گۆرانی گۆرانیه‌كان ٦: ١ - ٨: ١٤

• 1دڵدارەکەت چووە کوێ،
• ئەی جوانی نێو ئافرەتان؟
• دڵدارەکەت ڕووی لەکوێ کرد،
• هەتا لەگەڵت بەدوایدا بگەڕێین؟
• 2دڵدارەکەم دابەزییە ناو باخچەکەی،
• بۆ ناو باخچەی بۆندار،
• هەتا مێگەلی خۆی لەناو باخچەکاندا بلەوەڕێنێت و
• سەوسەن کۆبکاتەوە.
• 3من بۆ دڵدارەکەمم و دڵدارەکەم بۆ منە،
• لەناو گوڵە سەوسەنەکان دەلەوەڕێت.
• 4یارەکەم تۆ وەک شانشینی تیرزە جوانی،
• وەک ئۆرشەلیم شیرینی،
• وەک لەشکرە ئاڵادارەکان شکۆداری.
• 5چاوەکانت لەسەر من لابدە،
• چونکە بەرگەی ناگرم.
• قژت وەک ڕانە بزنە
• کە لە کێوی گلعادەوە دێتە خوارەوە.
• 6ددانەکانت وەک ڕانە مەڕن
• کە لە شوشتن گەڕاونەتەوە،
• هەموویان جووتن،
• هیچیان بە تەنها نین.
• 7گۆنات وەک لەتە هەنارە
• لە پشت پەچەکەتەوە.
• 8شەست شاژنن و
• هەشتا کەنیزەن،
• پاکیزەکانیش لە ژمارە نایەن،
• 9بەڵام کۆترەکەم، بێگەردەکەم، بێ وێنەیە،
• کچە تاقانەی دایکییەتی،
• نازدارەکەی ئەوەی بوویەتی.
• کچ بینییان خۆزگەیان پێ خواست
• شاژنەکان و کەنیزەکان ستایشیان کرد.
• 10ئەوە کێیە سەری هەڵهێنا وەک بەرەبەیان،
• جوانە وەک مانگ، بێگەردە وەک ڕۆژ،
• وەک کەژاوەی ئەستێرەکان شکۆدارە؟
• 11بۆ ناو باخی دار گوێز دابەزیم
• بۆ بینینی دەرکەوتنی گیای دۆڵ،
• بۆ ئەوەی ببینم ئاخۆ دار مێو چەکەرەی کردووە،
• هەناریش پشکوتووە؟
• 12پێش ئەوەی بزانم،
• گیانم لەناو گالیسکەکانی پاشایەتی گەلەکەم داینام.
• 13ئەی شولەمیتی، بگەڕێوە، بگەڕێوە!
• بگەڕێوە، بگەڕێوە، بۆ ئەوەی تەماشات بکەین!
• بۆچی تەماشای شولەمیت دەکەن
• وەک سەمای مەحەنەیم؟

گۆرانی گۆرانیه‌كان ٧

• 1ئەی کچە میر،
• پێیەکانت لەناو پێڵاو چەندە جوانن!
• کەوانی ڕانت وەک خشڵە
• دەستکردی دەستی وەستای کارامەیە.
• 2ناوکت جامێکی خڕە
• شەرابی تێکەڵاوی لێ کەم ناکات،
• ناوقەدت خەرمانی گەنمە
• بە سەوسەن پەرژین کراوە.
• 3جووتە مەمکەکەت وەک دوو کارمامزن،
• وەک جووتێک مامزن.
• 4گەردنت قوللەیەکی عاجە.
• چاوەکانت وەک گۆمن لە حەشبۆن
• لەبەردەم دەروازەی بەت ڕەبیم.
• لووتت وەک قوللەی لوبنانە
• ڕووەو دیمەشق دەڕوانێت.
• 5سەرت وەک کێوی کارمەلە بەسەرتەوە و
• پرچی سەرت ئەرخەوانییە،
• پاشا بەندی ئەگریجەکانە.
• 6چەند جوان و چەند شیرینیت،
• ئەی ئەویندارەکەم، من بە تۆ دڵشادم!
• 7ئەم بەژنەت لە دار خورما دەچێت،
• مەمکەکانت لە هێشوو.
• 8گوتم: «بەسەر دار خورما دەکەوم،
• خۆم بە بەرهەمەکەی دەگرم.»
• با مەمکەکانت وەک هێشووە ترێ بن،
• بۆنی هەناسەت وەک سێو بێت،
• 9دەمت وەک باشترین جۆری شەراب بێت.
• با شەرابەکە بە ئاسانی بۆ دڵدارەکەم بڕژێت،
• بە نەرمی بەسەر لێو و دداندا بڕوات.
• 10من بۆ دڵدارەکەمم و
• ئەو پەرۆشی منە.
• 11دڵدارەکەم، وەرە با بچینە کێڵگە،
• لە گوندەکان شەو بەسەرببەین.
• 12با بەیانی زوو بگەینە سەر ڕەزەمێوەکان،
• ببینین ئاخۆ دار مێو چەکەرەی کردووە،
• پەسیرەکان کراونەتەوە،
• هەناریش پشکوتووە؟
• لەوێ ئەوینەکەمت پێ دەبەخشم.
• 13گیائادەمە بۆن بڵاو دەکاتەوە،
• لە بەردەرگاکەشمان هەموو میوەیەکی بەتام هەیە،
• کۆن و نوێ
• کە بۆ تۆم هەڵگرتووە، ئەی دڵدارەکەم.

