Die land gons tans oor die anti-parasitiese middel, Ivermectin, wat moontlik voorkomend en as behandeling teen Covid doeltreffend is. Hoe werk die middel? Waarom kan die middel nie net vir alle Covid-gevalle ingespan word nie? Wat is die grens tussen oorversigtigheid en nalatigheid van owerheidskant? Hoe vinnig kan standpunte verander? Marí Hudson praat met ’n farmakoloog oor dié aspekte.

Hoe verskil die tweede Covid-golf van die eerste een, en wanneer kan ons die pieke in die verskillende streke verwag? Hoe lyk die algemeenste gesig van Covid nou? Is die virus nou gevaarliker as voorheen? Marí Hudson praat met ’n data-ontleder oor die syfers, en met ‘n infeksiebeheerspesialis oor die jongste wat dokters in hospitale teëkom.

Wat het slaapapnee en snork met jou hart te doen? Baie meer as wat jy ooit kon droom. As jy of jou maat snags ophou asemhaal en dan weer skielik na asem snak, MOET jy hierna luister. Marí Hudson praat met ’n hartspesialis oor die jongste feite oor slaapapnee en hartprobleme.

Die fokus is op tiener-selfdood na aanleiding van heelwat tienersterftes die afgelope maande. Word die druk op Graad 11's onderskat? Speel die ontwrigte jaar ‘n rol? Waarop moet ouers bedag wees? Dr. Eugene Allers, 'n psigiater verbonde aan SASOP, gee inligting en raad.

Covid is steeds besig om die wêreld onderstebo te keer. Terwyl die Britte begin met die eerste vaksinerings, neem die aantal Covid-gevalle in die Oos- en Wes-Kaap toe, en in die VSA praat hulle van ’n vierde golf. Waar staan ons, en wat hou die toekoms in? Marí Hudson praat hieroor met prof. Glenda Gray van die Mediese Navorsingsraad.

Is sekere mense meer vatbaar vir osteoporose as ander? Kan mans dit ook kry? Hoe diagnoseer dokters dit? Wat is die nuutste behandeling? Marí Hudson praat met ’n endokrinoloog oor die jongste feite aangaande osteoporose.

Drie farmaseutiese maatskappye het aangekondig dat Covid-vaksiene op pad is. Hoe werk dié vaksiene? Hoe werk virusvaksiene in die algemeen? Hoe effektief beloof dit om te wees? Kan dit gevaarlik wees? Hoe lank sal dit effektief wees? Marí Hudson gesels met ’n infeksiebeheer-spesialis om meer uit te vind oor die Covid-vaksiene, en of daar ’n lewe ná Covid is of mét  Covid.

Daar is steeds baie verwarring oor Covid-toetse. Wat beteken vals positiewe of vals negatiewe toetse? Beteken dit jy kan Covid hê, maar jy toets negatief, of dat jy gesond is, maar jy toets positief? Kan die toets positief wees vir influenza-virusse? Marí Hudson praat met ’n viroloog om die verwarring op te klaar.

Die fokus is op diabetes. Eerstens omdat dit op 14 November Wêreld Diabetesdag is. Tweedens omdat die verband tussen diabetes en Covid-sterftes groot is. Derdens omdat die Covid-pandemie groot tekortkominge in diabetessorg blootgelê het. Vierdens omdat die meeste mense met hartsiektes, diabete is. En, vyfdens omdat baie mense nie besef waarom dit lewensbelangrik is om diabetes goed te beheer nie.

Dit is baie belangrik om ná ’n knie- of heupvervanging die regte dinge op die regte manier te doen om seker te maak dat jou herstel so goed moontlik verloop. Marí Hudson praat met ’n ortopeed oor dié operasies, en veral die nasorg. Hy gee praktiese raad.