ગ્રંથસાર — વિશ્વની શ્રેષ્ઠ કૃતિઓનો સાર હવે આપણી ભાષામાં

and storytelling, accessible to all lovers of literature.

ગ્રંથસાર. વિશ્વની શ્રેષ્ઠ નવલકથાઓનો સાર હવે આપણી ભાષામાં.

એકત્ર ફાઉન્ડેશને વિદ્યાર્થીઓ, વાચકો અને સાહિત્યપ્રેમીઓ માટે વિશ્વભરની પ્રખ્યાત નવલકથાઓ અને પુસ્તકોના હૃદયસ્પર્શી સારાંશને ગુજરાતી ઓડિયો–વીડિયો દ્વારા જીવંત કરવાનો પ્રકલ્પ શરૂ કર્યો છે. ‘ગ્રંથસાર’ એ વિશ્વની શ્રેષ્ઠ કૃતિઓનો ગુજરાતીમાં શ્રાવ્ય સાર (ઓડિયો સમરી) છે. હવે વિશ્વના મહાન લેખકોની કલમે લખાયેલી ઉત્તમ વાર્તાઓનો ઊંડો અનુભવ કરી શકાશે અને તે પણ આપણી ભાષા ગુજરાતીમાં!

સાહિત્ય અને સંસ્કૃતિ માટે ઊંડો પ્રેમ હોવા છતાં ભાષા અને સમયની અડચણને કારણે વિશ્વસાહિત્યના અનુભવથી વંચિત રહેવું પડે છે. પણ હવે, આધુનિક AI ટૅક્નૉલૉજીની મદદથી, આપણી પાસે વિશ્વની મહાન કૃતિઓના સારાંશ મોટા પાયે તૈયાર કરવાની અને તેમને આપણી પોતાની ભાષામાં સાંભળી શકવાની શક્યતાઓ ઊભી થઈ છે. તેથી સાહિત્ય વધુ સુલભ અને પ્રસ્તુત બનશે. જેમને પુસ્તકો વાંચવાનો સમય નથી મળતો અથવા જેઓ નવી રીતે સાહિત્યનો અનુભવ કરવા માંગે છે, તેમના માટે આ એક તક છે. ‘ગ્રંથસાર’નો હેતુ એ છે કે વિશ્વભરના ઉત્તમ સાહિત્યની સુવાસ ગુજરાતી ભાષામાં વધુને વધુ લોકો સુધી પહોંચે અને સાહિત્ય પ્રત્યેનો પ્રેમ વધુ ગાઢ બને.

આ આગાઉ આપણાં ઘણાં લેખકોએ વિશ્વ સાહિત્યનો અનુવાદ અને પરિચય આપ્યો જ છે. પણ આ પ્રયોગ 7–8મિનિટના ગુજરાતી ઓડિયો–વીડિયો દ્વારા નવી પેઢીના સાહિત્યપ્રેમીઓને મૂળ પુસ્તકના પ્રવેશ માટેની એક નાની બારી બની શકે છે. આ પહેલનો હેતુ વિદ્વાનો કે સાહિત્યકારો માટે નથી; પણ ઓડિયો દ્વારા પુસ્તકોની દુનિયા સાથે જોડાવા માંગતા, પ્રખ્યાત પુસ્તકોની રોમાંચક વાર્તાઓ જાણવા ઉત્સુક ગુજરાતી વાચકો માટે છે. અહીં સાહિત્યના વિદ્યાર્થીઓ માટે ટૂંકમાં પુસ્તક, લેખક, પાત્રો, શૈલી અને સાંસ્કૃતિક પૃષ્ઠભૂમિની વિગતોનો પણ સમાવેશ થાય છે. વિશ્વસાહિત્યની સાથે ભારતીય અન્ય ભાષાઓની કૃતિઓનો પરિચય પણ મેળવીશું. ટૉલ્સટૉયથી ટાગોર અને માર્ક્વેઝથી મુનશી, સૌની વાર્તાઓ ગુજરાતીમાં સાંભળીએ. તમે પણ નામ સૂચવી શકો છો.

તો આવો, ‘ગ્રંથસાર’ના આ પહેલા ગુચ્છની દસેક નવલકથાઓનો સારાંશ સાંભળીએ અને આપણી સાહિત્યયાત્રાને વધુ સમૃદ્ધ બનાવીએ.