گۆرانی گۆرانیه‌كان ٨

• 1بریا برای من بووای،
• شیرەخۆری مەمکی دایکم!
• ئەوا لە دەرەوە تووشت دەهاتم و ماچم دەکردیت،
• بەبێ ئەوەی ڕیسوا بم.
• 2دەمبردیت،
• دەمبردیتە ماڵی دایکم،
• ئەوەی منی پەروەردە کردووە.
• شەرابی تێکەڵاوم دەرخوارد دەدای،
• لە خۆشاوی هەنارەکەم.
• 3دەستی چەپی لەژێر سەرمە و
• دەستی ڕاستی لە ئامێزم دەگرێت.
• 4ئەی کچانی ئۆرشەلیم، سوێندتان دەدەم
• کە خۆشەویستی هەڵنەستێنن و بە ئاگای نەهێنن
• هەتا خۆی حەز دەکات.
• 5ئەو کچە کێیە لە چۆڵەوانییەوە دێت و
• پاڵی بە دڵدارەکەیەوە داوە؟
• لەژێر دار سێوەکە بەئاگام هێنای،
• لەوێ دایکت بە تۆ سک پڕ بوو،
• لەوێ ئەوەی تۆی بوو سکی پێت پڕ بوو.
• 6بمکە مۆر لەسەر دڵت،
• مۆر لەسەر بازووت،
• چونکە خۆشەویستی وەک مردن بەهێزە،
• ئیرەیی وەک گۆڕ سەختە،
• خۆشەویستی سووتێنەرە، گڕی ئاگرە،
• وەک ئاگرێکی بەهێزە.
• 7ئاوە زۆرەکان ناتوانن خۆشەویستی بکوژێننەوە،
• ڕووبارەکان نوقومی ناکەن.
• ئەگەر مرۆڤ هەموو سامانی ماڵەکەی
• لە پێناوی خۆشەویستی ببەخشێت،
• بە بێبەها دادەنرێت.
• 8خوشکێکی بچووکمان هەیە،
• هێشتا مەمکی نەهاتووە.
• چی بکەین بۆ خوشکمان،
• ئەو ڕۆژەی داخوازیکەری بێت؟
• 9ئەگەر شوورا بێت،
• قوللەی زیوین لەسەری بنیاد دەنێین.
• ئەگەر دەرگا بێت،
• بە تەختەداری ئورز دەوری دەدەین.
• 10من شوورام و
• مەمکەکانم وەک قوللەن،
• بەم جۆرە لە چاوەکانی
• پەسەندی بەدی دەکەم.
• 11سلێمان ڕەزەمێوێکی هەبوو لە بەعل‌هامۆن،
• ئەم ڕەزەمێوی دایە ڕەزەوانان،
• هەریەکە و لەبری بەرهەمەکەی
• هەزار شاقل زیوی دەدا.
• 12بەڵام ڕەزەمێوەکەی خۆم بە ویستی خۆمە بیبەخشم؛
• ئەی سلێمان، هەزار شاقل بۆ تۆ بێت،
• دوو سەد شاقلیش بۆ ڕەزەوانەکان.
• 13ئەی دانیشتووی ناو باخچەکان!
• هاوڕێیان گوێیان لە دەنگت گرتووە،
• با گوێم لێت بێت.
• 14ڕابکە، دڵدارەکەم،
• وەک ئاسک بە
• یان وەک کارمامز
• لەسەر ئەو چیایانەی پڕ بۆنوبەرامن.

