێی بڵێت: «تۆ چی دەکەیت؟»
• 5ئەوەی فەرمانەکەی بەجێبگەیەنێت تووشی خراپە نابێت،
• دڵی داناش کات و ڕێوشوێنی گونجاو دەزانێت،
• 6چونکە هەر شتێک کات و ڕێوشوێنی خۆی هەیە،
• هەرچەندە مرۆڤ دەردەسەری زۆر بێت.
• 7کەس نازانێت لە داهاتوودا چی دەبێت،
• ئەوەی ڕوودەدات کێ پێی ڕادەگەیەنێت؟
• 8وەک چۆن کەس دەسەڵاتی بەسەر بادا نییە، بۆ ئەوەی با بگرێت،
• مرۆڤ دەسەڵاتی بەسەر ڕۆژی مردندا نییە.
• وەک چۆن نەسرەوتن لە کاتی شەڕدا نییە،
• خراپەکار توانای نییە خۆی لە خراپە ئازاد بکات.
• 9هەموو ئەمانەم بینی، کە سەرنجم دایە هەموو ئەو کارانەی لەسەر زەوی کراون. کاتێک هەیە کەسێک بەسەر کەسێکی دیکەدا دەسەڵاتدار دەبێت بۆ زیانی خۆی.
• 10بەم جۆرە بینیم خراپەکاران لە گۆڕ نران، ئەوانەی کە لە شوێنی پیرۆزەوە هاتوچۆیان دەکرد و لەو شارەی ئەو کارانەیان کرد ستایش کرابوون. ئەمەش هەر بێ واتایە.
• 11لەبەر ئەوەی سزای تاوان بە پەلە جێبەجێ ناکرێت، دڵی ئادەمیزاد پڕ بووە لە پیلانی خراپ.
• 12هەرچەندە بەدکار کە سەد جار تاوانی کردبێت و تەمەنێکی درێژ بژیێت، بەڵام من دەزانم کە بۆ لەخواترس کە ڕێزی خودا دەگرێت باشتر دەبێت.
• 13بەڵام بۆ بەدکاران چاک نابێت و وەک سێبەر ڕۆژانیان درێژە ناکێشێت، چونکە لە خودا ناترسن.
• 14شتێکی دیکەی بێ واتا هەیە کە لەسەر زەویدا دەکرێت، ئەمەیە: ڕاستودروستان هەن بەگوێرەی کاری بەدکارانیان بەسەردا دێت و بەدکارانیش هەن بەگوێرەی کاری ڕاستودروستانیان بەسەردا دێت. گوتم، ئەمەش هەر بێ واتایە.
• 15لەبەر ئەوە ئامۆژگاری دەکەم بەشدار بن لە شادی، چونکە کوا چاکە بۆ مرۆڤ لەسەر زەوی؟ بێجگە لەوەی کە بخوات و بخواتەوە و شادبێت و ئەمەی بۆ دەمێنێتەوە لە ماندووبوونەکەی بە درێژایی ژیانی، کە خودا پێیداوە لەسەر زەویدا.
• 16کاتێک سەرنجم دایە دانایی و ڕەنجکێشانی خەڵکی زەوی، کە شەو و ڕۆژ خەو نەدەچووە چاویان،
• 17هەموو ئەوەی خودا ئەنجامی داوە بینیم. کەس ناتوانێت لە کارەکانی خودا لەسەر زەوی تێ بگات. سەرەڕای ئەوەی مرۆڤ ماندوو دەبێت بۆ دۆزینەوەی بنچینەکەی، بەڵام نایدۆزێتەوە. هەرچەندە کەسی داناش دەڵێت دەزانم، بەڵام ناتوانێت بیدۆزێتەوە.

