ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ សកម្ម​ជន​បរិស្ថាន​នៅ​ខេត្ត​កោះកុង លោក ឈុត វុទ្ធី ត្រូវ​បាន​គេ​បាញ់​សម្លាប់ ចំណែក​សកម្ម​ជន​បរិស្ថាន​មួយ​ចំនួន​ទៀត​ត្រូវរង​ការ​គំរាម​កំហែង និងចាប់​ខ្លួន​ដាក់​ពន្ធនាគារ​ជាដើម។​ កញ្ញា លីម គីមស័រ និង​លោក ថុន រដ្ឋា ​សកម្មជន​បរិស្ថាន​នៃ​ចលនា​មាតា​ធម្មជាតិ លើក​ឡើង​ក្នុង​កម្មវិធី​ Hello VOA សំឡេង​ជំនាន់​ថ្មី​ថា កាងារ​ជា​សកម្មជន​បរិស្ថានប្រឈម​នឹង​គ្រោះថ្នាក់ច្រើន តែ​ថាជា​ក្រុម​មនុស្ស​ដែល​បំពេញចំណុច​ខ្វះខាត​របស់​រដ្ឋាភិបាលក្នុង​ការ​ការពារ​ធនធាន​ធម្មជាតិ។ (កញ្ញា កាន់ វិច្ឆិកា, ភ្នំពេញ, ១៧​ កុម្ភៈ ២០២០)

«ជន្លេន»​គឺ​គម្រោងកែប្រែ​កាក​សំណល់​សរីរាង្គ​ ឬ​កាក​សំណល់​សើម ​ឲ្យ​ទៅ​ជា​អាចម៍​ជន្លេន ដែល​ជា​ជី​មាន​សារធាតុ​ចិញ្ចឹម​សម្រាប់​កសិករ​ប្រើប្រាស់​លើដំណាំ​ ដើម្បីកាត់​បន្ថយការ​ប្រើ​ប្រាស់​ជី​គីមី។ កញ្ញា សុខ​ សុធារតន៍​ ស្ថាបនិក «ជន្លេន» ដែល​ជា​គម្រោង​កែប្រែ​កាក​សំណល់​សរីរាង្គ​ទៅ​ជា​ជី​អាចម៍​ជន្លេន​ លើក​ឡើង​ក្នុង​កម្មវិធី​ Hello VOA សំឡេង​ជំនាន់​ថ្មី​ កាល​ពី​យប់​ថ្ងៃ​ច័ន្ទ​ថា ការ​ចិញ្ចឹម​ជន្លេន​ឲ្យ​ស៊ី​កាក​សំណល់​សរីរាង្គ​ អាច​ជួយ​ការពារ​បរិស្ថាន និង​ធ្វើ​ឲ្យជីវភាព​កសិករ​ប្រសើរ​ឡើង។ (កាន់ វិច្ឆិកា, Hello VOA សំឡេង​ជំនាន់​ថ្មី, ភ្នំពេញ, ២០ មករា ២០២០)

ស្របពេល​ដែល​ការ​ប្រើប្រាស់​អ៊ីនធឺណិត ​និង​ឧបករណ៍​អេឡិច​ត្រូនិក​មាន​ការ​កើន​ឡើង អក្ខរកម្ម​ប្រព័ន្ធ​ផ្សព្វផ្សាយ និង​ព័ត៌មាន កំពុង​ត្រូវ​បាន​បញ្ជ្រៀប​ដល់​ប្រជាពលរដ្ឋ ជាពិសេស​យុវជន​នៅ​កម្ពុជា ដើម្បី​ឲ្យ​អ្នកប្រើប្រាស់​ប្រើបាន​ដោយ​ភាព​ត្រឹមត្រូវ។ កញ្ញា ហួត សាលីនិត មន្ត្រី​កម្មវិធី​អក្ខរកម្ម​ប្រព័ន្ធ​ផ្សព្វផ្សាយ និង​ព័ត៌មាន និង​លោក ម៉ម វិបុល អ្នក​សម្រប​សម្រួល​កម្មវិធី​អក្ខរកម្ម​ប្រព័ន្ធ​ផ្សព្វផ្សាយ និង​ព័ត៌មាន នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លើក​ឡើង​ក្នុង​កម្មវិធី​ Hello VOA សំឡេង​ជំនាន់​ថ្មី​ថា ការ​យល់​ដឹង​ពី​អក្ខរកម្មប្រព័ន្ធ​ផ្សព្វផ្សាយ ​ធ្វើ​ឲ្យ​អ្នក​ប្រើប្រាស់​អាច​ទាញ​ប្រយោជន៍​ពី​អ៊ីនធឺណិត​ប្រកប​ដោយ​សុវត្ថិភាព​ និង​កាត់​បន្ថយ​ហានិភ័យ​ផ្សេងៗ។ (កញ្ញា កាន់ វិច្ឆិកា, ភ្នំពេញ, ១៦ ធ្នូ ២០១៩)