گۆرانی گۆرانیه‌كان ٥: ٦ - ١٦

• 6دەرگام بۆ دڵدارەکەم کردەوە،
• بەڵام دڵدارەکەم بایدابووەوە و ڕۆیشتبوو.
• گیانم بەدوای ئەودا دەرچوو،
• بەدوایدا گەڕام، بەڵام نەمدۆزییەوە.
• بانگم کرد، وەڵامی نەدامەوە.
• 7تووشی ئێشکگرەکان بووم
• کاتێک بەناو شاردا دەسووڕانەوە.
• لێیان دام و برینداریان کردم،
• چارۆکەکەیان لەبەر داکەندم،
• ئێشکگری شووراکان
• 8ئەی کچانی ئۆرشەلیم، سوێندتان دەدەم،
• ئەگەر تووشی دڵدارەکەم بوون،
• ئەمەی پێ بڵێن،
• من بە شەیدای خۆشەویستی ئەوم.
• 9دڵدارەکەی تۆ چی زیاترە لە دڵداران،
• ئەی جوانی نێو ئافرەتان؟
• دڵدارەکەی تۆ چی زیاترە لە دڵداران،
• کە ئاوا سوێندت داین؟
• 10دڵدارەکەم سوور و گەشاوەیە،
• لەناو دە هەزار کەسدا دیارە.
• 11سەری زێڕی بێگەردە،
• زولفی بەرداوەتەوە،
• ڕەشە وەک قەلەڕەش.
• 12چاوەکانی وەک کۆترن
• چاوەکانی وەک کۆترن لەسەر کانییەک،
• کۆترەکان هێندە سپین وەکو شیر،
• لە کەناری حەوزێک هەڵنیشتوون.
• 13گۆناکانی وەک باخچەی بۆندارن،
• بۆنیان خۆشە.
• لێوەکانی سەوسەنن،
• موڕی شلیان لێ دەتکێت.
• 14دەستەکانی لوولەی زێڕن،
• بە زەبەرجەد ڕازاونەتەوە،
• لەشی عاجی تاشراوە
• بە بەردی یاقووتی شین پێچراوەتەوە.
• 15قاچەکانی ستوونی مەڕمەڕن،
• لەسەر دوو بنکەی زێڕی بێگەرد دامەزراون.
• ڕوخساری وەک لوبنانە،
• هەڵبژاردە وەک ئورز.
• 16دەمی شیرینە،
• سەراپای خۆشەویستە.
• ئەمە دڵدارەکەمە، ئەو ئازیزی منە،
• ئەی کچانی ئۆرشەلیم!

