Saúdos, moi boa tarde.

A Xunta aproba unha oferta de emprego público de mil cen prazas.

A Universidade de Vigo avanza que tamén pedirá impartir Medicina.

E sobre o peche de Sargadelos, o presidente da Xunta esixe ó propietario que retome a actividade de inmediato.

Son titulares dunha tarde na que medra a preocupación entre os produtores polo avance da peste porcina, e na que acabamos de saber que, despois de 68 días, hai acordo e desconvocouse a folga do SAF en Ponteareas, e que as estatuas de Abrahamm e Isaac, atribuídas ó Mestre Mateo, xa están no Museo do Pobo Galego. Veñen de seren trasladadas dende o Pazo de Meirás.

Comezamos.

A semana empeza con preocupación no sector primario pola chegada a España da peste porcina. A Federación Galega de Porcino xa se reuniu esta mañá coa Xunta e estudáronse posibles medidas preventivas.

A partir das dúas e dez escoitaremos ós produtores. Luns ademais no que estamos pendentes do Consello da Avogacía: rexeita as novas condicións económicas da Xunta para os letrados da quenda de oficio.

E hoxe Galicia súmase ós actos polo Día Mundial da loita contra a sida.

A peste porcina africana non chegou a Galicia, pero as súas consecuencias xa se notan nos mercados e nas vendas ó estranxeiro. Agora trátase de evita-los danos directos, polo que o sector pide medidas de control sobre o principal vector de transmision: o xabarín. É especialmente importante pro porco celta, que se cría en extensivo.

O Consello da Xunta aproba a Oferta pública de emprego de 2025, con máis de mil cen prazas

Terceiro día sen que o persoal de Sargadelos poida entrar na factoría... Os sindicatos piden reunións con Emprego e Cultura

O Consello da Avogacía Galega rexeita por insuficiente o novo baremo de retribucións proposto pola Xunta pro turno de oficio

No tempo, aviso laranxa no mar por ventos fortes, e aumento das chuvias nasvindeiras horas.

Multitudinaria manifestación en Ferrol en petición dun tren do século XXI, con representantes veciñais, empresariais e tamén presenza de todos os partidos políticos. Ferrolterra queda atrás, o mellor exemplo é o tren e a alternativa unha custosa AP9.

A mañá deixa un mozo ferido grave na Coruña. Caeu desde unha fonte da praza de Azcárraga. E durante a madrugada unha persoa foi excarcerada despois de sufrir un accidente de tráfico no concello do Corgo. O vehículo no que viaxaba envorcou na nacional Sexta, a altura da parroquia de Gomeán.

Hoxe mellorou o día no meteorolóxico