ស្ថានភាព​នយោបាយ​នៅ​កម្ពុជា​បច្ចុប្បន្ន​កំពុង​មាន​ភាព​តានតឹង​ដោយសារ​វោហារ​សាស្រ្ត និង​សកម្មភាព​របស់​អ្នកនយោបាយ ដែល​មិន​ខុសគ្នា​ប៉ុន្មាន​ពី​ស្ថានភាព​នយោបាយ​អាណត្តិ​មុន​ៗ ចាប់​តាំង​ពី​ការ​បោះឆ្នោត​ឆ្នាំ​១៩៩៨​មក។ កញ្ញា យ៉ាង លាភា មន្រ្តី​កម្មវិធី​ជាន់​ខ្ពស់​គម្រោង​សិទ្ធិ​អំណាច​ស្រ្តី និង​យុវជន​ក្នុង​ភាព​ជា​អ្នកដឹកនាំ​នៃ​អង្គការ​តម្លាភាព​កម្ពុជា លើក​ឡើង​ក្នុង​កម្មវិធី Hello VOA សំឡេង​ជំនាន់​ថ្មី​ថា យុវជន​ចង់​ឃើញអ្នក​នយោបាយ​គ្រប់​គណបក្ស​បញ្ឈប់​ការចង់​ឈ្នះ​រៀង​ខ្លួន​ហើយ​ចាប់ដៃគ្នា​ដើម្បីតម្កល់​ប្រយោជន៍​ជាតិ​ជា​ធំ៕ (កញ្ញា កាន់ វិច្ឆិកា, Hello VOA, ភ្នំពេញ, ១៨ វិច្ឆិកា ២០១៩)

ចរន្តនៃការអាននិងការតែងនិពន្ធហាក់បានងើបឡើងវិញ នារយៈពេលពីរឆ្នាំចុងក្រោយនេះ ដែលផ្ដល់ជាការពិសោធន៍សម្រាប់ការផលិតស្នាដៃនិពន្ធន៍ថ្មីបន្ថែម សម្រាប់អ្នកនិពន្ធជំនាន់ថ្មី តែស្របពេលជាមួយគ្នានេះដែរ ស្នាដៃនិពន្ធថ្មីៗក៏រងផលប៉ះពាល់ពីការចម្លងស្នាដៃ និងរំលោភកម្មសិទ្ធិបញ្ញាផងដែរ។ នេះជាការកត់សម្គាល់របស់កញ្ញា សែត ហត្ថា អ្នកនិពន្ធវ័យ២៧ឆ្នាំ ដែលមាននាមស្លាបប៉ាកាថា «កូនចាបមាស»។ ការងារជាអ្នកនិពន្ធម្នាក់ កញ្ញាបានលើកឡើងថា ស្មេរត្រូវតែមានការអាន និងសិក្សាស្រាវជ្រាវឱ្យបានច្រើន និងត្រូវបង្ហាញភាពជាគំរូផ្នែកសីលធម៌រស់នៅ បង្ហាញដល់សាធារណជនផងដែរ។ កញ្ញាបានចូលមកធ្វើវាគ្មិនក្នុង នាទី«សំឡេងជំនាន់ថ្មី‍»នៃកម្មវិធី Hello VOA កាលពីថ្ងៃទី២១ ខែតុលា ឆ្នាំ២០១៩ ក្រោមប្រធានបទ«បទពិសោធអ្នកនិពន្ធវ័យក្មេងក្នុងរបត់ថ្មីនៃវិស័យអក្សរសិល្ប៍ខ្មែរ» ដែលមានលោក អូន ឆេងប៉រ នៃ VOA ជាអ្នកសម្របសម្រួលពីការិយាល័យប្រចាំរាជធានីភ្នំពេញរបស់ VOA៕