گۆرانی گۆرانیه‌كان ٤: ١ - ٥: ٥

• 1ئەی یارەکەم، تۆ چەند جوانیت،
• چەند جوانیت!
• چاوەکانت دوو کۆترن لە پشت پەچەکەتەوە.
• قژت وەک مێگەلە بزنە
• کە لە کێوی گلعادەوە دێتە خوارەوە.
• 2ددانەکانت وەک ڕانە مەڕن،
• کە تازە بڕاونەتەوە و لە شوشتن گەڕاونەتەوە،
• هەموویان جووتن،
• هیچیان بە تەنها نین.
• 3لێوەکانت وەک ڕیسی ئاڵە،
• دەمت شیرینە،
• گۆنات وەک لەتە هەنارە
• لە پشت پەچەکەتەوە.
• 4گەردنت وەک قوللەی داودە
• بە ڕیزە بەرد بنیاد نراوە،
• هەزار قەڵغانی پێوە هەڵواسراوە،
• هەمووی قەڵغانی پاڵەوانانە.
• 5جووتە مەمکەکەت وەک دوو کارمامزن،
• وەک جووتێک مامزن،
• کە لەنێو گوڵە سەوسەندا دەلەوەڕێن.
• 6بەر لەوەی ڕۆژ هەڵبێت و
• تاریکی بڕەوێتەوە،
• دەچمە چیای موڕ و
• گردی بخوور.
• 7ئەی یارەکەم، سەرتاپات جوانییە،
• هیچ کەموکوڕیت تێدا نییە.
• 8بووکێ، لەگەڵ من لە لوبنانەوە وەرە،
• لەگەڵ من لە لوبنانەوە وەرە.
• لە لووتکەی چیای ئەماناوە وەرە خوارەوە،
• لە سەری سنیرەوە کە لووتکەی حەرمۆنە،
• لە لانەی شێرانەوە،
• لە چیای پڵنگانەوە.
• 9ئازیزەکەم، بووکێ، دڵی منت ڕفاندووە،
• بە تیلەی چاوت دڵت ڕفاندووم،
• بە موورووێکی ملوانکەکەت.
• 10ئەوینت چەند جوانە، بووکی ئازیزم،
• ئەوینت چەند لە شەراب خۆشترە،
• بۆنی عەترەکەشت لە هەموو بۆنوبەرامێک.
• 11لێوەکانت شانەی هەنگوینیان لێ دەتکێت، بووکێ،
• شیر و هەنگوین لەژێر زمانتە!
• بۆنی جلوبەرگت وەک بۆنی لوبنانە.
• 12باخچەیەکی داخراوە! بووکی ئازیزم،
• سەرچاوەیەکی داخراوە، کانییەکی مۆرکراوە!
• 13نەمامەکانت باخی هەنارن
• لەگەڵ بەروبوومی هەڵبژاردە،
• خەنە و ناردین،
• 14ناردین و کارکۆم،
• قامیشی بۆنخۆش و دارچین،
• لەگەڵ هەموو جۆرە دار بخوورێک،
• موڕ و ئەلوا
• لەگەڵ هەموو بۆنوبەرامەکان.
• 15تۆ سەرچاوەی باخچەکانیت،
• بیری ئاوی لەبەر ڕۆیشتووی،
• لێشاوە لە لوبنان دێتە خوارێ.
• ئەویندار
• 16هەستە، ئەی بای باکوور،
• وەرە، ئەی بای باشوور!
• بەسەر باخچەکەم هەڵبکەن،
• با بۆنوبەرامی بڵاوبێتەوە،
• بۆ ئەوەی دڵدارەکەم بێتە ناو باخچەکەی خۆی،
• با بەروبوومە هەڵبژاردەکەی تام بکات.

گۆرانی گۆرانیه‌كان ٥

• 1هاتمە ناو باخچەکەم، ئازیزم، بووکێ،
• موڕ و بۆنوبەرامی خۆمم کۆکردەوە،
• شانەی هەنگوین و هەنگوینی خۆمم خوارد،
• شەراب و شیری خۆمم خواردەوە.
• ئەی هاوڕێیان، بخۆن و بخۆنەوە؛
• یاران، بە ئەوین مەست بن.
• 2من خەوتووم، بەڵام دڵم بێدارە!
• دەنگی دڵدارەکەمە لە دەرگا دەدات:
• «دەرگام بۆ بکەرەوە، دڵداری ئازیزم،
• ئەی کۆترەکەم، ئەی بێ کەموکوڕییەکەم،
• سەرم پڕ ئاونگ بووە،
• ئەگریجەم پڕ شەونم.»
• 3جلەکانم داکەندووە،
• ئایا دەبێ دیسان لەبەری بکەمەوە؟
• پێیەکانم شوشتووە،
• ئایا دەبێ دیسان پیسیان بکەمەوە؟
• 4دڵدارەکەم لە کونی دەرگاوە دەستی درێژکرد،
• هەناوم بۆی ڕاچەنی.
• 5هەستام هەتا دەرگا لە دڵدارەکەم بکەمەوە،
• دەستەکانم موڕیان لێ دەچۆڕا،
• پەنجەکانم موڕی شل
• لەسەر دەسکی سورگییەکە.

