Coa constitución do xurado hoxe arrinca na Coruña o xuizo pola morte de Samuel Luiz no que hai cinco acusados. En Vigo outro xurado declarou culpable de homicidio ó home xulgado por matar a un profesor na rúa Areal. E, aínda outra cita nos tribunais, neste caso na Audiencia nacional, o novo xuizo contra dous membros de Resistencia Galega.

A Xunta anuncia o rescate da concesión de catro autovías, nas que non había cabinas de cobro. Non están as dúas nas que os usuarios pagan directamente a peaxe: Coruña-Carballo e Vigo-Baiona.

E, se vive na área da Coruña teña en conta que sobre as dez lle vai soar unha alarma no móbil. É a proba dun simulacro da Xunta para avisar á poboación no caso dunha emerxencia

O tempo. Aumenta a inestabilidade atmosférica en Galicia coa aproximación dunha borrasca polo sur e que a próxima noite traerá de novo chuvias a toda Galicia

O tribunal do xurado declara culpable de homicidio e estafa o autor confeso do coñecido coma crime do Areal de Vigo. Xulgábase a un home que recoñeceu ser o autor da morte dun profesor xubilado en decembro do 2021. 

A Xunta vai rescatar catro autovías con peaxe na sombra, é dicir, que xa pagaba a Administración. 

É un dos acordos do Consello da Xunta tra-lo que hoxe Alfonso Rueda se defendeu das acusacións da oposición polos contratos sen publicidade que o Goberno galego adxudicou á empresa do irmán da secretaria xeral de Presidencia. PSOE e BNG piden explicacións.