ការច្នៃ​ម៉ូត​សម្លៀក​បំពាក់​បែប​ទំនើប មាន​ការ​រីក​ចម្រើន​ខ្លាំង​នៅ​ប្រទេស​អភិវឌ្ឍន៍​ ជា​ពិសេសនៅ​តាម​បណ្តា​ប្រទេស​ប៉ែក​អឺរ៉ុប។​ ជាទូទៅ​ការ​ច្នៃ​ម៉ូត​សម្លៀក​បំពាក់​បែប​ទំនើប គឺ​ត្រូវ​ការ​ពេល​វេលា និង​ធនធាន​ច្រើន ដូច្នេះសម្រាប់កម្ពុជាដែល​ជា​ប្រទេស​កំពុង​អភិវឌ្ឍន៍​ក្នុង​ពេល​បច្ចុប្បន្ន ការ​ច្នៃ​ម៉ូត​សម្លៀក​បំពាក់​បែប​ទំនើប ហាក់​មាន​ការ​ចាប់​អារម្មណ៍ ប៉ុន្តែ​មិន​ទាន់​មាន​ការ​ពេញ​និយម​នៅ​ឡើយ។ យ៉ាងណាក្តី អ្នកច្នៃ​ម៉ូត​វ័យ​ក្មេង​មួយ​រូប​មក​ពីមជ្ឈមណ្ឌល​រចនា​បែប​ទំនើប គឺ​កញ្ញា សេង សុវណ្ណ​រចនា លើកឡើង​ក្នុង​កម្មវិធី​ Hello VOA សំឡេង​ជំនាន់​ថ្មី​ថា ​ការ​គាំទ្រ​ការ​ច្នៃ​ម៉ូតបែប​ទំនើប​ដែល​ច្នៃ​ដោយ​ជនជាតិ​ខ្មែរ នឹង​ជួយ​លើក​តម្កើង​វប្បធម៌ និង​សេដ្ឋកិច្ច​ជាតិ៕ (កញ្ញា កាន់ វិច្ឆិកា, ភ្នំពេញ, ១៦ កញ្ញា ២០១៩)

កុមារ គឺជា​ធនធាន​មនុស្ស​យ៉ាង​សំខាន់​ដែល​ត្រូវ​ការ​ការ​យក​ចិត្ត​ទុក​ដាក់​ខ្ពស់​ក្នុង​ការ​ថែររក្សា និង​ការពារ ដើម្បី​ឲ្យ​ពួកគេ​ក្លាយ​ជាធនធាន​នា​ពេល​អនាគត។​ «ទិវា​ផ្តល់​ក្តី​ស្រលាញ់​ចំពោះ​កុមារ» ​បង្កើត​នូវ​កម្មវិធី និង​សកម្មភាព​សង្គម​ផ្សេងៗ ដែល​លើក​ទឹក​ចិត្តឲ្យ​កុមារ​កាន់​តែ​ស្រលាញ់​សាលារៀន។ លោក មឿន លីហ៊ន ស្ថាបនិក និង​ជា​នាយក​ប្រតិបត្តិ​សមាគម​អភិវឌ្ឍន៍​សមត្ថភាព​កម្ពុជា​លើក​ឡើងក្នុង​កម្មវិធី​ Hello VOA សំឡេង​ជំនាន់​ថ្មី​ថា សកម្មភាព​នេះ ជំរុញ​ឲ្យ​កុមារ​ងាយ​ទទួល​បាន​ជោគ​ជ័យ​ក្នុង​ការ​សិក្សា៕ (កញ្ញា កាន់ វិច្ឆិកា, Hello VOA សំឡេង​ជំនាន់​ថ្មី, ភ្នំពេញ, ១៩​ សីហា ២០១៩)

យុវជន​មួយ​ក្រុម​បាន​ចាប់​ផ្តើម​បង្កើត​ធុង​សំរាម​មួយ​ដែល​មាន​ឈ្មោះ​ថា ធុង​សំរាម​វៃឆ្លាត ឬ ហៅ​ជា​ភាសា​អង់គ្លេស​ថា Smart Bin ដោយភ្ជាប់​នឹង​បច្ចេកវិទ្យា​ក្នុង​ការបែង​ចែក​សំរាម​ទៅ​តាម​ប្រភេទ ស្រប​ពេល​ដែល​ការគ្រប់គ្រង​សំរាម​នៅ​តែ​ជា​បញ្ហា​ចោទ​ ហើយ​ការបែកចែក​សំរាម​ទៅ​តាម​ប្រភេទ ហាក់​មិនទាន់​មាន​ការ​អនុវត្តនៅ​កម្ពុជា​នៅ​ឡើយ។ លោក​ ​វ៉ែន អរុណរតន៍​ ដែល​ជា​សហ​ស្ថាបនិក និង​ជា​អ្នកដឹកនាំ​បច្ចេកទេស​មួយ​រូប​ក្នុងការ​បង្កើត​ធុង​សំរាម​វៃឆ្លាត លើក​ឡើងក្នុង​កម្មវិធី​ Hello VOA សំឡេង​ជំនាន់​ថ្មី​ថា ធុង​សំរាម​វៃ​ឆ្លាត នឹង​ជួយ​កាត់​បន្ថយ​កាក​សំណល់តាម​រយៈ​ការ​បែងចែក​សំរាម​ទៅ​តាម​ប្រភេទ៕ (កញ្ញា កាន់ វិច្ឆិកា, ភ្នំពេញ, ១៥​ កក្កដា ២០១៩)

