Om ‘n kankerdiagnose aan te hoor, is gewoon skrikwekkend, maar dan begin die beplanning van die behandeling. Wat is die behandelingsmetodes wat deesdae toegepas word? Wat is die nuutste soorte behandeling? Lewer dit beter resultate? Marí Hudson praat hieroor met ’n kankerspesialis van Pretoria.

Wat is sistiese fibrose? Is dié siekte seldsaam? As ’n kleuter met dié siekte, wat ook die longe beskadig, gediagnoseer word, wag ’n lang stryd op die kind en ouers. Marí Hudson praat met ’n kinder-longspesialis oor sistiese fibrose nadat die 20-jarige Bolander, Lisa-Mari Beyers, onlangs aan sistiese fibrose gesterf het, selfs ná ’n desperate longoorplanting.

Mediese navorsers werk in laboratoriums met mikroskope en proefbuise in hulle eie wêreld. Hoe oorbrug ’n navorser die afstand tussen laboratorium en die regte lewe van pasiëntsorg? ’n Suid-Afrikaanse navorser is pas bekroon met ’n internasionale prys omdat sy aan die voorpunt gestaan het om ingewikkelde laboratoriumbevindings te omskep in ’n eenvoudige, vinnige toets wat letterlik in die verste kliniek op die platteland gedoen kan word.

Hartchirurg dr. Susan Vosloo vertel hoe ’n chirurg soms ’n tweede en derde hartfout gebruik om ’n relatiewe normale hartfunksie te skep, soos in die geval van klein Roxanne. Ja, ’n hartchirurg moet ook soos ’n ingenieur en fisikus dink om struktuur, kragte, vloei en druk in ag te neem om ‘n hart so goed moontlik te laat funksioneer. Sy vertel ook van ’n peuter, Henu, wat op ’n hartoorplanting wag.

Wat is die verband tussen jou hart en beroerte, en waar pas antistolmiddels in? En nee, ‘n disprin per dag sal nié beroerte keer nie! Marí Hudson vertel die storie van ‘n 18 jarige seun met atriale fibrillasie, en jy kan meer uitvind oor jou risiko vir beroerte en die moets en moenies van antistolmiddels.

Wat gebeur met jou hormone wanneer jy vet word, en kan dít wat skeefloop, weer herstel word? Kan ’n middel enigsins help om jou makliker gewig te laat verloor? Wat is die jongste nuus? En as iets werk, wat van newe-effekte en langtermynsuksesse?

Die Covid-pandemie het baie vraagstukke in ons gesondheidstelsel uitgewys. Is die Regering se hantering van Covid ’n suksesvolle toetslopie vir ’n Nasionale Gesondheidstelsel? Of het die groot tekort aan dokters, verpleegkundiges en fasiliteite bewys dat die private gesondheidsektor onontbeerlik is? Hoe kan gevriesde poste en afgradering van staatshospitale regverdig word? Watter feite moet nou die hardste praat?

Nog nooit het soveel samesweringsteorieë, menings en vals nuus mense bereik as oor Covid nie. Mense weet nie meer wat om te glo en wat nie, want alles klink of dit waar kan wees. Marí Hudson gaan op grond van goeie wetenskaplike inligting probeer om die kaf van die koring te skei en die verwarring uit te skakel.

Dit is geen geheim dat gesondheidswerkers onder groot duk werk weens die Covid-gevalle in hospitale. Hoe hanteer gesondheidswerkers hierdie druk, veral jong dokters wat toegang het tot medikasie wat verslawend kan wees? Hoe ken mens die gevaartekens uit waaraan aandag geskenk moet word? Marí Hudson praat hieroor met dr. Eugene Allers, ‘n psigiater.

Daar is baie vrae oor die Covid-entstof en die uitrol daarvan in Suid-Afrika: Presies hoe werk dié entstof? Hoe veilig en effektief is die entstof, selfs teen die nuwe variante? Sal dit jou DNS verander? Wat van al die samesweringsteorieë? Marí Hudson praat met prof. Glenda Gray van die Mediese Navorsingsraad oor Covid-entstowwe.