Xornada con novas do eido agrogandeiro, nun día con novas mobilizacións contra o acordo da UE e Mercosur, vimos de coñecer que a Xunta prorroga as medidas para controlar a enfermidade dermatose nodular no gando. As medidas preventivas seguirán un mes máis.

Todo nun xoves no que continuamos con aviso laranxa na costa, a Aemet anunciou que será vermello -risco extremo- na noite do venres ó sábado.

E día tamén con anuncio da Xunta para a poboación galego que no seu momento emigrou: abre liña de axudas para o retorno de 1000 familias. Seguimos falando de migración, de mulleres migrantes

Unha familia de Monfero denuncia a retirada da coidadora para o seu fillo, un neno de 8 anos con autismo, grao 2 de dependencia, e un 36 por cento de discapacidade. A súa nai vai cada mañá ó colexio para atendelo e cambiarlle o cueiro. Desde Educación dín que a avaliación realizada concluíu que non precisa coidadora, xa que dispón de autonomía suficiente.

A situación dos bombeiros no concello de Ferrol será un dos asuntos que se aborde hoxe no pleno. Os grupos da oposición presentan unha moción conxunta para reclamar unha mesa de diálogo sobre a relación de postos de traballo.

O concello da Coruña, que hoxe aprobará definitivamente o seu orzamento para o 2026, pon en marcha a campaña “Este é o teu sinal” para fomentar condutas cívicas no ocio nocturno.

Pleno extraordinario nas Pontes para abordar a solicitude da suspensión inmediata do desmantelamento do parque de carbóns da central térmica de Endesa, iniciado esta semana.

Hoxe cúmprense dous meses do inicio das tractoradas en Ourense. Daquela aínda non se asinara o acordo de libre comercio da Unión Europea contra Mercosur. Agora xa está asinado e de momento paralizada a súa aplicación e este xoves está prevista unha nova manifestación de gandeiros en Lugo.

Outra mobilización prevese para este domingo en Santiago. Neste caso en defensa da sanidade pública, asunto que protagonizou o debate na sesión de control no Parlamento.

No tempo... hoxe quedamos nunha situación intermedia entre as altas e as baixas presións, temperaturas máis altas e protagonismo, sobre todo pola tarde, para o vento.