In die episode dui ek aan dat getuienis in die lewe van 'n dissipel nie daaroor gaan om ander mense te probeer help om "in die hemel" te kom nie. Dit gaan eerder daaroor dat ek sal leer hoe om volledig onder die heerskappy van God as dissipel te leef. As ek dit leer doen, SAL my lewe ook getuig van God se goedheid, liefde, genade, omgee en sorg vir alle mense. 

In die episode probeer ek verduidelik dat ons nie vir God 'n guns doen as ons tyd met Hom spandeer nie. God het nie gunste van enigiemand nodig nie. Hy doen ons 'n baie groot guns om ons uit te nooi om vanuit Hom as Bron te leef as sy dissipels. Dit verseker die optimale manier van leef vir enige mens. 

In die episode dui ek aan hoe God se bedoeling om die mens te seën en te betrek by dit wat Hy doen, nooit verander het nie. Die Bybel is juis geskryf om vir ons te vertel hoe God dit doen, sodat ons kan leer hoe om weer onder sy heerskappy te leef. 

In die episode gesels ek oor die wanopvatting dat God in beheer van ALLES is. Ek toon aan dat dit juis is as gevolg van die feit dat mense gekies het om nie onder God se beheer te leef (as sy dissipels) nie, dat die wêreld so verwoes word. Juis daarom het dit nodig geword om weer op 'n radikale manier in te gryp op aarde. 

In hierdie episode verduidelik ek hoe die versoeking wat na die mens gekom het, meegebring het dat die mens weier om as dissipel of as leerling van God te leef. Hulle het gekies om eerder te probeer om "soos God" te wees, daarom 'n strewe daarna om vir hulleself 'n naam te maak, hulle eie koninkryke te bou en hulle eie wil te doen. 

Hier verduidelik ek in kort waarom God ons geskep het. ''n Doel wat aan ons as sy dissipels of leerlinge, ''n baie betekenisvolle rede vir ons bestaan gee! Daarom kry die lewe sin en betekenis vir die wat dit verstaan. 

Ons almal is geskep as verteenwoordigers van God. In die lewe van ''n verteenwoordiger gaan dit oor die Naam van die een wat jy verteenwoordig; oor die belange van die een wat jy verteenwoordig en die wil van die een wat jy verteenwoordig.