كۆمكار ٥: ٧ - ٦: ١٢

• 7زیادبوونی خەون و چەنەبازی بێ واتان، لەبەر ئەوە لەخواترس بە.
• 8ئەگەر بینیت لە هەرێمێکدا هەژار ستەمی لێ کرا و ڕاستودروستی و دادپەروەری پشتگوێ خرا، ئەوا سەرسام مەبە، چونکە لێپرسراوی بەرز لێپرسراوی بەرزتر دەپارێزێت و بەرزتریش لەوان هەردووکیان دەپارێزێت.
• 9بەڵام گەل لە وڵات سوود وەردەگرن، چونکە پاشا هەموو کێڵگەکانی دەپارێزێت.
• 10ئەوەی حەزی لە پارە بێت لە پارە تێر نابێت،
• ئەوەی حەزی لە سامان بێت لە داهات تێر نابێت،
• هەروەها ئەمەش بێ واتایە.
• 11بە زیادبوونی خێروبێر
• زیاد دەبن ئەوانەی دەیخۆن.
• ئایا چ سوودێکی بۆ خاوەنەکەی هەیە،
• جگە لەوەی تەنها چاوەکانی تێری لێ دەخۆن؟
• 12خۆشە خەوی کارگەر،
• کەم بخوات یان زۆر،
• بەڵام تێریی دەوڵەمەند
• ڕێ بە خەو نادات.
• 13خراپەیەکی ناخۆش هەیە لەسەر زەویدا بینیم:
• سامانێک پارێزراوە بۆ خراپەی خاوەنەکەی،
• 14ئەم سامانەش لە مامەڵەیەکی خراپدا لەناوچوو،
• ئینجا کوڕێکی بوو و هیچی بۆ نەمایەوە هەتا بۆ کوڕەکەی بەجێبهێڵێت.
• 15وەک چۆن لە سکی دایکی هاتە دەرەوە،
• بە ڕووتی دەگەڕێتەوە، دەڕوات وەک هات.
• هیچ شتێک لە ماندووبوونەکەی نابات
• لەگەڵ دەستی کە دەڕوات.
• 16ئەمەش خراپەیەکی ناخۆشە:
• هەروەک چۆن مرۆڤ دێتە جیهان، بە هەمان شێوە بەجێدەهێڵێت،
• ئەوەی ماندووبوونەکەی بۆ با دەبێت
• چ قازانجێک دەکات؟
• 17هەروەها هەموو ڕۆژانی ژیانی لە تاریکیدا بەسەردەبات،
• لەگەڵ وەڕسبوونێکی زۆر و نەخۆشی و تووڕەیی.
• 18ئەوەی من بینیومە باشە، ئەوەی گونجاوە، کە مرۆڤ بخوات و بخواتەوە و خۆشی ببینێت لە هەموو ئەوەی کە لەسەر زەویدا پێوەی ماندوو دەبێت، بە درێژایی ئەو ڕۆژگارە کەمەی کە خودا پێیداوە، چونکە بەشی ئەوە.
• 19هەروەها کە خودا بە یەکێک دەوڵەمەندی و سامان دەدات و ئەویش دەتوانێت سوودی لێی وەربگرێت و بە بەشی خۆی ڕازی بێت و بە ماندووبوونەکەی دڵخۆش بێت، ئەمە دیارییەکە لە خوداوە.
• 20جا ڕۆژگاری ژیانی بەبیر نایەتەوە، چونکە خودا بە خۆشی دڵییەوە خەریکی کردووە.

كۆمكار ٦

• 1بارگرانییەکم لەسەر زەوی بینیوە کە ئادەمیزاد خراپ گیرۆدە بوون بە دەستیەوە،
• 2کەسێک خودا دەوڵەمەندی و سامان و ڕێزی پێدابێت و هیچ کەمی نەبێت لەوەی گیانی ئارەزووی دەکات، بەڵام خودا دەسەڵاتی پێنەداوە بۆ ئەوەی بیخوات، بەڵکو بێگانە دەیخوات، ئەمە بێ واتایە و دەردێکی خراپە.
• 3ئەگەر کەسێک سەد منداڵی هەبێت و ساڵانێکی زۆر بژیێت و تەمەنی زۆر بێت، بەڵام گیانی تێر خۆشی نەبێت و هەروەها ناشتنی بۆ نەبێت، دەڵێم: لەبارچووێک لەو باشترە،
• 4چونکە بێ واتایانە دێت و بە تاریکیدا دەڕوات، ناویشی بە تاریکی دادەپۆشرێت.
• 5هەروەها نە خۆری بینی و نە دەشزانێت، ئەم ئاسوودەترە لەو کەسە.
• 6ئەگەر هەزار ساڵ دووبارەش بژیێت بەڵام خۆشی نەبینێت، ئایا هەمووان بۆ یەک شوێن ناڕۆن؟
• 7هەموو ماندووبوونی مرۆڤ بۆ دەمییەتی،
• بەڵام هەرگیز تێر ناخوات.
• 8دانا چی لە گێل زیاترە؟
• چی یارمەتی هەژار دەدات
• کە ئەو بزانێت چۆن هەڵسوکەوت بکات
• لەگەڵ ئەوانەی کە لە ژیاندان؟
• 9ئەوەی هەتە و لەبەرچاوتە
• باشترە لەوەی کە نیتە و ئارەزووت لێیەتی.
• ئەمەش بێ واتایە و گڤەی بایە.
• 10ئەوەی هەبووە لە کۆنەوە ناوی لێنراوە و
• زانراوە.
• مرۆڤ ناتوانێت ململانێ لەگەڵ یەکێک بکات
• کە لە خۆی بەهێزترە.
• 11ئەوەندە قسە زیاد دەبێت،
• ئەوەندە سوودی کەم دەبێتەوە،
• جا مرۆڤ چی بۆ دەمێنێتەوە؟
• 12کێ دەزانێت چی باشە بۆ مرۆڤ لە ژیاندا کە درێژی تەمەنی بێ واتا وەک سێبەر بەسەردەچێت؟ کێ بە مرۆڤ ڕادەگەیەنێت پاش ئەو لەسەر زەوی چی ڕوودەدات؟