កម្ពុជានិងពិភពលោកមានគោលដៅបោសសម្អាតមីនឲ្យអស់នៅឆ្នាំ២០២៥ ប៉ុន្តែការបោសសម្អាតគ្រាប់មីននៅកម្ពុជានៅតែបន្តយឺតៗ បើទោះបីកិច្ចការនេះបានធ្វើឡើងនៅជាទ្រង់ទ្រាយធំចាប់តាំងពីឆ្នាំ១៩៩២ម៉្លេះ។ លោក រីឆាត យិម សហស្ថាបនិកនិងជានាយកប្រតិបត្តិនៃក្រុមហ៊ុន Demine Robotics ពន្យល់ថា ការប្រើបច្ចេកវិទ្យាមនុស្សយន្តដែលក្រុមហ៊ុនលោកបានបង្កើតជាមធ្យោបាយមួយដែលអាចជួយពន្លឿនដំណើរការបោសសម្អាតមីន ដើម្បីអាចមានឱកាសសម្រេចគោលដៅបោសសម្អាត​មីន​ត្រឹមឆ្នាំ២០២៥។ (សឹង សុផាត, Hello VOA សំឡេងជំនាន់ថ្មី, ភ្នំពេញ, ១៧ មិថុនា ២០១៩)

ការវិវត្តថ្មីលឿនរហ័សនៃបច្ចេកវិទ្យា បាននាំការផ្លាស់ប្ដូរគួរឱ្យកត់សម្គាល់លើវិស័យឧស្សាហកម្មប្រព័ន្ធផ្សព្វផ្សាយ ក្នុងយុគសម័យនៃការប្រណាំងប្រជែងផ្នែកល្បឿន និងដណ្ដើមយកការទាក់ទាញអារម្មណ៍សាធារណមតិអ្នកអាន ដែលប្រើប្រាស់ផលិតផលបច្ចេកវិទ្យាទំនើប ដូចជាទូរស័ព្ទដៃទំនើបជាដើម ក្នុងការទទួលព័ត៌មាន។ នៅប្រទេសកម្ពុជា ចាប់តាំងពីឆ្នាំ២០១៦មក បណ្ដាញទំនាក់ទំនងសង្គម បានប្រជែងឈ្នះប្រព័ន្ធផ្សព្វផ្សាយបែបប្រពៃណីដូចជា វិទ្យុ និងទូរទស្សន៍ ជាដើម ដោយគ្រងតំណែងជាប្រភពអាទិភាពចម្បងដែលប្រជាជនស្វះស្វែងរក ពេលពួកគាត់ចង់ដឹង ចង់អានព័ត៌មាន។ ការណ៍នេះក៏បានផ្លាស់ប្ដូរដល់ឥរិយាបថ និងការផ្ចិតផ្ចង់អារម្មណ៍ទទួលព័ត៌មានរបស់សាធារណជនទូទៅដែរ ដែលទាមទារឱ្យអ្នកផលិតព័ត៌មាន ស្វះស្វែងរកវិធីសាស្ត្រថ្មីៗ និងគំនិតច្នៃប្រឌិតនានា ដើម្បីនាំយកខ្លឹមសារឱ្យបានទៅដល់ភ្នែកដល់ត្រចៀកនៃសាធារណជន។ កញ្ញា សៀង សុខចេង ស្ថាបនិកនៃគេហទំព័រ Wapatoa បានចូលមកជជែកពិភាក្សាអំពីចរន្តថ្មីនេះ ក្នុងកម្មវិធីសំឡេងជំនាន់ថ្មី នៃកម្មវិធី Hello VOA កាលពីថ្ងៃទី២០ ខែឧសភា ឆ្នាំ២០១៩ ដែលមានលោក អូន ឆេងប៉រ នៃVOA ជាអ្នកដឹកនាំសម្របសម្រួល ពីបន្ទប់ផ្សាយក្នុងរាជធានីភ្នំពេញរបស់VOA៕ (លោកអូន ឆេងប៉រ, Hello VOA សំឡេងជំនាន់ថ្មី, រាជធានីភ្នំពេញ, ២០ ឧសភា ២០១៩)