Rematamos a semana, no laboral, como a comezamos: con mal tempo. Importante, lembren aviso vermello -risco extremo- por temporal costeiro ata mañá pola mañá en todo o litoral galego salvo na Mariña, tamén hai temporal alí pero con menos perigo.

Polo demais, en terra, toda Galicia baixo avisos por chuvias ou vento, así que aproveitando que todos os venres neste espazo falamos de cultura desde diferentes ópticas, o cine é un bo plan

Docentes e familias dos colexios de San Xoan de Filgueira de Ferrol, e o Monte dos Postes de Santiago...pasaron a noite pechados nos seus colexios. Convocados pola CIG e o STEG, protestan pola falta de profesionais especializados, sobre todo, para atender ó alumnado con máis necesidades.

Último intento para chegar a un preacordo entre sindicatos e patronal do sector do transporte de viaxeiros da provincia, antes da folga indefinida que comezará o este próximo luns. Para as once desta mañá está convocada unha nova reunión no Consello de Relacións Laborais.

Concentracións hoxe en Aguiño e na Pobra do Caramiñal, convocadas pola plataforma en defensa da sanidade pública do Barbanza que denuncia a falta de persoal sanitario nos centros de saúde da comarca.

O Complexo Hospitalario Universitario da Coruña bate novos récords de transplantes. En 2025 foron 313, grazas a 51 doadores.

Suspendida a repotenciación obrigatoria dos parques eólicos de máis de 25 anos. O Tribunal Constitucional suspende a medida e outra sobre dependencia tra-lo recurso do goberno sobre varios artigos que a Xunta incluiu na lei de acompañamento dos orzamentos do ano pasado. O goberno galego considera que a decisión prexudica ós galegos.

E os tractores retoman o protagonismo: varias ducias deles manteñen interrompido o tráfico na A-52 en Xinzo.

Deportes. O Celta que empatou en Belgrado saberá hoxe quen é o seu rival na próxima eleiminatoria da Europa League, Lille ou Paok, equipos os que xa se mediu na primeira fase da competición.

O tempo. Este venres unha nova borrasca quedará situada ao suroeste de Irlanda, cunha fronte fría activa asociada. Enviará chuvascos, ocasionalmente treboentos e que poden vir acompañados de sarabia.

Prevense acomumulacóns de neve superiores aos 5cm por riba dos 1000 metros.

No mar, á tarde o aviso laranxa, que está agora activo, amplíase no litoral da Coruña e Pontevedra a vermello por ondas de ata 9 metros e vento de forza 8 a 9