كۆمكار ٤: ٩ - ٥: ٦

• 9دوو کەس لە یەک کەس باشترە،
• چونکە لە ماندووبوونەکەیان قازانجێکی باشتریان دەبێت.
• 10ئەگەر یەکێکیان بکەوێت،
• هاوڕێکەی هەڵیدەستێنێتەوە.
• بەڵام قوڕبەسەر ئەوەی کە تەنهایە،
• دەکەوێت و کەس نییە هەڵیبستێنێتەوە.
• 11هەروەها ئەگەر دوو کەس پێکەوە ڕابکشێن، گەرم دەبنەوە،
• بەڵام یەکێک تەنها بێت، چۆن گەرم دەبێتەوە؟
• 12ئەگەر یەکێک یەک کەس ببەزێنێت،
• دووان دەتوانن بەرامبەری بوەستن،
• گوریسی سێ تاڵیش زوو ناپسێت.
• 13گەنجێکی هەژار و دانا باشترە لە پاشایەکی پیر و گێل، کە ئیتر ناتوانێت گوێ لە هۆشداری بگرێت.
• 14دەشێت گەنجەکە لە بەندیخانەوە هاتبێتە دەرەوە هەتا ببێت بە پاشا، یاخود بە هەژاری لەو شانشینەدا لەدایک بووبێت.
• 15ڕوانیمە هەموو ئەو مرۆڤانەی کە بەسەر زەویدا هاتوچۆیان دەکرد پشتگیری گەنجەکەیان دەکرد کە جێگەی پاشاکەی گرتەوە.
• 16ئەو مرۆڤانەی کە هاتنە بەردەمی پاشا بێشومار بوون، بەڵام گەل دڵیان بەو پاشایە خۆش نەبوو. ئەمەش بێ واتایە و گڤەی بایە.

كۆمكار ٥

• 1کاتێک دەچیت بۆ ماڵی خودا، ئاگاداری پێی خۆت بە. وەرە پێشەوە هەتا گوێ بگریت، نەوەک قوربانی گێلەکان بکەی کە خراپەکاری خۆیان نازانن.
• 2با دەمت لە قسەکردندا پەلە نەکات،
• با دڵیشت خێرا نەکات،
• لە دەربڕینی قسە لەبەردەم خودا،
• چونکە خودا لە ئاسمانە و
• تۆ لەسەر زەویت،
• لەبەر ئەمە با وشەکانت کەم بن.
• 3خەون لە ئەنجامی ماندووبوونی زۆرەوە دێت و
• قسەی گێلیش لە زۆر گوتن.
• 4ئەگەر نەزرێکت بۆ خودا کرد، دوا مەکەوە لە ئەنجامدانی، چونکە بە گێلەکان دڵخۆش نابێت. جا ئەوەی نەزرت کردووە ئەنجامی بدە.
• 5باشترە نەزر نەکەیت لەوەی بیکەیت و ئەنجامی نەدەیت.
• 6ڕێگا مەدە دەمت وا بکات لەشت گوناه بکات و لەبەردەم نێردراوی پەرستگا مەڵێ: «ئەم نەزرە هەڵە بوو.» بۆچی خودا لە قسەکەت تووڕە بێت و ئەوەی کردووتە لەناوی ببات؟