گۆرانی گۆرانیه‌كان ٣: ١ - ١١

• 1بە درێژایی شەو لەسەر نوێنەکەم
• بەدوای ئەو کەسەدا گەڕام کە گیانم خۆشی دەوێت؛
• بەدوایدا گەڕام، بەڵام نەمدۆزییەوە.
• 2ئێستا هەڵدەستم و بەناو شاردا دەسووڕێمەوە،
• بەناو شەقام و گۆڕەپانەکاندا
• بەدوای ئەو کەسەدا دەگەڕێم کە گیانم خۆشی دەوێت.
• ئیتر بەدوایدا گەڕام، بەڵام نەمدۆزییەوە.
• 3تووشی ئێشکگرەکان بووم،
• کاتێک بەناو شاردا دەگەڕان.
• «ئایا ئەوەی گیانم خۆشی دەوێت ئێوە نەتانبینیوە؟»
• 4ئەوەندەی نەمابوو لێیان تێپەڕم
• کاتێک ئەوەم بینییەوە کە گیانم خۆشی دەوێت.
• گرتم و بەرمنەدا،
• هەتا بردمە ماڵی دایکم،
• بۆ ژووری ئەو کەسەی کە بە من سکپڕ ببوو.
• 5ئەی کچانی ئۆرشەلیم، سوێندتان دەدەم
• بە مامز یان مێینەی ئاسکی دەشتودەر،
• کە خۆشەویستی هەڵنەستێنن و بە ئاگای نەهێنن
• هەتا خۆی حەز دەکات.
• 6ئەوە کێیە لە چۆڵەوانییەوە بەدەرکەوت،
• وەک ستوونی دووکەڵ،
• بە موڕ و بخوور بۆنخۆش کراوە،
• بە هەموو بۆنوبەرامێکی بازرگانان؟
• 7ببینن! گالیسکەکەی سلێمانە،
• شەست پاڵەوان دەوریان داوە
• لە پاڵەوانەکانی ئیسرائیل،
• 8هەموو شمشێر بەدەستن،
• شارەزای جەنگن،
• هەریەکە و شمشێرەکەی بە لاڕانیەوەیە،
• لەبەر مەترسییەکانی شەو.
• 9سلێمانی پاشا گالیسکەیەکی بۆ خۆی دروستکرد
• لە داری لوبنان.
• 10ستوونەکانی لە زیو دروستکرد،
• کاریتەکانی لە زێڕ.
• بەرگی دۆشەکەکان ئەرخەوانییە،
• ناوەوەی بە ئەوین ڕازێنراوەتەوە.
• ئەی کچانی ئۆرشەلیم،
• 11وەرنە دەرەوە،
• ئەی کچانی سییۆن، ببینن.
• سلێمانی پاشا بەو تاجەوە ببینن کە لەسەریەتی،
• کە دایکی لەسەری نا
• لە ڕۆژی زەماوەندی ژنهێنانی،
• لە ڕۆژی شادی دڵی.

گۆرانی گۆرانیه‌كان ٢: ١٤ - ١٧

• 14ئەی کۆترەکەم لەناو کەلەبەری هەڵدێرەکان،
• لە پەناگای بنارەکان،
• با ڕوخسارت ببینم،
• با دەنگت ببیستم،
• چونکە دەنگت ناسکە و
• ڕوخسارت شیرینە!
• 15ڕێوییەکانمان بۆ ڕاو بکەن،
• ئەو توولە ڕێوییانەی
• ڕەزەکانمان تێکدەدەن،
• چونکە ڕەزەکانمان پەسیرەیان گرتووە.
• 16دڵدارەکەم بۆ منە و منیش بۆ ئەوم،
• لەناو گوڵە سەوسەنەکان دەلەوەڕێت.
• 17بەر لەوەی ڕۆژ هەڵبێت و
• تاریکی بڕەوێتەوە،
• ئەی دڵدارەکەم، بگەڕێوە،
• وەک ئاسک بە،
• یان کارمامز
• لەسەر چیا فرە لووتکەکان.

گۆرانی گۆرانیه‌كان ٢: ٥ - ١٣

• 5بە کشمیش گڕوتینم پێ ببەخشن،
• بە سێو بمگەشێننەوە،
• چونکە من بە شەیدای خۆشەویستی ئەوم.
• 6دەستی چەپی لەژێر سەرمە و
• دەستی ڕاستی لە ئامێزم دەگرێت.
• 7ئەی کچانی ئۆرشەلیم، سوێندتان دەدەم،
• بە مامز یان مێینەی ئاسکی دەشتودەر،
• کە خۆشەویستی هەڵنەستێنن و بە ئاگای نەهێنن
• هەتا خۆی حەز دەکات.
• 8گوێ بگرە! ئەوە دەنگی دڵدارەکەمە!
• تەماشا بکە! وا دێت،
• لەسەر چیاکان هەڵدەبەزێتەوە،
• بەسەر گردەکاندا باز دەدات.
• 9دڵدارەکەم وەک ئاسک یان وەک کارمامزە،
• وا لە پشت دیوارەکەمان ڕاوەستاوە،
• لە دەلاقەوە سەیر دەکات،
• لە کڵاوڕۆژنەوە تەماشا دەکات.
• 10دڵدارەکەم قسەی کرد، پێی گوتم:
• «یارەکەم، هەستە،
• شیرینەکەم، وەرە.
• 11تەماشا بکە، زستان تێپەڕی،
• باران بەسەرچوو و نەما.
• 12گوڵ لەسەر زەوی دەرکەوت،
• ئێستا کاتی گۆرانییە؛
• خوێندنی کوکوختی
• لە خاکی ئێمە دەبیسترێت.
• 13هەنجیر بەری گرتووە،
• بۆنی بەرسیلەی مێو بڵاو بووەتەوە.
• یارەکەم، هەستە،
• شیرینەکەم، وەرە.»

گۆرانی گۆرانیه‌كان ٢: ١ - ٤

• 1من گوڵاڵە سوورەی شارۆن و
• سەوسەنی دۆڵانم.
• 2وەک گوڵی سەوسەن لەناو دڕکوداڵ
• یارەکەم ئاوایە لەناو کچان.
• 3وەک دار سێو لەنێو دارەکانی دارستان
• دڵدارەکەم ئاوایە لەناو کوڕان.
• حەزم لە دانیشتنە لە سێبەرەکەی
• مێوەکەشی بۆ دەمم شیرینە.
• 4با بمباتە هۆڵی خوانەکە،
• خۆشەویستییەکەی وەک ئاڵا لەسەر سەرم بشەکێتەوە.

گۆرانی گۆرانیه‌كان ١: ١٤ - ١٧

• 14دڵدارەکەم هێشووی خەنەیە
• لەناو ڕەزەمێوەکانی کانی گەدی.
• 15ئەی یارەکەم، تۆ چەند جوانیت،
• چەند جوانیت!
• چاوەکانت کۆترن.
• 16ئەی دڵدارەکەم، تۆش چەند قۆزیت،
• چەند شیرینیت!
• جێگاکەمان سەوزە.
• 17کاریتەی خانووەکەمان لە داری ئورزە،
• تەختەدارەکانی سەروون.

گۆرانی گۆرانیه‌كان ١: ٩ - ١٣

• 9یارەکەم، بە ئەسپێک لە گالیسکەکانی فیرعەون
• لێکم چوواندی،
• 10گۆنات بە خشڵەوە جوانە،
• گەردنت بە گەردانەوە.
• 11خشڵی زێڕت بۆ دەکەین،
• لەگەڵ نقێمی زیو.
• 12هەتا پاشا لە کۆڕی خۆیەتی،
• ناردینی من بۆنی خۆی بڵاو دەکاتەوە.
• 13دڵدارەکەم چەپکێک موڕە
• کە لەنێو مەمکەکانم شەو بەسەردەبات.

گۆرانی گۆرانیه‌كان ١: ٥ - ٨

• 5ئەی کچانی ئۆرشەلیم،
• من ئەسمەرێکی جوانم،
• وەک ڕەشماڵەکانی قێدار،
• وەک نێوبەندی ڕەشماڵەکانی سلێمان.
• 6تەماشام مەکەن کە من ئەسمەرم،
• ئەوە خۆر لێیداوم.
• کوڕانی دایکم لە من تووڕە بوون،
• منیان کردە چاودێری ڕەزەمێو،
• لەبەر ئەوەی ناچار کرام، چاودێری ڕەزەمێوەکەم نەکرد.
• 7ئەی خۆشەویستی گیانم، پێم بڵێ،
• لەکوێ مێگەلی خۆت دەڵەوەڕێنیت،
• کاتی نیوەڕۆش پشتیری مەڕەکانت لەکوێیە؟
• بۆچی وەک پەچەکراوێک بم،
• لەلای مێگەلی هاوڕێیەکانت؟
• 8ئەی جوانترینی نێو ئافرەتان، ئەگەر نازانیت
• بە شوێن پێی مەڕاندا بڕۆ و
• کارەبزنەکانت بلەوەڕێنە
• لەلای نشینگەی شوانەکان.